Mach laʼ cʌy laʼ «comol pʼʌtʼesan laʼ bʌ»

1. Cheʼ bajcheʼ miʼ yʌl 1 Tesalonicenses 5:11, ¿chuqui ti eʼtel woli lac mel ti lac pejtelel?

¿AM BA i chaʼle coltaya jiñi a congregación tiʼ melol (pʌtol) o tiʼ tojʼesʌntel jumpʼejl i Yotlel tempa bʌ? Mi añʌch, miʼ mejlel la cʌl chaʼan cʼajal a chaʼan bajcheʼ yubil tsaʼ wubi ti jiñi ñaxam bʌ a tempa bʌ. Tsaʼ wen aqʼue wocolix i yʌlʌ Jehová. I tajol wocol tsaʼ wubi chaʼan maʼ cʼʌyin jiñi ñaxam bʌ cʼay come cʌlʌxix jiñi a tijicñʌyel. Tiʼ sujm, jiñi i Yotlel tac tempa bʌ miʼ yʌqʼuen i ñuclel Jehová. Pero anto junchajp ñumen ñuc bʌ i cʼʌjñibal bajcheʼ i melol baqui jach bʌ otot yicʼot muʼto bʌ i ñumen aqʼuen i ñuclel Jehová: Jiñʌch cheʼ bʌ mi lac pʼʌtʼesan jiñi muʼ bʌ i tempañob i bʌ yaʼ tiʼ Yotlel tempa bʌ. Jiñʌch tsaʼ bʌ i taja ti tʼan jiñi apóstol Pablo cheʼ bʌ tiʼ tsʼijbu 1 Tesalonicenses 5:11 (pejcan), jiñi texto baqui loqʼuem ili estudio.

2. ¿Chuqui mi caj laj qʼuel ti ili estudio?

² Chaʼan mi laj cʌn bajcheʼ miʼ mejlel lac pʼʌtʼesan la quermañujob, miʼ mejlel laj cʌn tiʼ yejemplo jiñi apóstol Pablo. Tsiʼ chʼʌmbe i sujm yañoʼ bʌ. Ti ili estudio mi caj laj qʼuel bajcheʼ tsiʼ colta jiñi yambʌ xñoptʼañob chaʼan miʼ lʌtʼob jiñi wocol tac, chaʼan miʼ yajñelob ti ñʌchʼtʌlel yicʼot chaʼan miʼ ñumen ñopob ti Jehová. Laʼ laj qʼuel bajcheʼ miʼ mejlel lac lajin Pablo (1 Cor. 11:1).

PABLO TSIʼ COLTA I YERMAÑUJOB CHAʼAN MIʼ LɅTʼOB WOCOL

3. ¿Bajcheʼ tsiʼ pʌsʌ Pablo chaʼan pʼisbil jach ti chuqui miʼ mel?

³ Pablo tsiʼ wen cʼuxbi i yermañujob. I tsaʼʌch mejli i pʼuntañob yicʼot i chʼʌmbeñob i sujm come tsaʼʌch i ñusa tsʌts bʌ wocol tac jaʼel. Ti jumpʼejl bʌ qʼuin tsaʼ jili i taqʼuin, i tsaʼ caji ti eʼtel (troñel) chaʼan miʼ taj jiñi i cʼʌjñibal bʌ i chaʼan yicʼot i cʼʌjñibal bʌ i chaʼan i piʼʌlob (Hech. 20:34). Tsiʼ mele pisil bʌ otot tac. Cheʼ bʌ tsaʼ cʼoti ti Corinto tsiʼ chaʼle eʼtel yicʼot Áquila yicʼot Priscila, lajaloʼ bʌ i yeʼtel yicʼot. Pero «tiʼ pejtelel sábado» tiʼ sube wen tʼan jiñi judíojob yic’ot griegojob. I cheʼ bʌ tsaʼ cʼoti Silas yicʼot Timoteo, «Pablo tsaʼ jax i yʌcʼʌ i bʌ tiʼ subol jiñi i tʼan Dios» (Hech. 18:2-5). Pablo tsiʼ pʌsʌ chaʼan jiñi ñumen ñuc bʌ i cʼʌjñibal tiʼ cuxtʌlel jiñʌch cheʼ miʼ melben (chaʼliben) i yeʼtel Jehová. Juntiquilʌch wiñic yujil bʌ eʼtel, i jiñi tsiʼ colta chaʼan miʼ mejlel i tijicñesan jiñi hermanojob yicʼot miʼ yʌqʼueñob ticʼojel tac chaʼan mach tiʼ cajic jach jiñi wocol tac o tiʼ caj yom miʼ mʌcʼlañob i familia miʼ ñajʌtesañob jiñi ñumen ñuc bʌ i cʼʌjñibal, pejtelel chaʼan tac bʌ i chʼujutesayajob (Filip. 1:10).

