Muʼ bʌ i subeñet jiñi libro chaʼan Apocalipsis

1, 2. ¿Baqui bʌ junchajp i sujmlel chaʼan yom mi lac mulan laj cʌn muʼ bʌ i yʌl jiñi libro chaʼan Apocalipsis?

¿AM BAʼ qʼuelbe i foto tac yambʌ lac piʼʌlob? Tajol tsaʼ taja a qʼuel mach bʌ a cʌñʌyobic. Pero maʼ waʼ taj a qʼuel jumpʼejl foto muʼ bʌ a wen mulan. ¿Chucoch? Come yaʼ maʼ loqʼuel jaʼel. Maʼ wen qʼuel i maʼ ñop a cʼajtesan jalixqui yicʼot baqui tsaʼ locʼsʌnti. Cheʼ jaʼel maʼ qʼuel pejtelel muʼ bʌ i loqʼuelob yaʼi. Jatet maʼ wen qʼuel ti ñuc jiñi foto come mach lajalic bajcheʼ jiñi yan tac bʌ.

² Weno, jiñi libro chaʼan Apocalipsis lajalʌch bajcheʼ jiñi foto. ¿Chucoch? Miʼ mejlel la cʌl chaʼchajp. Ñaxam bʌ, come lac chaʼañʌch ti tsʼijbunti. Tiʼ tejchibal miʼ yʌl: «Junchajp tsaʼ bʌ i pʌsʌ Jesucristo, tsaʼ bʌ aqʼuenti ti Dios, chaʼan miʼ pʌsben jiñi xyaj eʼtelob i chaʼan chuqui mi caj i yujtel ti lʌcʼʌl» (Apoc. 1:1). Jin chaʼan, ili libro lac chaʼañʌch, jiñi i wiñiconbʌla Dios, mach i chaʼañic pejtelel lac piʼʌlob. Jin chaʼan, maʼañic miʼ toj sajtel lac pusicʼal cheʼ la cujil chaʼan woli (choncol) lac chaʼlen coltaya chaʼan miʼ tsʼʌctiyel jiñi utsʼatax bʌ profecía tac. ¡Yaʼañonla «ti jiñi foto»!

3, 4. Cheʼ bajcheʼ miʼ yʌl jiñi libro chaʼan Apocalipsis, ¿jala mi caj i tsʼʌctiyel jiñi profecía tac, i chuqui yom mi lac mel?

³ Jiñi i chaʼchaʼpʼejl jiñʌch chaʼan jiñi i yorajlel waʼchocobil bʌ chaʼan miʼ tsʼʌctiyel jiñi profecía tac. Jiñi apóstol Juan tsiʼ taja ti tʼan iliyi cheʼ bʌ tsiʼ yʌlʌ: «Jiñi chʼujul bʌ espíritu tsiʼ pʌyʌyon tiʼ qʼuiñilel lac Yum» (Apoc. 1:10). Juan tiʼ tsʼijbu ili tʼan tac ti jiñi jabil 96 cheʼ bʌ tilemix Cristo. Ti jiñi bʌ ora wen jalto yom chaʼan jiñi i qʼuiñilel lac Yum (Mat. 25:14, 19; Luc. 19:12). Pero jiñi profecía tac miʼ pʌs chaʼan jiñi qʼuin tsaʼ tejchi ti 1914, cheʼ bʌ Jesús tsaʼ sujti ti Rey yaʼ ti panchan. Ti jiñi bʌ jab tsaʼ caji ti tsʼʌctiyel jiñi profecía tac chaʼan bʌ Apocalipsis, baqui ochem jiñi i tejclum Dios. Jin chaʼan chumulonla «tiʼ qʼuiñilel lac Yum».

⁴ Come chumulonla tiʼ qʼuiñilel lac Yum, yom mi lac chʌn cʼajtesan jiñi ticʼojel muʼ bʌ lac taj ti Apocalipsis 1:3: «Tijicña jiñi muʼ bʌ i pejcan ti cʼam bʌ tʼan jiñi tʼan tac chaʼan bʌ ili profecía i tijicñayob jiñi muʼ bʌ i yubiñob yicʼot muʼ bʌ i jacʼob chuqui tac tsʼijbubil yaʼi, come lʌcʼʌlix jiñi waʼchocobil bʌ i yorajlel». Tiʼ sujm, yomʌch mi lac pejcan ti cʼam bʌ tʼan «jiñi tʼan tac chaʼan bʌ ili profecía», mi lac ñʌchʼtan yicʼot mi lac jacʼ. ¿Baqui bʌ jiñi tʼan tac yom bʌ mi lac jacʼ?

