Jesús tsiʼ jacʼʌ tʼan tiʼ pejtelel ora

¿Cʼun ba ti jacʼol muʼ bʌ yʌl a papá yicʼot a mamá?... An tajol mach cʼuñic, ¿ñomach? Pero cheʼ bʌ maʼ qʼuel jiñi ejemplo i chaʼan Jesús, mi caj i coltañet a chʼujbin tʼan. ¿A wujil ba majqui tsiʼ chʼujbibe i tʼan?... Jiñʌch Jehová, cheʼ jaʼel i papá yicʼot i mamá wʌʼ ti Pañimil. Laʼ lac tsʼitaʼ cʌn chaʼan Jesús.

Cheʼ bʌ maxto julemic wʌʼ ti Pañimil, Jesús yaʼ chumul ti panchan yicʼot i Tat, Jehová. Pero cheʼ tsaʼ chumle wʌʼ ti Pañimil, añʌch i papá yicʼot i mamá tsaʼ bʌ i cosayob jaʼel. Jiñobʌch José yicʼot María. ¿A wujil ba bajcheʼ tsaʼ sujti tiʼ papá yicʼot tiʼ mamá?...

Chaʼan miʼ mejlel i yilan pañimil (chʼocʼan) Jesús, Jehová tiʼ mele jumpʼejl milagro. Tiʼ cʼaxtesʌbe i cuxtʌlel Jesús tiʼ matriz María. Tiʼ cʌnta 9 uw i cheʼ jiñi tsiʼ yila pañimil, cheʼʌch bajcheʼ miʼ yilan pañimil alʌlob ti ili ora. Cheʼ bajcheʼ jiñi, tsaʼ chʼocʼa Jesús i tsaʼ caji i cosañob.

Cheʼ bʌ an jaxto 12 i jabilel, Jesús tiʼ pʌsʌ chaʼan miʼ wen cʼuxbin i Tat am bʌ ti panchan, Jehová. Tiʼ pʌsʌ cheʼ bʌ tsaʼ majli yicʼot i familia ti Jerusalén. Tsaʼ majli i chʼujutesañob Jehová. Cheʼ bʌ sujtelix mucʼob ti yotot, José yicʼot María tsiʼ qʼueleyob chaʼan maʼañic tsiquil Jesús. ¡Maʼañic tsiʼ tajayob! ¿Chuqui tiʼ mele José yicʼot María maʼ wʌl?...

Ti orajach tsaʼ chaʼ majli i sʌclañob yaʼ ti Jerusalén. Uxpʼejl qʼuin tsiʼ joy sʌclayob. ¡Tiʼ wen cʼojoʼtayob! Pero tsaʼʌch i tajayob. ¿A wujil ba baqui?... Yaʼan ti Templo. ¿Chucoch yaʼan yaʼi? Come yaʼʌch baqui miʼ mejlel i wen cʌn i chaʼan bʌ Jehová. Jesús tsiʼ wen cʼuxbi i Tat Jehová yicʼot tsiʼ mulaj i mel muʼ bʌ yʌqʼuen i tijicñʌyel. Cheʼ bʌ Jesús tsaʼ coli, tsiʼ chʌn jacʼbe i tʼan Jehová. Tiʼ pejtelel ora tsiʼ jacʼʌ tʼan anquese an tajol wocol tsiʼ ñusa come an tsaʼ bʌ i ticʼlayob. ¿Tsaʼ ba i jacʼbe i tʼan jaʼel jiñi José yicʼot María maʼ wʌl?... Jiñi Biblia mi yʌl chaʼan tsaʼʌch.

¿Chuqui miʼ mejlel a cʌn chaʼan Jesús?... Chaʼan yom maʼ jacʼben i tʼan a papá yicʼot a mamá anquese an tajol mach cʼuñic ti melol. ¿Cheʼ ba mi caj a mel?...