Sujten ti precursor

Cheʼ mi la cʌqʼuen lac bʌ meta tac miʼ coltañonla chaʼan mi laj cʼʌn ti wen jiñi lac pʼʌtʌlel yicʼot jiñi i yorajlel anto bʌ cheʼ maxto tilemic i jilibal ili pañimil (1Co 9:26; Ef 5:15, 16). ¿Ixcu cheʼ muqʼuic laʼ qʼuel ti laʼ chʼujutesaya ti familia chuqui ti meta tac miʼ mejlel laʼ wʌqʼuen laʼ bʌ ti jiñi tsijiʼ bʌ jabil chaʼan subtʼan? Ti ili Jun chaʼan lac tempa bʌ I Subtʼan yicʼot i Melbal jiñi xÑoptʼan mi caj laʼ taj tema tac chaʼan baqui tac bʌ meta miʼ mejlel laʼ wʌqʼuen laʼ bʌ cheʼ bʌ tsaʼix laʼ melbe oración Jehová (Snt 1:5).

Jumpʼejl ejemplo, ¿muʼ ba i mejlel laʼ coltan juntiquil ti laʼ familia chaʼan miʼ yochel bajcheʼ precursor regular? I mi maʼ bʌcʼñan chaʼan maʼañic maʼ tsʼʌctesan jiñi hora muʼ bʌ i cʼajtintel, pejcan precursorob cheʼ bʌ woliʼ ñusañob bajcheʼ jatet (Pr. 15:22). Tajol miʼ mejlel a melben cʼajtiya tac juntiquil precursor cheʼ bʌ maʼ mel a chʼujutesaya ti familia, i cheʼ jiñi maʼ tsʼijbun bajcheʼ tac hora maʼ mejlel ti subtʼan. Cheʼ jaʼel, mi cʌn precursoretix wajali, ¿chucoch maʼañic maʼ chaʼ ñop? Tajol ili ora muqʼuix caj a mejlel.

¿Mejl ba ti ochel ti precursor auxiliar juntiquil ti laʼ familia jumpʼejl uw o ñumen? Mi mach wen añic a pʼʌtʌlel, maʼ mejlel ti jumucʼ subtʼan ti jujumpʼejl qʼuin. I mi mach wen añic i yorajlel chaʼan maʼ loqʼuel ti subtʼan tiʼ caj maʼ chaʼlen eʼtel o woliyet ti clase, maʼ mejlel ti ochel bajcheʼ precursor ti jiñi uw cheʼ bʌ an i yorajlel qʼuiñijel tac, o cheʼ bʌ miʼ chʼʌm tilel joʼpʼejl sábado yicʼot domingo. Tsʼijbun ti jumpʼejl calendario chuqui ti uw tac a wom ochel ti precursor auxiliar yicʼot mele jumpʼejl horario (Pr. 21:5).

CHEʼ BɅ TSAʼIX LAʼ QʼUELE JIÑI VIDEO YOM CHʼEJLETLA, PRECURSOROB, JACʼɅ ILI CʼAJTIYA TAC:

• ¿Bajcheʼ tsiʼ cʌnta Jehová jiñi hermana Aamand? ¿Chuqui miʼ pʌsbeñonla iliyi?