WEN QʼUELE MI JEHOVÁ MUCʼɅCH I CHʼɅM JIÑI A CHʼUJUTESAYA

5. ¿Bajcheʼ miʼ pʌs jiñi libro chaʼan Apocalipsis chaʼan wen ñucʌch i cʼʌjñibal cheʼ mi laj qʼuel mi Jehová wolʌch i chʼʌm lac chʼujutesaya?

⁵ Cʼʌlʌl ti jiñi ñaxam bʌ capítulo chaʼan Apocalipsis mi laj qʼuel chaʼan Jesús wolʌch i wen qʼuel pejtelel jiñi muʼ bʌ i yujtel ti jiñi congregación tac (Apoc. 1:12-16, 20; 2:1). Jiñi tʼan tac tsaʼ bʌ i chocbe majlel jiñi siete congregación tac chaʼan Asia Menor miʼ pʌs chaʼan cheʼʌchi. Tsiʼ yʌcʼʌ ticʼojel tac muʼ bʌ caj i coltañob jiñi xñoptʼañob cheʼ ti ñaxam bʌ siglo chaʼan miʼ qʼuelob mi Jehová wolʌch i chʼʌm jiñi i chʼujutesayajob. I jiñi i ticʼojel tac miʼ mejlel i coltañonla jaʼel jiñi i wiñiconbʌla Dios ili ora. ¿Chuqui miʼ pʌsbeñonla iliyi? Chaʼan jiñi lac Yum, Jesucristo, wen yujil bajcheʼ añonla la quicʼot Dios. Miʼ tojʼesañonla majlel i miʼ cʌntañonla, i miʼ luʼ taj i qʼuel. Yujil chuqui yom mi lac mel (chaʼlen) chaʼan chʌn wen miʼ qʼuelonla Jehová. Wʌle, mi caj laj qʼuel chaʼpʼej uxpʼejl ticʼojel tac tsaʼ bʌ i yʌcʼʌ yicʼot yom bʌ mi lac jacʼ ili ora.

6. a) Cheʼ bajcheʼ miʼ yʌl Apocalipsis 2:3, 4, ¿chuqui ti wocol añob i chaʼan jiñi xñoptʼañob ti Éfeso? b) ¿Chuqui mi laj cʌn joñonla?

⁶ (Pejcan Apocalipsis 2:3, 4). Mach lac sʌt jiñi cʼuxbiya am bʌ lac chaʼan ti ñaxan tiʼ tojlel Jehová. Jiñi tsaʼ bʌ i sube Jesús jiñi xñoptʼañob ti Éfeso miʼ pʌs chaʼan tsaʼʌch i cuchuyob jiñi wocol tac yicʼot tsiʼ bej melbeyob i yeʼtel (troñel) Jehová. Pero tiʼ sʌtʌyob jiñi cʼuxbiya añoʼ bʌ i chaʼan ti ñaxan tiʼ tojlel Jehová. Mi yomob chaʼan Jehová miʼ chʼʌm jiñi i chʼujutesayajob yom miʼ chaʼ pʼʌtʼesañob jiñi i cʼuxbiya. Cheʼʌch miʼ yujtel jaʼel ili ora. Mach jasʌlic cheʼ mi laj cuch jiñi wocol tac, yom mi lac mel chaʼan laj cʼuxbiya. Jehová mach jin jach miʼ qʼuel chuqui mi lac mel, miʼ qʼuel jaʼel chucoch mi lac mel. Jiñi ñumen ñuc bʌ i cʼʌjñibal tiʼ tojlel jiñʌch chuqui miʼ ñijcan lac pusicʼal. Yom chaʼan mi lac chʼujutesan chaʼan laj cʼuxbiya yicʼot chaʼan mi laj qʼuel ti ñuc (Pr. 16:2; Mar. 12:29, 30).

7. a) Cheʼ bajcheʼ miʼ yʌl Apocalipsis 3:1-3, ¿chuqui ti wocol tsiʼ qʼuele Jesús ti jiñi congregación chaʼan Sardis? b) ¿Chuqui yom mi lac mel joñonla?

