Ñopo chaʼan jiñi Xmeloñel tiʼ pejtelel pañimil miʼ pʌs i pʼuntaya

1. ¿Chuqui ñuc bʌ i cʼʌjñibal tsaʼ pʌsbenti Abrahán?

TIʼ tojlel juntiquil ángel, Jehová tiʼ sube Abrahán chaʼan mi caj i jisan Sodoma yicʼot Gomorra. Anquese Abrahán mucʼʌch i wen ñop Jehová, wocol tsiʼ yubi chaʼan miʼ chʼʌmben i sujm jiñi woli bʌ (choncol bʌ) i subentel. Jin chaʼan tsiʼ cʼajti: «¿Muʼ ba caj a jisan jini toj bʌ yicʼot jontol bʌ? […] Jini xMeloñel muʼ bʌ i mel pejtel añoʼ bʌ ti pañimil, ¿mach ba muqʼuic i melob ti toj?». Jehová an chuqui ñuc bʌ i cʼʌjñibal tsiʼ colta i chʼʌmben i sujm jiñi i yamigo, i jiñʌch chaʼan maʼañic baʼ ora mi caj i jisan jiñi tojoʼ bʌ. Iliyi mucʼʌch i wen coltañonla jaʼel ili ora (Gn. 18:23-33).

2. ¿Chucoch miʼ mejlel lac ñop chaʼan tojʌch bajcheʼ miʼ chaʼlen meloñel Jehová yicʼot chaʼan mucʼʌch i pʌs i pʼuntaya?

² ¿Chucoch miʼ mejlel lac ñop chaʼan tojʌch bajcheʼ miʼ chaʼlen meloñel Jehová yicʼot chaʼan mucʼʌch i pʌs i pʼuntaya? Come la cujil chaʼan Jehová miʼ qʼuel lac pusicʼal (1 S. 16:7). Jiñi Biblia miʼ yʌl chaʼan miʼ cʌmbeñob i pusicʼal pejtelel lac piʼʌlob (1 Cr. 28:9; 1 R. 8:39). Jehová maʼañic i pʼisol i ñaʼtʌbal i maʼañic miʼ mejlel lac luʼ cʌn. Jin chaʼan jiñi apóstol Pablo tsiʼ yʌlʌ: «Maʼañic miʼ mejlel ti laj chʼʌmbentel i sujm bajcheʼ miʼ chaʼlen meloñel» (Rom. 11:33).

3, 4. ¿Chuqui muʼ bʌ i mejlel laj cʼajtiben lac bʌ? ¿Chuqui mi caj laj qʼuel ti ili estudio? (Juan 5:28, 29).

³ Pero tajol cheʼ mi la cujtel bajcheʼ Abrahán i mi laj cʼajtiben lac bʌ: «¿Muʼ ba caj i chaʼ chʼojyelob jiñi tsaʼ bʌ jisʌntiyob ti Jehová, bajcheʼ tsaʼ bʌ jisʌntiyob ti Sodoma yicʼot Gomorra? ¿Yaʼ ba ochemob jaʼel ti jiñi ‹mach bʌ tojobic› muʼ bʌ caj i chaʼ chʼojyelob?» (Hech. 24:15).

⁴ Mi caj laj qʼuel tiʼ tojlel jiñi muʼ bʌ caj i chaʼ chʼojyelob ti talto bʌ qʼuin. Maxto wen jalic tsaʼ tsictesʌnti bajcheʼ an i sujmlel cheʼ an muʼ bʌ caj i «chʼojyelob chaʼan cuxtʌlel» yicʼot muʼ bʌ caj i «chʼojyelob chaʼan meloñel» (pejcan Juan 5:28, 29).a Iliyi miʼ pʌs chaʼan an tacʌch yambʌ chuqui yom miʼ qʼuextʌyel, i jiñʌch muʼ bʌ caj laj qʼuel ti ili estudio yicʼot ti yambʌ. Mi caj lac ñaxan qʼuel chaʼan an chuqui tac mach bʌ la cujilic chaʼan bajcheʼ miʼ chaʼlen meloñel Jehová, i ti wiʼil mi caj laj qʼuel chuqui tac la cujilʌch bʌ.

