¿Bajcheʼ miʼ mejlel lac taj ñuc tac bʌ i cʼʌjñibal yaʼ ti Biblia?

Chaʼan mi lac taj ñuc tac bʌ cʼʌjñibal cheʼ bʌ woli lac pejcan jiñi Biblia, yomʌch mi lac mel investigación. Pero ¿chuqui yom mi lac mel chaʼan mucʼʌch i coltañonla?

Laʼ lac sʌclan jiñi mach bʌ la cujilic. Jumpʼejl ejemplo, miʼ mejlel lac sʌclan majqui tiʼ tsʼijbu jiñi relato, jalix tiʼ tsʼijbu yicʼot majqui tiʼ tojlel tsaʼ tsʼijbunti. Cheʼ jaʼel, miʼ mejlel lac sʌclan chuqui woliʼ yujtel ti jimbʌ ora, chuqui tsaʼ ñaxan ujti i chuqui tsaʼ ujti ti wiʼil.

Laʼ lac ñaʼtan chuqui miʼ cʌntesañonla. Laʼ lac sʌclan i jacʼbal ili cʼajtiya tac: «¿Bajcheʼ tsiʼ yubiyob i bʌ jiñi muʼ bʌ i yʌjlelob ti ili relato? ¿Chuqui jiñi wen tac bʌ i melbal tsiʼ pʌsʌyob, i chucoch yom mic lajiñob? ¿Chuqui jiñi mach bʌ weñic tsiʼ meleyob, i chucoch mach yomic mic mel bajcheʼ jiñi?».

Laʼ lac mel cheʼ bajcheʼ tsaʼ laj cʌñʌ. Miʼ mejlel lac mel cheʼ bajcheʼ tsaʼ laj cʌñʌ cheʼ bʌ mi lac loqʼuel ti subtʼan yicʼot ti bajcheʼ yilalonla la quicʼot yañoʼ bʌ. Cheʼ bajcheʼ jiñi mi caj lac jacʼ muʼ bʌ i yʌl jiñi Salmo 107:43: «Jini am bʌ i ñaʼtʌbal laʼ i ñaʼtan iliyi».

• Muʼ bʌ mejlel a mel: Cheʼ bʌ maʼ pejcan jiñi Biblia wen qʼuele bajcheʼ chajpʌbil jiñi sección «Ñuc tac bʌ i cʼʌjñibal ti Biblia» muʼ bʌ i qʼuejlel yaʼ ti lac tempa bʌ. Ti ili sección miʼ tilel cʼajtiya tac muʼ bʌ i coltañonla laj qʼuel bajcheʼ miʼ cʼʌjñibʌyel lac chaʼan jiñi woli bʌ laj cʌn. Cheʼ jaʼel, an dibujo, foto tac yicʼot yan tac bʌ ñuc bʌ i cʼʌjñibal muʼ bʌ i mejlel lac wen ñaʼtan.