Laʼ laj coltan lac bʌ yicʼot lac bʌxlel tiʼ melol chuqui wen

Hebreos 10:24 mi yʌl chaʼan mi «laj coltan lac bʌ tiʼ pejtelel chuqui wen, chaʼan mi laj cʼuxbin lac bʌ bajcheʼ yom yicʼot wen bʌ lac melbal». Miʼ mejlel laj coltan la quermañojob cheʼ mi lac pʌsbeñob wem bʌ ejemplo i cheʼ mi lac subeñob jiñi ñopol bʌ lac chaʼan. Suben jiñi hermanojob chuqui wen tac bʌ ñusʌbil a chaʼan ti subtʼan. Laʼ i qʼuelob chaʼan tijicñayet cheʼ maʼ melben i yeʼtel Jehová. Mach a wʌcʼ chaʼan miʼ lajiñob i bʌ yicʼotet o tiʼ tojlel yambʌlob (Gá. 6:4). Laʼ lac chaʼlen wersa lac ñijcan yambʌlob chaʼan miʼ pʌsob ‹cʼuxbiya yicʼot chaʼan miʼ melob chuqui wen›, mach chaʼañic xicʼbil miʼ yubiñob chaʼan miʼ melob chuqui wen. (Qʼuele jiñi Benefíciese i yopol 158, párr. 4.) Mi caj i melob chuqui wen mi mucʼʌch lac ñijcañob chaʼan miʼ pʌsob i cʼuxbiya, miʼ mejlel i tʼox chuqui añob i chaʼan o miʼ mejlel i chaʼleñob coltaya ti subtʼan (2 Co. 1:24).