Tsajcanla i melbal jiñi xʼaltʼañob: Habacuc
1. ¿Chucoch mi lac chʼʌmben isujm bajcheʼ yubil tsiʼ yubi jiñi xʼaltʼan Habacuc?
1 Cheʼ mi laj qʼuel bajcheʼ woliʼ pʼojlel jontolil, miʼ mejlel la cubin bajcheʼ Habacuc tsaʼ bʌ i cʼajtibe Jehová chucoch miʼ yʌcʼ ti ujtel jontolil (Hab. 1:3; 2 Ti. 3:1, 13). Cheʼ mi lac wen ñaʼtan i tʼan Habacuc yicʼot i xucʼtʌlel, miʼ mejlel i coltañonla chaʼan mi lac lʌtʼ jiñi wocol tac cheʼ bʌ maxto julem i qʼuiñilel Jehová chaʼan miʼ chaʼlen meloñel (2 P. 3:7).
2. ¿Bajcheʼ miʼ mejlel lac pʌs lac xucʼtilel ili ora?
2 Yom xucʼulonla. Habacuc yʌxʌl i yo tsaʼ ajñi yicʼot maʼañic tsiʼ cʌyʌ i melben i yeʼtel Dios, i mach jin jach tsiʼ cʼojoʼta i wocol (Hab. 2:1). Jehová tsiʼ sube chaʼan mi caj i tsʼʌctiyel i tʼan cheʼ tiʼ yorajlel yicʼot chaʼan cuxul mi caj i yajñelob jiñi xucʼuloʼ bʌ (Hab. 2:2-4). ¿Chuqui i sujmlel iliyi chaʼan jiñi xñoptʼañob ti ili cojix bʌ qʼuin? Chaʼan jiñi ñumen ñuc bʌ i cʼʌjñibal jiñʌch cheʼ mi lac ñop chaʼan mi caj i tilel i jilibal, i mach jiñic jala mi caj i tilel. Jiñi ñopoñel miʼ coltañonla chaʼan chʌn yʌxʌl la co yicʼot chaʼan mi la cʌcʼ ti ñuc jiñi subtʼan (He. 10:38, 39).
3. ¿Chucoch yom chʌn tijicñayonla tiʼ melol i yeʼtel Jehová?
3 Tijicñayonla tiʼ melol i yeʼtel Jehová. Jiñi lac chʼujbiya mi caj i ñojpel cheʼ bʌ Gog miʼ contrajin i tejclum Jehová (Ez. 38:2, 10-12). Cheʼ an jumpʼejl guerra, miʼ pʼojlel cabʌl wocol, cheʼ to jaʼel tiʼ tojlel muʼ bʌ i mʌlob jiñi guerra. Mach lajalix bajcheʼ ti ñaxan, jiñi quixtañujob miʼ sʌtob chuqui añob i chaʼan yicʼot miʼ sʌjlel bʌlñʌcʼʌl. ¿Chuqui mi caj lac mel cheʼ miʼ tilel jiñi wocol tac? Habacuc tsiʼ ñaʼta chaʼan mi caj i taj wocol tac, pero tsiʼ taja i tijicñʌyel tiʼ melol i yeʼtel Jehová (Hab. 3:16-19). Lac tijicñʌyel ti Jehová mi caj i coltañonla chaʼan mi lac lʌtʼ jiñi wocol tac (Neh. 8:10; He. 12:2).
4. ¿Chuqui miʼ mejlel lac mel ti ili ora yicʼot ti talto bʌ qʼuin?
4 Jehová mi caj i chʌn cʌntesan jiñi muʼ bʌ i cʌntañob cheʼ tiʼ qʼuiñilel meloñel (Hab. 2:14). Jiñi muʼ bʌ i chaʼ chʼojyelob mi caj i cʌntesʌntelob ti Jehová. Jin chaʼan, laʼ lac chaʼlen wersa chaʼan mi lac sub i chaʼan bʌ Jehová yicʼot melbil tac bʌ i chaʼan (Sal. 34:1; 71:17).