Jehová miʼ cʌntan i wiñicob

1. ¿Chucoch Jesús tsiʼ cʼajtibe Jehová chaʼan miʼ cʌntan jiñi i wiñicob?

CHEʼ bʌ jumpʼejl jax acʼʌlel yom chaʼan miʼ chʌmel (sajtel), Jesús an chuqui ñuc bʌ i cʼʌjñibal tsiʼ cʼajtibe i Tat: Chaʼan miʼ cʌntan jiñi i wiñicob (Juan 17:15, 20). Jehová tiʼ pejtelel ora an i cʌnta yicʼot i colta jiñi i wiñicob. Pero Jesús yujil chaʼan Satanás muʼto caj i ñumen ticʼlʌben jiñi i wiñicob, jin chaʼan i cʼʌjñibal i chaʼañob i coltaya Jehová.

2. Cheʼ bajcheʼ miʼ yʌl Salmo 33:18-20, ¿chucoch mach yomic mi lac bʌcʼñan jiñi wocol tac?

² Jiñi i pañimil (mulawil) Satanás woliʼ yʌcʼ chaʼan ñumen wocol miʼ ñusañob jiñi i sujm bʌ xñoptʼañob. Jiñi wocol tac miʼ mejlel i chilbeñonla lac pʼʌtʌlel i miʼ mejlel i yʌcʼ chaʼan mach xucʼulic mi la cajñel ti Jehová. Cheʼ bajcheʼ mi caj laj qʼuel ti ili estudio, mach yomic mi lac chaʼlen bʌqʼuen. Jehová woli (choncol) i qʼuel pejtelel muʼ bʌ lac ñusan i yom i coltañonla. Mi caj laj qʼuel chaʼpʼejl relato muʼ bʌ i pʌs chaʼan «lac Yum woliʼ cʌntan jini woli bʌ i bʌcʼñañob» (pejcan Salmo 33:18-20).

CHEʼ BɅ LAC BAJÑEL MI LA CUBIN LAC BɅ

3. ¿Chuqui tac miʼ mejlel i yʌcʼ chaʼan lac bajñel mi la cubin lac bʌ?

³ Cabʌlonla muʼ bʌ lac chʼujutesan Jehová, pero an i tajol lac bajñel jach mi la cubin lac bʌ. Jumpʼejl ejemplo, tajol jiñi xcolelob i bajñelob jach miʼ yubiñob i bʌ cheʼ bʌ yom miʼ subob ti escuela jiñi ñopoloʼ bʌ i chaʼan o cheʼ bʌ miʼ qʼuextañob jiñi i congregación. Tajol chʼijyem mi la cubin lac bʌ o woli (yʌquel) lac chaʼlen wersa chaʼan maʼañic mi lac ñaʼtan mach bʌ weñic ti lac tojlel, i mi lac ñaʼtan chaʼan lac bajñel jach yom mi lac ñusan jiñi wocol. Tajol maʼañic majqui la com lac suben come mi lac bʌcʼñan chaʼan maʼañic miʼ chʼʌmbeñoñobla i sujm. I jiñi miʼ mejlel i yʌqʼueñonla lac ñaʼtan chaʼan maʼañic majqui i wentajonla. Cheʼ lac bajñel jach mi la cubin lac bʌ miʼ mejlel ti ochel lac bʌqʼuen yicʼot lac ñaʼtan chaʼan maʼañic majqui miʼ coltañonla yilal. Pero Jehová mach yomic chaʼan cheʼ mi la cubin lac bʌ bajcheʼ jiñi. ¿Chucoch cheʼ mi la cʌl bajcheʼ jiñi?

4. ¿Chucoch Elías tsiʼ yʌlʌ «c bajñel jach tsaʼ cʌleyon»?