MACH BɅ LA CUJILIC

5. ¿Chuqui an ajli wajali tiʼ tojlelob jiñi tsaʼ bʌ jisʌntiyob ti Sodoma yicʼot Gomorra?

⁵ ¿Chuqui mi caj i yujtel tiʼ tojlelob jiñi tsaʼ bʌ jisʌntiyob come mach tojobic tsaʼ qʼuejliyob, bajcheʼ jiñi tsaʼ bʌ jisʌntiyob ti Sodoma yicʼot Gomorra? Ti wajali tsaʼ ajli chaʼan maʼañic mi caj i chʌn chʼojyelob. Pero jiñi xucʼul bʌ xyaj eʼtel an i wen chaʼle estudio yicʼot oración i tsaʼ cʼoti i qʼuelob chaʼan maʼañic miʼ mejlel ti junyajl ajlel bajcheʼ jiñi. Laʼ laj qʼuel chucoch.

6. ¿Baqui ora tsaʼ jisʌntiyob yambʌ lac piʼʌlob, pero chuqui mach bʌ muqʼuic i mejlel la cʌl?

⁶ An yambʌ relato tac muʼ bʌ i pʌs chaʼan Jehová tsaʼʌch i jisayob jiñi lac piʼʌlob mach bʌ tojobic tsiʼ qʼuele. Jumpʼejl ejemplo, tiʼ yorajlel jiñi Diluvio yonlel lac piʼʌlob tsaʼ jiliyob, cojach Noé yicʼot i familia cuxul tsaʼ cʌleyob. Ti wiʼil, Jehová tiʼ sube jiñi israelitajob chaʼan miʼ jisañob jiñi siete tejclum yaʼ bʌ añob ti jiñi lum tsaʼ bʌ i wʌn subeyob. Cheʼ jaʼel, juntiquil ángel tiʼ tsʌnsa 185 mil soldadojob asiriojoʼ bʌ ti jumpʼejl acʼʌlel (Gn. 7:23; Dt. 7:1-3; Is. 37:36, 37). Jiñi Biblia maʼañic miʼ pʌs chaʼan pejtelel ili lac piʼʌlob tsaʼix junyajl jisʌntiyob i chaʼan maʼañix mi caj i chaʼ chʼojyelob. Laʼ lac ñumen qʼuel.

7. ¿Chuqui mach bʌ la cujilic tiʼ tojlel jiñi tsaʼ bʌ jisʌntiyob ti jiñi Diluvio yicʼot yaʼ ti Canaán? (Qʼuele jiñi dibujo).

⁷ Anquese Jehová tsiʼ jisa pejtelel jiñi lac piʼʌlob, pero mach la cujilic bajcheʼ yilal tsiʼ qʼuele ti jujuntiquil, mi la cujilic mi tsaʼixto mejli i cʌñob Jehová yicʼot miʼ cʌyob i mul. Muʼ bʌ i yʌl jiñi Biblia tiʼ tojlel Noé jiñʌch chaʼan tsiʼ chaʼle subtʼan (2 Ped. 2:5). Pero jiñi Biblia maʼañic miʼ yʌl chaʼan cheʼ bʌ wolito i mel (pʌt) jiñi arca, tsiʼ ñopo i subeñob jaʼel jujuntiquil lac piʼʌlob chuqui muʼ bʌ caj i yujtel. Cheʼ jaʼel, mach la cujilic mi añixto bajcheʼ tsaʼ mejli i cʌñob Jehová jiñi tsaʼ bʌ jisʌntiyob ti Canaán.

