Laj cʼajtesʌbentel chaʼan jiñi uxpʼejl bʌ qʼuin colem tempa bʌ
I yorajlel jiñi programa. Jiñi puerta mi caj i jajmel ti a las 8:00 a.m. Jiñi música mi caj i tejchel ti a las 9:20 a.m. tiʼ yuxpʼejlel qʼuin. Ti jiñi bʌ ora, ti lac pejtelel yom mi lac buchtʌl chaʼan utsʼat miʼ tejchel jiñi programa. Ti viernes i ti sábado, a las 5:00 p.m. miʼ cajel jiñi cʼay yicʼot oración chaʼan i yujtibal, i ti domingo, a las 4:00 p.m.
Cʼay tac chaʼan i ñuqʼuesʌntel Jehová. Ti wajali, i tejclum Dios tsiʼ ñuqʼuesayob Jehová yicʼot cʼay tac. Ti ili ora, jiñi música chʌn ñuc to i cʼʌjñibal ti jiñi isujm bʌ chʼujutesaya (Sal. 28:7). Tiʼ yuxpʼejlel qʼuin mi caj i tejchel yicʼot jumpʼejl música. Mach toʼol música jach, tsaʼ chajpʌnti chaʼan mi laj cʌn i chaʼan mi lac ñuqʼuesan Jehová. Jin chaʼan, cheʼ miʼ yʌjlel chaʼan mux caj i tejchel jiñi música, yom mi lac buchtʌl i yom mi lac wen ñʌchʼtan, mach yomix mi lac chʌn chaʼlen tʼan. Cheʼ bajcheʼ jiñi, woli lac pʌs chaʼan mi laj qʼuel ti ñuc jiñi muʼ bʌ i chaʼleñob wersa i melob jiñi orquesta i chaʼan Watchtower. Chaʼsujtel ti jujumpʼejl jab miʼ cʼʌñob i taqʼuin chaʼan miʼ majlelob ti Patterson (Nueva York) chaʼan miʼ melob jiñi utsʼatax bʌ música muʼ bʌ lac wen mulan. Cheʼ miʼ yujtel jiñi música, mi caj lac ñuqʼuesan Jehová yicʼot cʼay tac chaʼan bʌ i Yumʌntel.
Baʼ miʼ cottʌl carro tac. Maʼañic mi caj i tojtʌl mi joñonla mi caj laj qʼuel, i mi caj i cottʌl cheʼ bajcheʼ miʼ cʼotel majlel. Come mach colemic baʼ miʼ cottʌl jiñi carro tac, mic poj subeñetla chaʼan cabʌl mi laʼ majlel ti juncojt carro. Yaʼ baqui mi yʌl chaʼan cʼamoʼ bʌ, cojach miʼ mejlel ti cottʌl yaʼi jiñi carro tac muʼ bʌ i cuch tilel jiñi mach bʌ tsʼʌcʌlic i yoc o i cʼʌb.
Buchlibʌl tac. Cheʼ miʼ jajmel jiñi puerta, mach a chaʼlen ajñel cheʼ bajcheʼ an majqui a wom a mʌlben yilal chaʼan maʼ taj a buchlib yaʼ baqui maʼ ñumen mulan. Qʼuele ti ñuc yambʌlob anquese maʼ buchtʌl yaʼ baqui maʼañic maʼ mulan. Mi cheʼʌch mi lac mel bajcheʼ jiñi, miʼ yʌcʼonla ti cʌjñel bajcheʼ i sujm bʌ xñoptʼañonla i miʼ ñijcabeñob i pusicʼal jiñi choncol bʌ i qʼueloñobla chaʼan miʼ ñuqʼuesañob Dios (Jn. 13:34, 35; 1 Co. 13:5; 1 P. 2:12). Cojach miʼ mejlel a mʌctʌben i buchlib jiñi lajal bʌ chumul a wicʼot, jiñi lajal bʌ mi tilel ti carro a wicʼot o jiñi woli bʌ a pʌsben estudio. Maʼañic chuqui yom maʼ wʌcʼ yaʼ ti buchlibʌl miʼ maʼañic mi caj a cʼʌn, chaʼan ora miʼ cʌjñel jiñi jochol to bʌ. Miʼ caj i yʌjqʼuel buchlibʌl chaʼan jiñi ñoxobix bʌ yicʼot chaʼan jiñi cʼamoʼ bʌ, mach tiʼ pejtelel ora mi caj i buchtʌl yicʼotob i familia come tsicbil jach jiñi buchlibʌl. A wocolic, cʌyʌ jiñi buchlibʌl chaʼan jiñi añobix bʌ i jabilel, jiñi cʼamoʼ bʌ yicʼot jiñi woli bʌ i coltañob.
