Cheʼ baʼ ora jini Pañimil mi chaʼ sujtel ti jumpʼejl paraíso

JINI cojix bʌ libro chaʼan Biblia —Revelación, o Apocalipsis— mi yʌqʼuen i pijtaya ti pejtelel winicob xʼixicob. I tsʼijbubal jini apóstol Juan, mi chʼʌm tilel cabʌl tsaʼ bʌ pʌsbenti yicʼot muʼto bʌ caj i tsʼʌctiyel jini ñaʼtʌbil bʌ i chaʼan Jehová.

Jini ñaxam bʌ tsaʼ pʌsbenti, Jesús tsaʼ bʌ tejchi chʼojyel, miʼ pʼʌtʼesan yicʼot miʼ tojʼesan jini congregación tac. Ti yambʌ miʼ subeñonla i buchlib Dios yaʼ ti panchan yicʼot mi laj qʼuel jini ángelob woli bʌ i chʼujutesañob Jehová.

Cheʼ woli ti lʌcʼtiyel chaʼan miʼ tsʼʌctiyel i yujtibal jini ñaʼtʌbil bʌ i chaʼan Dios, jini Tiñʌmeʼ (Jesucristo) tsiʼ chʼʌmʌ jumpʼejl rollo am bʌ wucchajp i sellolel. Cheʼ tsiʼ ñaxan jamʌ jini chʌnchajp, tsaʼ loqʼui tilel chʌntiquilob cʼʌchʌloʼ bʌ ti caballo. Jini ñaxam bʌ jiñʌch Jesús, tsaʼ bʌ aqʼuenti i corona chaʼan Rey cʼʌchʌl bʌ ti sʌsʌc caballo. Jini yambʌ uxtiquil cʼʌchʌlob ti yan tac bʌ color caballo, yombʌ i yʌl jini guerra, wiʼñal yicʼot cʼamʌjel tac mu bʌ i yʌcʼ ti chʌmel yonlel winicob xʼixicob, yicʼot mi yʌcʼ ti cʌjñel ili pañimil chaʼan mach jalix mi caj i jisʌntel. Cheʼ tsaʼ jajmi jini i wucchajplel rollo tsaʼ ubinti wucchajp cʼam bʌ i tʼan trompeta, muʼ bʌ i sub chaʼan Dios mi caj i yʌqʼuen i toj i mul i contrajob. Jini chaʼan Dios miʼ pʌs ili yambʌ wucchajp wocol jiñʌch i michʼajel.

Ti wiʼil, Juan tsiʼ qʼuele cheʼ tsaʼ yila pañimil juntiquil alʌl, yom bʌ i yʌl cheʼ tsaʼ tejchi i Yumʌntel Dios yaʼ ti panchan. Tsaʼ tejchi guerra, jini Satanás yicʼot i xibajob tsaʼ chojquiyob jubel ti panchan ila ti Pañimil. Cheʼ jini tsaʼ ubinti cʼam bʌ tʼan, tsi yʌlʌ: «Obol laʼ bʌ añet bʌ la ti Pañimil». ¿Chucoch? Come jini Diablo yujil chaʼan lʌcʼʌlix i yorajlel i wem cabʌl i michʼajel (Apocalipsis 12:12).

Jesús tsiʼ chaʼ pʌsʌ i bʌ ti panchan bajcheʼ tiñʌmeʼ, yaʼan ti tʼejl 144,000 winicob xʼixicob yajcʌbiloʼ bʌ muʼ bʌ «caj i i tem chaʼleñob yumʌntel yicʼot Cristo». Yaʼʌch ti Apocalipsis baʼ mi laj cʌn jini yambʌ parte chaʼan i pʼolbal junmojt bʌ winicob xʼixicob 144,000 (Apocalipsis 14:1; 20:6).

Cheʼ jini, jini yumʌlob ti Pañimil mi tempañob i bʌ chaʼan jini Armagedón, o «guerra muʼ bʌ caj i yujtel ti jini ñuc bʌ qʼuin, i qʼuiñilel Dios Mach bʌ Anic i Pʼisol i Pʼʌtʌlel», i mi caj i contrajiñob i bʌ yicʼot jini cʼʌchʌl bʌ ti sʌsʌc caballo, Jesús yicʼot i soldadojob ti panchan. ¿Bajcheʼ yilal mi caj i yujtel ili guerra? Jini yumʌlob ti pañimil mi caj i jisʌntelob yicʼot jini Satanás mi caj yochel ti mʌjquibʌl. Jesús yicʼot jini 144,000 mi caj i chaʼleñob yumʌntel ti Pañimil mil jabil, cheʼ mi yujtel jini mil jabil, Satanás mi caj i jisʌntel jaʼel. (Apocalipsis 16:14; 20:4).

¿Chuqui mi caj i mel cheʼ ti Mil jabil bʌ i Yumʌntel Cristo tiʼ tojlel winicob xʼixicob xjacʼtʼañoʼ bʌ? Juan tsiʼ tsʼijbu: «[Jehová] mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol ti pejtelel ora. Come tsaʼix ñumi jini ñaxan tac bʌ» (Apocalipsis 21:4). Jini chaʼan, ¡jini Pañimil miʼ chaʼ sujtel ti jumpʼejl paraíso!

Cheʼʌch mi yujtel i tsictesan jini libro chaʼan Apocalipsis jini tʼan muʼ bʌ yʌl ti Biblia: chaʼan tiʼ tojlel i Yumʌntel jini Mesías, Jehová mi caj i sʌqʼuesan i cʼabaʼ yicʼot chaʼan miʼ chʌn ñaʼtʌntel cojach jini am bʌ ti wenta chaʼan miʼ chaʼlen yumʌntel ti pejtelel ora.

(Loqʼuem yaʼ ti libro chaʼan Apocalipsis.)