¿Muʼ ba i mejlel i coltañon jiñi Biblia?

¿CHUQUI MAʼ MEL JATETIC?

Ñaʼtancu iliyi: David woli (choncol) i ñijcan majlel i carro yaʼ baqui mach cʌmbilic i chaʼan. Cheʼ bʌ miʼ qʼuelben i cʼabaʼ jiñi calle yicʼot cheʼ bʌ miʼ qʼuel jiñi otot tac, miʼ cʼotel i ñaʼtan chaʼan tiʼ sʌtʌ i bʌ. Tajol maʼañic tsiʼ qʼuele bajcheʼ ora tsiʼ chʼʌmʌ yambʌ bij.

Cheʼ jatetic, ¿chuqui maʼ mel?

WAʼLEN A ÑAʼTAN

Miʼ mejlel a:

1. Cʼajtin bajcheʼ maʼ mejlel ti cʼotel.

2. Cʼʌn jumpʼejl mapa o GPS.

3. Bej ñijcan majlel jinto maʼ taj yaʼ baqui a wom majlel.

Wen tsiquil chaʼan mach jiñic yom maʼ mel jiñi opción C.

Ñumen wen jiñi opción B: Maʼ cʼʌn jumpʼejl mapa o GPS muʼ bʌ i mejlel i coltañet chaʼan maʼ cʼotel yaʼ baqui a wom majlel.

Jiñi Biblia cheʼʌch miʼ mejlel i coltañet jaʼel bajcheʼ jiñi.

Jiñi libro ñumen chombil bʌ miʼ mejlel:

• I coltañet cheʼ bʌ maʼ ñusan wocol tac.

• I coltañet a wen cʌn a bʌ yicʼot chaʼan miʼ ñumen tojʼan a melbal.

• I cʌntesañet bajcheʼ yom maʼ chumtʌl ti wen.

I JACʼBAL JIÑI ÑUC TAC BɅ CʼAJTIYA

Cheʼ bʌ alʌlontola, mi lac tech lac mel cʼajtiya tac:

• ¿Chucoch azul jiñi panchan?

• ¿Chuqui tsaʼ cʼʌjñi ti mejlel jiñi ecʼ tac?

Ti wiʼil mi lac tech la mel cʼajtiya tac chaʼan jiñi muʼ bʌ i yujtel:

• ¿Chucoch mi lac taj wocol tac?

• ¿Chucoch mi lac chʌmel?

¿A wujilix ba chaʼan jiñi Biblia miʼ yʌqʼuen i jacʼbal ili cʼajtiya tac?

Cabʌl miʼ yʌlob chaʼan jiñi Biblia cojach miʼ yʌl cuento tac, leyenda tac, chaʼan jumpʼejlʌch libro ñoxix bʌ o wocol bʌ tiʼ chʼʌmbentel isujm. Pero ¿isujm ba jiñi? ¿Isujm ba muʼ bʌ i yʌlob chaʼan jiñi Biblia? ¿Mach ba ti ca weñic bajcheʼ ubibilob i chaʼan?

Jumpʼejl ejemplo: Jiñi quixtañujob miʼ ñopob chaʼan jiñi Biblia miʼ yʌl chaʼan Dios an tiʼ cʼʌb ili pañimil. Pero ¿am ba i sujmlel jiñi? Ili pañimil wen an jach ti wocol. Baqui jach mi laj qʼuel cʼuxyajiyel, ilaya wocol, cʼamʌjel, chʌmel, pʼumpʼuñiyel yicʼot i jisʌntel chuqui an. ¿Muʼ ba i mejlel i mel iliyi juntiquil Dios yujil bʌ cʼuxbiya?

¿Muʼ baʼ mulan a ñaʼtan majqui woliʼ yuman ili pañimil? I jacʼbal muʼ bʌ i yʌcʼ jiñi Biblia mi caj i yʌcʼ ti toj sajtel a pusicʼal.

Tajol tsaʼ qʼuele chaʼan loqʼuen ti Biblia jiñi ticʼojel tac am bʌ ti ili folleto. Jiñi i testigojob Jehová wen yujilob chaʼan jiñi Biblia miʼ mejlel ti ñojpel chuqui miʼ yʌl come ‹chʼoyol ti Dios pejtelel i Tsʼijbujel, i cʼʌjñibal ti cʌntesa chaʼan lac ticʼol, chaʼan lac tojʼesʌntel yicʼot chaʼan mi lac mel chuqui toj› (2 Timoteo 3:16, 17). Aqʼuen i yorajlel chaʼan maʼ cʌn ili libro wen wajalix bʌ tsʼijbunti yicʼot anto bʌ cʼʌjñibal ili ora.