Miʼ mejlel a taj a tijicñʌyel ili ora
ÑAʼTANCU bajcheʼ yilal miʼ cajel cheʼ bʌ maʼañix cʼamʌjel, ñoxlel yicʼot chʌmel (sajtel). Ili wen utsʼatax bʌ pijtaya mucʼʌch i mejlel a taj. Pero tiʼ sujm, ili ora cabʌlto wocol mi laj qʼuel. ¿Bajcheʼ miʼ mejlel a wubin a tijicñʌyel ili ora? Jiñi Biblia miʼ chʼʌm tilel ticʼojel tac muʼ bʌ i mejlel i yʌqʼueñet a tijicñʌyel yicʼot miʼ yʌqʼuen i sujmlel a cuxtʌlel. Laʼ laj qʼuel bajcheʼ miʼ mejlel i coltañonla jiñi i Tʼan Dios chaʼan mi laj cuch jiñi wocol tac.
YOM TIJICÑAYONLA ANQUESE MACH CABɅLIC LAC CHUBɅʼAN
Jiñi ticʼojel am bʌ ti Biblia: «Mach mi laʼ tsʌjyun taqʼuin. Yom tijicña mi laʼ wajñel yicʼot chuqui tac an laʼ chaʼan» (Hebreos 13:5).
Ili pañimil (mulawil) cabʌl jax chuqui miʼ sub yicʼot miʼ pʌs i cʼʌjñibal bʌ lac chaʼan yilal. Pero jiñi Biblia miʼ yʌl chaʼan mucʼʌch i mejlel la cubin lac tijicñʌyel cheʼ bʌ mach cabʌlic lac chubʌʼan. ¿Bajcheʼ miʼ mejlel lac mel?
Mach yomic mi laj cʼuxbin jiñi taqʼuin. Tiʼ caj «i mulʌntel taqʼuin», jiñi lac piʼʌlob miʼ yʌcʼob ti wocol i cʼocʼlel, miʼ cʌyob i familia, i yamigojob, maʼañix miʼ qʼuelob ti ñuc jiñi wem bʌ melbal tac, i cheʼ jaʼel maʼañix miʼ chʼʌmob i bʌ ti ñuc (1 Timoteo 6:10). ¡Mach i wentajobic chuqui miʼ sʌtob tiʼ caj miʼ mulañob taqʼuin! Cheʼ jaʼel, jiñi muʼ bʌ i cʼuxbin jiñi taqʼuin maʼañic ba ora mi caj i yubin chaʼan miʼ «jastiyel ti taqʼuin» (Eclesiastés 5:10).
Jiñi ñuc bʌ i cʼʌjñibal jiñʌch lac piʼʌlob i mach jiñic chubʌʼañʌl. Tiʼ sujm, añʌch chubʌʼañʌl ñuc tac bʌ i cʼʌjñibal, pero iliyi maʼañic miʼ mejlel i yʌqʼueñonla cʼuxbiya, cojach jiñi wiñicob xʼixicob (quixtañujob) muʼ bʌ i mejlel i melob iliyi. Muʼ bʌ i yʌqʼueñonla lac tijicñʌyel jiñʌch la camigojob (Proverbios 17:17).
TIJICÑA MI CAJ LA CAJÑEL MI TSAʼ LAC JACʼɅ JIÑI TICʼOJEL TAC AM BɅ TI BIBLIA
CHEʼ BɅ CʼAMONLA
Jiñi ticʼojel am bʌ ti Biblia: «I tijicñʌyel lac pusicʼal i wentajʌch wen bʌ tsʼac» (Proverbios 17:22).
Jiñi lac tijicñʌyel lajalʌch bajcheʼ «wen bʌ tsʼac» muʼ bʌ i coltañonla cheʼ bʌ cʼamonla. Pero ¿bajcheʼ miʼ mejlel la cubin lac tijicñʌyel cheʼ bʌ cʼamonla?
