¿Majqui i mul?

Mi mach i mulic Dios cheʼ an lac wocol, ¿chuqui tiʼ caj o majqui i mul? ¿Chucoch cabʌl quixtañu woliʼ chʌmel ti wiʼñal o wen pʼumpʼun bajcheʼ chumulob? ¿Chucoch an cabʌl guerra, cʼamʌjel yicʼot yan tac bʌ wocol bajcheʼ icʼ jaʼal? Jiñi i Tʼan Dios, jiñi Biblia, miʼ tsictesʌbeñonla uxchajp i sujmlel chucoch mi la quilan wocol:

1. Cʼuxbiya ti lac bajñelil, i cʌlʌx mulʌntel chubʌʼañʌl yicʼot tsʼaʼleya. Jiñi wiñicob miʼ «cʼʌñob i pʼʌtʌlel chaʼan miʼ jisañob i piʼʌlob» (Eclesiastés 8:9). Ti bele ora, jiñi quixtañujob miʼ yubiñob wocol tiʼ tojlel yambʌlob jontoloʼ bʌ i melbal yicʼot muʼ bʌ i bajñel cʼuxbiñob i bʌ.

2. I yorajlel baqui añonla yicʼot cheʼ mach ñaʼtʌbilic lac chaʼan. Jiñi Biblia miʼ yʌl: «Maʼanic majqui yujil baqui ora mi caj i chujquel ti wocol» (Eclesiastés 9:12). Yom i yʌl chaʼan miʼ mejlel lac taj wocol tiʼ caj baqui añonla i mach ñaʼtʌbilic lac chaʼan chuqui mi caj i yujtel, o mach tsajaloñicla o mi lac mel mach bʌ weñic.

3. Jiñi jontol bʌ yumʌl ila ti pañimil. Jiñi Biblia wen tsiquil miʼ sub majqui i mul cheʼ miʼ yubin wocol jiñi quixtañujob, miʼ yʌl: «Pejtelel i chaʼañoʼ bʌ pañimil añob tiʼ cʼʌb jini xjontolil» (1 Juan 5:19). Jiñi «xjontolil» jiñʌch Satanás, juntiquil pʼʌtʌl bʌ ángel wem bʌ ti ñaxan, pero «maʼanic tsaʼ chʌn ajni tiʼ sujmlel Dios» (Juan 8:44). Yambʌ ángelob tsiʼ coltayob Satanás chaʼan miʼ contrajiñob Dios i miʼ melob chuqui bajñel yomob, i cheʼ bajcheʼ jiñi ti sujtiyob ti xiba (Génesis 6:1-5). Cheʼ bʌ tsiʼ contrajiyob Dios, Satanás yicʼot i xibajob an i cʼʌñʌyob i pʼʌtʌlel chaʼan miʼ melob jontolil ila ti pañimil, i wʌle ora ñumen tsiquil bajcheʼ miʼ cʌñob i pʼʌtʌlel. Jiñi Diablo wen michʼ i woliʼ «lotin pejtel winicob ti pañimil», jin chaʼan jiñi Biblia miʼ yʌl: «Obol laʼ bʌ añet bʌ la ti pañimil yicʼot ti colem ñajb» (Apocalipsis 12:9, 12). Satanás miʼ cʼʌn i pʼʌtʌlel chaʼan miʼ mel jontolil i miʼ ticʼlañonla, wen jontol i tijicña miʼ yubin cheʼ mi la quilan wocol. Jiñʌch i mul Satanás cheʼ mi la quilan wocol, mach i mulic Dios.

ÑAʼTANCU ILIYI: Cojach juntiquil wen jontol bʌ maʼañic bʌ i pusicʼal miʼ mejlel i yʌqʼuen wocol jiñi quixtañujob maʼañobic bʌ i mul. Pero jiñi Biblia miʼ yʌl chaʼan «cʼuxbiyajʌch Dios» (1 Juan 4:8). Jin chaʼan, maʼañic miʼ mejlel lac ñaʼtan chaʼan Dios miʼ mel jontolil o mach bʌ tojic (Job 34:10).

Pero tajol maʼ cʼajtiben a bʌ: «¿Jala mi caj i jisan Dios jiñi i pʼʌtʌlel Satanás ila ti pañimil?». Cheʼ bajcheʼ tsaʼ laj qʼuele, Dios miʼ tsʼaʼlen jontolil, i cʼux miʼ yubin tiʼ pusicʼal cheʼ mi la quilan wocol. Cheʼ jaʼel, jiñi i Tʼan miʼ subeñonla chaʼan mi lac suben chuqui tac mi laj cʼojoʼtan, come miʼ chʼʌmonla ti ñuc (1 Pedro 5:7). Yaʼ ti yambʌ temaj mi caj laj qʼuel chuqui tac miʼ pʌs chaʼan Dios mucʼʌch i cʼuxbiñonla i chaʼan añʌch i pʼʌtʌlel chaʼan miʼ jisan jiñi wocol yicʼot toʼol ticʼlʌntel.a