⁴ Jumpʼejl ejemplo, jiñi xʼaltʼan Elías ñumen ti 40 qʼuin tsaʼ putsʼi ñumel chaʼan Jezabel maʼañic miʼ tsʌnsan (1 R. 19:1-9). I bajñel jach tsaʼ ajñi ti jumpʼejl chʼen, baqui tiʼ sube Jehová: «C bajñel jach tsaʼ cʌleyon» (1 R. 19:10). Tsiʼ ñaʼta chaʼan maʼañix yambʌ xʼaltʼan ti jiñi país, pero mach cheʼiqui. Abdías tsiʼ colta 100 xʼaltʼañob chaʼan Jezabel maʼañic miʼ tsʌnsañob (1 R. 18:4, 7, 13). Yubil cheʼ jiñi, ¿chucoch i bajñel jach tsiʼ yubi i bʌ Elías? Tajol tsiʼ ñaʼta chaʼan tsaʼix laj tsʌnsʌntiyob jiñi xʼaltʼañob tsaʼ bʌ i colta Abdías. O cheʼ tsiʼ yubi i bʌ bajcheʼ jiñi come maʼañic majqui tsaʼ caji i chʼujutesan Jehová anquese tsiʼ qʼueleyob chuqui tsaʼ ujti tiʼ tojlel jiñi i wiñicob Baal yaʼ ti wits Carmelo. O tajol tsiʼ ñaʼta chaʼan maʼañic majqui miʼ chʼʌmben i sujm jiñi wocol woli bʌ i ñusan yicʼot chaʼan maʼañic majqui i wenta. Jiñi Biblia maʼañic miʼ luʼ subeñonla, pero la cujil chaʼan Jehová yujil chucoch Elías i bajñel jach tsiʼ yubi i bʌ yicʼot bajcheʼ miʼ mejlel i coltan.

5. ¿Chuqui tsiʼ mele Jehová chaʼan miʼ pʌsben Elías chaʼan mach i bajñelic?

⁵ Jehová cabʌl bajcheʼ tsiʼ colta Elías. Jumpʼejl ejemplo, tiʼ sube chaʼan miʼ yʌl bajcheʼ yubil miʼ yubin i bʌ. Chaʼsujtel tsiʼ cʼajtibe: «¿Chuqui woli a mel ilayi?» (1 R. 19:9, 13). I tiʼ chaʼyajlel tsiʼ ñʌchʼta ti wen. Cheʼ jiñi tsiʼ pʌsbe chaʼan yaʼʌch an yicʼot i chaʼan juntiquilʌch Dios wen pʼʌtʌl bʌ. Cheʼ jaʼel, tiʼ sube chaʼan yaʼ ti Israel cabʌlobto muʼ bʌ i coltañob jiñi i sujm bʌ chʼujutesaya (1 R. 19:11, 12, 18). Miʼ mejlel la cʌl chaʼan Elías tsaʼʌch i wen colta cheʼ bʌ tiʼ sube Jehová bajcheʼ yubil miʼ yubin yicʼot cheʼ bʌ tsiʼ yubi tsaʼ bʌ i yʌlʌ Jehová. Cheʼ jaʼel, Jehová tsiʼ yʌqʼue ñuc tac bʌ eʼtel (troñel): Yom miʼ yotsan Hazael bajcheʼ rey ti Siria, Jehú bajcheʼ rey ti Israel yicʼot Eliseo bajcheʼ xʼaltʼan (1 R. 19:15, 16). Cheʼ bajcheʼ iliyi, Jehová tsiʼ colta chaʼan miʼ ñaʼtan chuqui tac wem bʌ i tsiʼ yʌqʼue juntiquil wem bʌ i piʼʌl, Eliseo. ¿Chuqui miʼ mejlel lac mel (chaʼlen) mi lac bajñel mi la cubin yicʼot i cʼʌjñibal lac chaʼan i coltaya Jehová?

6. ¿Chuqui miʼ mejlel lac suben Jehová cheʼ lac bajñel mi la cubin lac bʌ? (Salmo 62:8).