Cheʼ mi la cʌqʼuen wocolix i yʌlʌ Dios. Cheʼ jin jach mi lac wen ñaʼtan jiñi laj cʼamʌjel, mach tijicñayic mi caj la cubin ti jujumpʼejl qʼuin (Proverbios 15:15). Pero jiñi Biblia miʼ cʌntesañonla chuqui yom bʌ mi lac mel: «Subenla Dios wocolix i yʌlʌ» (Colosenses 3:15). Yom mi laj cʌn la cʌqʼuen wocolix i yʌlʌ Dios chaʼan chuqui wem bʌ miʼ yʌqʼueñonla ti laj cuxtʌlel. Cheʼ bʌ mi laj qʼuel miʼ bʌjlel jiñi qʼuin, cheʼ miʼ jatsʼonla jiñi icʼ o i tseʼñal juntiquil muʼ bʌ lac wen cʼuxbin jiñʌch muʼ bʌ mejlel i yʌqʼuen i tijicñʌyel laj cuxtʌlel.
Cheʼ bʌ mi laj coltan yambʌlob. «Ñumen tijicña jini muʼ bʌ i yʌcʼ majtañʌl bajcheʼ jini muʼ bʌ i chʼʌm i majtan», ili tʼan mucʼʌch i tsʼʌctiyel jaʼel cheʼ bʌ cʼamonla (Hechos 20:35). Cheʼ bʌ mi laj coltan yambʌlob i miʼ subeñonla wocolix la cʌlʌ, miʼ yʌqʼueñonla lac tijicñʌyel yicʼot muʼto i yʌqʼueñonla lac ñajʌtesan lac wocol. Cheʼ bʌ mi laj coltan yambʌlob mucʼʌch i yʌcʼ chaʼan utsʼat mi la cajñel.
MI LAC PʼɅTʼESAN LAC ÑUJPUÑEL
Jiñi ticʼojel am bʌ ti Biblia: Sajcanla «chuqui ñumen wen» (Filipenses 1:10).
Jiñi xñujpuñelob mach bʌ temelic miʼ wen ñusañob qʼuin, miʼ mejlel i yʌcʼob ti wocol i ñujpuñel. Jin chaʼan, jiñi xñujpuñelob yom miʼ qʼuelob ti ñuc jiñi i ñujpuñelob come jiñʌch ñuc bʌ jaʼel.
Laja melela chuqui mi laʼ mulan. Jiñi Biblia miʼ yʌl chaʼan ñumen wen «cheʼ chaʼtiquilonla» (Eclesiastés 4:9). Mach cojach yom maʼ ñaʼtan a mel muʼ bʌ a bajñel mulan, ñaʼtan chuqui miʼ mejlel laʼ mel ti laʼ chaʼticlel. Jumpʼejl ejemplo, miʼ mejlel laʼ laja mel laʼ waj, mi laʼ loqʼuel ti xʌmbal, mi laʼ laja cʼux laʼ waj o mi laʼ yajcan yambʌ chuqui miʼ mejlel laʼ mel.
Pʌsben laʼ bʌ laʼ cʼuxbiya. Jiñi Biblia miʼ yʌl chaʼan jiñi xñujpuñelob yom miʼ cʼuxbiñob i bʌ yicʼot miʼ qʼuelob i bʌ ti ñuc (Efesios 5:28, 33). Cheʼ bʌ mi laʼ laja tseʼtan laʼ bʌ, cheʼ bʌ mi laʼ mecʼ la bʌ o cheʼ bʌ mi laʼ wʌqʼuen laʼ bʌ jumpʼejl majtañʌl jiñʌch muʼ bʌ i mejlel i pʼʌtʼesan laʼ ñujpuñel. Cheʼ jaʼel, cʼajtesanla chaʼan jatet jach la miʼ mejlel laʼ piʼlen laʼ bʌ i mach jiñic mach bʌ ñujpuñemic laʼ wicʼot (Hebreos 13:4).