8. ¿Chuqui mach bʌ la cujilic tiʼ tojlelob jiñi tsaʼ bʌ jisʌntiyob ti Sodoma yicʼot Gomorra?

⁸ ¿Ixcu jiñi lac piʼʌlob tsaʼ bʌ jisʌntiyob ti Sodoma yicʼot Gomorra? La cujil chaʼan ti Sodoma an jach juntiquil wiñic toj bʌ, jiñʌch Lot. Pero mach la cujilic mi tsiʼ ñopo i subeñob chaʼan bʌ Dios jiñi lac piʼʌlob. I sujmʌch chaʼan jontolob (mañajob) jiñi lac piʼʌlob, pero ¿yujiloʼ ba cʌñol chuqui jiñi wem bʌ yicʼot mach bʌ weñic? Tajol maʼañic, come jiñi Biblia miʼ yʌl chaʼan ti jumpʼejl bʌ qʼuin cheʼ bʌ Lot tsaʼ cʼoti i julaʼ, jiñi wiñicob ti Sodoma tsiʼ ñopo i wersa piʼleñob. Tajol maʼañic miʼ ñaʼtañob chaʼan mach weñic jiñi woli bʌ (yʌquel bʌ) i melob (Gn. 19:4; 2 Ped. 2:7). ¿Pero muʼ ba i mejlel la cʌl chaʼan Jehová, jiñi yujil bʌ pʼuntaya, maʼañix mi caj i chaʼ chʼojyesan mi juntiquilic? I sujmʌch chaʼan Jehová tiʼ sube Abrahán chaʼan mi añicto 10 tojoʼ bʌ ti jiñi tejclum (Gn. 18:32). Jin chaʼan, tojʌch tsaʼ bʌ i mele Jehová cheʼ tsiʼ jisayob, pero maʼañic miʼ mejlel la cʌl chaʼan mi juntiquilic mi caj i chaʼ chʼojyel.

9. ¿Chuqui mach bʌ la cujilic tiʼ tojlel Salomón?

⁹ Jiñi Biblia miʼ yʌl jaʼel chaʼan an lac piʼʌlob tojoʼ bʌ pero ti wiʼil tsiʼ meleyob mach bʌ weñic, bajcheʼ Salomón. Wen i cʌñʌ Jehová yicʼot tsiʼ chʼujutesa i tsiʼ taja cabʌl bendición, pero ti wiʼil tsaʼ caji i chʼujutesan yambʌ dios tac. Jehová maʼañic tsiʼ mulaj jiñi, i jiñi israelitajob tsiʼ tajayob wocol tiʼ caj tsaʼ bʌ i mele Salomón. Pero jiñi Biblia miʼ yʌl chaʼan cheʼ bʌ tsaʼ chʌmi Salomón tsaʼ mujqui tiʼ tejclum David, yaʼ baqui an i ñojteʼelob (1 R. 11:5-10, 43; 2 R. 23:13). ¿Yom ba i yʌl iliyi chaʼan Salomón mi caj i chaʼ chʼojyel? Jiñi Biblia maʼañic miʼ yʌl. An muʼ bʌ i mejlel i ñaʼtañob chaʼan cheʼʌchi come Romanos 6:7 miʼ yʌl chaʼan «jiñi muʼ bʌ i chʌmel muqʼuix i ñusʌbentel i mul». Pero ili texto mach yomic i yʌl chaʼan cheʼ bʌ an majqui miʼ chʌmel yom i yʌl chaʼan mi caj i chaʼ chʼojyel. Jehová mi caj i chaʼ aqʼuen i cuxtʌlel jiñi yom bʌ chaʼan miʼ cʌñob yicʼot miʼ ñaʼtañob mi yomob i melben i yeʼtel (troñel). Ili majtañʌl mach majqui jach mi caj i taj (Job 14:13, 14; Juan 6:44). ¿Muʼ ba caj i chaʼ chʼojyel Salomón? Mach la cujilic. La cujil bʌ jiñʌch chaʼan Jehová mi caj i mel chuqui toj.