Wem bʌ lac pislel. Jiñi pisil muʼ bʌ lac xoj yom wen jach, i mach yomic mi lac lajin jiñi ñumeñix bʌ ti pʼis miʼ chʼʌlob i bʌ cheʼ bajcheʼ ñʌmʌl ila ti pañimil (1 Ti. 2:9). Cheʼ jaʼel, yom wen mi lac lʌp lac pislel cheʼ bajcheʼ xñoptʼan, cheʼ mi lac tsʼijbun lac bʌ yaʼ ti hotel o cheʼ mi la cʌcʼ jiñi otot baʼ tsaʼ cʌyleyonla i cheʼ miʼ yujtel jiñi colem tempa bʌ ti jujumpʼejl qʼuin. Cheʼ bajcheʼ jiñi, tijicña mi caj la cubin cheʼ bʌ mi lac lʌp jiñi tarjeta chaʼan jiñi colem tempa bʌ i maʼañic mi caj la cubin quisin cheʼ mi lac tajben i yorajlel chaʼan mi lac chaʼlen subtʼan. Jiñi wem bʌ lac pislel yicʼot lac melbal mi caj i coltan chaʼan miʼ lʌcʼtesañob i bʌ jiñi yom bʌ i cʌmbeñob i tʼan Dios, i mi caj i tijicñesan Jehová jaʼel (Sof. 3:17).
Celular o yan tac bʌ. Mi woli a ñaʼtan a chʼʌm majlel a celular o yan tac bʌ, yom maʼ wʌcʼ ti ñʌchʼʌl chaʼan maʼañic majqui miʼ yʌmben i pensar. Mi an a cámara, jumpʼejl muʼ bʌ i chaʼlentel ti grabar video, tableta o yan tac bʌ, yom wen jach maʼ cʼʌn chaʼan maʼañic maʼ mʌctan chuqui choncol ti ñumel yaʼ ti plataforma. Qʼuele ti ñuc yambʌlob, mach a tsʼijbun tʼan tac o correo tac maʼañic bʌ i cʼʌjñibal cheʼ yaʼañet ti colem tempa bʌ.
Bʌlñʌcʼʌl. Chʼʌmʌ majlel a wuchʼel chaʼan maʼañic miʼ loqʼuel a mʌn cheʼ tiʼ yorajlel cʼux waj. Miʼ mejlel a chʼʌm majlel i yajñib bʌlñʌcʼʌl muʼ bʌ i mejlel ti lojtel tiʼ yebal a buchlib. Yaʼ ti colem tempa bʌ mach mejlic a chʼʌm majlel colem bʌ i yajñib bʌlñʌcʼʌl yicʼot bux, plato o yan tac bʌ melbil bʌ ti vidrio.
Taqʼuin loqʼuem bʌ ti lac pusicʼal. Miʼ mejlel laj qʼuel ti ñuc jiñi colem tempa bʌ cheʼ mi cʌcʼ lac taqʼuin loqʼuem bʌ ti lac pusicʼal chaʼan jiñi eʼtel tiʼ petol pañimil. Jiñi yom bʌ yʌcʼ i taqʼuin ti cheque, yom miʼ tsʼijbun tiʼ cʼabaʼ «La Torre del Vigía, A.R.». An colem tempa bʌ tac baqui miʼ mejlel ti ajqʼuel ti tarjeta de crédito i ti débito.