⁷ (Pejcan Apocalipsis 3:1-3). Yom chʌn yʌxʌl la co. Qʼuexel i wocolob jiñi añoʼ bʌ ti congregación chaʼan Sardis. Anquese ti ñaxan tsaʼʌch i wen melbeyob i yeʼtel Jehová, tsaʼix jubiyob majlel. Jin chaʼan, Jesús tiʼ subeyob chaʼan yom miʼ chaʼ chaʼleñob wersa. Jumpʼejlʌch ticʼojel chaʼañonla jaʼel. I sujmʌch chaʼan Jehová maʼañic miʼ ñajʌyel i chaʼan muʼ bʌ lac mel tiʼ tojlel (Heb. 6:10). Pero mach yomic mi lac ñaʼtan chaʼan tiʼ caj tsaʼix lac wen melbe i yeʼtel Jehová ti wajali mach yomix mi lac chaʼlen wersa ili ora. Tajol maʼañix miʼ mejlel lac wen mel cheʼ bajcheʼ ti wajali, pero yomʌch mi lac «wen chaʼlen eʼtel tiʼ chaʼan bʌ lac Yum tiʼ pejtelel ora» yicʼot yom chʌn yʌxʌl la co cʼʌlʌl miʼ tilel jiñi i jilibal (1 Cor. 15:58; Mat. 24:13; Mar. 13:33).

8. ¿Chuqui mi laj cʌn ti jiñi tsaʼ bʌ i sube Jesús jiñi xñoptʼañob ti Laodicea? (Apocalipsis 3:15-17).

⁸ (Pejcan Apocalipsis 3:15-17). Laʼ lac chʼujutesan Jehová yicʼot lac tijicñʌyel i tiʼ pejtelel lac pusicʼal. Ti jiñi tsaʼ bʌ i sube Jesús jiñi xñoptʼañob ti Laodicea, tsiʼ yʌlʌ yambʌ wocol. «Qʼuixiñob jach» yicʼot mach i wentajobix jiñi i chʼujutesayob tiʼ tojlel Jehová. Jesús tiʼ subeyob chaʼan mach tijicñayobic yicʼot pʼumpʼuñob jax. Jin chaʼan, an chuqui yom miʼ melob chaʼan miʼ chaʼ tajob i tijicñʌyel ti Jehová yicʼot ti jiñi i chʼujutesaya (Apoc. 3:19). ¿Chuqui miʼ pʌsbeñonla? Mi mach tijicñayoñixla cheʼ bajcheʼ ti ñaxan, yom mi lac ñumen qʼuel ti ñuc pejtelel am bʌ i yʌqʼueyonla Jehová (Apoc. 3:18). Mach la cʌcʼ chaʼan miʼ yʌjñel lac pensar tiʼ caj la com chaʼan cabʌl chuqui an lac chaʼan mi lac chumtʌl. La com la cʌcʼ ti ñaxan jiñi i chaʼan tac bʌ Dios.

9. Cheʼ la cujil chuqui tiʼ sube Jesús jiñi congregación tac chaʼan Pérgamo yicʼot Tiatira, ¿baqui yom mi laj cʌntan lac bʌ?

⁹ Laʼ lac tsʼaʼlen i cʌntesa tac jiñi apóstatajob. Jesús tsʌts tsiʼ tiqʼui jiñi xñoptʼañob ti Pérgamo come woli (yʌquel) i yʌcʼob tʼox bʌ (Apoc. 2:14-16). Cheʼ jaʼel, tiʼ sube chaʼan weñʌch woli bʌ i melob jiñi xñoptʼañob ti Tiatira come maʼañic tsiʼ ñopoyob jiñi «wen mucul bʌ i chaʼan Satanás» i tiʼ subeyob chaʼan yom tsʌts miʼ chucob i bʌ tiʼ sujmlel (Apoc. 2:24-26). Jiñi xñoptʼañob cʼuñoʼ bʌ i ñopoñel yicʼot jiñi tsaʼ bʌ i yʌcʼʌyob i bʌ ti lotintel ti jiñi mach bʌ i sujmic cʌntesa tac yom miʼ chaʼ ñaʼtañob i bʌ. Joñonla jaʼel yom mi lac tsʼaʼlen jiñi cʌntesa tac am bʌ tiʼ contra muʼ bʌ i ñaʼtan Jehová. Tajol jiñi apóstatajob miʼ poj pʌsob chaʼan «miʼ chʼujutesañob Dios», pero tiʼ sujm «mach cheʼic chumulob bajcheʼ jiñi i chʼujutesayajob» (2 Tim. 3:5). Cheʼ wen la cujilʌch pejcʌntel i Tʼan Dios, mach wocolic mi caj la cubin chaʼan mi laj cʌn yicʼot chaʼan maʼañic mi lac chʼʌm jiñi mach bʌ i sujmic cʌntesa tac (2 Tim. 3:14-17; Jud. 3, 4).

