CɅNTESɅNTEL 55
Coltan a congregación
Tiʼ pejtelel pañimil (mulawil), yonlel lac piʼʌlob tijicña woli (choncol) i chʼujutesañob Jehová ti cabʌl congregación tac. Ili xñoptʼañob miʼ wen qʼuelob ti ñuc jiñi ticʼojel muʼ bʌ i yʌqʼuentelob, i ti jumpʼejlob i pusicʼal miʼ chaʼleñob coltaya yaʼ ti congregación. ¿Cheʼ ba maʼ wubin a bʌ jaʼel yaʼ ti a congregación?
1. ¿Bajcheʼ miʼ mejlel a cʼʌn jiñi yorajlel am bʌ a chaʼan yicʼot a pʼʌtʌlel chaʼan maʼ coltan jiñi congregación?
Ti lac pejtelel mi lac mejlel ti coltaya yaʼ ti congregación. Jumpʼejl ejemplo, ¿am ba hermanojob ñoxobix bʌ o cʼamoʼ bʌ ti a congregación? ¿Muʼ ba mejlel a pʌyob majlel ti tempa bʌ? ¿O am ba chuqui yambʌ miʼ mejlel a mel tiʼ tojlelob, tajol cheʼ maʼ coltañob ti mʌñoñel o chaʼan maʼ mel jiñi eʼtel (troñel) tac yom bʌ melol tiʼ yototob? (Pejcan Santiago 1:27). Cheʼ jaʼel, mi lac mejlel lac chaʼlen coltaya tiʼ sʌqʼuesʌntel yicʼot tiʼ tojʼesʌntel jiñi i Yotlel tempa bʌ. Maʼañic majqui miʼ xicʼonla, mi lac mel ti jumpʼejl lac pusicʼal come mi laj cʼuxbin Dios yicʼot jiñi la quermañujob (Salmo 110:3).
Jiñi Testigojob chʼʌmbilix bʌ i chaʼañob jaʼ an tac yambʌ bajcheʼ miʼ mejlelob ti coltaya yaʼ ti congregación. Jiñi hermanojob muʼ bʌ i tsʼʌctesañob muʼ bʌ i cʼajtin jiñi Biblia miʼ mejlelob ti ochel ti siervo ministerial i ti wiʼil bajcheʼ anciano. I ti lac pejtelel, hermanojob yicʼot hermanajob, mi lac mejlel ti ochel bajcheʼ precursor chaʼan mi lac ñumen chaʼlen subtʼan. Cheʼ jaʼel, an hermanojob muʼ bʌ i chaʼleñob coltaya tiʼ melol i yotlel tac chʼujutesaya. I an muʼ bʌ i majlelob ti yambʌ congregación baqui anto yom coltʌntel.
2. ¿Bajcheʼ miʼ mejlel laj cʼʌn lac taqʼuin yicʼot chuqui an lac chaʼan chaʼan mi laj coltan jiñi congregación?
Jiñi Biblia miʼ yʌl: «Chʼujutesan lac Yum. Tʼoxben a chubʌʼan» (Proverbios 3:9). Wen utsʼatax cheʼ miʼ mejlel laj cʼʌn lac taqʼuin yicʼot chuqui an lac chaʼan chaʼan mi laj coltan laj congregación yicʼot jiñi subtʼan tiʼ pejtelel pañimil (pejcan 2 Corintios 9:7). I cheʼ mi la cʌcʼ lac donación mi laj coltan jaʼel jiñi la quermañujob baqui miʼ yujtel wocol. Cabʌlob ñʌmʌlob i «tsʼitaʼ tʼox» i taqʼuin chaʼan miʼ yʌcʼob i donación (pejcan 1 Corintios 16:2). Miʼ mejlel la cʌcʼ yaʼ ti caja tac am bʌ tiʼ Yotlel tempa bʌ o miʼ mejlel lac choc majlel yaʼ ti página chaʼan internet donate.jw.org. Jehová miʼ yʌcʼ chaʼan mi laj cʼʌn jiñi am bʌ lac chaʼan chaʼan mi lac pʌsben laj cʼuxbiya.
LAʼ LAC ÑUMEN ÑAʼTAN
Laʼ laj qʼuel bajcheʼ tac miʼ mejlel a coltan jiñi congregación.
3. Maʼ mejlel a wʌcʼ jiñi a taqʼuin
Jehová yicʼot Jesús miʼ cʼuxbin jiñi muʼ bʌ i yʌcʼob tiʼ tijicñʌyel i pusicʼal. Ti jumpʼejl bʌ qʼuin, Jesús tsiʼ qʼuele chuqui tsiʼ mele juntiquil pʼumpʼum bʌ mebaʼ xʼixic chaʼan miʼ yʌcʼ i donación. Pejcanla Lucas 21:1-4 i tem alʌla iliyi:
¿Yom ba mi la cʌcʼ cabʌl lac taqʼuin chaʼan mi la cʌqʼuen i tijicñʌyel Jehová?
¿Bajcheʼ yubil miʼ yubin i bʌ Jehová yicʼot Jesús cheʼ loqʼuemʌch ti lac pusicʼal jiñi muʼ bʌ la cʌcʼ?