4. ¿Chuqui tsiʼ mele Pablo yicʼot Timoteo chaʼan miʼ coltañob jiñi i yermañujob chaʼan miʼ lʌtʼob jiñi tsʼaʼlentel?

⁴ Cheʼ bʌ tsijib melbilto jiñi congregación ti Tesalónica, tsaʼ caji ti wen tsʼaʼlentel jiñi tsijiʼ bʌ xñoptʼañob. Cheʼ bʌ junmojt jontoloʼ (simaroñoʼ) bʌ lac piʼʌlob maʼañic tsiʼ tajayob Pablo yicʼot Silas, «tsiʼ tujcʼayob majlel [...] chaʼtiqui uxtiquil hermanojob tiʼ tojlelob jiñi yumʌlob ti tejclum». Ti cʼam bʌ tʼan tsiʼ yʌlʌyob: «Ili wiñicob miʼ melob chuqui an tiʼ contra i mandar tac César» (Hech. 17:6, 7). Miʼ mejlel la cʌl chaʼan tsiʼ wen chaʼleyob bʌqʼuen ili tsijib xñoptʼañob cheʼ bʌ tsiʼ qʼueleyob chaʼan jiñi lac piʼʌlob yaʼ ti tejclum tsaʼ caji i tsʼaʼleñob. Ili miʼ mejlel i chilbeñob i tijicñʌyel tiʼ melbentel i yeʼtel Jehová. Pero Pablo mach yomic chaʼan miʼ yujtel jiñi. Anquese Pablo yicʼot Silas tsaʼʌch loqʼuiyob ti jiñi tejclum, tsiʼ chʼʌmʌyob tiʼ wenta chaʼan mach i bajñelic miʼ cʌlel jiñi tsijib congregación. Ti wiʼil, jiñi apóstol tiʼ sube jiñi añoʼ bʌ ti Tesalónica: «Tsaʼ lon c chocbeyetla majlel Timoteo [...] chaʼan miʼ xucʼchocoñetla yicʼot miʼ ñuqʼuesan laʼ pusicʼal chaʼan i wenlel laʼ ñopoñel, chaʼan maʼañic majqui miʼ cʼuñʼan tiʼ caj ili wocol tac» (1 Tes. 3:2, 3). Tajol Timoteo tsaʼʌch i ñusa i tsʼaʼlentel jaʼel cheʼ bʌ chumulto ti Listra. Tsiʼ qʼuele bajcheʼ Pablo tsiʼ pʼʌtʼesa jiñi xñoptʼañob añoʼ bʌ yaʼi yicʼot bajcheʼ tsiʼ coltayob Jehová. Jin chaʼan, miʼ mejlel i subeñob jiñi tsijiʼ bʌ xñoptʼañob chaʼan Jehová mi caj i coltañob (Hech. 14:8, 19-22; Heb. 12:2).

5. ¿Bajcheʼ tsiʼ colta Bryant jiñi tsaʼ bʌ i mele juntiquil anciano?

