Mach lac bajñelic

1, 2. a) ¿Chucoch miʼ mejlel lac ñop chaʼan mach lac bajñelic cheʼ bʌ an lac wocol? b) ¿Chuqui mi caj laj qʼuel ti ili estudio?

CHEʼ bʌ mi lac ñusan tsʌts bʌ wocol tajol lac bajñel mi la cubin lac bʌ. Lajal bajcheʼ mi lac bajñel sajtel ti mateʼel i maʼañic mi lac ñaʼtan bajcheʼ mi lac mejlel ti loqʼuel come mach laj cʌñʌyic jiñi bij. Pero mach lac bajñelic come Jehová miʼ qʼuel jiñi woli bʌ (choncol bʌ) lac ñusan i an i yʌcʼʌ i tʼan chaʼan mi caj i yajñel yicʼotonla. Jehová miʼ suben jiñi i wiñicob: «Mi caj j coltañet» (Is. 41:10).

² Ti ili estudio mi caj laj qʼuel chʌnchajp bajcheʼ miʼ coltañonla Jehová: 1) Miʼ pʌsbeñonla chuqui yom mi lac mel (chaʼlen), 2) miʼ yʌqʼueñonla chuqui i cʼʌjñibal lac chaʼan, 3) miʼ cʌntañonla i 4) miʼ ñuqʼuesan lac pusicʼal. Jehová an i yʌcʼʌ i tʼan chaʼan maʼañic baʼ ora mi caj i ñajʌyel i chaʼañonla yicʼot i cʌyonla, mach yʌlʌyic chuqui ti wocol mi lac ñusan. Jin chaʼan miʼ mejlel lac ñop chaʼan mach lac bajñelic.

JEHOVÁ MIʼ PɅSBEÑONLA CHUQUI YOM MI LAC MEL

3, 4. ¿Bajcheʼ miʼ pʌsbeñonla Jehová chuqui yom mi lac mel? (Salmo 48:14).

³ (Pejcan Salmo 48:14). Jehová yujil chaʼan maʼañic miʼ mejlel lac bajñel ñaʼtan chuqui yom mi lac mel, jin chaʼan miʼ coltañonla. Junchajp muʼ bʌ i cʼʌn i coltañonla jiñʌch jiñi Biblia (Sal. 119:105). Yaʼi miʼ subeñonla bajcheʼ miʼ mejlel lac chʼʌm wen tac bʌ decisión yicʼot bajcheʼ miʼ mejlel lac pʌs wen tac bʌ lac melbal muʼ bʌ i coltañonla chaʼan ñumen tijicñayonla yicʼot muʼ bʌ i yʌqʼueñonla lac pijtaya chaʼan mi lac taj laj cuxtʌlel maʼañic bʌ i jilibal.a Jumpʼejl ejemplo, miʼ pʌsbeñonla chaʼan yom mi lac ñusʌben i mul yañoʼ bʌ, chaʼan mach yomic mi lac lot lac michʼajel, chaʼan yom mi lac mel chuqui wem bʌ yicʼot mi laj cʼuxbin lac bʌ ti jumpʼejl lac pusicʼal (Sal. 37:8; Heb. 13:18; 1 Ped. 1:22). Cheʼ bʌ mi lac mel pejtelel iliyi miʼ coltañonla chaʼan mi lac sujtel ti wem bʌ tatʌl, ijñamʌl, ñoxiʼal yicʼot ti wem bʌ amigo.

⁴ Yaʼ ti Biblia, Jehová tsiʼ yʌcʼʌ ti tsʼijbuntel cʌytʌl relato tac chaʼan lac piʼʌlob tsaʼ bʌ i ñusayob wocol tac yicʼot cheʼ bʌ tsiʼ yubiyob i bʌ jaʼel bajcheʼ joñonla (1 Cor. 10:13; Sant. 5:17). An chaʼchajp bajcheʼ miʼ mejlel i coltañonla cheʼ mi lac pejcan jiñi relato tac i mi laj qʼuel chuqui miʼ mejlel laj cʌn yaʼi. Ñaxam bʌ, miʼ pʌsbeñonla chaʼan mach joñon jachla mi lac ñusan wocol tac. Añʌch yañoʼ bʌ am bʌ i ñusayob wocol tac bajcheʼ lac chaʼan, i Jehová an i coltayob chaʼan miʼ lʌtʼob (1 Ped. 5:9). I chaʼchajplel, miʼ pʌsbeñonla bajcheʼ miʼ mejlel lac lʌtʼ jiñi wocol tac (Rom. 15:4).

