Laʼ laj cʼʌn ti wen jiñi qʼuin yaʼ ti lac subtʼan
Ti jiñi jabil chaʼan subtʼan 2014, tsaʼ lac chaʼle subtʼan mil 945 millón 487 mil 604 ora. Ili miʼ pʌs chaʼan chʌn com lac melben i yeʼtel Jehová (Sal. 110:3; 1 Co. 15:58). Come maʼañix cabʌl ora, laʼ lac ñumen sʌclan jiñi quixtañujob cheʼ mi laj cʼʌn jiñi qʼuin wen ñuc bʌ i cʼʌjñibal ti subtʼan (1 Co. 7:29).
Chaʼan mi laj cʼʌn ti wen jiñi qʼuin yaʼ ti lac subtʼan, yom mi laj qʼuextan lac pensar. Ejemplo: Mi tiʼ pejtelel qʼuin mi lac ñusan jumpʼejl o chaʼpʼejl ora yaʼ ti subtʼan pero mi maʼañic majqui mi lac taj chaʼan mi lac pejcan, ¿chuqui miʼ mejlel lac mel chaʼan mi lac ñumen sʌclan quixtañujob? Isujmʌch, mach lajalic jiñi territorio tac, pero jiñi muʼ bʌ caj laj qʼuel miʼ mejlel i coltañonla chaʼan mi laj cʼʌn ti wen jiñi qʼuin yicʼot chaʼan mach toʼol jach mi lac chaʼlen wersa (1 Co. 9:26).
Subtʼan ti jujumpʼejl otot. Ti cabʌl jabil, jiñi xsubtʼañob ñʌmʌl i techob jiñi subtʼan ti jujumpʼejl otot cheʼ ti sʌcʼan. Come an cabʌl muʼ bʌ i chaʼleñob troñel cheʼ ti qʼuiñil, ¿chucoch mach ti ochʼajel qʼuin o cheʼ ti icʼan mi lac majlel ti subtʼan ti jujumpʼejl otot? Ti jiñi bʌ ora, yaʼix añob tiʼ yotot yicʼot woliyobix ti cʼaj o. Cheʼ mi lac chaʼlen subtʼan ti sʌcʼan yaʼ ti calle yicʼot baqui an xchoñoñelob, miʼ mejlel lac taj cabʌl muʼ bʌ i ñʌchʼtañob jiñi wen tʼan.
Subtʼan baqui an cabʌl quixtañujob. Yom miʼ yʌjqʼuel jiñi mesa tac yicʼot jiñi alʌ carro tac baʼ miʼ ñumel cabʌl quixtañujob yaʼ tiʼ territorio jiñi congregación (qʼuele La Queʼtel tiʼ chaʼan bʌ Dios i chaʼan julio, 2013, tiʼ yopol 5). Mi maʼañix miʼ ñumel cabʌl quixtañujob yaʼi, jiñi Comité i chaʼan Servicio yaʼ ti Congregación miʼ mejlel i choc majlel ti yambʌ parte jiñi alʌ carro yaʼ baʼ mucʼʌch i ñumel cabʌl quixtañujob.
Revisita tac yicʼot estudio tac. An tajol cheʼ ti qʼuiñil, ti baqui jach bʌ ora, maʼañic mi lac taj muʼ bʌ i ñʌchʼtañob jiñi wen tʼan. Laʼ lac mel revisita tac yicʼot estudio tac ti jiñi bʌ ora. Ejemplo: Mi mucʼʌch lac taj quixtañujob cheʼ mi lac ñumel ti subtʼan ti jujumpʼejl otot cheʼ ti sʌcʼan ti sábado, laʼ lac pʌs jiñi estudio tac cheʼ ti ochʼajel qʼuin o cheʼ ti icʼan. Cheʼ mi lac mel revisita tac tajol ñumen wen cheʼ mi lac julaʼtañob jiñi muʼ bʌ laʼ cʌqʼueñob estudio tac yaʼ jach bʌ chumulob yaʼi chaʼan mi lac ñumen chaʼlen subtʼan.
Isujmʌch, mi lac tsic tiʼ pejtelel jiñi ora muʼ bʌ lac ñusan yaʼ ti subtʼan, pero ñumen tijicña mi la cubin cheʼ mucʼʌch lac taj jiñi quixtañujob. Mi jiñi subtʼan woli bʌ lac mel ti baqui jach bʌ ora maʼañic mi lac wen taj quixtañujob, laʼ lac sʌclan yambʌ bajcheʼ miʼ mejlel lac chaʼlen subtʼan. Laʼ lac pejcan Jehová ti oración, jiñi i «Yum cʼajbal», chaʼan miʼ coltañonla laj cʼʌn ti wen jiñi qʼuin yaʼ ti lac subtʼan (Mt. 9:38).