10. ¿Chuqui yambʌ mi laj cʌn ti jiñi tsaʼ bʌ i sube Jesús jiñi congregación tac am bʌ ti Pérgamo yicʼot ti Tiatira?

¹⁰ Mach lac mel jiñi tsʼiʼlel yicʼot laʼ lac tsʼaʼlen. Ti Pérgamo yicʼot ti Tiatira an yambʌ i wocolob. An xñoptʼañob mach bʌ lecojix miʼ qʼuelob jiñi tsʼiʼlel, jin chaʼan Jesús tsiʼ tiqʼuiyob (Apoc. 2:14, 20). Ili miʼ pʌsbeñonla chaʼan Jehová mach cheʼ jach mi caj i qʼuel cheʼ mi lac mel tsʼiʼlel anquese cabʌlix jab añonla tiʼ sujmlel yicʼot cabʌl la queʼtel yaʼ ti congregación (1 S. 15:22; 1 Ped. 2:16). Anquese miʼ ñumen asiyel ili pañimil (mulawil), Jehová yom chaʼan mi laj qʼuel ti ñuc jiñi i mandar tac (Efes. 6:11-13).

11. ¿Chuqui qʼuelbil lac chaʼan cʼʌlʌl ili ora? (Qʼuele jaʼel jiñi recuadro «Muʼ bʌ laj cʌn»).

¹¹ ¿Chuqui qʼuelbil lac chaʼan cʼʌlʌl ili ora? Tsaʼix laj qʼuele chaʼan wen ñuc i cʼʌjñibal cheʼ mi laj qʼuel mi Jehová wolʌch i chʼʌm lac chʼujutesaya. Mi woli lac mel mach bʌ weñic, laʼ laj qʼuextan ti ora (Apoc. 2:5, 16; 3:3, 16). Pero Jesús an chuqui yambʌ tiʼ sube jiñi congregación tac. ¿Chuquiyes?

YOM CHAJPɅBILET CHAʼAN MAʼ CUCH JIÑI TSʼAʼLENTEL

12. ¿Chuqui mi laj cʌn ti jiñi tsaʼ bʌ subenti jiñi congregación tac chaʼan Esmirna yicʼot Filadelfia? (Apocalipsis 2:10).

¹² Wʌle, laʼ laj qʼuel chuqui tsaʼ subenti jiñi congregación tac chaʼan Esmirna yicʼot Filadelfia. Jesús tiʼ sube jiñi xñoptʼañob chaʼan mach yomic miʼ bʌcʼñañob jiñi tsʼaʼlentel, come Jehová mi caj i yʌqʼueñob i chobejtʌbal chaʼan jiñi i xucʼtʌlelob (pejcan Apocalipsis 2:10; 3:10). ¿Chuqui mi laj cʌn ti jiñi tsaʼ bʌ subentiyob? Chaʼan mucʼʌch caj lac tsʼaʼlentel i yomʌch chajpʌbilonla chaʼan mi laj cuch (Mat. 24:9, 13; 2 Cor. 12:10). ¿Chucoch ñuc i cʼʌjñibal cheʼ cʼajal lac chaʼan iliyi?

13, 14. ¿Bajcheʼ an i ticʼla jiñi i wiñicob Dios muʼ bʌ i yʌl Apocalipsis capítulo 12?

¹³ Jiñi libro chaʼan Apocalipsis miʼ subeñonla chaʼan cheʼ «tiʼ qʼuiñilel lac Yum», ili yom i yʌl, ti ili ora, jiñi i wiñicob Dios mi caj i tsʼaʼlentelob. Jiñi capítulo 12 miʼ yʌl chaʼan «tsaʼ caji guerra yaʼ ti panchan» cheʼ bʌ tsaʼ caji jiñi i Yumʌntel Dios. Miguel, ili jiñʌch Jesucristo cheʼ bʌ añix bajcheʼ rey, yicʼot jiñi i yángelob tsiʼ chaʼleyob guerra tiʼ contra Satanás yicʼot jiñi i xibajob (Apoc. 12:7, 8). Cheʼ bajcheʼ jiñi, jiñi i contrajob Dios tiʼ sʌtʌyob i tsaʼ chojquiyob jubel ila ti Lum, baqui woliʼ yʌqʼueñob cabʌl wocol jiñi lac piʼʌlob (Apoc. 12:9, 12). Pero ¿bajcheʼ tsiʼ ticʼla iliyi jiñi i wiñicob Dios?