⁶ Jehová miʼ subeñonla chaʼan mi lac pejcan ti oración. Miʼ qʼuel bajcheʼ yubil mi la cubin i miʼ subeñonla chaʼan bajcheʼ jach ora miʼ mejlel lac pejcan yicʼot chaʼan mucʼʌch caj i ñʌchʼtañonla (1 Tes. 5:17). Jehová miʼ wen mulan i ñʌchʼtan jiñi i wiñicob (Pr. 15:8). ¿Chuqui miʼ mejlel lac suben cheʼ bʌ lac bajñel mi la cubin lac bʌ? Miʼ mejlel lac laj suben chuqui an ti lac pusicʼal, cheʼ bajcheʼ tsiʼ mele Elías (pejcan Salmo 62:8). Laʼ lac suben chuqui mi lac pensarin yicʼot bajcheʼ yubil mi la cubin. Laʼ laj cʼajtiben chaʼan miʼ coltañonla laj qʼuel chuqui yom mi lac mel. Jumpʼejl ejemplo, mi xcoleletto, ¿chuqui miʼ mejlel a mel mi a bajñel maʼ wubin a bʌ i maʼ bʌcʼñan a wʌl i chaʼan bʌ Jehová yaʼ ti escuela? Miʼ mejlel a cʼajtin a chʼejlel yicʼot a ñaʼtʌbal chaʼan wen jach bajcheʼ maʼ tsictesan jiñi ñopol bʌ a chaʼan (Luc. 21:14, 15). ¿I chuqui miʼ mejlel a mel mi woli a chaʼlen wersa chaʼan maʼañic maʼ ñaʼtan mach bʌ weñic ti a tojlel? Cʼajtiben Jehová chaʼan miʼ coltañet a pejcan juntiquil hermano añix bʌ i ñaʼtʌbal yicʼot chaʼan miʼ coltan jiñi hermano chaʼan miʼ chʼʌmben i sujm bajcheʼ yubil maʼ wubin. Mi mucʼʌch lac suben Jehová bajcheʼ yubil mi la cubin, mi laj qʼuel bajcheʼ miʼ jacʼ jiñi la coración yicʼot mi lac jacʼ laj coltʌntel, mach lac bajñelix mi caj lac wen ubin lac bʌ.

7. ¿Chuqui maʼ cʌn tiʼ tojlel Mauricio?

⁷ Jehová miʼ yʌqʼueñonla eʼtel tac wen ñuc bʌ i cʼʌjñibal. Miʼ qʼuel ti ñuc pejtelel chuqui mi lac mel yaʼ ti congregación yicʼot ti subtʼan (Sal. 110:3). Cheʼ mi lac melben i yeʼtel Jehová miʼ coltañonla chaʼan mach lac bajñelic mi la cubin lac bʌ. ¿Chucoch? Laʼ laj qʼuel tsaʼ bʌ ujti tiʼ tojlel juntiquil chʼiton i cʼabaʼ Mauricio.b Cheʼ bʌ Mauricio tsaʼ jaxto i chʼʌmʌ jaʼ, juntiquil wem bʌ i yamigo cʼunteʼ cʼunte tsiʼ ñajtʼesa i bʌ ti Jehová. Mauricio miʼ yʌl: «Cheʼ bʌ tsaʼ j qʼuele chaʼan jiñi camigo tsaʼ caji i ñajtʼesan i bʌ ti jiñi i sujmlel, tsiʼ yʌcʼʌ ti ochel c duda tac i tsaʼ j cʼajtibe c bʌ mi mucʼʌch caj i mejlel c tsʼʌctesan jiñi c tʼan yicʼot chaʼan mic bej ajñel tiʼ familia Jehová. C bajñel tsaʼ caji cubin c bʌ i tsaʼ c ñaʼta chaʼan maʼañic majqui mi caj i chʼʌmbeñon i sujm». ¿Chuqui tsiʼ colta chaʼan miʼ bej chaʼlen wersa? Miʼ yʌl: «Jiñi subtʼan tsiʼ coltayon chaʼan mach c bajñelic mic ñaʼtan c bʌ yicʼot chaʼan maʼañic mic wen ñaʼtan mach bʌ weñic tic tojlel. Cheʼ bʌ tsaʼ cajiyon ti subtʼan quicʼot jiñi hermanojob, tijicñayon yicʼot mach c bajñelix tsaʼ caji cubin c bʌ». I cheʼʌch miʼ mejlel la cubin lac bʌ jaʼel bajcheʼ iliyi anquese ti carta jach o ti teléfono jach mi lac chaʼlen subtʼan la quicʼot jiñi hermanojob, mucʼʌch i pʼʌtʼesañonla. ¿Chuqui yambʌ tsiʼ colta Mauricio? Miʼ yʌl chuqui tsiʼ mele: «Tsaʼ ñumen cajiyon ti eʼtel yaʼ ti congregación. Tsaʼ c chaʼle wersa chaʼan mic chajpan yicʼot chaʼan wen mic ñusan jiñi c asignación tac. Cheʼ bajcheʼ jiñi tsaʼ cubibe i cʼuxbiya Jehová yicʼot jiñi hermanojob».