5. ¿Majquiyob miʼ cʼʌn Jehová chaʼan miʼ coltañonla?

⁵ Jehová miʼ cʼʌn jaʼel jiñi hermanojob chaʼan miʼ coltañonla.b Laʼcu lac ñaʼtan, jiñi superintendentejob chaʼan circuito miʼ julaʼtañob jiñi congregación tac yicʼot miʼ ñusañob discurso tac muʼ bʌ i pʼʌtʼesañonla yicʼot muʼ bʌ i coltañonla chaʼan chʌn juntemel mi la cajñel (Hech. 15:​40–16:5). Jiñi ancianojob ti congregación tac miʼ chʌcʌ qʼuelob bajcheʼ yilal añob jujuntiquil publicador (1 Ped. 5:​2, 3). Jiñi tatʌlob miʼ cʌntesañob i yalobil chaʼan miʼ cʼuxbiñob Jehová, chaʼan miʼ chʼʌmob wen tac bʌ decisión yicʼot chaʼan miʼ melob i chaʼan tac bʌ Jehová (Pr. 22:6). I jiñi hermanajob ñumen añobix bʌ i jabilel miʼ yʌqʼueñob wem bʌ ejemplo jiñi más xchʼocobto bʌ, miʼ yʌqʼueñob ticʼojel tac yicʼot miʼ subeñob tʼan tac muʼ bʌ i tijicñesʌbeñob i pusicʼal (Tito 2:​3-5).

6. ¿Chuqui yom mi lac mel chaʼan mi lac tajben i wenlel jiñi i coltaya Jehová?

⁶ Jehová añix i yʌqʼueyonla pejtelel chuqui i cʼʌjñibal lac chaʼan chaʼan mi lac chʼʌm wen tac bʌ decisión yicʼot chaʼan tijicñayonla. ¿Pero chuqui yom mi lac mel chaʼan mi lac tajben i wenlel yicʼot chaʼan mi lac pʌs chaʼan mucʼʌch laj qʼuel ti ñuc? Proverbios 3:​5, 6 miʼ yʌl: «Ñopo lac Yum tiʼ pejtelel a pusicʼal. Mach a bajñel ñaʼtan bajcheʼ jach a wom maʼ mel». ¿Chuqui mi caj i yujtel? «Cheʼ jini [Jehová] mux caj i chajpʌbeñet a bijlel». Iliyi yom i yʌl chaʼan mi caj i coltañonla chaʼan maʼañic mi lac taj wocol yicʼot chaʼan ñumen tijicñayonla. ¡Mucʼʌch lac wen qʼuel ti ñuc cheʼ Jehová miʼ cʼuxbiñonla yicʼot miʼ yʌqʼueñonla jiñi ticʼojel tac i cʼʌjñibal bʌ lac chaʼan! (Sal. 32:8).

JEHOVÁ MIʼ YɅQʼUEÑONLA CHUQUI I CʼɅJÑIBAL LAC CHAʼAN

7. Cheʼ bajcheʼ miʼ yʌl Filipenses 4:​19, ¿bajcheʼ miʼ coltañonla Jehová?

⁷ (Pejcan Filipenses 4:19). Yambʌ bajcheʼ miʼ coltañonla Jehová jiñʌch cheʼ miʼ yʌqʼueñonla i bendición cheʼ mi lac chaʼlen wersa lac sʌclan chuqui tac i cʼʌjñibal lac chaʼan bajcheʼ i bʌl lac ñʌcʼ, lac pislel yicʼot baqui mi lac chumtʌl (Mat. 6:33; 2 Tes. 3:12). I tilelʌch cheʼ mi lac pensarin bajcheʼ mi caj lac taj chuqui i cʼʌjñibal lac chaʼan, pero Jehová miʼ subeñonla chaʼan mach yomic mi laj cʌlʌx pensarin pejtelel jiñi (qʼuele jiñi ñaxam bʌ nota de estudio chaʼan Mateo 6:25 ti español). ¿Chucoch? Come an i yʌcʼʌ i tʼan chaʼan maʼañic baqui ora mi caj i bajñel cʌy i wiñicob (Mat. 6:8; Heb. 13:5). Miʼ mejlel lac ñop chaʼan Jehová mucʼʌch caj i tsʼʌctesan i tʼan i mi caj i yʌqʼueñonla chuqui i cʼʌjñibal lac chaʼan.

8. ¿Bajcheʼ tsaʼ coltʌnti David ti Jehová?

⁸ Laʼcu lac ñaʼtan bajcheʼ Jehová tsiʼ colta David cheʼ bʌ woli (yʌquel) ti putsʼel tiