Cheʼ tsaʼ chʌmi Cristo

JESÚS anix uxpʼejl jab yicʼot ojlil i cajel ti subtʼan yicʼot yujilix chaʼan mach jalix wʌʼan ti Pañimil. Jini judíojob añoʼ bʌ i yeʼtel ti ñopbalʌl tsiʼ chajpayob chaʼan mi tsʌnsañob, pero tsiʼ bʌcʼñayob jini winicob xʼixicob, come cʌmbilob i chaʼan bajcheʼ xʼaltʼan jini Jesús. Cheʼ jini, Satanás tsaʼ ochi ti i pusicʼal Judas —jiñʌch i lajchʌnticleloʼ bʌ apóstol— chaʼan miʼ chon jini xcʌntesa i chaʼan. Jini judíojob añoʼ bʌ i yeʼtel ti ñopbalʌl tsiʼ tojbeyob treinta taqʼuin chaʼan bʌ plata.

Jini acʼʌlel cheʼ ti i yorajlel jini Pascua, Jesús tsiʼ tempayob i bʌ chaʼan miʼ melob yicʼot apóstolob i chaʼan. Cheʼ bʌ tsaʼ ujti i suben Judas chaʼan miʼ loqʼuel majlel, Cristo an chuqui tsijib tsiʼ mele: jini i Cena lac Yum. Tsiʼ xetʼe jini caxlan waj, tsiʼ chaʼle oración yicʼot tsiʼ ñusʌbe jini junlujuntiquil apóstolob. Tsiʼ yʌlʌ: «Jiñʌch c bʌcʼtal muʼ bʌ cʌcʼ chaʼañetla. Cheʼʌch yom mi la mel chaʼan c ñaʼtʌntel». Cheʼ jini tsiʼ chʼʌmʌ jaʼel vino i tsaʼ yʌlʌ: «Jini vaso jiñʌch tsijiʼ bʌ trato chaʼan c chʼichʼel muʼ bʌ i bejqʼuel chaʼañetla» (Lucas 22:19, 20).

Jini cojix bʌ acʼʌlel, Jesús an cabʌl chuqui tac tsiʼ cʌntesa jini apóstolob i chaʼan. Yicʼot jaʼel tsiʼ yʌqʼueyob tsijiʼ bʌ mandar: chaʼan miʼ cʼuxbiñob i bʌ i mach chaʼanic an chuqui miʼ cʼajtiñob. Cheʼ jaʼel, tsiʼ yʌlʌ: «Cheʼ jini pejtelel winicob mi caj i ñaʼtañob xcʌntʼañetla c chaʼan [...] cheʼ mi laʼ cʼuxbin laʼ bʌ» (Juan 13:34, 35). Tsiʼ subeyob chaʼan maʼanic miʼ melob i pusicʼal chaʼan chuqui miʼ caj tiʼ ujtel, cheʼ jini Jesús tsiʼ chʌn chaʼle oración tiʼ tojlelob. Ti wiʼil, tsiʼ cʼʌyibeyob i ñuclel Dios i tsaʼ letsiyob majlel ti tʼojol jax bʌ ajñibʌl yaʼ ti Getsemaní.

Cheʼ yaʼix an Jesús, tsaʼ ñocle yicʼot tsiʼ jamʌ i pusicʼal ti Jehová. Pero cheʼ jini, tsaʼ bʌcʼ cʼotiyob junmojt soldadojob, winicob chucbiloʼ bʌ i chaʼan espada yicʼot motomajob chaʼan yom i chucob Jesús. Chaʼan miʼ cʌñob majqui jini Jesús, Judas tsiʼ yʌcʼʌ ti cʌjñel cheʼ bajcheʼ tsiʼ ñaʼta: cheʼ tsiʼ tsʼujtsʼu. Jini soldadojob tsiʼ chucuyob Cristo, jini apóstolob tsaʼ putsʼiyob majlel.

Jesús tsiʼ tsictesa yaʼ ti melobʌjʌl chaʼan judíojob, chaʼan jiñʌch i Yalobil Dios. Jini juezob tsaʼ yʌlʌyob chaʼan tsiʼ chaʼle pʼajoñel tiʼ tojlel Dios, jumpʼejlʌch mulil chaʼan miʼ yʌjqʼuel ti tsʌnsʌntel. Cheʼ jini tsiʼ pʌyʌyob majlel baʼan Poncio Pilato, jini romano bʌ yumʌl. Maʼanic tsiʼ tajbe i mul Jesús, pero mi jinic jax chaʼan maʼanic i mul, tsiʼ colta chaʼan maʼanic mi tsʌnsʌntel cheʼ bajcheʼ woliʼ cʼajtiñob ti cʼam bʌ tʼan jini tejclum.

Tsiʼ pʌyʌyob majlel Cristo yaʼ ti ajñibʌl i cʼabaʼ Gólgota, yaʼʌch baʼ tsiʼ chʼijiyob ti teʼ jini romano bʌ soldadojob. Ti jimbʌ ora, tsaʼ mʌjqui qʼuin icʼ yochʼan tsaʼ sujti pañimil. Ti jimbʌ icʼajel, cheʼ bʌ tsaʼ chʌmi Jesús, tsaʼ ñumi tsʌts bʌ yujquel lum. Tsiʼ mucbeyob i bʌcʼtal baʼ tocbil bʌ xajlel, i ti yambʌ qʼuin, jini motomajob tsiʼ mʌcbeyob i tiʼ jini mucoñibʌl yicʼot chaʼan miʼ cʌntañob. ¿Jim ba cojix bʌ i chumlib jini? Mach jiniqui, come muʼto i caj ti ujtel jini ñumen ñuc bʌ milagro.

(Loqʼuem yaʼ ti capítulo 26 yicʼot 27 chaʼan Mateo, jini capítulo 14 yicʼot 15 chaʼan Marcos, jini capítulo 22 yicʼot 23 chaʼan Lucas yicʼot jini capítulo 12 cʼʌlʌl ti 19 chaʼan Juan.)