CHEʼ BɅ MIʼ YɅCʼONLA TI PENSAR JIÑI TSɅTS BɅ WOCOL TAC

8. ¿Bajcheʼ yubil miʼ mejlel la cubin lac bʌ cheʼ bʌ mi lac ñusan tsʌts tac bʌ wocol?

⁸ Ti lac pejtelel la cujil chaʼan mi caj lac taj wocol tac ti ili cojix tac bʌ qʼuin (2 Tim. 3:1). Pero tajol miʼ yʌcʼ ti toj sajtel lac pusicʼal bajcheʼ yilal bʌ wocol mi lac taj o baqui ora mi lac taj jiñi wocol. Tajol miʼ waʼ jilel lac taqʼuin, mi lac tajbentel jumpʼejl tsʌts bʌ cʼamʌjel o an majqui miʼ chʌmel lac chaʼan. Ti jimbʌ ora tajol wen chʼijyemonla o mi lac wen chaʼlen pensar, ñumento mi muqʼuix i waʼ luʼ tempʌyel lac wocol mi la cubin. Pero laʼ laj cʼajtesan chaʼan Jehová miʼ cʌntañonla i yicʼot i coltaya miʼ mejlel lac lʌtʼ baqui jach bʌ wocol mi lac taj.

9. ¿Chuqui tac ti wocol tsiʼ ñusa Job?

⁹ Laʼ laj qʼuel tsaʼ bʌ ujti tiʼ tojlel Job. Ili wiñic tsiʼ ñusa cabʌl wocol. Ti jumpʼejl jach qʼuin tiʼ sʌtʌ pejtelel i yʌlacʼ, i wiñicob yicʼotto i yalobilob (Job 1:13-19). Mach wen jalic tsaʼ ñumi i tsiʼ taja jumpʼejl tsʌts bʌ cʼamʌjel (Job 2:7). Wen chʼijyem tsiʼ yubi i tsaʼto i yʌlʌ: «Cʼojyemonix. Mach comic jalijel tiʼ pejtelel ora» (Job 7:16).

10. ¿Chuqui tsiʼ mele Jehová chaʼan miʼ coltan Job i lʌtʼ jiñi i wocol tac? (Qʼuele jiñi dibujo am bʌ tiʼ tejchibal).

