¿Muʼ ba caj laj qʼuel jumpʼejl pañimil baqui maʼañix ticʼlʌntel?

WERSA BɅ PIʼLENTEL YICʼOT TICʼLɅNTEL TI OTOT. Jumpʼejl informe i chaʼan jiñi Naciones Unidas miʼ yʌl chaʼan «ti uxʼuxtiquil xʼixic an juntiquil muʼ bʌ i jajtsʼel o wersa bʌ miʼ piʼlentel tiʼ ñoxiʼal». Chʼijiyemtic jax come «miʼ ñaʼtʌntel chaʼan tiʼ pejtelel pañimil, ti joʼjoʼtiquil xʼixic an juntiquil muʼ bʌ caj i ticʼlʌntel o mi caj i ñojpel i ticʼlʌntel».

XMEL JONTOLILOB TI CALLE. Jiñi xmotin xʌmbalob muʼ bʌ i melob ñumel wocol ti Estados Unidos miʼ yʌjlel chaʼan ñumen ti 30,000. Ti Latinoamérica, ti uxʼuxtiquil quixtañu an cheʼ bʌ juntiquil tsaʼ bʌ ticʼlʌnti o tsaʼ wen jajtsʼi.

TSɅNSA. Cheʼ ti 2012, miʼ ñaʼtʌntel chaʼan cojach ti jiñi bʌ jabil tsaʼ tsʌnsʌntiyob lʌcʼʌ cheʼ bʌ 500 mil quixtañu tiʼ pejtelel pañimil, ñumen cabʌl cheʼ bajcheʼ tsaʼ bʌ chʌmiyob tiʼ caj guerra. Ti Centroamérica yicʼot ti país tac am bʌ ti África del Sur yaʼʌch baqui ñumen cabʌl tsaʼ tsʌnsʌntiyob, ti 100 mil quixtañu cheʼ bʌ 26 o 30 tsaʼ bʌ chʌmiyob. Ti Latinoamérica, ñumen ti 100 mil tsaʼ bʌ tsʌnsʌntiyob ti jumpʼejl jab, ti Brasil cheʼ bʌ 50 mil. ¿Anto ba bajcheʼ miʼ mejlel ti jisʌntel ili ticʼlʌntel?

¿MUʼ BA I MEJLEL TI JISɅNTEL JIÑI TICʼLɅNTEL?

¿Chucoch wen pʼojlemix? Cabʌl chuqui tiʼ caj, mach junlajalic bajcheʼ yilal miʼ qʼuejlel jiñi wiñicob xʼixicob (quixtañujob) i mach junlajal añob i taqʼuin, jiñi tsʼaʼleya, jiñi droga tac, jiñi lembal, cheʼ bʌ colel to mucʼob tsiʼ qʼueleyob bajcheʼ yilal i melbal yambʌlob i come maʼañic chuqui miʼ tumbentelob yilal jiñi jontoloʼ bʌ.

Miʼ mejlel la cʌl chaʼan añʌch tejclum tac baqui mach wen cabʌlix miʼ yujtel tsʌnsa. Jumpʼejl jiñʌch jiñi tejclum São Paulo ti Brasil, baqui cabʌl xchumtʌlob, ti jiñi cojix bʌ 10 jab ñumen bʌ an juben cheʼ bʌ 80% jiñi tsʌnsa. Pero cabʌl to yambʌ chuqui miʼ yujtel yaʼ ti tejclum, ti 100 mil quixtañujob anto 10 muʼ bʌ i chʌmelob. Cheʼ jiñi, ¿chuqui yom melol chaʼan miʼ junyajlel jilel jiñi jontolil?

Chaʼan miʼ junyajl jilel, tiʼ pejtelel quixtañu an chuqui yom miʼ mel come jiñi wocol yaʼʌch cʌyʌl chaʼan bajcheʼ yilalob i melbal jaʼel. Jiñi muʼ bʌ i mel jontolil yom miʼ cʌy i chanʼesan i bʌ, i cʌy i mulan chuqui mach i chaʼañic yicʼot cheʼ i bajñel jach miʼ ñaʼtan i bʌ chaʼan cheʼ jiñi miʼ mejlel i cʼuxbin yambʌlob yicʼot miʼ qʼuelob i miʼ chʼʌmob ti ñuc.

¿Chuqui miʼ mejlel i ñijcʌben i pusicʼal juntiquil chaʼan miʼ qʼuextʌyel? Qʼuele muʼ bʌ i cʌntesañonla jiñi Biblia:

• «I cʼuxbintel Dios jiñʌch i chʼujbibentel i mandar» (1 Juan 5:3).

• «Muʼ bʌ i bʌcʼñan lac Yum miʼ tsʼaʼlen jontolil» (Proverbios 8:13).

Jiñi i cʼuxbintel yicʼot i bʌcʼñʌntel Dios tiʼ melol mach bʌ weñic tiʼ tojlel wen an i pʼʌtʌlel chaʼan miʼ qʼuextan jiñi jontol bʌ quixtañujob, pero miʼ junyajlel qʼuextañob tiʼ cuxtʌlel, i mach ti chaʼchajp o uxchajp jach. Pero ¿mucʼʌch ba i mejlel?

Laʼ la cʌl chaʼan Álex,a tsaʼ bʌ ajñi 19 jab ti jumpʼejl cárcel yaʼ ti Brasil chaʼan miʼ toj cabʌl i mul. Cheʼ ti jabil 2000 tsaʼ sujti tiʼ testigo Jehová cheʼ bʌ tsiʼ cʌñʌ chaʼan Biblia. ¿Tsaʼʌch ba i qʼuexta i bʌ? Cheʼʌchi, cheʼ jaʼel, wen cʼux miʼ yubin chaʼan tsaʼ bʌ i mele tac. Álex miʼ yʌl: «Tsaʼ cʼoti j cʼuxbin Dios come cujil chaʼan tsaʼix i junyajlel ñusa c mul. Coltʌbil i chaʼañon ti qʼuextʌyel cheʼ mij qʼuel ti ñuc tsaʼ bʌ i mele Jehová yicʼot mij cʼuxbin».

