Cʌntesʌntel 6
¿Chuqui jini i Yumʌntel Dios?
¿Baqui an jini i Yumʌntel Dios? (1)
¿Majqui jini i Rey? (2)
¿An ba yambʌ winicob xʼixicob muʼ bʌ caj i chaʼleñob yumʌntel yicʼot jini Rey? Mi cheʼʌchi, ¿jaytiquil? (3)
¿Bajcheʼ mi lac ñaʼtan chaʼan añonixla ti cojix tac bʌ qʼuin? (4)
¿Chuqui mi caj i mel jini i Yumʌntel Dios ila ti pañimil ti tal to bʌ qʼuin? (5-7)
1. Cheʼ bʌ tsajñi Jesús ila ti Pañimil, tsiʼ cʌntesayob jini xcʌntʼan i chaʼan, chaʼan miʼ cʼajtiñob miʼ tilel jini i Yumʌntel Dios. Jini tʼan «yumʌntel» jiñʌch juntiquil yumʌl chucul bʌ ti juntiquil rey. Jini i Yumʌntel Dios juntiquilʌch yumʌl cojach bʌ. Yaʼʌch an ti panchan, i miʼ cajel ti yumʌntel ti tojlel jini añoʼ bʌ ila ti Pañimil. Mi cajel i sʌqʼuesʌben i cʼabaʼ Dios o mi caj i mel ti chʼujul. Mi caj i mejlel chuqui yom Dios ila ti Pañimil cheʼ bajcheʼ miʼ mejlel ti panchan (Mateo 6:9, 10).
2. Dios tsiʼ wʌn alʌ chaʼan Jesús mi caj i yochel ti Rey chaʼan I Yumʌntel (Lucas 1:30-33). Cheʼ bʌ tsajñi Jesús ila ti Pañimil, tsiʼ pʌsʌ chaʼan mi caj i mel i yeʼtel bajcheʼ juntiquil Yumʌl uts bʌ, toj bʌ yicʼot mach xmulilic. Cheʼ bʌ tsaʼ chaʼ sujti majlel ti panchan, mach ti orajic tsaʼ otsʌnti bajcheʼ Rey chaʼan jini i Yumʌntel Dios (Hebreos 10:12, 13). Cheʼ ti 1914, Jehová tsiʼ yʌqʼue Jesús i yeʼtel cheʼ bajcheʼ tsiʼ wʌn sube. Cheʼ jini, Jesús tsiʼ teche i yumʌntel yaʼ ti panchan, cheʼ bajcheʼ Rey waʼchocobil bʌ i chaʼan Jehová (Daniel 7:13, 14).
3. Jehová tsiʼ yajca jaʼel lamital winicob xʼixicob xucʼuloʼ bʌ ila ti Pañimil chaʼan miʼ majlelob ti panchan. Ili winicob xʼixicob miʼ cajelob ti yumʌntel tiʼ tʼejl Jesús bajcheʼ reyob, xmeloñelob i xmotomajob tiʼ tojlel winicob xʼixicob (Lucas 22:28-30; Apocalipsis 5:9, 10). Jesús tsiʼ yʌlʌ chaʼan ti pejtelelob jini muʼ bʌ i cajelob ti Yumʌntel yicʼot «mach oñobic». Cojach 144.000 (Lucas 12:32; Apocalipsis 14:1-3).
4. Cheʼ bʌ Jesús tsaʼ seb ochi ti yeʼtel bajcheʼ Rey, tsiʼ choco jubel jini Satanás yicʼot jini jontol bʌ i yángelob ila ti Pañimil. Jini chaʼan tsaʼix wen asiyi jini Pañimil cʼʌlʌl cheʼ ti 1914 (Apocalipsis 12:9, 12). Guerra tac, wiʼñal tac, cʼamʌjel tac, tsaʼ pʼojli jontolil..., pejtelel jini jiñʌch jumpʼejl «señal» yom bʌ yʌl chaʼan Jesús wolix ti yumʌntel, yicʼot chaʼan añoñixla ti cojix tac bʌ qʼuin (Mateo 24:3, 7, 8, 12; Lucas 21:10, 11; 2 Timoteo 3:1-5).
5. Jesús lʌcʼʌlix miʼ caj ti meloñel yicʼot jini winicob xʼixicob, chaʼan mi caj i tʼox bajcheʼ juntiquil xcʌnta tiñʌmeʼ miʼ tʼox i tiñʌmeʼ yicʼot chivo. Mi caj i qʼuel bajcheʼ «tiñʌmeʼ» jini tsaʼ bʌ i pʌsʌyob i xucʼtilel, yicʼot mi caj i yʌqʼuen i cuxtʌlel mach bʌ anic miʼ jilel ila ti Pañimil. Jini «chivojob» jiñobʌch tsaʼ bʌ i tsʼaʼleyob i Yumʌntel Dios (Mateo 25:31-34, 46). Ti tal to bʌ qʼuin, Jesús mi caj i laj jisan jini winicob xʼixicob cheʼo bʌ bajcheʼ chivo (2 Tesalonicenses 1:6-9). Mi jatet a wom chaʼan i «tiñʌmeʼet» Jesús, yom chaʼan maʼ chʌn ñichʼtan jini wen tʼan chaʼan bʌ i Yumʌntel Dios, yicʼot maʼ mel cheʼ bajcheʼ woli a ñop majlel (Mateo 24:14).
6. Ili Pañimil tʼoxol ti cabʌl tejclum tac, ti jujumpejt an i bajñel yumʌlob. Jini tejclum tac miʼ contrajiñob i bʌ. Pero jini i Yumʌntel Dios mi caj i laj tʼuchtan jini yumʌlob añoʼ bʌ ti pañimil. Cojach yumʌl miʼ caj ti ajñel tiʼ petol Pañimil (Daniel 2:44). Cheʼ jini maʼanix miʼ chʌn cajel guerra tac, mi stsʌnsa mi jontolil. Pejtelel jini winicob xʼixicob mi caj i tem ajñelob ti ñʌchʼʌl (Miqueas 4:3, 4).
7. Cheʼ woli ti Yumʌntel jini Jesús Mil jabil, jini winicob xʼixicob xucʼuloʼ bʌ maʼanix i mul miʼ cajelob ti cʌlel, tiʼ petol jini Pañimil miʼ cajel ti sujtel ti jumpʼejl paraíso. Cheʼ bʌ wolix i yujtel jini mil jabil, Jesús tsaʼix i luʼ mele pejtelel jini tsaʼ bʌ i yʌqʼue i mel i tat. Cheʼ jini i Yumʌntel mi caj i yʌqʼuen i Tat (1 Corintios 15:24). ¿Chucoch mach maʼ suben a wamigojob yicʼot a cʌñʌyoʼ bʌ chuqui mi caj i mel jini i Yumʌntel Dios?
[Dibujo yaʼ ti iyopol 13]
Cheʼ woli ti yumʌntel jini Jesús maʼanix mach miʼ chʌn cajel ti tsʼaʼleya mi ticʼlaya