¿Bajcheʼ miʼ coltañon lojon jini superintendente i chaʼan circuito?

Pejtelel ora mi yʌjlel jini Bernabé yicʼot apóstol Pablo yaʼ ti Tsʼijbujel Griegas Cristianas. Jini winicob tsiʼ chaʼleyob eʼtel bajcheʼ muʼ bʌ i julaʼtañob congregación ti wajali. ¿Chucoch? Come tiʼ sujm miʼ cʼojoʼtañob bajcheʼ yilal añob i yermañojob. Pablo tsiʼ yʌlʌ: «Conla c julaʼtan la quermañojob» chaʼan mi laj qʼuel bajcheʼ yilal añob. Mach i wentajic tsiʼ chaʼle ñajt bʌ xʌmbal come yom i pʼʌtʼesan i yermañojob (Hechos 15:36). Cheʼʌch yom miʼ melob jaʼel jini muʼ bʌ i julaʼtañob congregación ili ora.

Miʼ tilel i coltañon lojon. Jujuntiquil superintendente i chaʼan circuito, lʌcʼʌl cheʼ bʌ 20 congregación tac miʼ julaʼtan, jumpʼejl semana mi yajñel ti jujumpʼejl congregación, miʼ mel iliyi chaʼ sujtel ti jumpʼejl jab. Miʼ mejlel lac taj lac wenlel cheʼ mi laj qʼuel chuqui miʼ melob jini lac quermañojob, mi ñujpuñemob miʼ mejlel i coltañonla i yijñamob jaʼel. Miʼ chaʼleñob wersa chaʼan miʼ cʌñob ti lajal jini maxto bʌ cabʌlobic i jabilel yicʼot añobix bʌ i jabilel, miʼ mulañob majlel ti subtʼan cheʼ jaʼel ti pʌs estudio yicʼotob. Jini muʼ bʌ i julaʼtañob congregación yicʼot jini ancianojob miʼ cʌntʌbeñob i tiñʌmeʼ Dios, mi yʌcʼob discurso tac ti tempa bʌ yicʼot yaʼ ti colem tempa bʌ chaʼan miʼ pʼʌtʼesañoñobla (Hechos 15:35).

Miʼ pʌsob chaʼan miʼ qʼuelob ti ñuc tiʼ pejtelel yaʼ bʌ miʼ tempañob i bʌ. Jini superintendente i chaʼan circuito, miʼ chaʼlen wersa i qʼuel bajcheʼ an jini congregación tiʼ chaʼan bʌ Jehová. Miʼ tempan i bʌ yicʼot ancianojob yicʼot siervo ministerial, chaʼan miʼ qʼuelob chuqui wem bʌ tsaʼ mejli yaʼ ti congregación yicʼot mi yʌcʼob ticʼojel chaʼan bajcheʼ yom miʼ melob i yeʼtel ti wen. Miʼ coltañob jaʼel jini precursor chaʼan miʼ tajob i wenlel ti subtʼan yicʼot chaʼan miʼ cʌñob jini woli jaxto bʌ i cʼotelob ti tempa bʌ, chaʼan miʼ qʼuelob jaʼel bajcheʼ woli i cʼʌjquelob majlel jaʼel ti chaʼan bʌ Jehová. Jujuntiquil lac quermañojob maʼanic chuqui miʼ cʼajtiñob cheʼ bʌ miʼ chaʼleñob coltaya bajcheʼ lac «piʼʌl [...] ti eʼtel ti [lac] tojlel» (2 Corintios 8:23). Yom mi lac lajin jini ñopoloʼ bʌ i chaʼan ti Dios yicʼot bajcheʼ miʼ chaʼleñob chʼujutesaya (Hebreos 13:7).

• ¿Chucoch miʼ cʼotelob jini superintendente i chaʼan circuito i julaʼtañob congregación?

• ¿Bajcheʼ miʼ mejlel i coltañetob cheʼ miʼ cʼotelob i julaʼtañob jini congregación?