⁵ ¿Chuqui yambʌ tsiʼ mele Pablo chaʼan miʼ pʼʌtʼesan i yermañujob? Cheʼ bʌ Pablo yicʼot Bernabé tsaʼ chaʼ majliyob ti Listra, Iconio yicʼot Antioquía, «tsiʼ waʼchocoyob ancianojob ti jujumpʼejl congregación» (Hech. 14:21-23). Jiñi tsaʼ bʌ waʼchocontiyob tsaʼʌch i wen coltayob jiñi congregación, cheʼ bajcheʼ miʼ melob jiñi ancianojob ti ili ora. Laʼ laj qʼuel chuqui miʼ yʌl juntiquil hermano i cʼabaʼ Bryant: «Cheʼ bʌ tsaʼ tsʼʌctiyi 15 c jabilel, jiñi c papá tsiʼ cʌyʌyon lojon i jiñi c mamá tsaʼ chaʼlenti ti expulsar. Chocbilon tsaʼ cubi c bʌ yicʼot wen chʼijyemon». ¿Chuqui tsiʼ colta chaʼan miʼ lʌtʼ ili tsʌts bʌ wocol? Miʼ yʌl: «Juntiquil anciano i cʼabaʼ Tony tsiʼ wen pejcayon ti tempa bʌ yicʼot tsiʼ locʼsʌbe yambʌ i yorajlel tac. Miʼ subeñon experiencia tac tiʼ tojlel hermanojob maʼañic bʌ tiʼ sʌtʌyob i tijicñʌyel anquese tsiʼ ñusayob wocol tac. Miʼ pejcʌbeñon Salmo 27:10 yicʼot tsiʼ wen tajbeyon ti tʼan Ezequías, tsaʼ bʌ i wen melbe i yeʼtel Jehová anquese mach weñic chuqui tac tsiʼ mele jiñi i papá». ¿Bajcheʼ tsiʼ colta Bryant iliyi? Miʼ yʌl: «Jiñi tsaʼ bʌ i mele Tony tic tojlel, tsiʼ coltayon chaʼan mic ñumen melben i yeʼtel Jehová, i jiñi an i yʌqʼueyon cabʌl c tijicñʌyel». Ancianojob, wen qʼuelela jiñi hermanojob yom bʌ miʼ tijicñesʌbentelob i pusicʼal cheʼ bajcheʼ Bryant (Pr. 12:25).

6. ¿Bajcheʼ tsiʼ cʼʌñʌ Pablo jiñi i yejemplo jiñi xucʼul bʌ i wiñicob Jehová ti wajali chaʼan miʼ coltan yañoʼ bʌ?

⁶ Pablo tsiʼ cʼajtesʌbe jiñi i yermañujob chaʼan «yonlel testigojob cheʼ bajcheʼ yonlel tocal» tsiʼ cuchuyob jiñi wocol tac come Jehová tsiʼ yʌqʼueyob i pʼʌtʌlel (Heb. 12:1). Yujil chaʼan jiñi i yejemplo i wiñicob Dios ti wajali mi caj i coltañob chaʼan miʼ tajob i chʼejlel yicʼot chaʼan miʼ yʌcʼob i ñaʼtʌbal «tiʼ tejclum jiñi cuxul bʌ Dios» (Heb. 12:22). I mucʼʌch i mejlel i coltañonla jaʼel. Ti lac pejtelel miʼ coltañonla cheʼ bʌ mi lac pejcan bajcheʼ Jehová tsiʼ colta Gedeón, Barac, David, Samuel yicʼot yambʌ i wiñicob (Heb. 11:32-35). I mucʼʌch i coltañonla jaʼel jiñi i yejemplo la quermañujob ti ili ora. Cabʌl hermanojob miʼ chocob cʼotel i carta yaʼ ti central mundial baqui miʼ yʌlob bajcheʼ tsiʼ coltayob cheʼ bʌ tsiʼ pejcayob jiñi ujtem bʌ tiʼ tojlel juntiquil xucʼul bʌ i wiñic Jehová ti ili ora.