LA CUJIL BɅ

10. ¿Bajcheʼ miʼ yubin i bʌ Jehová cheʼ miʼ jisan jiñi jontoloʼ bʌ? (Ezequiel 33:11, qʼuele jaʼel jiñi dibujo).

¹⁰ (Pejcan Ezequiel 33:11). Jehová miʼ subeñonla bajcheʼ yubil miʼ yubin i bʌ cheʼ bʌ miʼ chaʼlen meloñel. Jiñi apóstol Pedro lʌcʼʌ lajal tsiʼ yʌlʌ bajcheʼ tsaʼ bʌ i yʌlʌ jiñi xʼaltʼan Ezequiel, chaʼan Jehová «mach yomic chaʼan mi juntiquilic miʼ jisʌntel» (2 Ped. 3:9). Ili tʼan tac miʼ ñʌchʼchocon lac pusicʼal come la cujil chaʼan Jehová maʼañic mi caj i junyajl jisan juntiquil lac piʼʌl mi maʼañic chucoch yom miʼ mel. Wen yujil pʼuntaya i mi caj i pʌs cheʼ bʌ yomʌch miʼ qʼuel.

11. ¿Majqui jiñi maʼañic bʌ mi caj i chʼojyelob, i bajcheʼ la cujil?

¹¹ La cujil chaʼan añʌch lac piʼʌlob mach bʌ añix mi caj i chaʼ chʼojyelob, ¿majquiyob? Jiñi Biblia miʼ yʌl chaʼtiquil uxtiquilob.b Juntiquil jiñʌch Judas Iscariote, Jesús tsiʼ yʌlʌ chaʼan maʼañix mi caj i chaʼ chʼojyel (Mar. 14:21; qʼuele jaʼel Juan 17:12 yicʼot jiñi nota chaʼan estudio). Judas wen yujil chaʼan mach weñic chuqui woliʼ mel tiʼ tojlel Jehová yicʼot jiñi i Yalobil (qʼuele Marcos 3:29 yicʼot jiñi nota tac chaʼan estudio). Jesús tsiʼ yʌlʌ jaʼel chaʼan jiñi ñucoʼ bʌ i yeʼtel ti ñopbalʌl tsaʼ bʌ i contrajiyob ti jimbʌ ora maʼañix mi caj i chaʼ chʼojyelob (Mat. 23:33; qʼuele jaʼel Juan 19:11 yicʼot jiñi nota chaʼan estudio muʼ bʌ i yʌl «del hombre»). I jiñi apóstol Pablo tsiʼ wʌn alʌ chaʼan jiñi apóstatajob maʼañic bʌ miʼ chaʼ ñaʼtañob i bʌ maʼañic mi caj i chʼojyelob jaʼel (Heb. 6:4-8; 10:29).

12. ¿Bajcheʼ miʼ pʌs i pʼuntaya Jehová? Alʌ jumpʼejl ejemplo.

¹² Tsaʼix laj qʼuele chaʼan Jehová wen yujil pʼuntaya i «mach yomic chaʼan mi juntiquilic miʼ jisʌntel». ¿Bajcheʼ an i pʌsbe i pʼuntaya jiñi am bʌ i chaʼleyob tsʌts bʌ mulil? Jiñi rey David tsiʼ chaʼle tsʼiʼlel yicʼot tsʌnsa, pero tsaʼʌch i chaʼ ñaʼta i bʌ, jin chaʼan Jehová tsiʼ pʼunta i tsiʼ ñusʌbe i mul (2 S. 12:1-13). Cheʼ jaʼel, jiñi rey Manasés cabʌl jab tsiʼ mele mach bʌ weñic, pero Jehová tsiʼ pʼunta yicʼot tsiʼ ñusʌbe i mul cheʼ bʌ tsiʼ qʼuele chaʼan ti jumpʼejl i pusicʼal tsiʼ chaʼ ñaʼta i bʌ (2 Cr. 33:9-16). Ili ejemplo tac miʼ pʌsbeñonla chaʼan Jehová miʼ pʌs i pʼuntaya cheʼ bʌ yomʌch miʼ qʼuel. Jin chaʼan, David yicʼot Manasés mucʼʌch caj i chaʼ chʼojyelob, come tsaʼ cʼoti i cʌñob chaʼan machʌch weñic chuqui tsiʼ meleyob i tsiʼ chaʼ ñaʼtayob i bʌ.

