PARTE 4

¿Bajcheʼ yom miʼ cʼʌjñel jiñi taqʼuin?

«Cheʼ maxto ñaʼtʌbilic a chaʼan bajcheʼ yom maʼ mel, cʼajtiben jiñi yujiloʼ bʌ.» (Proverbios 20:18)

Ti lac pejtelel an i cʼʌjñibal lac chaʼan jiñi taqʼuin chaʼan mi la cʌqʼuen chuqui yom lac familia (Proverbios 30:8). Ti isujm, jiñi taqʼuin mucʼʌch i «coltañonla» (Eclesiastés 7:12). An i tajol wocol ti alol bajcheʼ yom miʼ cʼʌjñel jiñi taqʼuin ti otot pero mach a cʌy chaʼan jin jach miʼ yʌqʼuetla ti tech wocol (Efesios 4:32). Yom maʼ ñop muʼ bʌ yʌl a piʼʌl (ñoxiʼal o a wijñam) yicʼot lajal yom mi laʼ ñaʼtan bajcheʼ mi cajel laʼ cʼʌn jiñi taqʼuin.

1 ÑAʼTAN TI UTSʼAT

MUʼ BɅ YɅL JIÑI BIBLIA: «Mi an majqui yom i mel chan bʌ qʼueloñib, ¿mach ba ñaxañic miʼ buchtʌl i tsicben i tojol chaʼan miʼ ñaʼtan mi jasʌl i taqʼuin chaʼan miʼ yujtel i mel?» (Lucas 14:28). Ti laʼ chaʼticlel yom mi laʼ ñaʼtan bajcheʼ mi caj laʼ cʼʌn jiñi taqʼuin (Amós 3:3). Ñaxan ñaʼtanla chuqui i cʼʌjñibal bʌ laʼ chaʼan yicʼot jaypʼejl taqʼuin miʼ mejlel laʼ cʼʌn (Proverbios 31:16). Anquese añʌch cabʌl laʼ taqʼuin chaʼan mi mejlel laʼ mʌn chuqui laʼ wom pero mach yomic yʌl chaʼan cheʼʌch mi caj laʼ mel. Mach laʼ wen chaʼlen bet, cojach yom mi laʼ cʼʌn am bʌ laʼ chaʼan (Proverbios 21:5; 22:7).

MUʼ BɅ MEJLEL A MEL:

Mi an to laʼ taqʼuin ti yujtibal jumpʼejl uw, ñaʼtanla bajcheʼ mi caj laʼ cʼʌn
Mi maʼañix cabʌl laʼ taqʼuin, wen ñaʼtanla bajcheʼ mi caj laʼ cʼʌn chaʼan mach ti orajic miʼ jilel. Jumpʼejl ejemplo, chaʼan maʼañic mi laʼ mʌn jiñi bʌlñʌcʼʌl, chajpanla ti laʼ wotot jiñi laʼ wuchʼel

Jumpʼejl xñujpuñel woliʼ ñaʼtañob chuqui ñumen i cʼʌjñibal bʌ yom miʼ mʌñob

2 ALɅ CHUQUI TOJ YICʼOT CHʼɅMBEN ISUJM

MUʼ BɅ YɅL JIÑI BIBLIA: «Mel[e] [...] chuqui toj, mach cojic jach tiʼ wut lac Yum, pero tiʼ wut wiñicob xʼixicob jaʼel» (2 Corintios 8:21). Suben a wijñam jaypʼejl miʼ tojetob ti a weʼtel (troñel) yicʼot jaypʼejl maʼ cʼʌn jiñi taqʼuin.

Mi woli (yʌquel) a ñaʼtan a cʼʌn jiñi taqʼuin, ñaxan alʌ a wicʼot a piʼʌl (Proverbios 13:10). Mi mucʼʌch laʼ wen chajpan bajcheʼ mi caj laʼ cʼʌn jiñi taqʼuin, mi caj i coltañetla chaʼan maʼañic mi laʼ taj wocol ti laʼ ñujpuñijel. Mach a bajñel chaʼañic jiñi a tojol i chaʼañʌch a familia jaʼel (1 Timoteo 5:8).

Jumpʼejl xñujpuñel woliʼ temel qʼuelob jiñi lista cheʼ bʌ woliyob to ti mʌñoñel

MUʼ BɅ MEJLEL A MEL:

Wʌn alʌ a wicʼot a piʼʌl jaypʼejl miʼ mejlel laʼ cʼʌn jiñi taqʼuin ti jujuntiquil
Mach jiñic to maʼ pijtan miʼ jilel jiñi taqʼuin chaʼan mi caj laʼ wʌl bajcheʼ yom mi laʼ cʼʌn