Chʼujutesan Jehová a wicʼot a familia

Cheʼ bajcheʼ tsaʼ qʼuele ti ili folleto, jiñi Biblia miʼ chʼʌm tilel cabʌl principio tac muʼ bʌ mejlel i coltañet yicʼot a familia. Jehová yom chaʼan tijicña mi laʼ wajñel. Cheʼ jaʼel, miʼ yʌcʼ i tʼan chaʼan mi mucʼʌch laʼ wʌcʼ ti ñaxan i chʼujutesʌntel, «mi caj laʼ wʌqʼuentel pejtelel chuqui tac anto yom laʼ chaʼan» (Mateo 6:33). Dios yom chaʼan miʼ sujtel ti a wamigo. Jin chaʼan, chʼʌmʌ ti ñuc pejtelel chuqui miʼ mejlel i coltañet chaʼan maʼ sujtel tiʼ yamigo come jiñʌch jiñi ñumen ñuc bʌ a majtan miʼ mejlel a taj (Mateo 22:37, 38).

1 ÑUMEN PʼɅTʼESAN A BɅ TIʼ TOJLEL JEHOVÁ

MUʼ BɅ YɅL JIÑI BIBLIA: «Mi caj cochel ti laʼ Tat. Mi caj laʼ wochel ti calobil, cheʼen lac Yum [Jehová]» (2 Corintios 6:18). Dios yom sujtel ti wem bʌ a wamigo i jiñi oración jiñʌch junchajp bajcheʼ maʼ mejlel a lʌcʼtesan a bʌ tiʼ tojlel. Jehová miʼ subeñonla: «Chʌn chaʼlenla oración» (1 Tesalonicenses 5:17). Jehová miʼ mulan chaʼan maʼ suben jiñi muʼ bʌ a cʼojoʼtan yicʼot chuqui jiñi muʼ bʌ a ñaʼtan (Filipenses 4:6). Mi mucʼʌch a chaʼlen oración a wicʼot a familia, mi caj i qʼuelob chaʼan mucʼʌch a ñop Dios tiʼ sujmlel.

Pero mach cojic jach yom maʼ pejcan Dios, yom maʼ ñʌchʼtan jaʼel. ¿Bajcheʼ miʼ mejlel a mel jiñi? Jiñʌch cheʼ maʼ pejcʌben i Tʼan yicʼot jiñi jun tac loqʼuem bʌ ti Biblia (Salmo 1:1, 2). Wen ñaʼtan jiñi woli (yʌquel) bʌ a cʌn majlel (Salmo 77:1, 12). Chaʼan maʼ ñʌchʼtan Dios, wen ñuc i cʼʌjñibal jaʼel cheʼ maʼ majlel ti jiñi tempa bʌ tac (Salmo 122:1-4).

Yambʌ bajcheʼ mi mejlel a pʼʌtʼesan bajcheʼ añet a wicʼot Jehová, jiñʌch cheʼ maʼ pʌsben yambʌ quixtañujob jiñi cʌmbil bʌ a chaʼan. Mi cheʼʌch maʼ mel, ñumen lʌcʼʌl mi caj a wubin a bʌ tiʼ tojlel (Mateo 28:19, 20).

MUʼ BɅ MEJLEL A MEL:

• Aqʼuen i yorajlel chaʼan maʼ mel oración yicʼot chaʼan maʼ pejcan jiñi Biblia ti jujumpʼejl qʼuin

• Coltan a familia chaʼan miʼ ñumen acʼ ti ñaxan i chaʼan bʌ Jehová i mach jiñic jach jiñi ñusa bʌ tac

2 UBIN A TIJICÑɅYEL CHEʼ MAʼ MEL JIÑI CHUJUTESAYA TI FAMILIA

MUʼ BɅ YɅL JIÑI BIBLIA: «Lʌcʼtesan laʼ bʌ baʼan Dios. Cheʼ jiñi mi caj i lʌcʼtesan i bʌ baʼ añetla» (Santiago 4:8). Yajcan chuqui ti qʼuin yicʼot chuqui ti ora mi caj laʼ chʌn mel jiñi chʼujutesaya ti familia (Génesis 18:19). Pero mach cojach jiñi: Acʼʌ ti ñuc Dios ti jujumpʼejl qʼuin yicʼot coltan a familia chaʼan pʼʌtʌl miʼ yajñelob tiʼ tojlel. Jiñi Biblia mi yʌl: «Subeñob[i chaʼan bʌ Jehová] [...] cheʼ yaʼ añetla ti laʼ wotot, yicʼot cheʼ woliyetla ti xʌmbal ti bij, yicʼot cheʼ mi laʼ cajel ti wʌyel, yicʼot cheʼ mi laʼ chaʼ chʼojyel» (Deuteronomio 6:6, 7). Jiñi muʼ bʌ a ñaʼtan cheʼʌch yom bajcheʼ tsaʼ bʌ i yʌlʌ Josué: «Pero joñon yicʼot jiñi añoʼ bʌ ti cotot mi caj lac chʼujutesan lac Yum [Jehová]» (Josué 24:15).

MUʼ BɅ MEJLEL A MEL:

• Chajpan yicʼot tsʼijban chuqui jiñi muʼ bʌ caj a pʌsbeñob ti jujuntiquilob yaʼ ti a familia