¹⁰ Jehová wolʌch i qʼuel jiñi woli bʌ i ñusan Job. I tsiʼ yʌqʼue jiñi i cʼʌjñibal bʌ i chaʼan chaʼan miʼ lʌtʼ yicʼot chaʼan xucʼul miʼ yajñel come mucʼʌch i cʼuxbin. Jehová tsiʼ pejca i tiʼ sube bajcheʼ cʼamel i ñaʼtʌbal yicʼot bajcheʼ miʼ cʌntan pejtelel chuqui tsiʼ mele (pʌtʌ). Tsiʼ taja ti tʼan cabʌl añimal tac (Job 38:1, 2; 39:9, 13, 19, 27; 40:15; 41:1, 2). Cheʼ jaʼel, tsiʼ chocbe majlel Elihú chaʼan miʼ coltan yicʼot miʼ ñuqʼuesʌben i pusicʼal. Elihú tsiʼ cʼajtesʌbe chaʼan Jehová mucʼʌch i yʌqʼuen i majtan jiñi xucʼul bʌ miʼ melbeñob i yeʼtel anquese miʼ ñusañob wocol. Pero Jehová yom jaʼel chaʼan miʼ ticʼ Job. Elihú wen jach bajcheʼ tsiʼ colta i chʼʌmben i sujm Job, tsiʼ cʼajtesʌbe chaʼan joñonla maʼañic lac ñuclel cheʼ bajcheʼ Jehová, jiñi tsaʼ bʌ i mele panchan yicʼot Pañimil (Job 37:14). Jehová tsiʼ yʌqʼue jaʼel jumpʼejl ñuc bʌ eʼtel Job: Yom miʼ tajob ti oración jiñi uxtiquil i yamigojob tsaʼ bʌ i chaʼleyob mulil (Job 42:8-10). ¿I bajcheʼ miʼ coltañonla Jehová ili ora cheʼ bʌ mi lac ñusan tsʌts tac bʌ wocol?

11. ¿Bajcheʼ miʼ coltañonla jiñi Biblia cheʼ bʌ mi lac ñusan wocol tac?

¹¹ Jehová mach cheʼix miʼ pejcañonla cheʼ bajcheʼ tsiʼ mele tiʼ tojlel Job. Pero miʼ cʼʌn jiñi Biblia chaʼan miʼ pejcañonla (Rom. 15:4). Miʼ yʌqʼueñonla lac pijtaya chaʼan miʼ ñuqʼuesan lac pusicʼal. Laʼ laj qʼuel chaʼpʼej uxpʼejl texto muʼ bʌ i coltañonla cheʼ bʌ an lac wocol tac. Yaʼ ti Biblia, Jehová miʼ subeñonla chaʼan maʼañic chuqui «mi caj i mejlel i tʌtsʼonla tiʼ cʼuxbiya Dios», mi jiñicto jiñi tsʌts tac bʌ wocol (Rom. 8:38, 39). Cheʼ jaʼel miʼ yʌcʼ i tʼan chaʼan lʌcʼʌl an tiʼ tojlel pejtelel muʼ bʌ i pejcañob, ili yom i yʌl chaʼan miʼ ñʌchʼtan i yoración (Sal. 145:18). Jehová miʼ subeñonla chaʼan mi mucʼʌch lac ñop tiʼ tojlel, miʼ mejlel laj cuch baqui jach bʌ wocol yicʼot la cubin lac tijicñʌyel cheʼ bʌ mi lac ñusan wocol tac (1 Cor. 10:13; Sant. 1:2, 12). Cheʼ jaʼel, jiñi i Tʼan Dios miʼ subeñonla chaʼan jiñi wocol tac ñumel jach woli, pero jiñi laj cuxtʌlel muʼ bʌ caj lac taj chaʼañʌch tiʼ pejtelel ora, jiñʌch jiñi majtañʌl muʼ bʌ i subeñonla Jehová (2 Cor. 4:16-18). Jehová miʼ subeñonla chaʼan mi caj i jisan jiñi muʼ bʌ i pʼol wocol tac: Satanás yicʼot jiñi lajaloʼ bʌ yicʼot (Sal. 37:10). ¿Am ba a cʌyʌ ti a jol texto tac muʼ bʌ i mejlel i coltañet cheʼ bʌ maʼ ñusan jiñi wocol tac talto bʌ?

12. ¿Chuqui yom mi lac mel chaʼan mi lac ñumen locʼsʌben i wenlel jiñi coltaya muʼ bʌ i yʌqʼueñonla Jehová yaʼ tiʼ Tʼan?