13. a) ¿Chucoch Jehová tsiʼ pʼunta jiñi chumuloʼ bʌ ti Nínive? b) ¿Chuqui tsiʼ yʌlʌ Jesús tiʼ tojlel jiñi chumuloʼ bʌ ti Nínive?

¹³ Jehová tsiʼ pʌsbe i pʼuntaya jaʼel jiñi añoʼ bʌ ti Nínive. Dios tiʼ sube Jonás: «Qʼuelelix c chaʼan cabʌlob i jontolil». Pero cheʼ bʌ jiñi ninivitajob tsiʼ chaʼ ñaʼtayob i bʌ, Jehová tsiʼ ñusʌbeyob i mul. Ñumento tsiʼ pʌsʌ i pʼuntaya bajcheʼ Jonás. Cheʼ bʌ Jonás tsaʼ michʼa chaʼan maʼañic tsaʼ jisʌntiyob jiñi ninivitajob, Jehová tsiʼ cʼajtesʌbe chaʼan maʼañic miʼ ñaʼtañob baqui bʌ i ñoj i baqui bʌ i tsʼej (Jon. 1:1, 2; 3:10; 4:9-11). Ti wiʼil, Jesús tsiʼ taja ti tʼan jiñi añoʼ bʌ ti Nínive chaʼan miʼ pʌs chaʼan Jehová wen yujil pʼuntaya yicʼot chaʼan toj chuqui miʼ mel. Tsiʼ yʌlʌ jaʼel chaʼan jiñi añoʼ bʌ ti Nínive «mi caj i tejchelob ti meloñel» (Mat. 12:41).

14. ¿Chuqui mi caj i yujtel tiʼ tojlel jiñi ninivitajob muʼ bʌ caj i «chʼojyelob chaʼan meloñel»?

¹⁴ ¿Ti baqui bʌ «meloñel» mi caj i chʼojyelob jiñi ninivitajob? Jesús tsiʼ yʌlʌ chaʼan an muʼ bʌ caj i chʼojyelob «chaʼan meloñel», ili mi caj i yujtel ti talto bʌ qʼuin (Juan 5:29). Jin woliʼ taj ti tʼan cheʼ bʌ Jesús mi caj i chaʼlen yumʌntel mil jab, cheʼ ba ora «mi caj i chaʼ chʼojyelob jiñi tojoʼ bʌ yicʼot jiñi mach bʌ tojobic» (Hech. 24:15). Jiñi mach bʌ tojobic mi caj i «chʼojyelob chaʼan meloñel» come Jehová yicʼot Jesús mi caj i qʼuelob mi mucʼʌch i jacʼbeñob i tʼan. Mi juntiquil ninivita miʼ chaʼ chʼojyel pero mach yomic i chʼujutesan Jehová, mi caj i jisʌntel (Is. 65:20). Pero mi mucʼʌch i ñaʼtan i melben i yeʼtel Jehová, mi caj i mejlel ti chumtʌl tiʼ pejtelel ora (Dn. 12:2).

15. a) ¿Chucoch mach yomic mi la cʌl chaʼan mi juntiquilic tsaʼ bʌ jisʌnti ti Sodoma yicʼot Gomorra mi caj i chaʼ chʼojyel? b) ¿Baqui bʌ i sujmlel muʼ bʌ i yʌl Judas 7? (Qʼuele jiñi recuadro «¿Chuqui yom i yʌl Judas?»).

