I yángel Dios miʼ cʌntan Ezequías

Jiñi asiriojob tsiʼ chʼʌmbeyob i yumʌntel jiñi 10 tribu i chaʼan Israel. Senaquerib, i rey Asiria, yom i chʼʌm jaʼel jiñi yambʌ chaʼpʼejl tribu i chaʼan Judá. Jin chaʼan tsaʼ caji i chʼʌm ti jujumpʼejl jiñi tejclum tac yaʼ ti Judá. Jiñi tejclum muʼ bʌ i ñumen mulan jiñʌch Jerusalén. Pero mach yujilic chaʼan Jehová woli (choncol) i cʌntan jiñi tejclum.

Ezequías, i rey Judá, tsiʼ yʌqʼue cabʌl taqʼuin jiñi Senaquerib chaʼan maʼañic miʼ contrajin Jerusalén. Senaquerib tsiʼ chʼʌmʌ jiñi taqʼuin, pero tsiʼ wersa choco majlel i soldadojob chaʼan miʼ contrajiñob. Wen mucʼob ti bʌqʼuen yaʼ ti Jerusalén come woliʼ ñumen lʌcʼtesañob i bʌ jiñi asiriojob. Ezequías tiʼ subeyob: «Mach laʼ chaʼlen bʌqʼuen. Pʼʌtʌlobʌch jiñi asiriojob, pero Jehová mi caj i ñumen pʼʌtʼesañonla».

Senaquerib tsiʼ choco majlel Rabsaqué chaʼan miʼ wajlen jiñi wiñicob xʼixicob (quixtañujob) yaʼ ti Jerusalén. Rabsaqué tsaʼ waʼle yaʼ tiʼ pat Jerusalén i cʼam tsaʼ yʌlʌ: «Jehová mach mejlic i coltañetla. Mach laʼ wʌcʼ laʼ bʌ chaʼan miʼ lotiñetla Ezequías. Maʼañic dios muʼ bʌ i mejlel i coltañetla ti lon c tojlel».

Ezequías tsiʼ cʼajtibe Jehová chuqui yom miʼ mel i Jehová tsiʼ jacʼbe: «Mach a bʌcʼñan chuqui miʼ subeñet rabsaqué. Senaquerib maʼañic mi caj i contrajin Jerusalén». Ti wiʼil, Ezequías tsaʼ aqʼuenti jumpʼejl carta tsaʼ bʌ i chocbe majlel Senaquerib, jiñi carta miʼ yʌl cheʼi: «Acʼʌ laʼ bʌ. Jehová mach mejlic i coltañetla». Cheʼ jiñi Ezequías tsiʼ pejca Dios: «Jehová, a wocolic, coltañon lojon, chaʼan miʼ luʼ ñaʼtañob chaʼan jatet jach jiñi isujm bʌ Dios». Jehová tsiʼ jacʼbe: «I rey Asiria maʼañic mi caj i yochel ti Jerusalén. Mi caj j coltan c tejclum».

Senaquerib tsiʼ lon ñaʼta chaʼan mach jalix mi caj i jisan Jerusalén. Pero ti jumpʼejl bʌ acʼʌlel, Jehová tsiʼ choco majlel juntiquil ángel yaʼ tiʼ pat jiñi tejclum, yaʼ baqui jijlemob. ¡Jiñi ángel tiʼ tsʌnsa 185 mil soldadojob! Tsaʼ chʌmi ñumen pʼʌtʌl bʌ i wiñicob Senaquerib, jin chaʼan tsaʼ sujti majlel tiʼ yotot. Jehová tsiʼ colta Ezequías yicʼot Jerusalén, cheʼ bajcheʼ tsiʼ wʌn alʌ. Cheʼ yaʼic añet ti Jerusalén ti jiñi bʌ ora, ¿tsaʼ baʼ wʌcʼʌ ti ñuc i tʼan Jehová?