Chaʼan maʼ ñaʼtan bajcheʼ miʼ cʼʌjñel jiñi donación tac, qʼuelela jiñi VIDEO. Cheʼ jiñi tem alʌla iliyi:
¿Bajcheʼ miʼ coltan jiñi congregación tac tiʼ pejtelel pañimil jiñi lac donación muʼ bʌ la cʌcʼ?
4. Maʼ mejlel a chaʼlen coltaya
Jiñi i wiñicob Jehová ti wajali tsiʼ chaʼleyob coltaya yicʼotob i tijicñʌyel chaʼan miʼ tojʼesʌntel yaʼ baqui miʼ chʼujutesʌntel Dios, i mach cojach tsiʼ yʌcʼʌyob i taqʼuin. Pejcanla 2 Crónicas 34:9-11 i tem alʌla iliyi:
¿Chuqui tsiʼ meleyob pejtelel jiñi israelitajob chaʼan miʼ cʌntʌbeñob jiñi i yotot Dios, yom i yʌl, yaʼ baqui miʼ chʼujutesañob Jehová?
Chaʼan maʼ ñaʼtan bajcheʼ miʼ melob jaʼel jiñi i testigojob Jehová ili ora, qʼuelela jiñi VIDEO. Cheʼ jiñi tem alʌla iliyi:
¿Chucoch ñucʌch i cʼʌjñibal cheʼ chʌn sʌc yicʼot cʌntʌbil miʼ yajñel jiñi i Yotlel tempa bʌ?
¿Bajcheʼ maʼ mejlel a chaʼlen coltaya?
5. Jiñi hermanojob miʼ mejlelob i chaʼlen wersa chaʼan miʼ ñumen aqʼuentelob yambʌ eʼtel tac
Jiñi Biblia miʼ suben jiñi xñoptʼañob wiñicoʼ bʌ chaʼan yom miʼ chaʼleñob wersa chaʼan miʼ colelob majlel tiʼ chaʼan bʌ Dios, i cheʼ bajcheʼ jiñi miʼ ñumen coltañob jiñi congregación. Chaʼan maʼ cʌn juntiquil hermano tsaʼʌch bʌ mejli i mel, qʼuelela jiñi VIDEO. Cheʼ jiñi tem alʌla iliyi:
¿Chuqui tac tsiʼ mele Ryan chaʼan miʼ colel tiʼ chaʼan bʌ Dios i miʼ ñumen coltan jiñi congregación?
Jiñi Biblia miʼ yʌl bajcheʼ yilal yomob jiñi hermanojob yomoʼ bʌ ochel ti siervo ministerial yicʼot anciano. Pejcanla 1 Timoteo 3:1-13 i tem alʌla iliyi:
¿Chuqui miʼ cʼajtintel tiʼ tojlel jiñi hermanojob yomoʼ bʌ ochel ti siervo ministerial yicʼot anciano?
¿Bajcheʼ yilal yom jiñi i familiajob? (Qʼuelela jiñi versículo 4 yicʼot 11).
Mi jiñi hermanojob miʼ chaʼleñob wersa i tsʼʌctesañob muʼ bʌ i cʼajtintel tiʼ tojlelob, ¿bajcheʼ mi caj i coltan jiñi congregación?
AN MUʼ BɅ I CAJTIBEÑOÑOBLA: «¿Baqui miʼ tajob taqʼuin jiñi i testigojob Jehová?».
¿Bajcheʼ mi caj a jacʼ?
TSAʼ BɅ LAJ CɅÑɅ
Jehová miʼ wen qʼuel ti ñuc cheʼ mi lac chaʼlen wersa laj cʼʌn jiñi i yorajlel am bʌ lac chaʼan, lac pʼʌtʌlel yicʼot lac taqʼuin chaʼan mi laj coltan jiñi congregación.
¿Chuqui tsaʼ cʌñʌ?
¿Bajcheʼ miʼ mejlel laj cʼʌn jiñi i yorajlel am bʌ lac chaʼan yicʼot lac pʼʌtʌlel chaʼan mi laj coltan jiñi congregación?
¿Bajcheʼ miʼ mejlel laj cʼʌn jiñi an tac bʌ lac chaʼan chaʼan mi laj coltan jiñi congregación?
¿Bajcheʼ a wom a coltan jatet jiñi congregación?
CɅÑɅ YAN TAC BɅ
Qʼuele chucoch Dios maʼañix miʼ pijtan chaʼan jiñi i wiñicob miʼ yʌcʼob jiñi diezmo.
«¿Chuqui miʼ yʌl jiñi Biblia chaʼan jiñi diezmo?» (Tema am bʌ ti jw.org)
Jiñi Biblia miʼ yʌl chaʼan an eʼtel tac yom jach bʌ miʼ melob jiñi wiñicob chʼʌmʌlix bʌ i chaʼañob jaʼ. Pero ¿chuqui miʼ yujtel mi juntiquil hermana yom miʼ mel jiñi eʼtel tac?
«Jiñi eʼtel tac am bʌ yaʼ ti congregación» (Lac Tsictesʌbentel, febrero 2021)
Cʌñʌ jiñi Testigojob muʼ bʌ i chaʼleñob wersa chaʼan miʼ chʼʌmbeñob majlel jun tac jiñi hermanojob.
Qʼuele chaʼan jiñi i testigojob Jehová mach lajalic baqui miʼ tajob taqʼuin cheʼ bajcheʼ miʼ melob jiñi yambʌ ñopbalʌl tac.