PABLO TSIʼ PɅSBE I YERMAÑUJOB BAJCHEʼ MIʼ MEJLELOB TI AJÑEL TI ÑɅCHʼTɅLEL

7. ¿Chuqui miʼ pʌsbeñonla tsaʼ bʌ i yʌlʌ Pablo ti Romanos 14:19-21?

⁷ Yambʌ bajcheʼ miʼ mejlel lac pʼʌtʼesan la quermañujob jiñʌch cheʼ mi lac sʌclan ñʌchʼtʌlel yaʼ ti congregación. Maʼañic mi la cʌcʼ ti ujtel tʼox bʌ tiʼ caj jach qʼuexel tac chuqui mi lac ñaʼtan yicʼot maʼañic mi la cʌl chaʼan mi caj lac mel chuqui mi lac mulan come maʼañic miʼ ñusʌntel ti pʼis jumpʼejl principio am bʌ ti Biblia. Laʼ laj qʼuel tsaʼ bʌ ujti yaʼ ti congregación ti Roma, baqui an xñoptʼañob judíojoʼ bʌ yicʼot chʼoyoloʼ bʌ ti yambʌ tejclum tac. An bʌlñʌcʼʌl tac muqʼuix bʌ i mejlel ti cʼuxtʌl come tsaʼix jisʌbenti i cʼʌjñibal jiñi Mandar tsaʼ bʌ aqʼuenti Moisés (Mar. 7:19). An xñoptʼañob judíojoʼ bʌ mach bʌ lecojic miʼ qʼuelob cheʼ miʼ cʼuxob baqui jach bʌ bʌlñʌcʼʌl. Pero an yambʌ xñoptʼañob judíojoʼ bʌ lecojʌch bʌ miʼ qʼuelob. Iliyi tsiʼ yʌcʼʌ tʼox bʌ yaʼ ti congregación. Pablo tsiʼ yʌlʌ chaʼan jiñi ñumen ñuc bʌ i cʼʌjñibal jiñʌch jiñi ñʌchʼtʌlel i tiʼ subeyob: «Ñumen wen cheʼ maʼañic maʼ cʼux weʼel yicʼot maʼañic maʼ jap vino i maʼañic maʼ wis mel muʼ bʌ i yʌcʼ tiʼ yajlel a wermañu» (pejcan Romanos 14:19-21). Jiñi tsaʼ bʌ i yʌlʌ tsiʼ colta i qʼuel jiñi hermanojob chaʼan ili wocol miʼ mejlel i bajñel ticʼlañob yicʼot i ticʼlan jiñi congregación. Pablo tsiʼ qʼuexta i melbal (chaʼlibal) jaʼel chaʼan maʼañic miʼ yʌcʼ ti yajlel yambʌlob (1 Cor. 9:19-22). Cheʼ bajcheʼ Pablo, joñonla jaʼel miʼ mejlel lac pʼʌtʼesan yañoʼ bʌ yicʼot mi laj coltan chaʼan an ñʌchʼtʌlel mi maʼañic mi lac chaʼlen michʼ tiʼ caj chuqui tac jach mi lac mulan.

8. ¿Chuqui tsiʼ mele Pablo cheʼ bʌ tsaʼ loqʼui jumpʼejl wocol muʼ bʌ i mejlel i jisan ñʌchʼtʌlel yaʼ ti congregación?

