Laʼ laj cʼʌn ti cʌntesa jiñi folleto Jini wen tʼan
1. ¿Bajcheʼ melbil jiñi folleto Jini wen tʼan?
1 Cheʼ bajcheʼ tsaʼ laj qʼuele ti La Queʼtel tiʼ chaʼan bʌ Dios i chaʼan julio, jiñi folleto ¡Jini wen tʼan tilem bʌ ti Dios! jiñʌch jumpʼejl la queʼtijib muʼ bʌ laj cʼʌn chaʼan mi laj cʌntesan tiʼ sujmlel yañoʼ bʌ. Ti ili folleto maʼañic ti tsʼijbunti jiñi versículo tac, ili tsaʼ mejli chaʼan miʼ sʌclan ti Biblia jiñi woli bʌ ti estudio. Jiñi jun tac tsaʼ mejli chaʼan mi lac bajñel pejcan, pero ili folleto tsaʼ mejli chaʼan miʼ tsajintel yicʼot juntiquil xcʌntesa. Jin chaʼan, cheʼ bʌ an majqui mi lac pʌsben ili folleto, laʼ lac chaʼlen wersa chaʼan mi lac pʌsben bajcheʼ miʼ mejlel jumpʼejl estudio, i cheʼ bajcheʼ jiñi, mi caj i ñaʼtan chaʼan tijicñayʌch cheʼ miʼ cʌn jiñi wen tʼan (Mt. 13:44).
2. ¿Bajcheʼ miʼ mejlel laj cʼʌn jiñi folleto Jini wen tʼan cheʼ ti ñaxam bʌ julaʼ?
2 Cheʼ ti ñaxam bʌ julaʼ. Miʼ mejlel a wʌl: «Cabʌl chuqui mi la cubin ti noticia, jin chaʼan cabʌl miʼ wen cʼojoʼtañob jiñi talto bʌ qʼuin. ¿Muʼ ba caj i tojʼan maʼ wʌl ili pañimil? [Pijtan chaʼan miʼ jacʼ.] ¿A wujil ba chaʼan jiñi Biblia miʼ yʌqʼueñonla lac pijtaya? Ti ili folleto miʼ tilel cʼajtiya tac muʼ bʌ i yʌqʼuen i jacʼbal jiñi Biblia». Aqʼuen jiñi folleto, i suben chaʼan miʼ yajcan jumpʼejl cʼajtiya am bʌ yaʼ tiʼ yujtibal. Pʌsben bajcheʼ miʼ mejlel jumpʼejl estudio cheʼ bʌ maʼ cʼʌn jiñi párrafo 1 am bʌ ti jiñi cʌntesʌntel muʼ bʌ i yʌqʼuen i jacʼbal jiñi cʼajtiya. Yambʌ jiñʌch cheʼ maʼ pʌsben bajcheʼ miʼ mejlel i coltan jiñi folleto i tajben i jacʼbal yaʼ ti Biblia jumpʼejl cʼajtiya tsaʼ bʌ a yajca jatet ti jumpʼejl cʌntesʌntel. Mi an jumpʼejl video yaʼ ti jw.org muʼ bʌ i taj ti tʼan jiñi temaj, miʼ mejlel a cʼʌn.
3. Tsictesan bajcheʼ miʼ mejlel ti pʌstʌl estudio yicʼot jiñi folleto Jini wen tʼan.
3 Bajcheʼ miʼ mejlel laj cʼʌn ti pʌs estudio. 1) Pejcan jiñi cʼajtiya am bʌ i númerojlel ti iʼicʼ chaʼan jiñi quixtañu miʼ qʼuel jiñi ñumen ñuc bʌ. 2) Pejcan jiñi párrafo. 3) Pejcan jiñi tʌtsʼʌl tac bʌ texto, i melben yambʌ cʼajtiya tac chaʼan maʼ coltan i jacʼ yicʼot Biblia jiñi cʼajtiya am bʌ ti iʼicʼ. 4) Mi an cabʌl párrafo ti jumpʼejl cʼajtiya, mele cheʼ bajcheʼ miʼ yʌl jiñi 2 yicʼot 3. Mi an jumpʼejl video maxto bʌ a pʌsbe muʼ bʌ yʌqʼuen i jacʼbal jiñi cʼajtiya, pʌsben cheʼ maʼ wʌqʼuen estudio. 5) Suben jiñi quixtañu chaʼan miʼ jacʼ jiñi cʼajtiya, cheʼ bajcheʼ jiñi mi caj a ñaʼtan mi tsaʼʌch i chʼʌmbe i sujm.
4. ¿Chuqui mi caj i coltañonla chaʼan miʼ mejlel lac wen cʼʌn ili folleto?
4 Pejcan ili eʼtijibʌl wen ñuc bʌ i cʼʌjñibal, i cʼʌñʌ tiʼ pejtelel ora. Cheʼ bʌ maʼ chajpan a bʌ, ñaʼtan jiñi muʼ bʌ a pʌsben estudio yicʼot bajcheʼ miʼ mejlel a cʼʌn jiñi versículo tac chaʼan miʼ mejlel a wen tsictesʌben (Pr. 15:28; Hch. 17:2, 3). Cheʼ ñumen a wujil i cʼʌñol ili folleto, mi caj a mulan a ñumen cʼʌn chaʼan maʼ cʌntesan tiʼ sujmlel yañoʼ bʌ.