CɅNTESɅNTEL 53
Aqʼuen i tijicñʌyel Jehová cheʼ maʼ yajcan ti wen jiñi a ñusaqʼuin tac
Jehová jiñʌch «jiñi tijicña bʌ Dios» (1 Timoteo 1:11). Yom chaʼan tijicñayonla yicʼot chaʼan mi lac ñusan lac bʌ. Miʼ mulan cheʼ mi laj cʼaj la co chaʼan la queʼtel (lac troñel) yicʼot cheʼ mi lac tijicñesan lac bʌ. Ti ili cʌntesʌntel, mi caj laj cʌn bajcheʼ miʼ mejlel laj cʼʌn ti wen jiñi i yorajlel am bʌ lac chaʼan i cheʼ jiñi mi la cʌqʼuen i tijicñʌyel Jehová.
1. ¿Chuqui yom mi lac chʼʌm ti ñuc cheʼ bʌ woli lac yajcan lac ñusaqʼuin?
¿Chuqui maʼ mulan a mel chaʼan maʼ cʼaj a wo yicʼot maʼ tijicñesan a bʌ? An muʼ bʌ i pejcañob jumpʼejl libro yaʼ tiʼ yotot, miʼ ñʌchʼtañob música, miʼ qʼuelob jumpʼejl película o miʼ yochelob ti internet. I an muʼ bʌ i majlelob ti xʌmbal yicʼot i yamigojob, miʼ majlelob ti ñuxijel o miʼ chaʼleñob alas. Mach yʌlʌyic chuqui mi lac mulan lac mel, yomʌch mi lac chaʼlen wersa laj qʼuel chaʼan jiñi muʼ bʌ lac yajcan «miʼ mulan lac Yum» (Efesios 5:10). Ñuc i cʼʌjñibal cheʼ mi lac chʼʌmben i sujm iliyi. ¿Chucoch? Come cabʌl chuqui miʼ mulañob jiñi lac piʼʌlob yaʼ ochem jiñi muʼ bʌ i tsʼaʼlen Jehová, bajcheʼ jiñi jontolil, jiñi tsʼiʼlel o i chaʼan tac bʌ xibajob (pejcan Salmo 11:5). ¿Chuqui mi caj i coltañonla chaʼan wen mi lac yajcan jiñi lac ñusaqʼuin tac?
Mi mucʼʌch lac yajcan wem bʌ la camigojob muʼ bʌ i cʼuxbiñob Jehová, mi caj i coltañoñobla chaʼan mi lac yajcan ti wen jiñi lac ñusaqʼuin tac. Cheʼ bajcheʼ tsaʼ laj qʼuele ti jiñi cʌntesʌntel 48, «jini muʼ bʌ i piʼleñob majlel jini weñoʼ bʌ i pusicʼal mucʼʌch i tajob i ñaʼtʌbal». Pero jiñi muʼ bʌ i ñochtañob jiñi maʼañic bʌ miʼ jacʼbeñob i mandar tac Jehová «miʼ yutsi pʼojlel i mul» (Proverbios 13:20).
2. ¿Chucoch ñuc i cʼʌjñibal cheʼ pʼisbil jach mi la cʌqʼuen i yorajlel jiñi lac ñusaqʼuin tac?
Anquese weñʌch jiñi lac ñusaqʼuin tac, yom mi lac chaʼlen wersa chaʼan maʼañic mi laj cʌlʌx aqʼuen yorajlel. Come mi tsaʼ lac mele, maʼañix mi caj lac tajben i yorajlel chaʼan mi lac mel jiñi ñumen ñuc tac bʌ i cʼʌjñibal. Jiñi Biblia miʼ subeñonla chaʼan yom mi laj cʼʌn ti wen jiñi i yorajlel am bʌ lac chaʼan (pejcan Efesios 5:15, 16).
LAʼ LAC ÑUMEN ÑAʼTAN
Laʼ laj qʼuel chuqui miʼ mejlel a mel chaʼan maʼ yajcan ti wen jiñi a ñusaqʼuin tac.
3. Mach a yajcan jiñi ñusaqʼuin tac mejl bʌ i ticʼlañet
¿Chucoch yomʌch mi lac yajcan ti wen jiñi lac ñusaqʼuin tac? Qʼuelela jiñi VIDEO i tem alʌla iliyi:
¿Bajcheʼ lajal jiñi ñusaqʼuin tac am bʌ ili ora yicʼot jiñi alas tac tsaʼ bʌ ujti ti wajali yaʼ ti Roma?
Cheʼ bajcheʼ tsaʼ qʼuele ti jiñi video, ¿chuqui tsiʼ cʌñʌ Danny chaʼan jiñi ñusaqʼuin tac?
Pejcanla Romanos 12:9 i tem alʌla iliyi:
¿Bajcheʼ miʼ coltañonla ili versículo chaʼan mi lac yajcan ti wen jiñi lac ñusaqʼuin tac?
