¿Chucoch tsac chʼʌmʌ lojon j cʼabaʼ bajcheʼ i testigojob Jehová?

Cabʌl winicob xʼixicob miʼ yʌlob chaʼan jini i testigojob Jehová jiñʌch jumpʼejl tsijib to bʌ ñopbalʌl. Pero anix ñumen 2,700 jab, i winicob jini cojach bʌ isujm Dios, tsaʼ cʌjñiyob bajcheʼ i testigojob (Isaías 43:10-12). Cheʼ bʌ maxto cʼotemic jini jabil 1931, tsaʼ cʌjñiyon lojon bajcheʼ xPejcaya bibliajob. Cheʼ jini, ¿chucoch tsac chʼʌmʌ lojon j cʼabaʼ bajcheʼ i testigojob Jehová?

Come miʼ yʌcʼ ti cʌjñel majqui c Dios lojon. I cʼabaʼ Dios jiñʌch Jehová, ñumen ti 7,000 mi lac taj yaʼ ti Biblia, cheʼ bajcheʼ miʼ pʌs yonlel jun tac wajalix bʌ tsʼijbunti. Ti yonlel Biblia tac jini cʼabaʼʌl, Jehová, tsaʼ qʼuextʌnti bajcheʼ yum o bajcheʼ Dios. Jini isujm bʌ Dios tsiʼ sube Moisés chaʼan jini i cʼabaʼ jiñʌch Jehová, tsiʼ yʌlʌ: «Jiñʌch j cʼabaʼ ti pejtelel ora» (Éxodo 3:15). Tsiʼ mele bajcheʼ iliyi chaʼan miʼ ñaʼtʌntel chaʼan mach lajalic bajcheʼ yan tac bʌ dios. Maʼanic yambʌ muʼ bʌ i chʼʌmben majlel chʼujul bʌ i cʼabaʼ Dios bajcheʼ joñon lojon.

Come mi yʌcʼ ti cʌjñel queʼtel lojon. Tsaʼ tejchi tiʼ yorajlel jini toj bʌ Abel, cheʼ bʌ jini winicob xʼixicob tsiʼ yʌcʼʌyob ti cʌñol cʌmbil bʌ i chaʼañob tiʼ tojlel Jehová. Ti cabʌl jabil tac, yañoʼ bʌ bajcheʼ, Noé, Abraham, Sara, Moisés yicʼot David, tsaʼ cʼotiyob ti cʌjñel jaʼel bajcheʼ «cabʌl testigojob cheʼ bajcheʼ colem tocal» (Hebreos 11:4–12:1). Cheʼ bajcheʼ juntiquil winic mi yʌl chuqui yujil tiʼ tojlel yambʌ winic ti jumpʼejl melobʌjʌl, chaʼan maʼanic mi yotsʌntel ti mʌjquibʌl, joñonla jaʼel cheʼʌch woli lac mel cheʼ mi laj cʌcʼ ti cʌñol chuqui isujm tiʼ tojlel Dios.

Come mic lajin lojon tsaʼ bʌ i mele Jesús. Jini Biblia miʼ yʌl chaʼan jini Jesús jiñʌch «jini isujm bʌ, jini xucʼul bʌ Testigo» (Apocalipsis 3:14). Jesús jiñʌch tsiʼ yʌlʌ chaʼan tsiʼ yʌcʼʌ ti cʌjñel i cʼabaʼ i Tat yicʼot chaʼan tsaʼ tili i yʌcʼ «ti cʌjñel i sujmlel» i chaʼan Dios (Juan 17:26; 18:37). Jin chaʼan, jini isujm bʌ xcʌntʼañob i chaʼan yom miʼ chʼʌmbeñob majlel i cʼabaʼ Jehová yicʼot miʼ tsictesañob. Iliyi jiñʌch muʼ bʌ c chaʼlen lojon wersa c mel lojon, bajcheʼ i testigojob Jehová.

• ¿Chucoch tsac chʼʌmʌ lojon j cʼabaʼ bajcheʼ i testigojob Jehová, i mach cheʼix bajcheʼ xPejcaya bibliajob?

• ¿Majqui jini ñaxam bʌ testigo tsaʼ bʌ ajni wʌʼ ti pañimil?

• ¿Majqui jini ñumen ñuc bʌ i testigo Jehová ti pejtelel ora?