⁸ Pero ¿chuqui miʼ mejlel mi mach junlajalic chuqui mi lac ñaʼtan chaʼan junchajp ñuc bʌ i cʼʌjñibal? Yom mi lac lajin Pablo chaʼan maʼañic miʼ jilel jiñi ñʌchʼtʌlel. Yaʼ ti congregación cheʼ ti ñaxam bʌ siglo an tsaʼ bʌ i yʌlʌyob chaʼan jiñi mach bʌ judíojobic muʼ bʌ i sujtelob ti xñoptʼan yom miʼ tsepob i pʌchʌlel, tajol chaʼan maʼañic miʼ chaʼleñob tʼan jiñi lac piʼʌlob (Gál. 6:12). Anquese Pablo mach cheʼic miʼ ñaʼtan bajcheʼ jiñi, maʼañic tsiʼ yʌlʌ chaʼan miʼ mejlel chuqui miʼ ñaʼtan, tsiʼ pʌsʌ i pecʼlel cheʼ bʌ tsaʼ majli i tojʼesan jiñi wocol yicʼotob jiñi apóstolob yicʼot jiñi ancianojob ti Jerusalén (Hech. 15:1, 2). Cheʼ bʌ tsiʼ mele bajcheʼ jiñi, tsiʼ colta chaʼan chʌn an ñʌchʼtʌlel yicʼot tijicñʌyel yaʼ ti congregación (Hech. 15:30, 31).

9. ¿Chuqui miʼ mejlel lac mel chaʼan mi lac lajin Pablo?

⁹ Mi tsaʼ loqʼui jumpʼejl wocol, miʼ mejlel laj cʼajtiben i coltaya jiñi waʼchobiloʼ bʌ i chaʼan Jehová yaʼ ti congregación chaʼan maʼañic miʼ jilel jiñi ñʌchʼtʌlel. Jiñi lac jun tac yicʼot muʼ bʌ i yʌl jiñi organización miʼ pʌsbeñonla chuqui miʼ yʌl jiñi Biblia. Mi mucʼʌch lac jacʼ jiñi muʼ bʌ i yʌjlel i mach jiñic mi lac chaʼlen wersa chaʼan miʼ mejlel chuqui la com, mi caj laj coltan chaʼan an ñʌchʼtʌlel yaʼ ti congregación.

10. ¿Chuqui yambʌ tsiʼ mele Pablo chaʼan an ñʌchʼtʌlel yaʼ ti congregación?

¹⁰ Pablo an chuqui yambʌ tsiʼ mele chaʼan an ñʌchʼtʌlel. Tsiʼ qʼuele chuqui wem bʌ tiʼ tojlel jiñi hermanojob, mach jiñic chuqui mach bʌ weñic. Jumpʼejl ejemplo, cheʼ bʌ muqʼuix caj i yujtesan jiñi i carta tiʼ tojlel jiñi romanojob, tsiʼ yʌlʌ chuqui tac wem bʌ tiʼ tojlel jiñi xñoptʼañob, i an i tajol ti jujuntiquil tsiʼ tajayob ti tʼan. ¿Bajcheʼ miʼ mejlel lac lajin? Jiñʌch cheʼ bʌ jamʌ tsiquil mi la cʌl chuqui jiñi wen tac bʌ mi laj qʼuel tiʼ tojlel yambʌlob. Cheʼ bajcheʼ iliyi, mi lac chaʼlen coltaya chaʼan miʼ ñumen cʼuxbiñob i bʌ jiñi hermanojob i miʼ sujtelob ti wem bʌ amigojob.

11. ¿Bajcheʼ miʼ mejlel lac chaʼ taj jiñi ñʌchʼtʌlel cheʼ bʌ miʼ yujtel jumpʼejl wocol?

