Ñusan a bʌ tiʼ subol jiñi wen tʼan

¿Am bʌ i tajol wocol maʼ wubin chaʼan maʼ loqʼuel ti subtʼan? Mi cheʼʌch bajcheʼ jiñi, mach jatet jach, ti lac pejtelel cheʼ miʼ laj cujtel bajcheʼ jiñi. Tajol chaʼan an mach bʌ yomobic i ñʌchʼtan, an muʼ bʌ i michʼañob o tajol wocol mi laj cubin cheʼ mi lac pejcan mach bʌ laj cʌñʌyobic, ili miʼ yʌqʼueñonla lac chʼijiyemlel. Mi lac chʼujutesan jiñi tijicña bʌ Dios i yom chaʼan tijicña mi lac melben i yeʼtel (Sal. 100:2; 1 Ti. 1:11, TNM). An uxchajp muʼ bʌ i coltañonla chaʼan mi lac taj lac tijicñʌyel ti subtʼan.

Ñaxam bʌ, mi lac suben jiñi quixtañujob chaʼan pijtaya. Anquese jiñi quixtañujob woliyix i jilel majlel i pijtayajob, pero joñonla miʼ mejlel la cʌqʼueñob i tijicñʌyel cheʼ bʌ mi lac subeñob «jini Wen Tʼan» (Is. 52:7). Cheʼ jaʼel, jiñi wen tʼan chaʼan i Yumʌntel Dios miʼ mejlel i yʌqʼueñonla cabʌl tijicñʌyel. Cheʼ muʼto caj lac loqʼuel ti subtʼan laʼ lac wen ñaʼtan jiñi bendición tac muʼ bʌ caj i chʼʌm tilel jiñi i Yumʌntel Dios wʌʼ ti Pañimil.

Yambʌ, jiñi lac subtʼan miʼ coltan jiñi quixtañujob tiʼ cuxtʌlel yicʼot tiʼ chaʼan bʌ Dios, miʼ cʌy i melob mach bʌ weñic yicʼot miʼ tajob i cuxtʌlel mach bʌ añic miʼ jilel (Is. 48:17, 18; Ro. 1:16). Laʼ cu lac ñaʼtan chaʼan mi laj coltan juntiquil am bʌ ti wocol pero an mach bʌ yomobic coltʌntel, mach jiñic chaʼan miʼ caj laj cʌy laj coltan jiñi yomoʼ bʌ coltʌntel (Mt. 10:11-14).

Jiñi cojix bʌ jiñʌch ñumen ñuc bʌ: Jiñi lac subtʼan miʼ yʌqʼuen i ñuclel Jehová. Miʼ wen qʼuel ti ñuc ili eʼtel (Is. 43:10; He. 6:10). Cheʼ to jaʼel miʼ yʌqʼueñonla chʼujul bʌ i yespíritu chaʼan mi lac tsʼʌctesan ili troñel. Jin chaʼan, laʼ lac chʌn cʼajtiben chaʼan miʼ yʌqʼueñonla jiñi tijicñʌyel muʼ bʌ i yʌcʼ jiñi chʼujul bʌ espíritu (Gá. 5:22). Cheʼ an la quicʼot Jehová maʼan lac bʌqʼuen i mi lac chaʼlen subtʼan yicʼot lac chʼejlel (Hch. 4:31). Jin chaʼan, anquese jiñi quixtañujob mach yomobic i ñʌchʼtan, joñonla mi lac taj lac tijicñʌyel cheʼ bʌ mi lac mel jiñi eʼtel (Ez. 3:3).

CHEʼ BɅ TSAʼIX LAʼ QʼUELE JIÑI VIDEO ¿BAJCHEʼ TSAʼ C CHAʼ TAJA C TIJICÑɅYEL TIʼ MELOL I YEʼTEL JEHOVÁ?, JACʼɅ ILI CʼAJTIYA TAC:

• ¿Chucoch ñaxan yom mi lac pʼʌtʼesan lac bʌ tiʼ chaʼan bʌ Jehová anquese cabʌl ora mi lac chaʼlen subtʼan ti jujumpʼejl uw?

• ¿Bajcheʼ miʼ mejlel lac lajin María?

• ¿Bajcheʼ ora maʼ wen ñaʼtan jiñi muʼ bʌ a pejcan tiʼ Tʼan Dios?

• ¿Chuqui muʼ bʌ a ñumen mulan cheʼ bʌ maʼ chaʼlen subtʼan?