Tsʼac tac. Mi woli a jap tsʼac subebilet bʌ i chaʼan jiñi doctor poj chʼʌmʌ majlel, come maʼañic mi caj a wʌqʼuentel yaʼ ti colem tempa bʌ. Mi an a chaʼan diabétes i mi yom maʼ cʼʌn jeringa tac, yom tsajilet baqui maʼ choc. Mach a choc yaʼ ti yajñib basura am bʌ yaʼ ti colem tempa bʌ, mi jiñic to yaʼ ti hotel.
Chaʼan maʼañic mi lac taj wocol. Ñuc i cʼʌjñibal cheʼ mij cʌntan lac bʌ chaʼan maʼañic mi lac lojwel tiʼ caj chaʼan miʼ jʌjlel la coc o chaʼan maʼañic mi laj qʼuel baʼ mi lac chaʼlen xʌmbal. Tiʼ pejtelel jabil an muʼ bʌ i lojwelob tiʼ caj miʼ cʼʌñob zapato wen chan bʌ i yoc. Yom maʼ lʌp wen jach bʌ zapato chaʼan mach wocol maʼ chaʼlen xʌmbal yaʼ ti rampa, ti escalera, ti rejilla i ti yan tac bʌ.
Jiñi maʼañic bʌ miʼ wen ubiñob tʼan. An colem tempa bʌ tac baqui mi caj i ñusʌntel ti radio (FM) jiñi programa. Chaʼan miʼ mejlel a ñʌchʼtan, yom an a chaʼan jumpʼej alʌ radio am bʌ i chaʼan batería yicʼot audífono.
Alʌ carro yicʼot silla chaʼan alʌlob. Mach a chʼʌm majlel alʌ carro yicʼot silla chaʼan alʌlob. Cojach miʼ mejlel a chʼʌm majlel i yajñib alʌlob mucʼ jach bʌ i mejlel ti ajqʼuel yaʼ ti buchlibʌl.
Perfume tac. An colem tempa bʌ tac muʼ bʌ i mejlel yaʼ baʼ joy ñupʼul pero miʼ cʼʌjñel máquina tac chaʼan miʼ yochel icʼ. Jin chaʼan, mi laj qʼuel ti ñuc la quermañojob cheʼ maʼañic mi lac cʼʌn perfume tac wen pʼʌtʌl bʌ i yujtsʼil chaʼan maʼañic majqui miʼ cʼamʼesan tiʼ bicʼ, tiʼ ñiʼ o yan tac bʌ cʼamʌjel (1 Co. 10:24).
Baʼ miʼ chojñel bʌlñʌcʼʌl. Jiñi wem bʌ lac melbal baʼ miʼ chojñel uchʼel miʼ ñuqʼuesan i cʼabaʼ Jehová. Yom wen maʼ xoj majlel a pislel bajcheʼ xñoptʼan. Cʌyʌ propina o taqʼuin mi cheʼʌch ñʌmʌl ti mejlel yaʼi.
Hotel o jiñi otot baʼ mi laj cʌytʌl:
Mach a cʼajtin cabʌl cuarto mi maʼañic mi caj a luʼ cʼʌn, cojach yom maʼ wotsañob ti jiñi cuarto cheʼ bajcheʼ tsaʼ subentiyet.
Mach a chaʼlen ti cancelar jiñi cuarto, cojach mi tsaʼ ujti jumpʼejl tsʌts bʌ wocol, i subu yaʼ ti hotel chaʼan miʼ cʼʌn yañoʼ bʌ (Mt. 5:37). Mi tsaʼ chaʼle ti cancelar, tsʼijbun i númerojlel jiñi cancelación. Mi tsaʼ chaʼle ti cancelar cheʼ bʌ mach tajax 48 ora yom chaʼan maʼ cʼʌn jiñi cuarto, maʼañix mi caj a sutqʼuibentel a taqʼuin.
