Cʌntesʌntel 12

¿Chuqui mi lac chaʼlen cheʼ mi lac chʌmel?

Jini chʌmel mach lajalic bajcheʼ jini laj cuxtʌlel. Lajal bajcheʼ tam bʌ lac wʌyel (Juan 11:11-14). Jini chʌmeñoʼ bʌ maʼanix mi yubiñob, maʼanix chuqui miʼ qʼuel, maʼanix mi mejlelob ti tʼan mi anicto chuqui miʼ ñaʼtañob (Eclesiastés 9:5, 10). Jini ñopbalʌl mach bʌ isujmic, mi yʌl chaʼan jini chʌmeñoʼ bʌ miʼ majlelob yaʼ tiʼ lumal jini espíritujob, chaʼan miʼ chumtʌl yicʼotob wajalix bʌ chʌmiyob. Pero mach jinic muʼ bʌ yʌl jini Biblia.

Jini tsaʼix bʌ chʌmiyob mach mejlix i coltañonla mi muqʼuic mejlel i ticʼlañonla. Wen cʌmbilix ti winicob xʼixicob cheʼ mi yʌqʼueñob i majtan chʌmeñoʼ bʌ, come mi mulan mi lon ñaʼtañob. Pero, ili ñʌmʌl bʌ ti mejlel maʼanic miʼ mulan Dios come yaʼ loqʼuem tiʼ lot Satanás. Cheʼ jaʼel mach mejlix yubiñob i tijicñʌyel jini tsaʼix bʌ chʌmiyob, come mach chʌn cuxulobix. Mach yomic lac bʌcʼñan, mi yomic lac chʼujutesan jini chʌmeñoʼ bʌ. Cojach yom mi lac chʼujutesan jini Dios (Mateo 4:10).

Jini chʌmeñoʼ bʌ mi caj i chaʼ cuxtʌyelob. Ti jini talto bʌ qʼuin, Jehová mi caj i tech chʼojyel jini chʌmeñoʼ bʌ chaʼan miʼ chumtʌlob ti paraíso ila ti Lum (Juan 5:28, 29; Hechos 24:15). Dios miʼ mejlel i ñijcan chʼojyel jini tsaʼix bʌ chʌmiyob, lajal bajcheʼ joñonla mi lac ñijcan tejchel juntiquil lac piʼʌl wʌyʌl bʌ (Marcos 5:22, 23, 41, 42).

Satanás jini Diablo, woliʼ pam puc ñumel jini lot chaʼan mach isujmic mi lac chʌmel. Satanás yicʼot i xibajob mi yʌqʼuen i ñaʼtan winicob xʼixicob chaʼan i yespíritujob jini xchʌmeñobix bʌ chʌn cuxuloʼto, mi yʌloʼ jaʼel chaʼan mi yʌcʼ cʼamʌjel o yan tac bʌ wocol. Satanás miʼ lotin winicob xʼixicob, tiʼ ñajal o cheʼan chuqui mi yʌcʼ ti qʼuelol. Jini chaʼan, Jehová miʼ tajben i mul majqui jach miʼ ñop i pejcan jini chʌmeñoʼ bʌ (Deuteronomio 18:10-12).