¹¹ An i tajol jiñi xñoptʼañob ñumen añobix bʌ i ñaʼtʌbal mach junlajalic chuqui miʼ ñaʼtañob o muʼto i chaʼleñob leto (quera). Jiñʌch tsaʼ bʌ ujti tiʼ tojlel Pablo yicʼot Bernabé, wen i yamigojoʼ bʌ i bʌ. Tsiʼ chaʼleyob leto tiʼ caj woli (choncol) i ñaʼtañob mi yomʌch miʼ pʌyob majlel Marcos yaʼ baqui mi caj i majlelob ti subtʼan. ¿Chuqui tsaʼ ujti? Jiñi Biblia miʼ yʌl: «Tiʼ caj iliyi tsiʼ wen letojiyob i bʌ, i jujuntiquil tsiʼ chʼʌmʌ i bijlel» (Hech. 15:37-39). Pero Pablo, Bernabé yicʼot Marcos tsaʼʌch i tojʼesayob i wocol. Cheʼ bajcheʼ jiñi, tsiʼ pʌsʌyob chaʼan jiñi ñumen ñuc bʌ i cʼʌjñibal jiñʌch cheʼ an ñʌchʼtʌlel yicʼot juntemelob yaʼ ti congregación. Ti wiʼil, Pablo tsiʼ yʌlʌ chuqui wem bʌ tiʼ tojlel Bernabé yicʼot Marcos (1 Cor. 9:6; Col. 4:10). Joñonla jaʼel yomʌch mi lac tojʼesan baqui jach bʌ wocol an lac chaʼan la quicʼot la quermañujob i mi laj qʼuel chuqui wem bʌ tiʼ tojlelob. Cheʼ bajcheʼ jiñi, mi lac chaʼlen coltaya chaʼan an ñʌchʼtʌlel yicʼot juntemel mi la cajñel (Efes. 4:3).

PABLO TSIʼ COLTA JIÑI HERMANOJOB CHAʼAN MIʼ ÑUMEN ÑOPOB TI DIOS

12. ¿Chuqui tac ti wocol miʼ ñusañob jiñi hermanojob?

¹² Mi lac pʼʌtʼesañob jaʼel jiñi la quermañujob cheʼ bʌ mi laj coltañob chaʼan miʼ ñumen ñopob ti Jehová. An muʼ bʌ i wajlentelob tiʼ familia, tiʼ piʼʌlob ti clase o i piʼʌlob ti eʼtel. An yañoʼ bʌ wen cʼamoʼ bʌ o añob i chʼijyemlel i pusicʼal. I an cabʌlix bʌ jab i chʼʌmʌyob jaʼ i woli (yʌquel) i bej pijtañob chaʼan miʼ tilel i jilibal ili pañimil (mulawil). Pejtelel iliyi miʼ mejlel i yʌcʼ ti wocol jiñi ñopol bʌ lac chaʼan. Jiñʌch tsaʼ bʌ i ñusayob jaʼel jiñi xñoptʼañob yaʼ ti congregación cheʼ ti ñaxam bʌ siglo. ¿Chuqui tsiʼ mele Pablo chaʼan miʼ pʼʌtʼesañob?

13. ¿Bajcheʼ tsiʼ colta Pablo jiñi muʼ bʌ i wajlentelob tiʼ caj xñoptʼañob?

¹³ Pablo tsiʼ cʼʌñʌ jiñi Tsʼijbujel chaʼan miʼ pʼʌtʼesan jiñi ñopol bʌ i chaʼan jiñi hermanojob. Jumpʼejl ejemplo, tajol jiñi xñoptʼañob judíojoʼ bʌ mach yujilobic bajcheʼ yom miʼ jacʼob cheʼ bʌ jiñi i familiajob miʼ yʌlob chaʼan ñumen ñuc i cʼʌjñibal jiñi i ñopbal judíojob. Miʼ mejlel la cʌl chaʼan jiñi carta tsaʼ bʌ i tsʼijbube majlel Pablo jiñi hebreojob tsaʼʌch i wen coltayob (Heb. 1:5, 6; 2:2, 3; 9:24, 25). Jiñi xñoptʼañob miʼ mejlel i cʼʌñob jiñi tsaʼ bʌ i yʌlʌ Pablo chaʼan miʼ mʌcbeñob i yej jiñi mucʼoʼ bʌ ti tʼan. Ixcu joñonla, ¿bajcheʼ miʼ mejlel laj coltañob jiñi hermanojob muʼ bʌ i wajlentelob? Jiñʌch cheʼ bʌ mi lac pʌsbeñob i cʼʌn jiñi lac jun tac chaʼan miʼ mejlel i coltañob i bʌ. Jumpʼejl ejemplo, miʼ mejlel laj cʼʌn jiñi folleto ¿Es la vida obra de un Creador?, yicʼot El origen de la vida. Cinco cuestiones dignas de análisis chaʼan mi laj coltan jiñi xcolelob chaʼan miʼ mejlel i tsictesañob chucoch mucʼʌch i ñopob chaʼan an majqui tsiʼ mele chuqui tac an.