Mi maʼ cʼʌn tarjeta de crédito o débito cheʼ maʼ tsʼijbun a bʌ yaʼ ti hotel, mi caj i lot tsʼitaʼ a taqʼuin chaʼan i tojol muʼ bʌ i mejlel ti ujtel ti a cuarto yicʼot chaʼan muʼ bʌ i mejlel ti ujtel cheʼ yaʼañet ti hotel. Maʼañic miʼ mejlel a cʼʌn jiñi taqʼuin, jin to cheʼ tsaʼix loqʼuiyet ti jiñi hotel.
Chʼʌmʌ jiñi alʌ carro chaʼan bʌ cuchoñel cheʼ muqʼuix caj a cʼʌn, i sutqʼuin ti ora chaʼan miʼ cʼʌn yambʌlob.
Mi cheʼʌch ñʌmʌl ti mejlel yaʼi, cʌyben propina jiñi xʼeʼtelob yaʼ ti hotel muʼ bʌ i chʼʌmob majlel a cuch, i cʌybeñob jaʼel jiñi muʼ bʌ i sʌqʼuesañob a cuarto.
Chajpan a wuchʼel yaʼ ti a cuarto mi añʌch permiso chaʼan maʼ mel.
Mach a chʼʌm majlel yaʼ ti colem tempa bʌ jiñi bʌlñʌcʼʌl, cajpeʼ o jiñi hielo muʼ bʌ i yʌjqʼuel yaʼ ti hotel.
Pʌsʌ tiʼ pejtelel ora i wut jiñi espíritu cheʼ maʼ pejcan jiñi xʼeʼtelob yaʼ ti hotel. Cʼajtesan chaʼan cabʌl woli qʼuelob jiñi muʼ bʌ i cʌytʌlob yaʼ ti hotel, jin chaʼan yomob chaʼan mi lac chʼʌmbeñob isujm, chaʼan mi lac pʌs la cutslel i chaʼan maʼañic mi lac michʼan ti ora.
Ñuc i cʼʌjñibal cheʼ miʼ cʌntan i yalobilob jiñi tatʌlob cheʼ yaʼañob ti hotel, cheʼ bajcheʼ yaʼ ti elevador, baqui miʼ yujtel ñuxijel, baqui miʼ pijtʌntel yambʌlob yicʼot baʼ miʼ mejlel ejercicio tac.
I tojol muʼ bʌ i yʌjlel yaʼ tiʼ Listajlel jiñi hotel tac muʼ bʌ mejlel ti cʼʌñol jiñʌch i tojol ti jujumpʼejl qʼuin, pero maʼañic yaʼ ochem jiñi impuesto tac. Mi ñumeñix i tojol maʼ cʼajtibentel, mach a toj i suben ti ora jiñi añoʼ bʌ tiʼ wenta baʼ mi laj cʌytʌl.
Mi an wocol ti a cuarto, yom maʼ suben jiñi añoʼ bʌ tiʼ wenta baʼ mi laj cʌytʌl cheʼ yaʼañet ti colem tempa bʌ.
Yom bʌ i chaʼleñob coltaya. Jiñi yom bʌ coltaya yom miʼ majlel yaʼ baqui an jiñi añoʼ bʌ ti wenta chaʼan jiñi yom bʌ i chaʼleñob coltaya. Jiñi maxto bʌ i taja 16 i jabilel miʼ mejlel ti coltaya jaʼel, pero yom miʼ mel yicʼot i tat o jiñʌch majqui an tiʼ wenta o juntiquil ñuquix bʌ tsaʼ bʌ aqʼuenti permiso ti tatʌl o ñaʼʌl.