¿Chuqui tac jiñi muʼ bʌ i tsʼaʼlen Jehová? Pejcanla Proverbios 6:16, 17 yicʼot Gálatas 5:19-21. Cheʼ bʌ tsaʼix laʼ pejca jujumpʼejl texto, tem alʌla iliyi:
Tiʼ pejtelel muʼ bʌ i yʌl ili texto, ¿baqui tac bʌ an a wen qʼuele ti jiñi ñusaqʼuin tac am bʌ ili ora?
¿Bajcheʼ miʼ mejlel a yajcan ti wen jiñi a ñusaqʼuin tac?
Cʼajtiben a bʌ:
¿Muʼ ba i chʼʌm tilel muʼ bʌ i tsʼaʼlen Jehová?
¿Muʼ ba i mʌctañon chaʼan mic mel jiñi ñumen ñuc tac bʌ i cʼʌjñibal?
¿Muʼ ba i yʌqʼueñon c ñochtan jiñi lac piʼʌlob maʼañic bʌ miʼ cʼuxbiñob Jehová?
Chaʼan maʼañic chuqui mi lac chaʼlen yom mi lac chaʼlen wersa chaʼan mi lac ñajtʼesan lac bʌ ti jumpʼejl wocol. Jin chaʼan, yomʌch mi lac ñajtʼesan lac bʌ ti jiñi ñusaqʼuin tac mejl bʌ i ticʼlañonla.
4. Cʼʌñʌ ti wen jiñi yorajlel am bʌ a chaʼan
Qʼuelela jiñi VIDEO i tem alʌla iliyi:
Anquese jiñi hermano ti jiñi video maʼañic woliʼ mel mach bʌ weñic, ¿bajcheʼ woliʼ ticʼlan jiñi i ñusaqʼuin tac?
Pejcanla Filipenses 1:10 i tem alʌla iliyi:
¿Bajcheʼ miʼ mejlel i coltañonla ili versículo chaʼan mi lac ñaʼtan bajcheʼ cʼamel i yorajlel mi caj la cʌqʼuen jiñi lac ñusaqʼuin tac?
5. Yajcan wem bʌ a ñusaqʼuin
I sujmʌch chaʼan an ñusaqʼuin tac maʼañic bʌ miʼ mulan Jehová, pero an mucʼʌch bʌ, i joñonla miʼ mejlel lac ñusan lac bʌ ti jiñi ñusaqʼuin weñʌch bʌ miʼ qʼuel. Pejcanla Eclesiastés 8:15 yicʼot Filipenses 4:8, i tem alʌla iliyi:
¿Chuqui wem bʌ ñusaqʼuin tac maʼ mulan?
Miʼ mejlel la cubin lac tijicñʌyel ti wem bʌ ñusaqʼuin tac.
AN MUʼ BɅ I YɅLOB: «Maʼañic i wocolel jiñi ñusaqʼuin tac muʼ bʌ i chʼʌm tilel i chaʼan bʌ xibajob, chaʼan bʌ jontolil o piʼleya, i wocolel jiñʌch cheʼ mi lac mel».
Ixcu jatet, ¿chuqui maʼ wʌl?
TSAʼ BɅ LAJ CɅÑɅ
Jehová yom chaʼan mi lac yajcan wem bʌ ñusaqʼuin tac i cheʼ jiñi mi lac ñusan lac bʌ.
¿Chuqui tsaʼ cʌñʌ?
¿Chuqui ti ñusaqʼuin tac maʼañic mi lac mel jiñi xñoptʼañonbʌla?
¿Chucoch yom pʼisbil jach mi la cʌqʼuen i yorajlel jiñi lac ñusaqʼuin tac?
¿A wom baʼ yajcan ti wen jiñi ñusaqʼuin tac wem bʌ miʼ qʼuel Jehová? ¿Chucoch?
CɅÑɅ YAN TAC BɅ
Qʼuele majqui an tiʼ wenta i yajcan jiñi lac ñusaqʼuin tac.
Qʼuele bajcheʼ miʼ mejlel lac yajcan ti wen jiñi lac ñusaqʼuin tac.
«¿Wem ba jiñi lac ñusaqʼuin tac?» (Lac Tsictesʌbentel, 15 i chaʼan octubre, 2011)
Qʼuele bajcheʼ juntiquil wiñic tsiʼ cʌyʌ jiñi ñusaqʼuin tac mach bʌ weñic, pejcan jiñi tema «Tsaʼ j cʌyʌ c tsʼaʼlen jiñi sʌcoʼ bʌ i pʌchʌlel».
«Jiñi Biblia tsiʼ qʼuextʌbeyob i pensar» (Lac Tsictesʌbentel, 1 i chaʼan febrero, 2010)
Qʼuele chuqui tsiʼ mele juntiquil xʼixic cheʼ bʌ tsiʼ qʼuele jumpʼejl película chaʼan bʌ xibajob.
Tsʼaʼlen jiñi ñusaqʼuin tac muʼ bʌ i chʼʌm tilel i chaʼan bʌ xibajob (2:02)