Cʌntesʌntel 7
An chuqui miʼ subeñonla tsaʼ bʌ ujti wajali
Jehová maʼanic mi caj yʌqʼuen jini jontol bʌ winicob xʼixicob chaʼan miʼ jisañob jini Paraíso. Cojach yaʼi mi caj i chumtʌlob i yamigojob. ¿Chuqui mi caj i chaʼlen jini jontoloʼ bʌ? Chaʼan mi lac ñaʼtan i jacʼbal, laʼ laj qʼuel chuqui tsaʼ ujti i sujmlel bʌ cheʼ tiʼ yorajlel Noé. Noé tsaʼ ajñi ti wajali. Juntiquil winic wen utsʼat bʌ tsiʼ chʌn mele, yicʼot tsiʼ chaʼle wersa tiʼ pejtelel chaʼan mi mel chuqui yom Jehová. Pero jini yambʌ xchumtʌlob ti pañimil leco i melbalob. Jini chaʼan, Jehová tsiʼ sube Noé chaʼan mi caj i chʼʌm tilel jumpʼejl butʼjaʼ chaʼan miʼ jisan tiʼ pejtelel jini jontoloʼ bʌ. Yicʼot jaʼel tsaʼ subenti chaʼan miʼ mel jumpʼejl arca chaʼan maʼanic miʼ chʌmel jini Noé mi jinic i chaʼañoʼ bʌ cheʼ miʼ tilel jini Butʼjaʼ (Génesis 6:9-18).
Noé yicʼot i chaʼañoʼ bʌ tsiʼ meleyob jini arca. Noé tsiʼ sube yan tac bʌ winicob xʼixicob chaʼan mi caj i tilel jini Butʼjaʼ, pero maʼanic majqui tsiʼ ñichʼtabe. Tsiʼ chʌn meleyob jini mach bʌ utsʼatic. Cheʼ bʌ jini Noé tsaʼ ujti i mel jini arca, tsiʼ yotsa jini animal tac, cheʼ jini tsaʼ ochi Noé yicʼot i chaʼañoʼ bʌ. Cheʼ jini, Jehová tsiʼ choco tilel tsʌts bʌ icʼ jaʼal. Tsiʼ chaʼle jaʼal chaʼcʼal qʼuin yicʼot chaʼcʼal acʼʌlel, jini Lum tsaʼ bujtʼi ti jaʼ (Génesis 7:7-12).
Jini jontoloʼ bʌ tsaʼ chʌmiyob, pero Noé yicʼot i chaʼañoʼ bʌ tsaʼ coltʌntiyob. Jehová tsiʼ cʌnta jini Noé yicʼot i chaʼañoʼ bʌ cheʼ woli jini Butʼjaʼ, cheʼ jini tsaʼ pʌjyiyob majlel ti jumpʼejl pañimil sʌc bʌ, baʼ maʼanic jontolil (Génesis 7:22, 23). Jini Biblia miʼ yʌl chaʼan miʼ caj ti chaʼ cʼotel i yorajlel, baʼ mi caj i jisan Jehová jini mach bʌ yomic i melob chuqui toj. Jini tojoʼ bʌ maʼanic mi caj i jisʌntelob. Ti pejtelel ora mi caj i chumtʌlob wʌʼ ti Lum cheʼ miʼ sujtel ti jumpʼejl Paraíso (2 Pedro 2:5, 6, 9).
Ti ili qʼuin wʌle, yonlelob miʼ melob chuqui mach bʌ tojic. Ili pañimil butʼul ti wocol. Jehová miʼ chʌn choc majlel i Testigojob chaʼan miʼ majlel i suben jini winicob xʼixicob, pero yonlel mach yomobic i yubibeñob i tʼan Jehová. Mach yomobic i qʼuextañob i melbal mi yomic i jacʼbeñob chuqui miʼ subentelob ti Dios wen bʌ yicʼot mach bʌ wenic. ¿Chuqui mi caj i chaʼleñob ili winicob xʼixicob? ¿Muʼ ba caj i qʼuextañob i bʌ ti jumpʼejl bʌ qʼuin? Yonlelob maʼanic baʼ ora mi caj i qʼuextañob i bʌ. Lʌcʼʌlix jini qʼuin cheʼ mi caj i jisʌntelob jini jontoloʼ bʌ ti pejtelel ora (Salmo 92:7).
Ili Lum maʼanic mi caj i jisʌntel; mi caj i sujtel ti jumpʼejl Paraíso. Pero jini muʼ bʌ i sutqʼuiñob i bʌ tiʼ yamigo Dios, mi caj i chumtʌlob ti pejtelel ora ti jini Paraíso ila ti Lum (Salmo 37:29).