1921 Jiñi Cien Jab Ñumeñix BɅ

CHʼEJL BɅ XSUBTʼAÑOB

Jiñi Xpejcaya bibliajob yom chʼejlob chaʼan miʼ tsʼʌctesañob i yeʼtel. Mi caj i subeñob «wen tʼan jini utsoʼ bʌ» i mi caj i subob jaʼel chaʼan «mi caj i qʼuextan mulil lac Dios».

Juntiquil hermano tsaʼ bʌ chumle ti Canadá i cʼabaʼ John Hoskin tsiʼ chaʼle subtʼan yicʼot i chʼejlel anquese an contrajintel. Tiʼ tejchibal 1921 tsiʼ pejca juntiquil am bʌ i yeʼtel ti jiñi ñopbalʌl metodista, i tsaʼ caji i yʌl: «Wen jach bajcheʼ miʼ mejlel la cʌl i chaʼan bʌ Biblia. Anquese mach lajalic chuqui mi lac ñaʼtan wen jach bajcheʼ miʼ mejlel la cujtesan lac tʼan cheʼ bajcheʼ i yamigojoʼ bʌ i bʌ». Pero mach cheʼic tsaʼ ujti. Jiñi hermano Hoskin tsiʼ yʌlʌ: «Tsaʼ jaxto teche lon c tʼan i jiñi wiñic tsʌts tsiʼ ñupʼu i puerta, tsaʼ c ñaʼta chaʼan muʼto caj i tojpʼel i vidriojlel».

Jiñi wiñic tiʼ sube ti cʼam bʌ tʼan: «¿Chucoch maʼañic maʼ majlel a pejcan jiñi mach bʌ xñoptʼañobic?». Jiñi hermano Hoskin maʼañic chuqui tsiʼ yʌlʌ, pero cheʼ bʌ wolix (choncolix) i sujtel tsiʼ ñaʼta: «¡Tsaʼ c ñaʼta chaʼan jin woli (yʌquel) bʌ c mel (chaʼlen) jiñi!».

Jiñi contrajintel tsaʼ bej caji tiʼ yijcʼʌlel cheʼ bʌ jiñi wiñic tsiʼ chaʼle cʌntesa. Jiñi hermano miʼ yʌl: «Tiʼ subeyob jiñi i wiñicob tiʼ ñopbal chaʼan maʼañic miʼ ñʌchʼtañoñob. Tsiʼ yʌlʌ chaʼan juntiquil xloton tsaʼ bʌ cʼoti yaʼi i chaʼan yom mic tsʌnsʌntel». Pero ili maʼañic tsiʼ yʌqʼue i chʼijyemlel jiñi hermano. Tsiʼ bej chaʼle subtʼan i tsiʼ pejca cabʌlob. Tsiʼ bej alʌ: «Ti ñaxan maʼañic baʼ j cʌlʌx ubi c tijicñʌyel ti subtʼan ti ototʌl tac. An tsaʼto bʌ i subeyoñob: ‹Cujil lojon chaʼan i wiñiquet Dios› i tsiʼ cʼajtibeyoñob mi an bajcheʼ miʼ mejlel i coltañoñob».

COLTAYA CHAʼAN MIʼ BAJÑEL CHAʼLEÑOB ESTUDIO YICʼOT ESTUDIO TI FAMILIA

Chaʼan jiñi lac piʼʌlob miʼ ñumen chʼʌmbeñob i sujm jiñi Biblia, jiñi Xpejcaya bibliajob tsaʼ caji i locʼsañob cʼajtiya tac yicʼot i jacʼbal tac ti jiñi revista cʌmbil bʌ ili ora bajcheʼ ¡Jamʌx a wut! Ti jiñi programa «Juvenile Bible Study» (Estudio bíblico chaʼan xcolelob) miʼ tilel cʼajtiya tac yom bʌ miʼ qʼuelob jiñi tatʌlob yicʼotob i yalobil. Jiñi tatʌlob yom «miʼ melbeñob ili cʼajtiya tac i miʼ coltañob i tajben i jacʼbal yaʼ ti Biblia». An cʼajtiya tac muʼ bʌ i chʼʌm tilel jumpʼejl cʌntesa mach bʌ wocolic bajcheʼ «¿Jaypʼejl libro miʼ chʼʌm tilel jiñi Biblia?». Yambʌ cʼajtiya tac bajcheʼ «¿Yom ba miʼ ñaʼtañob jiñi xñoptʼañob chaʼan tiʼ pejtelelob mi caj i tajob contrajintel?», ili miʼ chajpañob jiñi xcolelob chaʼan miʼ sujtelob ti chʼejl bʌ xsubtʼañob.

