Cʌntesʌntel 8
Jumpʼejl xchumtʌl muʼ bʌ i mulan Dios
¿Chuqui mi chʼʌm ti wenta jini winic yicʼot tiʼ chaʼañoʼ bʌ? (1)
¿Bajcheʼ yom miʼ cʌntan i yijñam jini winic? (2)
¿Chuqui tac i yeʼtel an jini tatʌl? (3)
¿Baqui bʌ i yeʼtel jini xʼixic ti i chaʼañoʼ bʌ? (4)
¿Chuqui miʼ cʼajtin Dios tiʼ tojlel jini tatʌlob yicʼot jini alobob? (5)
¿Bajcheʼ yilal miʼ qʼuel Dios cheʼ miʼ yʌpob i bʌ ti jun yicʼot cheʼ miʼ poj cʌyob i bʌ? (6, 7)
1. Jini Biblia mi yʌl chaʼan jini winic jiñʌch i jol i chaʼaño bʌ (1 Corintios 11:3). Jini winic juntiquil jach yom miʼ pʌy i yijñam, i yom ñujpuñijem ti juez (1 Timoteo 3:2; Tito 3:1).
2. Jini winic yom miʼ cʼuxbin i yijñam cheʼ bajcheʼ miʼ bajñel cʼuxbin i bʌ. Yom miʼ cʌntan cheʼ bajcheʼ Jesús miʼ cʌntan xcʌntʼañob i chaʼan (Efesios 5:25, 28, 29). Maʼanic baʼ ora yom miʼ jatsʼ mi yomic i pʼunpʼun ticʼlan. Yom miʼ cʼuxbin yicʼot miʼ qʼuel ti ñuc (Colosenses 3:19; 1 Pedro 3:7).
3. Jini tatʌl yom tsʌts miʼ chaʼlen eʼtel chaʼan miʼ mʌcʼlan i chaʼañoʼ bʌ. Yom miʼ yʌcʼ bʌlñʌcʼʌl, i bujc i pislel yicʼot i chumlib i yijñam yicʼot i yalobilob. Yicʼot jaʼel yom miʼ chʼʌm tiʼ wenta chaʼan miʼ cʌñob Dios i chaʼañoʼ bʌ (1 Timoteo 5:8). Yom ñaxan miʼ yʌcʼ i bʌ tiʼ tojlel i chaʼañoʼ bʌ, chaʼan miʼ cʌñob Dios yicʼot Chuqui mi caj i mel (Deuteronomio 6:4-9; Efesios 6:4).
4. Jini xʼixic yomʌch juntiquil wem bʌ xcoltaya chaʼan i ñoxiʼal (Génesis 2:18). Yom miʼ coltan i ñoxiʼal chaʼan miʼ comol ticʼob i yalobilob (Proverbios 1:8). Jehová yom chaʼan jini xʼixic miʼ cʌntan i chaʼañoʼ bʌ yicʼot cʼuxbiya (Proverbios 31:10, 15, 26, 27; Tito 2:4, 5). Jini xʼixic yom miʼ wen qʼuel ti ñuc i ñoxial (Efesios 5:22, 23, 33).
5. Dios miʼ chʌn cʼajtiben jini alobob chaʼan miʼ jacʼbeñob i tʼan i tat i ñaʼ (Efesios 6:1-3). Dios miʼ pijtan chaʼan jini tatʌlob miʼ tojʼesañob i yalobilob. Jini tatʌlob yom miʼ ñusañob qʼuin yicʼot i yalobilob chaʼan miʼ chajpañob jini Biblia yicʼotob, miʼ chʼʌmob tiʼ wenta chaʼan miʼ cʌñob Dios yicʼot mi tijicñayobʌch i pusicʼal (Deuteronomio 11:18, 19; Proverbios 22:6, 15). Maʼanic baʼ ora yom tsʌts miʼ ticʼob i yalobilob (Colosenses 3:21).
6. Cheʼ baʼ ora jini winic yicʼot xʼixic mucʼo ti leto, jini ñumen utsʼat bʌ ti jacʼol jiñʌch jini ticʼojel am bʌ ti Biblia. Jini Biblia miʼ subeñonla chaʼan mi laj cʼuxbin lac bʌ yicʼot chaʼan mi lac ñusʌben lac bʌ lac mul (Colosenses 3:12-14). Jini tʼan Dios maʼanic mi yʌl chaʼan mi lac poj cʌy lac bʌ cheʼ bʌ an tsʼita wocol. Pero tajol jini xʼixic mi mejlel i poj tʌtsʼ i bʌ tiʼ ñoxiʼal mi 1) mach chʌn yomix i mʌcʼlan i chaʼañoʼ bʌ, 2) wen jontol jini winic i bʌbʌqʼuen an chuqui miʼ chaʼlen o miʼ chʌmel jini xʼixic o 3) maʼanic mi mejlel i chʼujutesan Jehová chaʼan miʼ mʌctan i ñoxiʼal (1 Corintios 7:12, 13).
7. Jini winic yicʼot xʼixic yom xucʼul mi yajñelob. Jini tsʼiʼlel jiñʌch jumpʼejl mulil wen tsʌts bʌ tiʼ contra Dios yicʼot tiʼ contra jini winic o xʼixic mach bʌ anic tsiʼ chaʼle mulil (Hebreos 13:4). Jini Biblia mi yʌl chaʼan cojach mi tsiʼ chaʼle tsʼiʼlel jini winic o xʼixic mi mejlel i yʌpob i bʌ ti jun chaʼan libre miʼ cʌytʌl chaʼan miʼ chaʼ ñujpuñijel (Mateo 19:6-9; Romanos 7:2, 3). Yaʼ ti Biblia mi yʌl chaʼan Jehová miʼ tsʼaʼlen cheʼ an majqui miʼ toʼol yʌpob i bʌ ti jun, i miʼ ñujpuñijel yicʼot yambʌ (Malaquías 2:14-16).
[Dibujo yaʼ ti iyopol 16, 17]
Dios miʼ pijtan jini tatʌlob chaʼan miʼ cʌntesañob i yalobil yicʼot chaʼan miʼ tojʼesañob majlel
[Dibujo yaʼ ti iyopol 17]
Jini tatʌl xcʼuxbiya bʌ miʼ yʌqʼuen chuqui an to yom i chaʼañoʼ bʌ i chaʼan miʼ cʌñob Jehová