¹⁵ Jesús tsiʼ yʌlʌ chaʼan jiñi tsaʼ bʌ i tsʼaʼleyob yicʼot maʼañic bʌ tsiʼ ñopbeyob i cʌntesa ñumen wocol mi caj i yubiñob tiʼ Qʼuiñilel meloñel i mach cheʼic bajcheʼ Sodoma yicʼot Gomorra (Mat. 10:14, 15; 11:23, 24; Luc. 10:12). ¿Chuqui yom i yʌl Jesús ilayi? Tajol miʼ mejlel ti ñaʼtʌntel chaʼan woli jach i cʼʌn bajcheʼ jumpʼejl lajiya,c pero mach cheʼic yilali, come cheʼ bʌ tsiʼ tajayob ti tʼan jiñi chumuloʼ bʌ ti Nínive mach wolic jach i cʼʌn bajcheʼ jumpʼejl lajiya. Jin chaʼan, jiñi i «Qʼuiñilel meloñel» woli bʌ i yʌl tiʼ tojlel Sodoma yicʼot Gomorra tajol lajal yicʼot tsaʼ bʌ i yʌlʌ cheʼ bʌ tsiʼ taja ti tʼan jiñi chumuloʼ bʌ ti Nínive. Jiñi ninivitajob tsiʼ wen meleyob mach bʌ weñic, cheʼ bajcheʼ jiñi tsaʼ bʌ jisʌntiyob ti Sodoma yicʼot Gomorra, pero jiñi ninivitajob tsaʼʌch mejli i chaʼ ñaʼtañob i bʌ. Cheʼ jaʼel, yom mi laj cʼajtesan chaʼan Jesús tsiʼ yʌlʌ chaʼan «jiñi tsaʼ bʌ i meleyob chuqui tac mach bʌ weñic mi caj i chʼojyelob chaʼan meloñel» (Juan 5:29). Jin chaʼan, tajol an chaʼtiquil uxtiquilob tsaʼ bʌ jisʌntiyob ti Sodoma yicʼot Gomorra añoʼ bʌ i pijtaya chaʼan miʼ chaʼ chʼojyelob i mi caj i mejlel laj coltañob chaʼan miʼ cʌñob Jehová yicʼot Jesús.

16. ¿Chuqui mi caj i chʼʌm ti ñuc Jehová chaʼan miʼ ñaʼtan majqui mi caj i chaʼ cuxtesan? (Jeremías 17:10).

¹⁶ (Pejcan Jeremías 17:10). Ili texto miʼ pʌs jiñi la cujilʌch bʌ: Chaʼan Jehová miʼ chʌcʌ qʼuel lac pusicʼal yicʼot muʼ bʌ lac ñaʼtan, i cheʼ bʌ woliʼ ñaʼtan majqui mi caj i chaʼ cuxtesan mi caj i yʌqʼuen «i chobejtʌbal» jujuntiquil cheʼ bajcheʼ an i melbal (chaʼlibal). Jehová mi caj i jisan jiñi yom bʌ miʼ toj i mul, pero mi caj i pʌs i pʼuntaya cheʼ bʌ yomʌch miʼ qʼuel. Jin chaʼan, mach la cʌl chaʼan juntiquil lac piʼʌl maʼañix mi caj i chaʼ chʼojyel mi jiñi Biblia maʼañic miʼ jamʌ al.

JIÑI XMELOÑEL TI PAÑIMIL TIʼ PEJTELEL ORA MI CAJ I MEL CHUQUI TOJ

17. ¿Chuqui mi caj i yujtel tiʼ tojlel jiñi chʌmeñobix bʌ?

