¿Chucoch an cabʌl tsʼaʼleya?

Ili pañimil butʼul ti tsʼaʼleya, ¿chucoch? Chaʼan mi lac ñaʼtan, yom mi lac chʼʌmben i sujm chuqui jiñi tsʼaʼleya, chucoch miʼ colel tiʼ pusicʼal jiñi quixtañujob i bajcheʼ miʼ pʼojlel.

¿Chuqui jiñi tsʼaʼleya?

Jiñʌch cheʼ mach la comic lac yoque qʼuel juntiquil lac piʼʌl o junmojt lac piʼʌlob. I mach lajalic cheʼ mucʼ jach lac jumucʼ michʼ qʼuel juntiquil lac piʼʌl.

¿CHUCOCH MIʼ PʼOJLEL TIʼ PUSICʼAL QUIXTAÑUJOB JIÑI TSʼAʼLEYA?

Añʌch cabʌl chucoch miʼ pʼojlel jiñi tsʼaʼleya. Lʌcʼʌ tiʼ pejtelel ora miʼ tsʼaʼleñob yambʌ mach tiʼ cajic chuqui miʼ melob tiʼ cajʌch majquiyob. Tajol miʼ qʼuelob bajcheʼ jontol bʌ lac piʼʌlob, bʌbʌqʼueñob jax bʌ o miʼ ñaʼtañob chaʼan maʼañic mi caj i tojʼan bajcheʼ yilalob. Cheʼ jaʼel, miʼ ñaʼtañob chaʼan mach wen ñucobic i cʼʌjñibal o chaʼan mucʼ jach caj i techob cabʌl wocol. An yambʌlob muʼ bʌ i chaʼleñob tsʼaʼleya tiʼ caj chuqui an i ñusayob, tajol tsaʼ ticʼlʌntiyob yicʼot tsaʼ melbentiyob chuqui mach bʌ weñic.

¿BAJCHEʼ MIʼ PʼOJLEL JIÑI TSʼAʼLEYA?

An i tajol, jiñi lac piʼʌlob muʼto i tsʼaʼleñob jiñi mach bʌ i cʌñʌyobic. Juntiquil lac piʼʌl miʼ mejlel i tsʼaʼlen yambʌ tiʼ caj cheʼ miʼ mel i familia o jiñi i yamigojob. I mi cabʌl cheʼ miʼ ñaʼtañob bajcheʼ jiñi miʼ ñumen pʼojlel jiñi tsʼaʼleya.

Cheʼ bʌ mi lac chʼʌmben i sujm chucoch orajach miʼ pam pujquel jiñi tsʼaʼleya mi cʼotel lac ñaʼtan chucoch an cabʌl lac piʼʌlob yujiloʼ bʌ tsʼaʼleya. Pero chaʼan mi lac jisan jiñi tsʼaʼleya yom mi laj cʌn baqui tsaʼ tejchi. Jiñi Biblia miʼ tsictesan baqui tejchen.

JIÑI BIBLIA MIʼ TSICTESɅBEÑONLA BAQUI TEJCHEN

Jumpʼejl diagrama muʼ bʌ i cʼʌn alʌ flecha tac chaʼan miʼ pʌs bajcheʼ miʼ pʼojlel jiñi tsʼaʼleya. 1. Cheʼ bʌ miʼ yʌjlel mach bʌ i sujmic yaʼ miʼ tejchel cheʼ mi lac xijqʼuel lac mel mach bʌ weñic, an tac bʌ ti internet o ti noticia tac. 2. Cheʼ mach lac wen cʌñʌyic, chaʼan jumpʼejl cultura, chaʼan baqui tilemob, chaʼan jumpʼejl ñopbalʌl 3. Bʌqʼuen, cheʼ an chuqui miʼ qʼuextʌyel, cheʼ an chuqui maʼ ñaʼtan mi caj i chilbeñetob, cheʼ an chuqui mach a wen cʌñʌyic. 4. Tsʼaʼleya, cheʼ mach comic laj qʼuel yambʌ, cheʼ ñuc mi laj qʼuel lac bʌ tiʼ tojlel yambʌ, jatsʼ o tsʌnsa.

TSAʼ BɅ I TECHE JIÑI TSʼAʼLEYA MACH JIÑIC JIÑI QUIXTAÑUJOB. Jiñi tsʼaʼleya tsaʼ tejchi yaʼ ti panchan tiʼ caj juntiquil ángel tsaʼ bʌ i contraji Dios cʌmbil bʌ bajcheʼ Satanás. Cheʼ bʌ tsiʼ teche i contrajin Dios, tsaʼ sujti ti juntiquil xtsʌnsa. Come «juntiquilʌch xlot yicʼot i tatʌch jiñi lot», jin chaʼan woli (choncol) i bej acʼ ti pʼojlel tsʼaʼleya, jatsʼ yicʼot tsʌnsa (Juan 8:44; 1 Juan 3:11, 12). Jiñi Biblia miʼ yʌl chaʼan wen jontolʌch yicʼot wen michʼ (Job 2:7; Apocalipsis 12:9, 12, 17).

TSAʼ LAC TOYO JIÑI TSʼAʼLEYA. Jiñi ñaxam bʌ wiñic, Adán, tiʼ tsajcʌbe i melbal Satanás, tiʼ caj jiñi, ti lac pejtelel xmulilonla yicʼot mach tojoñicla (Romanos 5:12). Caín, jiñi ñaxam bʌ i yalobil Adán, tiʼ tsʼaʼle Abel, jiñi i yijtsʼin i tiʼ tsʌnsa (1 Juan 3:12). Anquese mucʼʌch laj cʼuxbin yicʼot mi lac pʼuntan yambʌlob, pero come xmulilonla mach wocolic chaʼan mi lac tech lac mulʌben chuqui an i chaʼan yambʌlob, ñumen ñuc mi la cubin lac bʌ i cheʼ bajcheʼ jiñi mi lac tech lac tsʼaʼlen jiñi yambʌlob (2 Timoteo 3:1-5).

MI JUNTIQUIL MAʼAÑIC MIʼ MULAN BAJCHEʼ YILAL YAMBɅ MIʼ TSʼAʼLEN. Jiñi pañimil miʼ yʌcʼ ti pʼojlel mach tac bʌ weñic melbalʌl muʼ bʌ i yʌcʼ ti tejchel tsʼaʼleya. Come «jiñi pañimil an tiʼ pʼʌtʌlel Satanás», jin chaʼan an muʼ bʌ i michʼqʼuelob i bʌ yicʼot an muʼ bʌ i contrajin yambʌlob i jiñʌch muʼ bʌ laj qʼuel ti jujumpʼejl qʼuin (1 Juan 5:19).

Jiñi Biblia mach cojach miʼ tsictesʌbeñonla baqui tsaʼ tejchi jiñi wocol miʼ subeñonla jaʼel bajcheʼ miʼ jisʌntel.