CɅNTESɅNTEL 8
¿Chucoch Dios miʼ yʌcʼ ti ujtel jontolil yicʼot ilaya wocol?
1. ¿Bajcheʼ tsaʼ tejchi jini jontolil?
Dios woliʼ pʌs chaʼan jini winicob mach mejlicob i yumañob i bʌ, mi jinicto miʼ mejlel i jisañob wocol
Jini jontolil tsaʼ tejchi wʌʼ ti Pañimil cheʼ bʌ Satanás tsiʼ yʌlʌ jini ñaxam bʌ lot. Ti ñaxan, jini Satanás jiñʌch juntiquil ángel maʼanic bʌ i mul, pero «maʼanic tsaʼ chʌn ajni tiʼ sujmlel Dios» (Juan 8:44). Tsaʼ caji i mulan jini chʼujutesʌntel, cojach bʌ yom miʼ yʌqʼuentel Dios. Satanás tsiʼ loti jini ñaxam bʌ xʼixic i cʼabaʼ Eva, tsaʼ cajiʼ suben chaʼan jiñʌch miʼ jacʼbentel i tʼan i mach jinic Jioba. Adán tsiʼ jacʼbe i tʼan Eva, cheʼʌch bajcheʼ jini tsiʼ ñusʌbeyob i tʼan Dios. Tiʼ caj tsaʼ bʌ i mele Adán, tsaʼ tili ilaya wocol yicʼot chʌmel. Pejcan Génesis 3:1-6, 19.
Satanás tsiʼ yʌqʼue i ñaʼtan Eva chaʼan ñumen wen cheʼ maʼanic miʼ jacʼben i tʼan Dios, yicʼot maʼanic tsaʼ caji i qʼuel ti ñuc jini am bʌ ti wenta miʼ chaʼlen yumʌntel. Ñumen an winicob xʼixicob woli bʌ i jacʼbeñob i tʼan Satanás i mach jinic miʼ qʼuelob Dios bajcheʼ Yumʌl. Jin chaʼan, Satanás tsaʼ sujti bajcheʼ «i yum pañimil». Pejcan Juan 14:30 yicʼot 1 Juan 5:19.
2. ¿Mach ba wenic tsaʼ bʌ i mele Dios?
Laj weñʌch jini tsaʼ bʌ i mele Dios tiʼ pejtelel. Jini winicob xʼixicob yicʼot jini ángelob tsaʼ mejliyob chaʼan miʼ mejlel i jacʼbeñob i tʼan Dios ti tsʼʌcʌl (Deuteronomio 32:4, 5). Dios tsiʼ meleyonla chaʼan miʼ mejlel lac yajcan lac mel chuqui wen bʌ o mach bʌ wenic. Miʼ mejlel lac pʌs jini laj cʼuxbiya, cheʼ mi lac bajñel ñaʼtan chaʼan com lac melben i yeʼtel Dios. Pejcan Santiago 1:13-15 yicʼot 1 Juan 5:3.
3. ¿Chucoch Dios woliʼ yʌcʼ ti ujtel ilaya wocol cʼʌlʌl wʌle ora?
Cʼʌlʌl cheʼ bʌ Adán yicʼot Eva maʼanic tsiʼ jacʼʌyob chuqui tsaʼ bʌ subentiyob, Jioba woli to yʌcʼ chaʼan miʼ ñusʌbentel i tʼan bajcheʼ jin jach bʌ an tiʼ wenta chaʼan miʼ chaʼlen yumʌntel. ¿Chucoch? Chaʼan miʼ pʌs chaʼan mi juntiquilic yumʌl wʌʼ ti pañimil mi caj i mejlel i yuman jini winicob xʼixicob (Eclesiastés 7:29; 8:9). Ñumenix 6,000 jab cajel laj qʼuel iliyi. Miʼ pʌsbeñonla chaʼan jini yumʌlob wʌʼ ti pañimil maʼanic miʼ mejlel i jisañob guerra tac, tsʌnsʌntel tac, jontolil tac yicʼot cʼamʌjel tac. Pejcan Jeremías 10:23 yicʼot Romanos 9:17.