César, chʼoyol bʌ ti Brasil jeʼel, tsiʼ chaʼle xujchʼ 15 jab yicʼot tsiʼ cʼʌñʌ juloñib. ¿Chuqui tsiʼ yʌcʼʌ ti qʼuextʌyel? Jiñi i testigojob Jehová tsajñi i julaʼtañob yaʼ ti cárcel i tsiʼ jacʼʌ i cʌntesʌntel chaʼan Biblia, lajal bajcheʼ Álex. Miʼ yʌl: «Jiñʌch baqui tsaʼ cʼoti c ñaxan ubin chaʼan añʌch i sujmlel j cuxtʌlel. Tsaʼ caji j cʼuxbin Jehová yicʼot c bʌcʼñan, com cʌl, jumpʼejl bʌqʼuen chaʼan maʼañic mic chaʼ mel mach bʌ weñic i mi cʌqʼuen i chʼijiyemlel. Jehová tsiʼ wen pʌsbeyon i yutslel i mach comic c chaʼ mel mach bʌ weñic. Jiñi cʼuxbiya yicʼot wem bʌ bʌqʼuen tiʼ tojlel tsiʼ coltayon».

¿Chuqui miʼ pʌs ili ejemplo tac? Chaʼan añʌch i pʼʌtʌlel jiñi Biblia chaʼan miʼ qʼuextʌbeñob i pensar jiñi quixtañu i miʼ qʼuextʌyel bajcheʼ yilalob (Efesios 4:23). Álex miʼ yʌl: «Lajal bajcheʼ tsaʼ c tsʼʌmi sʌc bʌ jaʼ cheʼ bʌ tsaʼ caji j cʌn chaʼan Biblia. Xucʼu xucʼul tsaʼ caji i sʌqʼuesan c pensar jiñi tsaʼ bʌ caji j cʌn. Tsaʼ c ñaʼta chaʼan mach mejloñic». Tiʼ sujm, cheʼ mi la cotsan ti lac pensar am bʌ ti Biblia, mi lac choc loqʼuel tiʼ pejtelel chuqui bibiʼ. Jiñi i Tʼan Dios añʌch i pʼʌtʌlel chaʼan miʼ sʌqʼuesañonla bajcheʼ jiñi (Efesios 5:26). Jinto miʼ mejlelob ti sujtel ti uts bʌ quixtañu jiñi wen jontoloʼ bʌ yicʼot i bajñel bʌ miʼ ñaʼtañob i bʌ (Romanos 12:18). Ti ñʌchʼtʌlelix miʼ chumtʌlob cheʼ bʌ miʼ yʌcʼob ti ñuc jiñi principio tac am bʌ ti Biblia (Isaías 48:18).

Jiñi ñumen bʌ ti 8 millón i testigojob Jehová añoʼ bʌ ti 240 país yicʼot territorio tac tsaʼix i ñaʼtayob bajcheʼ miʼ mejlel ti jilel jiñi jontolil. Anquese mach junlajalobic i colorlel i pʌchʌlel yicʼot bajcheʼ yilal chumulob, muqʼuix i cʼuxbiñob yicʼot i bʌcʼñañob Dios. Muqʼuix i cʼuxbiñob i bʌ jaʼel yicʼot chumulob ti ñʌchʼtʌlel bajcheʼ jumpʼejl familia tiʼ pejtelel pañimil (1 Pedro 4:8). Ili tsiquil miʼ pʌs chaʼan mucʼʌch lac mejlel ti chumtʌl ti jumpʼejl pañimil baqui maʼañic jontolil.

LɅCʼɅLIX I JILIBAL TICʼLɅNTEL

Jiñi Biblia miʼ yʌl chaʼan Dios lʌcʼʌlix mi caj i sʌqʼuesan ili Pañimil. Ili jontol bʌ pañimil wolix i pijtan jiñi i «qʼuiñilel meloʼ mulil [i chaʼan Jehová], cheʼ miʼ tojob i mul jini winicob xʼixicob muʼ bʌ i ñusañob [i tʼan] Dios» (2 Pedro 3:5-7). Maʼañix juntiquil muʼ bʌ caj i yʌqʼuen wocol yambʌ quixtañu. Pero ¿bajcheʼ miʼ mejlel lac ñaʼtan chaʼan Dios yomʌch i jisan ticʼlʌntel?

Jiñi Biblia miʼ yʌl chaʼan Jehová «miʼ tsʼaʼlen [...] jini muʼ bʌ i lon mulan jisaya [o tsʌnsa]» (Salmo 11:5). Jehová miʼ mulan jiñi ñʌchʼtʌlel yicʼot chuqui toj (Salmo 33:5; 37:28). Jiñʌch miʼ yʌqʼueñonla lac ñop chaʼan Dios mach tiʼ pejtelelic ora mi caj i qʼuel jach jiñi ticʼlʌntel.

Mucʼʌch i mejlel lac ñop. Lʌcʼʌlix miʼ cajel jiñi tsijiʼ bʌ pañimil baqui cojach an ñʌchʼtʌlel (Salmo 37:11; 72:14). ¿Mach ba a womic a ñumen ñaʼtan chuqui yom maʼ mel chaʼan maʼ chumtʌl ti jumpʼejl pañimil bajcheʼ iliyi?