¹⁴ Apocalipsis miʼ subeñonla bajcheʼ yubil tsiʼ yubi i bʌ Satanás. Tiʼ caj maʼañix miʼ mejlel ti ochel ti panchan, miʼ locʼsan i michʼajel tiʼ tojlel jiñi yajcʌbiloʼ bʌ chaʼan miʼ majlelob ti panchan, jiñi muʼ bʌ caj i chaʼleñob yumʌntel ti jiñi i Yumʌntel Dios i «añob tiʼ wenta miʼ yʌcʼob ti cʌñol chaʼan bʌ Jesús» (Apoc. 12:17; 2 Cor. 5:20; Efes. 6:19, 20). ¿Bajcheʼ tsʼʌctiyem ili profecía?

15. ¿Majquiyob jiñi chaʼtiquil testigo muʼ bʌ i yʌjlel ti Apocalipsis capítulo 11, i chuqui tsiʼ chaʼleyob?

¹⁵ Satanás tsiʼ yʌcʼʌ chaʼan jiñi i contrajob Dios miʼ ticʼlañob jiñi hermanojob yajcʌbiloʼ bʌ añoʼ bʌ tiʼ wenta jiñi subtʼan. I yaʼ ochem jiñi hermanojob añoʼ bʌ i chaʼan ñuc tac bʌ eʼtel. Ili jiñobʌch jiñi chaʼtiquil testigob muʼ bʌ i yʌl jiñi libro chaʼan Apocalipsis chaʼan mi caj i tsʌnsʌntelob (Apoc. 11:3, 7-11). Ti 1918, ocho hermanojob añoʼ bʌ tiʼ wenta jiñi subtʼan tsaʼ jopʼbentiyob i mul i tsaʼ subentiyob chaʼan cabʌl jab mi caj i yajñelob ti cárcel. Tiʼ tojlel jiñi lac piʼʌlob, tsaʼix jisʌnti yilal jiñi eʼtel.

16. ¿Chuqui tsaʼ ujti ti 1919, i chuqui an mele tilel Satanás cʼʌlʌl ti jimbʌ ora?

¹⁶ Jiñi profecía am bʌ ti Apocalipsis capítulo 11 miʼ yʌl jaʼel chaʼan jiñi chaʼtiquil testigo mi caj i chaʼ cuxtʌyelob. Ili ti tsʼʌctiyi cheʼ bʌ maxto i taja jumpʼejl jab ñupʼulob. Ti marzo cheʼ ti 1919, ili xñoptʼañob tsaʼ locʼsʌntiyob ti cárcel, i ti wiʼil tsaʼ ajli chaʼan maʼañobic i mul. Jiñi hermanojob ti ora tsaʼ chaʼ caji i melob jiñi eʼtel chaʼan bʌ jiñi Yumʌntel. Pero Satanás tsaʼʌch bej caji ti wersa. Cʼʌlʌl ti jimbʌ ora, an i tsʼaʼle pejtelel jiñi i wiñicob Dios, ili lajal bajcheʼ «jumpʼejl colem jaʼ» (Apoc. 12:15). Jin chaʼan, ti lac pejtelel yom mi laj cuch wocol yicʼot yom an lac ñopoñel (Apoc. 13:10).

CHAʼLEN WERSA A MEL JIÑI EʼTEL TSAʼ BɅ I YɅQʼUEYONLA JEHOVÁ

17. ¿Bajcheʼ an coltʌntiyob jiñi i wiñicob Dios anquese woliʼ wen tsʼaʼlentelob ti Satanás?

¹⁷ Cheʼ jiñi, jiñi Apocalipsis capítulo 12 miʼ yʌl chaʼan jiñi i wiñicob Dios mi caj i coltʌntelob come miʼ yʌl chaʼan «jiñi lum [...] tsiʼ japʌ jiñi jaʼ» muʼ bʌ i lajintel bajcheʼ jiñi tsʼaʼlentel (Apoc. 12:16). I jiñʌch ujtem bʌ. An i tajol, jiñi an tac bʌ tiʼ pañimil Satanás, cheʼ bajcheʼ jiñi añoʼ bʌ i yeʼtel ti meloñibʌl, an i coltayob jiñi i tejclum Dios. Jiñi i wiñicob Jehová an i wen mʌlʌyob (jotoyob) meloñel tac i jiñi an i yʌcʼʌ chaʼan tsʼitaʼ librejob miʼ melbeñob i yeʼtel Dios. ¿I chuqui an i meleyob? An i chaʼleyob wersa chaʼan miʼ tsʼʌctesañob jiñi eʼtel tsaʼ bʌ i yʌqʼueyob Jehová (1 Cor. 16:9). ¿Chuqui ochem ti ili eʼtel?

