Elisabet añix i yalobil

Jiñi motomaj Zacarías yicʼot i yijñam i cʼabaʼ Elisabet, chumulob tiʼ tʼejl Jerusalén. Ñumeñix 400 jab cheʼ bʌ tsaʼ chaʼ tojʼesʌnti i murojlel Jerusalén. Zacarías yicʼot Elisabet cabʌlix jab ñujpuñemob, pero maʼañobic i yalobil. Ti jumpʼejl bʌ qʼuin, cheʼ bʌ Zacarías woliʼ pul pom yaʼ ti templo, tsiʼ pʌsbe i bʌ jiñi ángel Gabriel. Zacarías tsaʼ wen bʌcʼña, pero Gabriel tiʼ sube: «Mach a chaʼlen bʌqʼuen. Woli c chʼʌmbeñet tilel wem bʌ tʼan tilem bʌ ti Jehová. A wijñam, mi caj i yʌcʼ ti pañimil juntiquil alʌl, i cʼabaʼ miʼ cajel jiñʌch Juan. Jehová tsiʼ yajca Juan chaʼan miʼ mel wen ñuc bʌ eʼtel». Zacarías tsiʼ yʌlʌ: «¿Bajcheʼ mic ñaʼtan mi isujmʌch woli bʌ a wʌl? Quijñam yicʼot joñon mach mejlix cʌcʼ lon calobil come añix lon c jabilel». Gabriel tsiʼ jacʼbe: «Dios tsiʼ chocoyon tilel chaʼan mic subeñet ili wem bʌ tʼan. Pero maʼañic tsaʼ wʌcʼʌ ti ñuc, maʼañic mi caj a mejlel ti tʼan cʼʌlʌl jinto miʼ yilan pañimil jiñi alʌl».

Zacarías jalto tsaʼ ñumen cʌyle yaʼ ti templo. Cheʼ bʌ tsaʼ loqʼui tilel, jiñi woli bʌ i pijtañob yaʼ ti jumpat yom i ñaʼtañob chuqui tsaʼ ujti. Pero Zacarías maʼañic tsaʼ mejli ti tʼan, cojach tsaʼ mejli i ñijcan i cʼʌb. Cheʼ jiñi tsiʼ ñaʼtayob chaʼan tsaʼ aqʼuenti jumpʼejl tʼan tilem ti Dios.

Ti wiʼil, Elisabet tsaʼ caji i cʌntan alʌl i tsaʼ yʌcʼʌ ti pañimil alʌ chʼiton, cheʼʌch tsaʼ ujti bajcheʼ ti yʌlʌ jiñi ángel. I amigojob yicʼot i familiajob Elisabet tsaʼ tili i cʌñob jiñi alʌl i tijicña tsaʼ yubiyob. Elisabet tsiʼ yʌlʌ: «Juan i cʼabaʼ miʼ cajel». Tsiʼ jacʼbeyob: «Maʼañic cheʼ bʌ i cʼabaʼ bajcheʼ jiñi ti a familia. Otsʌbenla Zacarías, cheʼ bajcheʼ i tat». Pero Zacarías tiʼ tsʼijbu: «I cʼabaʼ jiñʌch Juan». Ti jiñi bʌ ora, Zacarías tsaʼ chaʼ mejli ti tʼan. Tsaʼ tsictiyi tiʼ pejtelel Judea jiñi alʌl, i tsiʼ cʼajtibeyob i bʌ: «¿Chuqui mi caj i mel jiñi alʌl cheʼ bʌ miʼ colel?».

Cheʼ jiñi, Zacarías tsaʼ bujtʼi ti chʼujul bʌ espíritu i tsaʼ yʌlʌ jumpʼejl profecía: «¡Laʼ lac ñuqʼuesan Jehová come tsiʼ yʌqʼue i tʼan Abraham chaʼan mi caj i choc tilel juntiquil xcoltaya, jiñi Mesías, chaʼan miʼ coltañonla. Juan jiñʌch juntiquil xʼaltʼan muʼ bʌ caj i chajpan chaʼan miʼ yʌc ti cʌñol jiñi Mesías».

Tsaʼ ujti jaʼel lʌcʼʌ lajal bʌ bajcheʼ iliyi tiʼ tojlel juntiquil i familia Elisabet, i cʼabaʼ María. Mi caj laj qʼuel ti yambʌ cʌntesʌntel.