TEMAJ AM BɅ TIʼ TEJCHIBAL | ¿AM BA I TSʼɅCAL JIÑI CɅLɅX PENSAL?
Tiʼ pejtelel pañimil an cʌlʌx pensal
«Cheʼ bʌ tsajñi c mʌn bʌlñʌcʼʌl, cojach galleta tsac taja, pero ñumen lets i tojol bajcheʼ ti ñaxan. Tiʼ yijcʼʌlel, jilemix tiʼ pejtelel.» (Paul, Zimbabue)
«Jiñi c ñoxiʼal tsiʼ subeyon chaʼan mi caj i cʌyon lojon. Muqʼuix caj c chʌmel tsaʼ cubi. ¿Chuqui mi caj i yujtel tiʼ tojlel calobilob?» (Janet, Estados Unidos)
«Cheʼ bʌ miʼ sub i bʌ jiñi alarma chaʼan guerra, ti ora mic majlel c mujcun c bʌ i mic choc c bʌ ti lum jinto miʼ yujtel i chocob jiñi bomba. I anquese tsaʼix ñumi, chʌn tsiltsilñayon to ti bʌqʼuen.» (Alona, Israel)
Ili ora an cabʌl wocol. «I yorajlel bʌbʌqʼuen tac bʌ.» (2 Timoteo 3:1.) An cabʌl muʼ bʌ i cʼojoʼtañob (pensaliñob) jiñi taqʼuin, jiñi guerra, cʼamʌjel pam pujquem bʌ yicʼot jiñi tsʌts bʌ icʼ jaʼal tac i tilelʌch bʌ miʼ yujtel o chaʼan tiʼ caj chuqui miʼ mel wiñicob xʼixicob (quixtañujob). Yambʌ jiñʌch chaʼan chuqui miʼ pensaliñob ti jujuntiquil. An muʼ bʌ i bʌcʼñañob subentel ti doctor chaʼan añob i cáncer. Yañoʼ bʌ miʼ cʼojoʼtañob chuqui mi caj i melob i yalobil yicʼot i butsob (mam) ti talto bʌ qʼuin.
I tilelʌch cheʼ mi laj cʼojoʼtan tiʼ pejtelel jiñi. Tajol mi laj cʼojoʼtan cheʼ mi caj lac mel jumpʼejl examen, cheʼ mi laj cajel ti tʼan baqui an cabʌl quixtañu o cheʼ mi lac melbentel cʼajtiya tac chaʼan jumpʼejl eʼtel. Cheʼ mucʼʌch lac tsʼitaʼ ñaʼtan jiñi, miʼ coltañonla chaʼan maʼañic mi lac yajlel ti wocol. Pero mi tsaʼ caji laj cʌlʌx cʼojoʼtan, miʼ mejlel i ticʼlañonla. Jumpʼejl estudio tsaʼ bʌ melbentiyob ñumen ti 68,000 quixtañu ñucobix bʌ tsiʼ pʌsʌ chaʼan anquese tsʼitaʼ jach mi laj cʼojoʼtan lac bʌ, miʼ mejlel i tsʌnsañonla cheʼ maxto i yorajlelic. Jin chaʼan Jesucristo tsiʼ yʌlʌ: «¿Majqui miʼ mejlel ti colel junxujcʼubʌyel chaʼañ ti cabʌl mel pusicʼal?». Anquese mi lac wen chaʼlen mel pusicʼal mach yomic i yʌl chaʼan mi caj lac ñumen jalʼan. Jin chaʼan tsiʼ yʌcʼʌ ili ticʼojel: «Mach mi laʼ mel laʼ pusicʼal» (Mateo 6:25, 27, Jiñi tsijiʼ bʌ wen tʼañ). Pero ¿am ba chuqui miʼ mejlel lac mel chaʼan maʼañic mi lac wen chaʼlen cʼojol?
Yom mi laj cʼajtiben i coltaya Dios i mi lac ñop chuqui albil bʌ i chaʼan. Mi caj laj qʼuel bajcheʼ tsiʼ colta Paul, Janet yicʼot Alona iliyi chaʼan maʼañix miʼ wen cʼojoʼtañob i bʌ. Anquese maʼañic woli lac ñusan jumpʼejl wocol bajcheʼ jiñi, ¿muʼ ba i mejlel laj cʌl chaʼan maʼañic mi caj i tajonla ti talto bʌ qʼuin?