18. ¿Baqui bʌ jiñi ñumen ñuc bʌ la queʼtel ti ili cojix tac bʌ qʼuin?

¹⁸ Jesucristo tsiʼ wʌn alʌ chaʼan jiñi xcʌntʼañob i chaʼan mi caj i subob «jiñi wen tʼan chaʼan bʌ Yumʌntel» tiʼ petol Pañimil cheʼ bʌ muʼto caj i tilel jiñi i jilibal (Mat. 24:14). Chaʼan miʼ tsʼʌctesañob ili eʼtel, woliʼ coltʌntelob ti juntiquil ángel o junmojt ángelob añoʼ bʌ i chaʼan «wen tʼan muʼ bʌ jalijel tiʼ pejtelel ora chaʼan miʼ suben jiñi añoʼ bʌ ti pañimil: Tiʼ pejtelel ñuqui tejclum, pʼolbalʌl tac, tʼan tac yicʼot alʌ tejclum tac» (Apoc. 14:6).

19. ¿Baqui bʌ yambʌ tʼan yom miʼ subob jiñi muʼ bʌ i cʼuxbiñob Jehová?

¹⁹ Pero jiñi i wiñicob Dios mach muqʼuic jach i subob jiñi wen tʼan tac chaʼan bʌ Yumʌntel. Woliʼ coltañob jaʼel jiñi ángelob muʼ bʌ i yʌjlel ti Apocalipsis, capítulo 8 cʼʌlʌl 10. Ili ángelob woliʼ subob jiñi wocol tac muʼ bʌ caj i tajob jiñi mach bʌ yomobic i coltan jiñi i Yumʌntel Dios. Jin chaʼan, jiñi i testigojonbʌla Jehová woli lac sub jiñi wocol tac muʼ bʌ caj i tilel lajal bʌ bajcheʼ «tuñijaʼ yicʼot cʼajc». Ili miʼ pʌs chuqui mi caj i tumben Dios jiñi an tac bʌ tiʼ pañimil Satanás (Apoc. 8:7, 13). Jiñi lac piʼʌlob yom miʼ ñaʼtañob chaʼan lʌcʼʌlix jiñi i jilibal. Cheʼ jach bajcheʼ jiñi, mi caj i mejlel i qʼuextañob i bʌ chaʼan maʼañic miʼ jisʌntelob cheʼ bʌ miʼ tilel i michʼajel Jehová (Sof. 2:2, 3). Yom an lac chʼejlel come cabʌl lac piʼʌlob maʼañic miʼ mulañob jiñi tʼan tac muʼ bʌ lac sub. I cheʼ tiʼ yorajlel jiñi cabʌl wocol ñumen tsʌtsto jiñi tʼan muʼ bʌ caj lac sub (Apoc. 16:21).

JACʼɅ «JIÑI TʼAN TAC CHAʼAN BɅ ILI PROFECÍA»

20. ¿Chuqui mi caj laj qʼuel ti jiñi yambʌ chaʼpʼejl estudio?

²⁰ Wen ñuc i cʼʌjñibal cheʼ mi lac jacʼ «jiñi tʼan tac chaʼan bʌ ili profecía» come «yaʼʌch añonla yaʼ ti foto», yom i yʌl chaʼan woli lac chaʼlen coltaya chaʼan miʼ tsʼʌctiyel muʼ bʌ i yʌl Apocalipsis (Apoc. 1:3). Pero ¿bajcheʼ miʼ mejlel laj cuch yicʼot lac xucʼtʌlel jiñi tsʼaʼlentel yicʼot mi lac bej sub yicʼot lac chʼejlel jiñi tʼan tac? An chaʼchajp muʼ bʌ caj i coltañonla: Ñaxam bʌ, muʼ bʌ i yʌl jiñi libro chaʼan Apocalipsis tiʼ tojlel jiñi i contrajob Dios, i chaʼpʼejlel, jiñi bendición tac muʼ bʌ caj lac taj mi xucʼulʌch mi la cajñel. Ili tema tac mi caj i qʼuejlel ti jiñi yambʌ chaʼpʼejl estudio.