14. ¿Chuqui tsiʼ mele Pablo anquese tsiʼ wen chaʼle subtʼan yicʼot cʌntesa?

¹⁴ Pablo tiʼ sube jiñi i yermañujob chaʼan miʼ melob «chuqui tac wen» chaʼan miʼ pʌsob i cʼuxbiya (Heb. 10:24). Mach tiʼ tʼañic jach tsiʼ coltayob, tsaʼʌch i pʌsʌ tiʼ melbal. Jumpʼejl ejemplo, tsaʼ aqʼuenti tiʼ wenta jaʼel chaʼan miʼ coltañob jiñi xñoptʼañob ti Judea cheʼ bʌ tsiʼ ñusayob wiʼñal (Hech. 11:27-30). Tiʼ pejtelel ora tiʼ sʌcla bajcheʼ miʼ mejlel i coltañob jiñi pʼumpʼuñoʼ bʌ anquese miʼ chaʼlen subtʼan yicʼot cʌntesa (Gál. 2:10). Cheʼ bajcheʼ jiñi tsiʼ colta jiñi hermanojob chaʼan miʼ ñumen ñopob chaʼan Jehová mi caj i cʌntañob. Ili ora, mi laj coltan la quermañujob jaʼel cheʼ bʌ mi laj cʼʌn lac tiempo, lac pʼʌtʌlel yicʼot chuqui tac la cujil chaʼan mi lac chaʼlen coltaya cheʼ bʌ miʼ yujtel jumpʼejl wocol yicʼot cheʼ bʌ mi la cʌcʼ lac donación. Cheʼ bajcheʼ iliyi, mi laj coltan jiñi la quermañujob chaʼan miʼ ñopob chaʼan Jehová maʼañic baʼ ora mi caj i cʌyob.

15, 16. ¿Bajcheʼ yilal yomonla tiʼ tojlel jiñi tsaʼ bʌ cʼuñʼayob?

¹⁵ Pablo maʼañic tsiʼ ñaʼta chaʼan maʼañix mi caj i tojʼañob jiñi tsaʼ bʌ cʼuñʼayob. Tsiʼ pʼuntayob i wen jach bajcheʼ tsiʼ pejcayob (Heb. 6:9; 10:39). Jumpʼejl ejemplo, yaʼ tiʼ carta tsaʼ bʌ i chocbe majlel jiñi hebreojob, tsiʼ wen cʼʌñʌ jiñi tʼan «joñonla», mach jiñic jiñi tʼan «jatetla», chaʼan miʼ pʌs chaʼan yomʌch miʼ jacʼ jaʼel jiñi ticʼojel tac woli bʌ i yʌcʼ (Heb. 2:1, 3). Cheʼ bajcheʼ Pablo, maʼañic mi lac ñaʼtan jaʼel chaʼan maʼañix mi caj i tojʼañob jiñi tsaʼix bʌ cʼuñʼayob. La com lac pʌsbeñob chaʼan la comʌch lac pʼʌtʼesañob i cheʼ bajcheʼ jiñi mi lac pʌsbeñob laj cʼuxbiya. Laʼ laj cʼajtesan chaʼan ñucʌch i cʼʌjñibal jiñi muʼ bʌ la cʌl, pero ñumen ñuc i cʼʌjñibal cheʼ yicʼotʌch laj cʼuxbiya mi lac pejcañob.