¹² Chaʼan mi lac ñumen locʼsʌben i wenlel jiñi coltaya muʼ bʌ i yʌqʼueñonla Jehová yaʼ ti Biblia, yom ñʌmʌloñʌchla lac pejcan yicʼot lac wen ñaʼtan muʼ bʌ i yʌl. Mi mucʼʌch lac jacʼ muʼ bʌ laj cʌn, mi caj lac ñumen ñop i ñumen lʌcʼʌl mi caj la cajñel tiʼ tojlel Jehová. Jiñi mi caj i yʌqʼueñonla lac pʼʌtʌlel chaʼan mi laj cuch. Cheʼ jaʼel, Jehová mi caj i yʌqʼueñonla jiñi chʼujul bʌ i yespíritu mi mucʼʌch lac ñop muʼ bʌ i yʌl jiñi i Tʼan. Jiñi i yespíritu mi caj i coltañonla chaʼan mi lac taj jiñi lac pʼʌtʌlel mach bʌ añic miʼ mejlel i tajob jiñi lac piʼʌlob chaʼan mi laj cuch baqui jach bʌ wocol (2 Cor. 4:7-10).

13. ¿Bajcheʼ miʼ coltañonla laj cuch wocol jiñi chʼujul bʌ bʌlñʌcʼʌl muʼ bʌ i yʌqʼueñonla «jiñi xucʼul bʌ xyaj eʼtel wen am bʌ i ñaʼtʌbal»?

¹³ Jehová woliʼ cʼʌn «jiñi xucʼul bʌ xyaj eʼtel wen am bʌ i ñaʼtʌbal» chaʼan miʼ yʌqʼueñonla cabʌl tema tac, video yicʼot cʼay tac muʼ bʌ i coltañonla chaʼan mi lac ñumen ñop yicʼot chaʼan yʌxʌl la co (Mat. 24:45). Yom mi lac pʼʌtʼesan lac bʌ yicʼot pejtelel ili chʼujul bʌ bʌlñʌcʼʌl muʼ bʌ la cʌqʼuentel. Maxto wen jalic, juntiquil hermana ti Estados Unidos tsiʼ yʌlʌ chaʼan miʼ wen qʼuel ti ñuc jiñi chʼujul bʌ bʌlñʌcʼʌl. Tsiʼ yʌlʌ: «Ti jiñi 40 jab cajel c melben i yeʼtel Jehová, an c ñusa cabʌl wocol muʼ bʌ i mejlel i jem jiñi c xucʼtʌlel». Ili hermana ñusʌbil i chaʼan tsʌts tac bʌ wocol. Juntiquil yʌc bʌ chófer tsiʼ juchʼbe i tatuch i tsaʼ chʌmi, jiñi i papá i mamá tsaʼ chʌmiyob tiʼ caj jumpʼejl tsʌts bʌ cʼamʌjel, i ili hermana chaʼyajl tsiʼ taja cáncer. ¿Chuqui tsiʼ colta chaʼan miʼ cuch? Miʼ yʌl: «Jehová an i cʌntayon tiʼ pejtelel ora. Jiñi chʼujul bʌ bʌlñʌcʼʌl muʼ bʌ i yʌqʼueñonla jiñi xucʼul bʌ xyaj eʼtel an i coltayon chaʼan mij cuch. Jin chaʼan miʼ mejlel cʌl cheʼ bajcheʼ Job: ‹¡Chʌn xucʼul mi caj cajñel cʼʌlʌlto mic chʌmel!›» (Job 27:5, TNM).

14. ¿Bajcheʼ miʼ cʼʌn Jehová jiñi hermanojob chaʼan miʼ coltañonla cheʼ bʌ mi lac ñusan wocol tac? (1 Tesalonicenses 4:9).

