¿Muʼ ba lac taj laj qʼuel chaʼan añʌch Dios?

Cheʼ bʌ mi laj qʼuel wen utsʼatax bʌ i ñich teʼ, ecʼ tac ti panchan o jumpʼejl cascada, ¿muʼ ba laj cʼajtesan jiñi tsaʼ bʌ i Meleyonla? Jiñi melbil tac bʌ miʼ coltañonla laj qʼuel chaʼan «añʌch Dios» (Ro. 1:20). Cheʼ bʌ mi lac locʼsʌben i yorajlel chaʼan mi lac wen ñaʼtan jiñi melbil tac, mi laj qʼuelben i pʼʌtʌlel, i cʼuxbiya, i ñaʼtʌbal yicʼot i tojel Dios, i cheʼ jaʼel i pʼejwlel (Sal. 104:24).

¿Chuqui melbil tac bʌ i chaʼan Jehová maʼ qʼuel ti jujumpʼejl qʼuin? Anquese chumulet ti jumpʼejl colem tejclum maʼ qʼuel xteʼlemut o teʼ tac. Cheʼ bʌ mi lac wen qʼuel jiñi melbil tac bʌ, miʼ mejlel i coltañonla chaʼan maʼañic mi laj cʌlʌx chaʼlen pensar, chaʼan mi la cʌcʼ lac ñaʼtʌbal ti jiñi ñumen ñuc bʌ i cʼʌjñibal yicʼot mi lac ñop chaʼan Jehová mi caj i cʌntañonla tiʼ pejtelel ora (Mt. 6:25-32). Mi an a walobil, coltan chaʼan miʼ cʌñob jiñi utsʼatax bʌ i melbal tac Jehová. Cheʼ bʌ mi laj qʼuel ti ñuc pejtelel melbil tac bʌ i chaʼan Jehová, ñumen lʌcʼʌl mi caj la cubin lac bʌ tiʼ tojlel (Sal. 8:3, 4).

CHEʼ BɅ TSAʼIX LAʼ QʼUELE JIÑI VIDEO JIÑI MELBIL TAC BɅ MIʼ PɅS I ÑUCLEL DIOS: JIÑI LUZ YICʼOT JIÑI COLOR TAC, JACʼɅ ILI CʼAJTIYA TAC:

• ¿Chucoch an tac i colorlel jiñi muʼ bʌ laj qʼuel?

• ¿Chucoch miʼ yʌjñel jiñi color tac cheʼ bʌ mach junsujmic jach bajcheʼ mi laj qʼuel?

• ¿Chucoch an cabʌl i colorlel jiñi panchan?

• ¿Chuqui tac ti color maʼ mulan a qʼuel ti jiñi melbil tac bʌ i chaʼan Jehová?

• ¿Chucoch yom mi la cʌqʼuen i yorajlel chaʼan mi lac wen qʼuel jiñi melbil tac bʌ i chaʼan Jehová?