Maʼañic chuqui miʼ mʌctañob

Juntiquil wiñic mach bʌ yujilic xʌmbal tiʼ pejtelel ora miʼ buchtʌl i cʼajtin taqʼuin yaʼ tiʼ tiʼ jiñi templo. Ti ochʼajel qʼuin tsiʼ qʼuele chaʼan yaʼ cʼotel Pedro yicʼot Juan yaʼ ti templo, i tiʼ subeyob: «Laʼ wocolic, aqʼueñonla taqʼuin». Pedro tsiʼ jacʼbe: «Miʼ mejlel cʌqʼueñet ñumen wem bʌ bajcheʼ taqʼuin. Tiʼ cʼabaʼ Jesús, ¡tejchen, chaʼlen xʌmbal!». Cheʼ jiñi, Pedro tsiʼ colta chaʼan miʼ chʼojyel, i jiñi wiñic tsaʼ caji ti xʌmbal. Jiñi wiñicob xʼixicob (quixtañujob) tsiʼ wen ubiyob i tijicñʌyel cheʼ bʌ tsiʼ qʼueleyob jiñi milagro i cabʌl tsaʼ sujtiyob ti xcʌntʼan.

Pero jiñi motomajob yicʼot saduceojob tsaʼ wen michʼayob. Tsiʼ chucuyob jiñi apóstolob, tsiʼ pʌyʌyob majlel yaʼ ti Sanedrín, yaʼ baqui añob jiñi ñaxam bʌ miʼ yʌcʼob i bʌ ti ñopbalʌl, i tsiʼ cʼajtiyob: «¿Baqui tsaʼ laʼ taja laʼ pʼʌtʌlel chaʼan mi laʼ tsʼʌcan jiñi wiñic?». Pedro tsiʼ jacʼʌ: «Tiʼ pʼʌtʌlel Jesucristo, jiñi wiñic tsaʼ bʌ laʼ tsʌnsa». Jiñi ñaxam bʌ miʼ yʌcʼob i bʌ ti ñopbalʌl tsiʼ yʌlʌyob ti cʼam bʌ tʼan: «¡Cʌyʌ laʼ wʌl Jesús!». Jiñi apóstolob tsiʼ yʌlʌyob: «Wersa mic sub lojon chuqui tsiʼ mele. Maʼan mi caj j cʌy lon c sub».

Cheʼ jiñi, Pedro yicʼot Juan tsaʼ cojliyob, i tsaʼ majliyob i suben jiñi yambʌ xcʌntʼañob chuqui tsaʼ ujti. Tsiʼ pejcayob Jehová: «A wocolic, aqʼueñon lon c chʼejlel chaʼan mi lon c chʌn sub a cʼabaʼ». Jehová tsaʼ yʌqʼueyob chʼujul bʌ espíritu, i tsaʼ bej cajiyob ti subtʼan yicʼot ti tsʼʌcaya. Tsaʼ caji ti pʼojlel xñoptʼañob. Jiñi saduceojob tsiʼ wen tsʼaʼle jiñi apóstolob, jin chaʼan tsiʼ yotsayob ti cárcel. Pero ti acʼʌlel, Jehová tsiʼ choco majlel juntiquil ángel chaʼan miʼ jamben i puertajlel jiñi cárcel i tiʼ subeyob: «Chaʼ cucula ti templo i chaʼlenla subtʼan yaʼi».

Cheʼ bʌ tsaʼ sʌcʼa pañimil, an majqui tsaʼ majli i sub yaʼ ti Sanedrín: «¡Jiñi cárcel ñupʼulʌch ti llave, pero jiñi wiñicob maʼañix tsiquilob! ¡Yaʼix añob ti subtʼan ti templo!». Jin chaʼan, tsiʼ chaʼ chucuyob jiñi apóstolob, i tsiʼ pʌyʌyob majlel yaʼ ti Sanedrín. Jiñi ñuc bʌ motomaj tsiʼ yʌlʌ: «¡Tsaʼix c subeyetla chaʼan maʼañix mi laʼ chʌn chaʼlen cʌntesa tiʼ cʼabaʼ Jesús!». Pedro tsiʼ jacʼʌ: «Wersa mic jacʼben lojon i mandar Dios anquese miʼ ñusʌntel i mandar wiñicob».

Jiñi ñaxam bʌ miʼ yʌcʼob i bʌ ti ñopbalʌl tsaʼ michʼayob i yomix i tsʌnsañob jiñi apóstolob. Pero tsaʼ waʼle juntiquil fariseo i cʼabaʼ Gamaliel i tsiʼ yʌlʌ: «Wen ñaʼtan chuqui woli laʼ wʌl! ¿Ixcu mi yicʼotʌch Dios ili wiñicob? ¿A wom ba laʼ contrajin Dios?». Tsiʼ jacʼbeyob i tʼan Gamaliel i tsiʼ coloyob, pero tsiʼ ñaxan jatsʼʌyob ti teʼ i tsiʼ chaʼ subeyob chaʼan miʼ cʌyob subtʼan. Pero jiñi maʼañic tsiʼ mʌctayob. Tsaʼ chʌn cajiyob ti subtʼan yaʼ ti templo yicʼot ti otot tac.