¹⁴ Jehová miʼ pʌsben jiñi i wiñicob chaʼan miʼ cʼuxbiñob i bʌ yicʼot miʼ coltañob i bʌ cheʼ bʌ miʼ ñusañob wocol tac (2 Cor. 1:3, 4; pejcan 1 Tesalonicenses 4:9). Jiñi la quermañujob lajalob bajcheʼ Elihú, yomob i coltañonla chaʼan xucʼul mi la cajñel cheʼ bʌ mi lac ñusan wocol tac (Hech. 14:22). Cheʼ tsiʼ qʼuele juntiquil hermana i cʼabaʼ Diane. Cheʼ bʌ tsaʼ cʼamaʼ jiñi i ñoxiʼal, jiñi congregación tsiʼ wen colta chaʼan pʼʌtʌl miʼ yajñel. Miʼ yʌl: «Wen wocolʌch tsaʼ lon c ñusa ti jiñi uw tac, pero ti jiñi bʌ ora lajal bajcheʼ Jehová tsiʼ meqʼueyon lon i tsiʼ pʌsbeyon lon i cʼuxbiya. Jiñi congregación tsiʼ wen coltayon lojon i tsiʼ yʌqʼueyon lon chuqui i cʼʌjñibal lon c chaʼan: Tsiʼ julaʼtayon lon, tsiʼ melbeyon lon llamada yicʼot tsiʼ meqʼueyon lon. I come mach cujilic ñijcʌntel carro tsiʼ chajpayob chaʼan miʼ cuchoñob majlel majlel ti tempa bʌ yicʼot ti subtʼan cheʼ bʌ mucʼʌch c mejlel». ¡Wen tijicña mi la cubin cheʼ ochemonla ti jumpʼejl familia baqui mi lac wen pʌsbentel cʼuxbiya!

MI LAJ QʼUEL TI ÑUC CHEʼ JEHOVÁ MIʼ CɅNTAÑONLA YICʼOT CʼUXBIYA

15. ¿Bajcheʼ la cujil chaʼan mucʼʌch i mejlel laj cuch jiñi wocol tac?

¹⁵ Ti lac pejtelel mi caj lac ñusan wocol tac. Pero cheʼ bajcheʼ tsaʼix laj qʼuele maʼañic baʼ ora lac bajñel jach yom mi lac ñusan. Jehová miʼ cʌntañonla tiʼ pejtelel ora cheʼ bajcheʼ juntiquil tatʌl wen yujil bʌ cʼuxbiya. An yicʼotonla i mi caj i ñʌchʼtañonla cheʼ bʌ mi laj cʼajtiben i coltaya (Is. 43:2). La cujil chaʼan miʼ mejlel laj cuch jiñi wocol tac come an i yʌqʼueyonla pejtelel chuqui i cʼʌjñibal lac chaʼan: Jiñi oración, jiñi Biblia, cabʌl chʼujul bʌ bʌlñʌcʼʌl yicʼot hermanojob muʼ bʌ i cʼuxbiñoñobla.

16. ¿Chuqui yom mi lac mel chaʼan miʼ bej cʌntañonla Jehová?

¹⁶ Mi lac wen qʼuel ti ñuc cheʼ jiñi lac Tat am bʌ ti panchan miʼ wen cʌntañonla. Jin miʼ yʌqʼueñonla i tijicñʌyel lac pusicʼal (Sal. 33:21). ¿Bajcheʼ miʼ mejlel lac pʌsben Jehová chaʼan mi laj qʼuel ti ñuc bajcheʼ miʼ cʌntañonla? Jiñʌch cheʼ mi lac chʼʌm pejtelel jiñi coltaya muʼ bʌ i yʌqʼueñonla. Pero añʌch chuqui yom mi lac mel chaʼan Jehová miʼ bej cʌntañonla. Yom mi lac chaʼlen wersa chaʼan mi lac jacʼben i tʼan yicʼot chaʼan mi lac mel chuqui tac wem bʌ miʼ qʼuel. Mi mucʼʌch lac mel, tiʼ pejtelel ora mi caj i cʌntañonla (1 Ped. 3:12).