Jiñi xʼaltʼañob miʼ coltañonla laj cʌn Dios

ABRAHÁN

Dios junlajal miʼ qʼuelonla i yom i yʌqʼueñonla ti lac pejtelel jiñi i bendición.

Dios tiʼ sube jiñi xʼaltʼan Abrahán chaʼan tiʼ tojlel «mi caj i tajob i wenlel winicob xʼixicob ti jujunmojt ti pañimil» (Génesis 12:3).

¿Chuqui mi laj cʌn? Chaʼan Dios miʼ wen cʼuxbiñonla yicʼot yom i yʌqʼuen i bendición jiñi familia tac, wiñicob, xʼixicob yicʼot xbiʼtalob muʼ bʌ i jacʼbeñob i tʼan.

MOISÉS

Dios añʌch i yutslel i miʼ yʌqʼuen i bendición jiñi muʼ bʌ i chaʼleñob wersa i ñumen cʌñob.

Dios tsiʼ yʌqʼue jiñi xʼaltʼan Moisés i pʼʌtʌlel chaʼan miʼ mel milagro tac. Anquese Moisés tsaʼ aqʼuenti i pʼʌtʌlel, tsiʼ cʼajtibe Dios: «Mij cʼajtibeñet chaʼan maʼ pʌsbeñon a bijlel, chaʼan mij cʌñet, chaʼan mic taj i yutslel a pusicʼal tiʼ pejtelel ora» (Éxodo 33:13). Dios tsaʼʌch i mulaj tsaʼ bʌ i cʼajti Moisés, jin chaʼan tsiʼ yʌqʼue i ñaʼtʌbal yicʼot tsiʼ colta i cʌn bajcheʼ yilal i melbal. Jumpʼejl ejemplo, Moisés tsaʼ cʼoti i cʌn chaʼan Dios yujil pʼuntaya yicʼot an i yutslel (Éxodo 34:6, 7).

¿Chuqui mi laj cʌn? Chaʼan Dios mi caj i yʌqʼueñonla ti lac pejtelel jiñi i bendición miʼ mucʼʌch lac chaʼlen wersa laj cʌn. Yaʼ tiʼ Tʼan miʼ subeñonla bajcheʼ yom mi lac chʼujutesan yicʼot chaʼan ti lac pejtelel yom i yʌqʼueñonla jiñi i bendición.

JESÚS

Dios mi caj i yʌqʼueñonla i bendición tiʼ pejtelel ora miʼ mucʼʌch laj cʌn tsaʼ bʌ i mele Jesús yicʼot chaʼan jiñi i cʌntesa.

Jiñi i Tʼan Dios miʼ yʌl tsaʼ bʌ i ñusa Jesús yicʼot chaʼan jiñi i cʌntesa. Dios tsiʼ yʌqʼue i pʼʌtʌlel Jesús chaʼan miʼ mel milagro tac, tsiʼ lajmesa jiñi xpotsʼob, xcojcob yicʼot jiñi mach bʌ weñobic i yoc. Cheʼ jaʼel, tsiʼ chaʼ aqʼue i cuxtʌlel jiñi tsaʼix bʌ chʌmiyob (sajtiyob). Cheʼ bajcheʼ ili, Jesús tsiʼ pʌsʌ muʼ bʌ caj i mel Dios ti talto bʌ qʼuin. Jesús tsiʼ subeyonla chuqui yom mi lac mel chaʼan mi lac taj ili bendición tac: «Jiñʌch i cuxtʌlel mach bʌ anic miʼ jilel, cheʼ miʼ cʌñetob jini mero Dios, jini cojach bʌ, yicʼot Jesucristo, tsaʼ bʌ a choco tilel» (Juan 17:3).

Jesús tsiʼ pʌsʌ i yutslel yicʼot i cʼuxbiya. Jin chaʼan cheʼ bʌ tsiʼ yʌlʌ: «Ñopoyon come utson. Pecʼ mic mel c bʌ. Muqʼuix caj laʼ taj cʼaj o chaʼan laʼ pusicʼal», jiñi wiñicob xʼixicob (quixtañujob) tsiʼ jacʼʌyob (Mateo 11:29). An wiñicob tiʼ yorajlel Jesús muʼ bʌ i ticʼlañob jiñi xʼixicob, pero Jesús tsiʼ pʌsbeyob i yutslel yicʼot tiʼ chʼʌmʌyob ti ñuc.

¿Chuqui mi laj cʌn? Chaʼan Jesús tsiʼ wen cʼuxbi jiñi quixtañujob i tsiʼ cʌybeyonla wem bʌ ejemplo chaʼan cheʼ yom mi lac mel tiʼ tojlel yambʌlob.

JESÚS MACH JIÑIC DIOS

Jiñi Chʼujul bʌ tsʼijbujel miʼ subeñonla chaʼan ‹an jach juntiquil Dios› i miʼ yʌl jaʼel chaʼan Jesucristo tsaʼ cʼʌjñi bajcheʼ xyaj ñusatʼan (1 Corintios 8:6). Jesús tsiʼ jamʌ alʌ chaʼan mach ñumen ñuquic bajcheʼ Dios i chaʼan tsaʼ chojqui tilel ila ti Lum (Juan 11:41, 42; 14:28).a