Cʌntesʌntel 11
Chuqui bajñel ñopol tac lac chaʼan yicʼot costumbre tac mach bʌ muqʼuic i mulan Dios
¿Baqui tac bʌ jini costumbre yicʼot muʼ bʌ i ñopob winicob xʼixicob mach bʌ wenic? (1)
¿Yom ba miʼ ñopob jini xñoptʼañob chaʼan Uxtiquil jini Dios? (2)
¿Chucoch maʼanic miʼ melob Navidad yicʼot Qʼuin Santo yicʼot jini cumpleaño tac jini isujm bʌ xñoptʼañob? (3, 4)
¿Muʼ ba i mejlel jini chʌmeñoʼ bʌ i ticʼlan jini cuxuloʼto bʌ? (5)
¿Tsaʼ ba chʌmi Jesús ti jumpʼejl cruz? (6)
¿Bajcheʼ cʼamel i cʼʌjñibal cheʼ mi lac tijicñesʌben i pusicʼal Dios? (7)
1. Mach tiʼ pejtelelic chuqui ñopol tac lac chaʼan yicʼot jini costumbre tac luʼ leco. Pero Dios maʼanic miʼ mulan jini tilem bʌ yaʼ ti mach bʌ isujmic ñopbalʌl o mach bʌ lajalic bajcheʼ mi yʌl ti Biblia (Mateo 15:6).
2. Uxtiquil bʌ dios: ¿Jin ba Jehová jini uxtiquil bʌ Dios? Mach cheʼiqui. Jehová, jini lac Tat, «jiñʌch cojach bʌ Dios isujm bʌ» (Juan 17:3; Marcos 12:29). Jesús jiñʌch ñaxan bʌ I Yalobil Dios, i chucul tiʼ tojlel Dios (1 Corintios 11:3). Jini lac Tat ñumen ñucʌch bajcheʼ i Yalobil (Juan 14:28). Jini chʼujul bʌ espíritu mach juntiquil lac piʼʌl; jiñʌch i pʼʌtʌlel Dios (Génesis 1:2; Hechos 2:18).
3. Navidad yicʼot Qʼuin Santo: Jesús maʼanic tsiʼ yila pañimil ti 25 chaʼan diciembre, tajol ti octubre ti ñaxan bʌ tsic, cheʼ i yorajlel woli i cʌntañob i tiñʌmeʼ jini xcʌnta tiñʌmeʼob cheʼ ti acʼʌlel (Lucas 2:8-12). Jesús maʼanic baʼ ora tsiʼ subeyob jini xñoptʼañob, chaʼan miʼ melob qʼuiñijel cheʼ baqui ora tsiʼ yila pañimil. Tsaʼʌch bʌ i subeyob i mel jiñʌch i cʼajtesʌntel, cheʼ ba ora tsaʼ chʌmi (Lucas 22:19, 20). Jini Navidad yicʼot costumbre tac tilem ti mach bʌ isujmic ñopbalʌl ti wajali. Cheʼ jaʼel jini Qʼuin Santo yicʼot chuqui miʼ mejlel ti jini qʼuin tac. Jini ñaxan bʌ xñoptʼañob ti wajali, maʼanic tsiʼ meleyob jini Navidad mi jinicto jini Qʼuin Santo, yicʼot jaʼel maʼanic miʼ melob jini isujm bʌ xñoptʼañob ti ili qʼuin wʌle.
4. Cumpleaño tac: Jini cojach bʌ chaʼpʼejl cumpleaño muʼ bʌ lac taj ti Biblia, jin tsaʼ bʌ i meleyob winicob xʼixicob mach bʌ anic tsiʼ chʼujutesayob Jehová (Génesis 40:20-22; Marcos 6:21, 22, 24-27). Jini ñaxan bʌ xñoptʼañob ti wajali maʼanic tsiʼ meleyob cumpleaño tac. Jini costumbre tac tilem yaʼ ti mach bʌ isujmic ñopbalʌl cʼʌlʌl ti wajali. Jini isujm bʌ xñoptʼañob miʼ tempañob i bʌ, yicʼot miʼ yʌqʼueñob i bʌ majtañʌl baqui jach bʌ qʼuin chaʼan mi yubiñob i tijicñʌyel.
5. I bʌcʼñʌntel chʌmeñoʼ bʌ: Jini chʌmeñoʼ bʌ maʼanix chuqui mi mejlel i melob, yicʼot maʼanix chuqui miʼ chʌn ubiñob. Joñonla mach mejlic laj coltañob, i cheʼob jaʼel mach mejlicob i ticʼlañonla (Salmo 146:4; Eclesiastés 9:5, 10). Jini winic miʼ chʌmel; maʼanix chuqui chʌn cuxul miʼ cʌytʌl tiʼ tojlel cheʼ mi yujtel ti chʌmel (Ezequiel 18:4). Pero an i tajol jontoloʼ bʌ ángel i cʼabaʼ xibajob miʼ poj melob i bʌ bajcheʼ i yespíritujob jini chʌmeñoʼ bʌ. Pejtelel costumbre tac chaʼan tiʼ chʼujutesʌntel o tiʼ bʌcʼñʌntel jini chʌmeñoʼ bʌ mach wenic (Isaías 8:19).
6. Cruz: Jesús maʼanic tsaʼ chʌmi ti jumpʼejl cruz, tsaʼ chʌmi tiʼ juntsʼijt teʼ. Jini tʼan (stau rós) ti griego ti cabʌl Biblia mi yʌl jini «cruz», cojach yom i yʌl juntsʼijt bʌñʌl bʌ teʼ. Jini tʼan cruz tilem yaʼ ti mach bʌ isujmic ñopbalʌl cʼʌlʌl ti wajali. Jini ñaxan bʌ xñoptʼañob ti wajali, maʼanic tsiʼ cʼʌñʌyob yicʼot maʼanic tsiʼ chʼujutesayob jini cruz. Jini chaʼan, ¿utsʼat ba maʼ wʌl cheʼ mi laj cʼʌn cruz ti lac chʼujutesaya? (Deuteronomio 7:26; 1 Corintios 10:14.)
7. Tajol tsʌts ti cʌyol i melol jini leco bʌ tiʼ ñopol yicʼot jini costumbre tac. Tajol lamital añoʼ bʌ ti a wotot a cʌñʌyoʼ bʌ o a wamigojoʼ bʌ mi caj i subeñetob chaʼan maʼanic maʼ cʌy a mel jini leco tac bʌ tiʼ melol yicʼot jini costumbre tac. Pero ñumen ñuc i cʼʌjñibal cheʼ mi lac tijicñesʌben i pusicʼal Dios i mach jiñobic jini laj cʌñʌyoʼ bʌ (Proverbios 29:25; Mateo 10:36, 37).
[Dibujo yaʼ ti iyopol 22]
Mach Uxtiquilic jini Dios
[Dibujo yaʼ ti iyopol 23]
Jini Navidad yicʼot Qʼuin Santo tilem ti mach bʌ isujmic ñopbalʌl cʼʌlʌl ti wajali
[Dibujo yaʼ ti iyopol 23]
Mach mejlic lac chʼujutesan mi muqʼuic mejlel lac bʌcʼñan jini chʌmeñoʼ bʌ