¹⁶ Pablo tiʼ sube jiñi i yermañujob chaʼan Jehová maʼañic ñajʌyem i chaʼan chuqui wen tac bʌ tsiʼ meleyob (Heb. 10:32-34). Jiñʌch muʼ bʌ i mejlel lac mel jaʼel cheʼ bʌ mi laj coltan juntiquil hermano tsaʼ bʌ cʼuñʼa. Miʼ mejlel laj cʼajtiben bajcheʼ tsiʼ cʌñʌ jiñi i sujmlel o mi laj coltan i cʼajtesan bajcheʼ tsiʼ qʼuelbe i coltaya Jehová. Ti jimbʌ ora, laʼ lac suben chaʼan Jehová maʼañic ñajʌyem i chaʼan bajcheʼ tsiʼ pʌsbe i cʼuxbiya yicʼot chaʼan maʼañic baʼ ora mi caj i cʌy (Heb. 6:10; 13:5, 6). Iliyi miʼ mejlel i coltan jiñi la quermañujob chaʼan miʼ mulañob i bej melben i yeʼtel Jehová.

«CHɅN TIJICÑESAN LAʼ BɅ»

17. ¿Bajcheʼ miʼ mejlel lac ñumen cʌn lac pʼʌtʼesan yañoʼ bʌ?

¹⁷ Juntiquil xʼeʼtel miʼ ñumen sejbʼan majlel cheʼ bʌ miʼ ñumel majlel ora. Joñonla jaʼel miʼ mejlel lac ñumen cʌn bajcheʼ miʼ mejlel lac pʼʌtʼesan la quermañujob. Laʼ lac pʼʌtʼesan jiñi la quermañujob chaʼan miʼ mejlel i lʌtʼob jiñi wocol tac cheʼ bʌ mi lac tajbeñob ti tʼan bajcheʼ tsiʼ cuchuyob jiñi yambʌ i wiñicob Jehová. Chaʼan mi lac sʌclan jiñi ñʌchʼtʌlel, laʼ la cʌl chuqui tac wem bʌ mi laj qʼuel tiʼ tojlel yambʌlob, laʼ laj cʌntan cheʼ bʌ an chuqui miʼ mejlel i jisan i laʼ lac chaʼlen wersa chaʼan mi lac chaʼ taj cheʼ bʌ miʼ yujtel jumpʼejl wocol. Chaʼan mi lac bej pʼʌtʼesan jiñi ñopol bʌ i chaʼan la quermañujob, laʼ la cʌl la quicʼotob jiñi i sujmlel tac am bʌ ti Biblia, laʼ lac sʌclan bajcheʼ miʼ mejlel laj coltañob i mach lac bajñel cʌy jiñi cʼuñoʼ bʌ.

18. ¿Chuqui a wom a mel jatet?

¹⁸ Tijicña miʼ yubiñob jiñi muʼ bʌ i chaʼleñob coltaya tiʼ melol i yotlel chʼujutesaya. Cheʼʌch miʼ mejlel la cubin jaʼel cheʼ bʌ mi lac chaʼlen coltaya chaʼan miʼ pʼʌtʼan la quermañujob. Jumpʼejl otot miʼ mejlel ti asiyel majlel, pero jiñi muʼ bʌ lac mel tiʼ tojlel la quermañujob miʼ mejlel ti jalijel tiʼ pejtelel ora. Jin chaʼan, laʼ lac chaʼlen wersa chaʼan mi lac jacʼ muʼ bʌ i yʌl 1 Tesalonicenses 5:11: «Chʌn tijicñesan laʼ bʌ yicʼot comol pʼʌtʼesan laʼ bʌ».