Cheʼ jaʼel miʼ tilel cʼajtiya tac yicʼot i jacʼbal loqʼuem bʌ ti Biblia chaʼan miʼ coltan jiñi ñumen i cʌñʌyobix bʌ chuqui miʼ yʌl. Jiñi i jacʼbal tac miʼ mejlel ti tajtʌl ti jiñi volumen 1 chaʼan jiñi libro Estudios de las Escrituras. Cabʌlob tsiʼ tajayob i wenlel ti ili chaʼpʼejl programa. Pero ti jiñi revista cʌmbil bʌ ili ora bajche ¡Jamʌx a wut!, tsaʼ bʌ loqʼui ti 21 chaʼan diciembre, 1921, tsaʼ sujbi chaʼan maʼañix mi caj i loqʼuel. ¿Chucoch ti ora tsaʼ qʼuextʌyi iliyi?

JUMPʼEJL TSIJIʼ BɅ LIBRO

Jiñi hermanojob añoʼ bʌ tiʼ wenta jiñi eʼtel tsiʼ qʼueleyob chaʼan jiñi tsijib Xpejcaya bibliajob yom ñumen chajpʌbil bajcheʼ miʼ cʌñob jiñi cʌntesa tac am bʌ ti Biblia. Jin chaʼan, ti noviembre cheʼ ti 1921 tsaʼ loqʼui jiñi libro The Harp of God (ti 1925 tsaʼ loqʼui ti español, i cʼabaʼ El Arpa de Dios). Jiñi muʼ bʌ i chʼʌmob ili libro miʼ yotsʌntelob ti jumpʼejl curso chaʼan bʌ Biblia i cʼabaʼ The Harp Bible Study Course. Ti ili curso, baqui jiñi lac piʼʌl miʼ bajñel tsajin (qʼuel) majlel jiñi libro, miʼ coltan i chʼʌmben i sujm «jiñi ñaʼtʌbil bʌ i chaʼan Dios chaʼan miʼ yʌqʼuen i cuxtʌlel jiñi quixtañujob». ¿Bajcheʼ miʼ mejlel iliyi?

Cheʼ bʌ juntiquil lac piʼʌl miʼ chʼʌm jumpʼejl libro, miʼ yʌqʼuentel jaʼel jumpʼejl tarjeta muʼ bʌ i pʌs baqui tac bʌ página yom miʼ pejcan. Cheʼ ti yambʌ semana miʼ yʌqʼuentel yambʌ tarjeta baqui miʼ tilel cabʌl cʼajtiya tac loqʼuem bʌ ti jiñi página tac tsaʼ bʌ i pejca i ti wiʼil miʼ yʌl baqui bʌ página miʼ pejcan cheʼ ti yambʌ semana.

Jiñi estudiante, 12 semana miʼ yʌqʼuentel ili tarjeta. Jujumpʼejl semana miʼ chocbentel majlel jumpʼejl tsijib tarjeta ti correo. Jiñi hermanojob ñoxobix bʌ o jiñi mach bʌ añic miʼ mejlelob ti loqʼuel tiʼ caj wocol miʼ yubiñob jiñʌch muʼ bʌ i chocob majlel ili tarjeta tac. Jumpʼejl ejemplo, Anna Gardner, chʼoyol bʌ ti Millvale (Pensilvania, Estados Unidos), miʼ yʌl: «Jiñi tsijib libro tsiʼ colta jiñi c chich Thayle, mach bʌ añic miʼ wen mejlel ti xʌmbal, chaʼan miʼ ñumen chaʼlen subtʼan come ti jujumpʼejl semana miʼ mejlel i choc majlel tarjeta tac am bʌ i cʼajtiya tac». Cheʼ bʌ jiñi estudiante miʼ yujtel ti ili curso, jiñi hermanojob ti congregación miʼ julaʼtañob chaʼan miʼ ñumen cʌn am bʌ ti Biblia.

CABɅLTO CHUQUI YOM MELOL

Tiʼ yujtibal jiñi jabil, jiñi hermano Joseph Rutherford tsiʼ chocbe majlel jumpʼejl carta pejtelel jiñi congregación. Tsiʼ yʌlʌ: «Ti ili jabil tsaʼ ñumen sujbi jiñi wen tʼan chaʼan bʌ i Yumʌntel Dios i tsaʼ lac ñumen qʼuelbe i wut jiñi eʼtel bajcheʼ ti yan tac bʌ jabil». I tsiʼ bej alʌ: «Cabʌlto chuqui yom miʼ mejlel. Subenla yañoʼ bʌ chaʼan miʼ chaʼleñob coltaya ti ili chʼujul bʌ eʼtel». Tsiquil chaʼan jiñi Xpejcaya bibliajob tsaʼʌch i jacʼʌyob. Ti 1922, yicʼotob i chʼejlel tiʼ subuyob jiñi wen tʼan chaʼan bʌ i Yumʌntel Dios i wen ñuc bajcheʼ tsiʼ meleyob.