¿Yom ba mi lac mel qʼuiñijel tac?

JIÑI qʼuiñijel tac muʼ bʌ i mel ñopbalʌl tac o jiñi muʼ bʌ i melob i chaʼañoʼ bʌ pañimil, mach loqʼuemic tilel ti Biblia. Cheʼ jiñi, ¿baqui tsaʼ loqʼui tilel jiñi? Maʼ mejlel ti majlel ti jumpʼejl biblioteca, o maʼ pejcan yan tac bʌ libro baqui mi yʌl chaʼan jiñi qʼuiñijel tac muʼ bʌ i mejlel yaʼ ti a lumal. Laʼ laj qʼuel chaʼpʼejl uxpʼejl ejemplo tac.

Qʼuin santo. Ili qʼuiñijel miʼ yʌjlel chaʼan jiñʌch i cʼajtesʌntel cheʼ bʌ tsaʼ chʌmi Jesús yicʼot cheʼ bʌ tsaʼ chaʼ tejchisʌnti. Ili costumbre mach loqʼuemic ti Biblia jumpʼejl ejemplo jiñʌch cheʼ an wiñicob xʼixicob muʼ bʌ i chʼuyob ñumel ti calle imagen tac. Jiñi libro Las Grandes Religiones Ilustradas mi yʌl cheʼ maxto tilemic Cristo chaʼan jiñi yaʼ bʌ chʼoyolob ti Babilonia caj i «qʼuelob ti ñuc jiñi imagen añoʼ bʌ i chaʼan [...]. Caj i bʌcʼob jiñi diosteʼ tac yicʼot wen letsem bʌ i tojol bʌ pisil, caj i chʼʌlob yicʼot ujʌl, xotcʼʌb yicʼot mʌtcʼʌb [...], cheʼ jaʼel caj i chʼuyob ñumel ti calle tac».

Tsijib Jabil. Ili qʼuiñijel mach lajalic miʼ mejlel ti yan tac bʌ país. Jiñi libro The World Book Encyclopedia mi yʌl: «Jiñi Rey ti wajali chʼoyol bʌ ti Roma, i cʼabaʼ Julio César, tsiʼ yʌcʼʌ i tʼan chaʼan cheʼ ti jabil 46 cheʼ maxto tilemic Cristo cheʼ ti 1 i chaʼan enero jiñʌch Tsijiʼ Jabil. Jiñi chʼoyoloʼ bʌ ti Roma ti wajali tsiʼ yajcayob jiñi i qʼuiñilel Jano, dios chaʼan jiñi puerta tac yicʼot i tejchibal [jabil tac]. Jiñi uw enero [ti latín cʌmbil bajcheʼ Januarius] tsaʼ ochi i cʼabaʼ bajcheʼ Jano, ili dios an chʌmpʼejl i wut: Chaʼpʼejl ti ñaxan i chaʼpʼejl tiʼ pat i jol». Jin chaʼan jiñi qʼuiñijel chaʼan Tsijib Jabil, tilem tiʼ chaʼan bʌ mulawil.

Jiñi Qʼuiñijel chaʼan tsaʼix bʌ chʌmiyob (Todos santos). Jiñi Encyclopedia Britannica tsaʼ bʌ mejli ti 1910 mi yʌl: «I Qʼuiñilel jiñi tsaʼix bʌ chʌmiyob [...] jiñʌch qʼuin yajcʌbil bʌ i chaʼan jiñi Iglesia Católica am bʌ ti Roma chaʼan miʼ cʼajtesañob i piʼʌlob xucʼuloʼ bʌ tsaʼix bʌ chʌmiyob. Ili qʼuiñijel miʼ melob come miʼ ñopob chaʼan jiñi tsaʼ bʌ chʌmiyob tiʼ xucʼtʌlel maʼañic tsaʼ sʌqʼuesʌntiyob chaʼan jiñi alʌ mulil, o chaʼan maʼañic tsaʼ ñusʌbentiyob i mul tsaʼ bʌ i meleyob wajali, maʼañic miʼ mejlel i sujtesañob bajcheʼ juntiquil chʼujul bʌ, jin chaʼan miʼ melob oración yicʼot misa [...]. Ili wen cʌmbil tac bʌ cheʼ miʼ mejlel i qʼuiñilel jiñi chʌmeñoʼ bʌ loqʼuem tiʼ chaʼan bʌ pañimil yicʼot añix bʌ cʼʌlʌl wajali. Jin chaʼan jiñi xcholelob ti cabʌl país católicojoʼ bʌ miʼ ñopob chaʼan jiñi chʌmeñoʼ bʌ mi chaʼ majlelob ti yotot ti jiñi bʌ qʼuin chaʼan miʼ chaʼleñob uchʼel».

Yambʌ qʼuiñijel tac. Mach mejlix lac tsictesan tiʼ pejtelel qʼuiñijel tac muʼ bʌ i mejlel tiʼ petol pañimil. Pero Jehová maʼañic miʼ qʼuel ti ñuc mi jumpʼejlic qʼuiñijel baqui miʼ yʌcʼ ti qʼuejlel ti ñuc quixtañu, o yumʌlob wʌʼ ti Pañimil (Jeremías 17:5-7; Hechos 10:25, 26). Cheʼ jaʼel, chaʼan maʼ cʌn mi wen o mach weñic tiʼ tojlel Dios jumpʼejl qʼuiñijel tilem bʌ ti ñopbalʌl, yom maʼ ñaxan wen qʼuel baqui tsaʼ tejchi tilel (Isaías 52:11; Apocalipsis [Revelación] 18:4). Jiñi principio tac loqʼuem bʌ ti Biblia tsaʼ bʌ tsictesʌnti yaʼ ti cʌntesʌntel 16 ti ili libro mi caj i coltañet a cʌn bajcheʼ yilal miʼ qʼuel Dios cheʼ mi lac mel yan tac bʌ qʼuiñijel mach bʌ tilemic ti ñopbalʌl tac.