Ili tʼan tac yom yaʼan ti a pusicʼal
Miʼ mejlel lac lajin jiñi tatʌlob ti juntiquil xcʌnta tiñʌmeʼ. Yom miʼ cʌntan i yalobilob cheʼ bajcheʼ jiñi xcʌnta tiñʌmeʼ. Miʼ mejlel i sʌtob i bʌ yicʼot i tajob wocol (Pr. 27:23). ¿Bajcheʼ miʼ sujtelob ti wem bʌ xcʌnta tiñʌmeʼ jiñi tatʌlob? Yom miʼ pejcan i yalobilob ti jujumpʼejl qʼuin. Cojach bajcheʼ jiñi mi caj i ñaʼtañob chuqui añob tiʼ pusicʼal yicʼot chuqui miʼ ñaʼtañob (Pr. 20:5). Yom miʼ pʼʌtʼesʌbeñob i chʼujbiya i yalobilob cheʼ miʼ cʼʌñob wen tac bʌ eʼtijibʌl (1 Co. 3:10-15). Jiñi video Estas palabras tienen que estar en tu corazón miʼ pʌs chaʼan ñuc i cʼʌjñibal cheʼ miʼ mejlel jiñi chʼujutesaya ti familia. Qʼuelela i tsajinla ili cʼajtiya tac.
1) ¿Chucoch mach yaʼic an i pensar tiʼ chaʼan bʌ Dios jiñi familia Román? 2) ¿Chucoch tsaʼ jejmi i chʼujutesaya ti familia jiñi hermano Román cheʼ bʌ tsiʼ ñaxan ñopo? 3) Cheʼ bajcheʼ miʼ yʌl ti Biblia, ¿chuqui yom miʼ mejlel chaʼan wen miʼ colel jiñi alobob? (Dt. 6:6, 7.) 4) ¿Chuqui miʼ mejlel ti melol chaʼan miʼ ñumen pejcañob i bʌ yaʼ ti familia? 5) ¿Chuqui yom miʼ cʌy i mel jiñi tatʌlob chaʼan i wenlel i yalobilob? 6) ¿Chuqui tsiʼ mele jiñi familia Vargas chaʼan miʼ coltan i familia Román? (Pr. 27:17.) 7) ¿Bajcheʼ yom miʼ chajpan i bʌ jiñi tatʌl mi yom chaʼan wen miʼ mejlel i Chʼujutesaya ti familia? 8) ¿Chuqui tsiʼ mele jiñi hermano Román chaʼan miʼ qʼuextʌyel i familia? 9) ¿Chucoch yom miʼ mejlel tiʼ pejtelel ora jiñi Chʼujutesaya ti familia? (Ef. 6:4.) 10) Alʌ chuqui tac miʼ mejlel ti melol yaʼ ti Chʼujutesaya ti familia. 11) Cheʼ bʌ Tomás tsiʼ pejca i yalobil chaʼan chucoch ñuc i cʼʌjñibal cheʼ miʼ mel chuqui wen, ¿chucoch weñʌch cheʼ tsʌts tsiʼ pejca, pero yicʼot i yutslel? (Jer. 17:9.) 12) ¿Bajcheʼ tsiʼ colta Tomás yicʼot Mónica i yixicʼal chaʼan miʼ ñaʼtan chuqui yom miʼ mel yicʼot Justin? (Mr. 12:30; 2 Ti. 2:22.) 13) ¿Chucoch maʼ wʌl chaʼan Tomás yicʼot Mónica tsiʼ pʌsʌyob i chʼujbiya cheʼ tsʼitaʼ jachix chuqui tsaʼ caji i melob? (Mt. 6:33.) 14) ¿Bajcheʼ miʼ coltan ili video jiñi tatʌlob chaʼan miʼ coltan i familiajob tiʼ chaʼan bʌ Dios? (1 Ti. 5:8.) 15) ¿Chuqui yom miʼ mel tiʼ familia jiñi tatʌl?
NOTA CHAʼAN TATɅLOB: Cheʼ tsaʼ ñumi ili drama yaʼ ti uxpʼejl bʌ qʼuin colem tempa bʌ ti 2011, ¿tsaʼ baʼ qʼuele mi yom to maʼ ñumen weñʼesan a Chʼujutesaya ti familia? Cheʼ tsaʼix a qʼuele ili video, ¿tsaʼ baʼ qʼuele mi anto yom bʌ maʼ weñʼesan? Cʼajtiben Jehová chaʼan miʼ coltañet a mel jiñi yom to bʌ melol chaʼan i coltʌntel a familia (Ef. 5:15-17).