¿Baqui miʼ tilel jini taqʼuin muʼ bʌ i cʼʌjñel tiʼ yeʼtel Dios ti pejtelel pañimil?

Jini c organización lojon miʼ mel yicʼot miʼ puc ti jujumpʼejl jabil cabʌl millón jini Biblia yicʼot yan tac bʌ jun loqʼuem bʌ ti Biblia. Mic mel lojon yicʼot mic tojʼesan lojon i Yotlel Tempa bʌ yicʼot jini Betel tac. Miʼ coltan jaʼel jini añoʼ bʌ ti Betel, woliyoʼ bʌ ti eʼtel bajcheʼ misionero yicʼot miʼ chaʼlen coltaya cheʼ mi yujtel tsʌts tac bʌ wocol. Tajol maʼ cʼajtiben a bʌ, ¿baqui miʼ tilel jini taqʼuin chaʼan miʼ mejlel pejtelel jini?

Maʼanic mij cʼajtin lojon diezmo, ofrenda mi jinic to mij cʼajtin lojon mij cʌqʼuentel lojon taqʼuin. Anquese lets miʼ loqʼuel i tojol cheʼ mic mel lojon jini eʼtel chaʼan bʌ subtʼan, maʼanic mij cʼajtin lojon taqʼuin. Cheʼ bʌ tsaʼ mejli jini segunda edición chaʼan jini Lac Tsictesʌbentel, tsiʼ yʌlʌ chaʼan jini c organización lojon maʼanic baqui ora mi caj i wersa cʼajtiben taqʼuin winicob xʼixicob, i cheʼʌch woliʼ mejlel bajcheʼ jini, come mic ñop lojon chaʼan cojach Jehová miʼ coltañon lojon chaʼan miʼ mejlel jini subtʼan (Mateo 10:8).

Chucbil ti taqʼuin loqʼuem bʌ tiʼ pusicʼal winicob xʼixicob. Cabʌl winicob xʼixicob miʼ yʌcʼob taqʼuin come miʼ qʼuelob ti ñuc jini j cʌntesa loqʼuem bʌ ti Biblia. Jini i testigojob Jehová tijicña miʼ melob jini eʼtel, miʼ cʼʌñob i wersa, i taqʼuiñob yicʼot yan tac bʌ i chubʌʼañob, chaʼan miʼ mejlel chuqui yom Dios tiʼ pejtelel pañimil (1 Crónicas 29:9). Yaʼ tiʼ Yotlel Tempa bʌ yicʼot colem tempa bʌ tac, an alʌ caja tac, chaʼan mi an majqui yom yʌcʼ taqʼuin loqʼuem bʌ tiʼ pusicʼal, miʼ mejlel i yʌcʼ. O miʼ mejlel ti melol jaʼel yaʼ ti www.jw.org/ctu. Jini taqʼuin muʼ bʌ i cʼʌjñel, jiñʌch miʼ ñumen acʼob maʼañobic bʌ cabʌl i taqʼuin, lajalob bajcheʼ jini mebaʼ xʼixic mach bʌ añic i chubʌʼan tsaʼ bʌ i yʌlʌ Jesús, tsiʼ choco ochel chaʼpʼejl taqʼuin yaʼ ti yajñib yaʼ bʌ an ti templo (Lucas 21:1-4). Jin chaʼan majqui jach miʼ ñaʼtan jaypʼejl mi caj i tʼox locʼsan chaʼan mi yʌcʼ, «laʼ i yʌcʼ cheʼ bajcheʼ tsiʼ ñaʼta tiʼ pusicʼal» (1 Corintios 16:2; 2 Corintios 9:7).

Cujil lojon chaʼan Jehová mi caj i chʌn ñijcʌben i pusicʼal winicob xʼixicob, chaʼan miʼ yʌcʼob taqʼuin chaʼan miʼ coltʌntel jini eʼtel chaʼan bʌ yumʌntel yicʼot chaʼan miʼ mejlel jini yom bʌ Dios (Proverbios 3:9).

• ¿Chucoch jini c organización lojon mach lajalic bajcheʼ yan tac bʌ tempa bʌ?

• ¿Bajcheʼ miʼ cʼʌjñel jini taqʼuin muʼ bʌ yʌcʼob winicob xʼixicob tiʼ pejtelel i pusicʼal?