Cʼajtiben Dios i bendición

Dios an i yʌqʼueyonla wen ñuc bʌ lac majtan chaʼan mi lac pejcan yicʼot chaʼan mi lac suben bajcheʼ yubil mi la cubin. Jiñi xʼaltʼan David tiʼ sube Dios: «Mi caj i tilelob baʼ añet pejtel winicob xʼixicob, Come jatet maʼ ñichʼtʌbeñob i yoración» (Salmo 65:2). Pero ¿bajcheʼ miʼ mejlel lac pejcan Dios ti oración chaʼan miʼ ñʌchʼtañonla yicʼot chaʼan miʼ yʌqʼueñonla i bendición?

PɅSɅ A PECʼLEL

Salmo 62:8 miʼ yʌl: «Cʼajtibenla Dios ti wocol tʼan pejtel chuqui wolaʼ ñaʼtan ti a pusicʼal». Cheʼ bʌ mi lac pejcan Dios ti oración, miʼ mejlel lac luʼ suben pejtelel laj cʼojol. Jiñi Mach bʌ añic i pʼisol i pʼʌtʌlel miʼ qʼuel ti ñuc jiñi oración loqʼuem bʌ ti lac pusicʼal.

PEJCAN DIOS TIʼ CʼABAʼ

Dios an cabʌl bajcheʼ miʼ pejcʌntel, pero an jach jumpʼejl i cʼabaʼ. «Joñon Jehová. Jiñʌch j cʼabaʼ» (Isaías 42:8, TNM). Yaʼ ti Chʼujul bʌ tsʼijbujel lʌcʼʌ cheʼ bʌ 7,000 miʼ chʼʌmben tilel i cʼabaʼ Dios, Jehová. I cabʌl xʼaltʼan tsiʼ cʼʌmbeyob i cʼabaʼ Dios. Jiñi xʼaltʼan Abrahán tsiʼ yʌlʌ: «C Yum [Jehová]. Mi caj c chaʼ pejcañet» (Génesis 18:30). Joñonla jaʼel yom mi laj cʼʌmben i cʼabaʼ Jehová cheʼ bʌ mi lac mel oración.

PEJCAN TI ORACIÓN TI JIÑI TʼAN A WUJIL BɅ

Dios yujil chuqui am bʌ ti lac pensar yicʼot bajcheʼ yubil mi la cubin lac bʌ i mach yʌlʌyic baqui bʌ tʼan la cujil. Yaʼ tiʼ Tʼan miʼ yʌl: «Junlajal miʼ qʼuel winicob Dios. Tiʼ pejtelel lum Dios miʼ qʼuel ti utsʼat jini muʼ bʌ i bʌcʼñañob, muʼ bʌ i chaʼleñob chuqui toj» (Hechos 10:34, 35).

Chaʼan Dios miʼ yʌqʼueñonla bendición mach cojach yom mi lac pejcan ti oración. Yaʼ ti yan tac bʌ artículo mi caj laj qʼuel chuqui yom bʌ mi lac mel.