Cʌntesʌntel 14
Bajcheʼ muchʼquibilob jini i testigojob Jehová
Ti ili qʼuin wʌle, ¿Jala tsaʼ tejchi jini i testigojob Jehová? (1)
¿Bajcheʼ yilal jini tempa bʌ tac muʼ bʌ i melob jini i testigojob Jehová? (2)
¿Bajcheʼ miʼ tojtʌl jini muʼ bʌ i cʼʌñob? (3)
¿Majqui ñaxan miʼ yʌcʼ majlel i bʌ yaʼ ti congregación? (4)
¿Baqui tac bʌ yambʌ colem bʌ tempa bʌ miʼ melob ti jujumpʼejl jab? (5)
¿Chuqui tac bʌ ti eʼtel miʼ mejlel yaʼ ti colem bʌ oficina i chaʼan i testigojob Jehová am bʌ yaʼ ti Nueva York yicʼot ti yan tac bʌ oficina am bʌ tiʼ petol Pañimil? (6)
1. Ti ili qʼuin wʌle jini i testigojob Jehová tsaʼ tejchi cheʼ ti 1870. I cʼabaʼob ti ñaxan jiñʌch xChaʼpaya Bibliajob, pero cheʼ ti 1931 tsiʼ chʼʌmʌyob i cʼabaʼ loqʼuem bʌ ti Biblia i testigojob Jehová (Isaías 43:10). Cheʼ bʌ tsaʼ tejchi chʼoʼchʼoc jax to, wʌle tsaʼix wen pʼojli i yonlelix i Testigojob Jehová, muʼ bʌ i chaʼleñob subtʼan ñumen ti doscientos treinta tejclum tac tiʼ petol pañimil.
2. Jini congregación tac chaʼan i testigojob Jehová miʼ tempañob i bʌ uxyajl ti jumpʼejl semana. Poj pʌybilet chaʼan maʼ majlel yaʼ ti tempa bʌ tac (Hebreos 10:24, 25). Jini cʌntesʌntel muʼ bʌ i yʌjqʼuel yaʼi loqʼuemʌch ti Biblia. Jini tempa bʌ tac miʼ tejchel yicʼot miʼ yujtel jumpʼejl oración, yicʼot tiʼ chʌmpʼejlel jini tempa bʌ miʼ «cʼʌjyel cʼay tac», loqʼuem bʌ ti lac pusicʼal chaʼan i chʼujutesʌntel Jehová (Efesios 5:18, 19). Libre mi la cochel i maʼanic miʼ cʼajtintel taqʼuin (Mateo 10:8).
3. Ti yonlel jini congregación tac miʼ melob i tempa bʌ ti jumpʼejl Otot chaʼan Tempa bʌ. Tiʼ pejtelel, jini Otot tac chaʼan Tempa bʌ tsiʼ meleyob jini i testigojob Jehová mach bʌ anic miʼ chʼʌmob i tojol yicʼot mach cabʌlic i chʼʌjlil tac tsiʼ meleyob. Yaʼi maʼanic mi caj a qʼuel imágen tac cruz o yan tac bʌ. Jini taqʼuin muʼ bʌ i yʌcʼob loqʼuem bʌ tiʼ pusicʼal, jiñʌch muʼ bʌ i cʼʌn i tojob chuqui miʼ cʼʌñob. Majqui jach yom i tsʼitaʼ mel i coltaya mi mejlel i yotsan yaʼ ti alʌ caja teʼ (2 Corintios 9:7).
4. Ti jujumpʼejl congregación tac an ancianojob, ñaxan bʌ mi yʌcʼob majlel i bʌ ti cʌntesa (1 Timoteo 3:1-7; 5:17). Jini ancianojob miʼ tajob i coltʌntel tiʼ tojlel yambʌ xcoltayajob (1 Timoteo 3:8-10, 12, 13). Ili winicob mach ñumen ñucobic bajcheʼ ti pejtelel jini congregación (2 Corintios 1:24). Maʼanic miʼ yʌqʼuentelob i cʼabaʼ ñumen ñuc bʌ (Mateo 23:8-10). Mach qʼuexelic miʼ chʼʌlob i bʌ bajcheʼ yañoʼ bʌ. Yicʼot maʼanic miʼ chʼʌmob i tojol chaʼan i yeʼtelob. Jini ancianojob miʼ qʼuelob chuqui an to yom i chaʼan jini congregación, chaʼan miʼ melbeñob i yeʼtel Jehová tiʼ wen. Mi yʌcʼob i coltaya i miʼ pʌsob wem bʌ bij cheʼ an majqui an ti wocol (Santiago 5:14-16; 1 Pedro 5:2, 3).
5. Jini i testigojob Jehová miʼ melob colem tac bʌ tempa bʌ ti jujumpʼejl jab jaʼel. Yaʼ bʌ ora jini, miʼ tempañob i bʌ yonlel congregación tac chaʼan miʼ ñichʼtañob i cʌntesʌntel loqʼuem bʌ ti Biblia. Junchajp muʼ bʌ i qʼuejlel yaʼ ti colem tac bʌ tempa bʌ, jiñʌch jini chʼʌmjaʼ chaʼan tsijiʼ bʌ xcʌntʼañob (Mateo 3:13-17; 28:19, 20).
6. Yaʼ ti Nueva York yaʼan jini colem bʌ oficina i chaʼan i testigojob Jehová muʼ bʌ i chʼʌm tiʼ wenta tac yan tac bʌ oficina ti petol pañimil. Yaʼi yaʼan junmojt muʼ bʌ i pʌsoʼ bij, junmojt ancianojob wen cabʌloʼ bʌ i ñaʼtʌbal, muʼ bʌ i chʼʌm ti wenta jini congregación tiʼ petol pañimil. Yicʼot jaʼel, tiʼ petol pañimil an cheʼ bajcheʼ ñumen ti cien oficina tac. Jini xʼetelob muʼ bʌ i chaʼleñob eʼtel yaʼi mach bʌ anic mi chʼʌmob i tojol, mi yʌcʼob i coltaya tiʼ melol laj cʌntesʌntel ti jumpʼejl jun loqʼuem bʌ ti Biblia, i miʼ chocob majlel ti yan tac bʌ tejclum. Yaʼi miʼ chajpʌntel bajcheʼ yom miʼ yujtel subtʼan jaʼel. ¿Chucoch mach maʼ chajpan a bʌ chaʼan mi majlel a qʼuel jini oficina lʌcʼʌl bʌ an yaʼ baqui chumulet?