Pero mach lajalic jini yumʌlob wʌʼ ti Pañimil bajcheʼ jini yumʌl tilem bʌ ti Dios, come mi yʌqʼuen chuqui wem bʌ jini muʼ bʌ i jacʼbeñob i tʼan (Isaías 48:17, 18). Mach jalix Jioba mi caj i jisan jini yumʌlob wʌʼ ti Pañimil. Mi caj i chumtʌlob wʌʼ ti Pañimil, jini winicob xʼixicob yomoʼ bʌ miʼ yumʌntelob ti Dios (Isaías 11:9). Pejcan Daniel 2:44.
Qʼuele jiñi video ¿Chucoch Dios miʼ yʌcʼ ti ujtel jiñi wocol?
4. ¿Chuqui miʼ mejlel lac mel cheʼ maxto i chʼʌmʌ tilel i jilibal jontol bʌ winicob xʼixicob?
Satanás tsiʼ yʌlʌ chaʼan mi juntiquilic winic mi caj i chʼujutesan Dios tiʼ pejtelel i pusicʼal. ¿A wom baʼ pʌs chaʼan mach isujmic? ¡Mucʼʌch i mejlel a mel! Cheʼ maxto i chʼʌmʌ tilel i jilibal jontol bʌ winicob xʼixicob, muʼ to yʌqʼueñonla i yorajlel chaʼan mi lac pʌs chaʼan lac comʌch mi lac yumʌntel ti Dios. Mi lac pʌs iliyi, jiñʌch ti lac melbal. Pejcan Job 1:8-12 yicʼot Proverbios 27:11.
5. ¿Bajcheʼ miʼ mejlel lac pʌs chaʼan jiñʌch lac com chaʼan Dios miʼ yumañonla?
Jini muʼ bʌ lac mel miʼ pʌs chaʼan lac comʌch miʼ yumañonla Dios
Miʼ mejlel lac waʼchocon Dios chaʼan miʼ yumañonla yicʼot mi lac mel jini isujm bʌ chʼujutesaya chucbil bʌ tiʼ Tʼan Dios yaʼ ti Biblia (Juan 4:23). Miʼ mejlel lac tsʼaʼlen Satanás bajcheʼ yumʌl cheʼ maʼanic mi lac cotsan lac bʌ tiʼ chaʼan bʌ ili yumʌlob ti pañimil, cheʼ bajcheʼ guerra tac yicʼot política tac, cheʼ bajcheʼ tsiʼ mele Jesús. Pejcan Juan 17:14.
Satanás miʼ cʼʌn jini tsʼiʼlel chaʼan jini winicob xʼixicob miʼ melob jini muʼ bʌ i tsʼaʼlen Dios. Cheʼ mi lac tsʼaʼlen jini tsʼiʼlel, tajol jini la camigojob maʼanic mi caj i mulañob yicʼot jini lac familia mi caj i wajleñonla (1 Pedro 4:3, 4). Jin chaʼan yom mi lac ñaʼtan chuqui yom mi lac mel. ¿Muʼ ba caj lac tempan lac bʌ yicʼotob jini muʼ bʌ i cʼuxbiñob Dios? ¿Muʼ ba caj lac jacʼ jini mandar tac? Mi cheʼʌch mi lac mel, mi caj mejlel lac pʌsben Satanás chaʼan tsaʼʌch i chaʼle lot, cheʼ bʌ tsiʼ yʌlʌ chaʼan mi juntiquilic mi caj i mejlel i ñop Dios tiʼ pejtelel i pusicʼal. Pejcan 1 Corintios 6:9, 10; 15:33.
Jini cʼuxbiya muʼ bʌ i pʌs Dios tiʼ tojlel winicob xʼixicob, miʼ pʌs chaʼan jini ilaya wocol yicʼot jontolil, mi caj i jisʌntel. Jini muʼ bʌ i pʌsob chaʼan mucʼʌch i ñopob iliyi, mi caj i chumtʌlob ti Pañimil tiʼ pejtelel ora. Pejcan Juan 3:16.