¹⁷ Cʼʌlʌl cheʼ bʌ Adán yicʼot Eva tsiʼ temeyob i bʌ yicʼot Satanás i tsiʼ yʌcʼʌyob i bʌ tiʼ contra Jehová, añix chʌmeñob (sajtemob) yonlel lac piʼʌlob. Tiʼ sujm, jiñi chʌmel juntiquilʌch laj contra (1 Cor. 15:26). ¿Pero chuqui mi caj i yujtel tiʼ tojlelob? An 144 mil muʼ bʌ caj i majlelob ti panchan, cheʼ bʌ miʼ chʌmelob miʼ chaʼ chʼojyelob ti panchan i miʼ yʌqʼuentelob i cuxtʌlel mach bʌ yujilic jilel (Apoc. 14:1). I an cabʌlob tsaʼ bʌ i melbeyob i yeʼtel Jehová muʼ bʌ caj i chaʼ chʼojyelob, ili jiñobʌch «jiñi tojoʼ bʌ», i mi caj i chumtʌlob tiʼ pejtelel ora mi xucʼul miʼ yajñelob ti jiñi Mil jab i yumʌntel Cristo yicʼot ti jiñi cojix bʌ prueba (Dn. 12:13; Heb. 12:1). Cheʼ jaʼel, mi caj i chʼojyelob «jiñi mach bʌ tojobic», ili jiñobʌch jiñi maʼañic bʌ tsaʼ mejli i melbeñob i yeʼtel Jehová o tsaʼ bʌ i meleyob mach bʌ weñic, i mi caj i mejlel i qʼuextañob i melbal yicʼot i chʼujutesañob Jehová (Luc. 23:42, 43). Pero jiñi wen jontoloʼ bʌ tsaʼ bʌ i yʌcʼʌyob i bʌ tiʼ contra Jehová maʼañix mi caj i chaʼ chʼojyelob (Luc. 12:4, 5).

18, 19. a) ¿Chucoch miʼ mejlel lac ñop chaʼan Jehová tojʌch chuqui mi caj i mel tiʼ tojlel jiñi chʌmeñobix bʌ? (Isaías 55:8, 9). b) ¿Chuqui mi caj laj qʼuel ti jiñi yambʌ estudio?

¹⁸ ¿Muʼ ba i mejlel lac ñop chaʼan Jehová tiʼ pejtelel ora mi caj i chaʼlen meloñel ti toj? ¡Mucʼʌch! Cheʼ bajcheʼ Abrahán, joñonla la cujil chaʼan jiñi «xMeloñel muʼ bʌ i mel pejtel añoʼ bʌ ti pañimil» tojʌch bʌ Dios, yujil pʼuntaya yicʼot wen an i ñaʼtʌbal. Jehová tsiʼ yʌqʼue tiʼ wenta i Yalobil chaʼan miʼ chaʼlen meloñel i tsaʼix i cʌntesa bajcheʼ yom miʼ mel (Juan 5:22). Jehová yicʼot i Yalobil miʼ mejlel i qʼuelob chuqui an ti lac pusicʼal (Mat. 9:4). Jin chaʼan tiʼ pejtelel ora toj mi caj i chaʼleñob meloñel.

¹⁹ La cujil chaʼan Jehová tiʼ pejtelel ora miʼ mel chuqui wen. Chajpʌbil chaʼan miʼ chaʼlen meloñel, mach lajalic bajcheʼ joñonla (pejcan Isaías 55:8, 9). Maʼañic mi lac pensarin bajcheʼ mi caj i chaʼlen meloñel Jehová yicʼot Jesús. Cheʼ jaʼel, Jesús jiñi lac Rey, miʼ lajin i Tat i mi caj i pʌs i pʼuntaya yicʼot toj chuqui mi caj i mel (Is. 11:3, 4). Ti jiñi yambʌ estudio mi caj laj qʼuel jiñi mach bʌ la cujilic yicʼot la cujilʌch bʌ chaʼan bajcheʼ mi caj i chaʼlen meloñel Jehová yicʼot Jesús cheʼ bʌ wolix jiñi ñuc bʌ wocol.