Cʌntesʌntel 15

Laʼ laj coltan yañoʼ bʌ chaʼan miʼ melob chuqui yom Dios

¿Chucoch yom maʼ sub woli bʌ a cʌn? (1)

¿Majqui mi mejlel a wʌqʼuen i cʌn jini wen tac bʌ tʼan? (2)

¿Chuqui mi mejlel i mel jini wem bʌ a melbal tiʼ tojlel jini yañoʼ bʌ? (2)

¿Jala muqʼuix a mejlel ti loqʼuel ti subtʼan yicʼot a congregación? (3)

1. Jatet tsaʼix a cʌñʌ cabʌl chuqui tac wen yaʼ ti Biblia. Jini tsaʼix bʌ a cʌñʌ yaʼ ti Biblia yom miʼ coltañet, chaʼan maʼ ñop a lajin bajcheʼ Cristo (Efesios 4:22-24). Yicʼot jaʼel, cheʼ maʼ taj a ñaʼtʌbal ñucʌch i cʼʌjñibal chaʼan maʼ taj a cuxtʌlel mach bʌ anic miʼ jilel (Juan 17:3). Yicʼot jaʼel jini a piʼʌlob yom miʼ yubiñob jini wen tʼan chaʼan miʼ tajob i coltʌntel. Ti pejtelel jini xñoptʼañob yom miʼ chaʼleñob subtʼan. Jiñʌch jumpʼejl i mandar Dios (Romanos 10:10; 1 Corintios 9:16; 1 Timoteo 4:16).

2. Mi mejlel a tech a subeñob jini wen tac bʌ tʼan woli bʌ a cʌn yicʼot jini winicob xʼixicob lʌcʼʌl bʌ añob a wicʼot. Subeñob jini a chaʼañoʼ bʌ ti a wotot, a wamigojob, a piʼʌlob ti escuela, yicʼot a piʼʌlob ti eʼtel. Mele yicʼot i yutslel a pusicʼal yicʼot yom a wujil pijt (2 Timoteo 2:24, 25). Yom cʼajal a chaʼan jini winicob xʼixicob miʼ ñumen qʼuelob chuqui miʼ mel juntiquil lac piʼʌl cheʼ bajcheʼ mucʼ jach bʌ yʌl. Jini chaʼan, jini wem bʌ a melbal mi mejlel i mel chaʼan miʼ ñichʼtañob jini wen tʼan woli bʌ a suben yañoʼ bʌ (Mateo 5:16; 1 Pedro 3:1, 2, 16).

3. Tajol ti jumpʼejl bʌ qʼuin chajpʌbiletix chaʼan maʼ tech subtʼan, yicʼot jini i congregación i testigojob Jehová baʼ maʼ tempan a bʌ. Iliyi jiñʌch junchajp chaʼan maʼ cʼʌjquel majlel (Mateo 24:14). ¡Wen tijicñajax cheʼ muqʼuic a coltan juntiquil chaʼan mi yochel tiʼ winic Jehová yicʼot chaʼan miʼ taj i cuxtʌlel mach bʌ anic miʼ jilel! (1 Tesalonicenses 2:19, 20.)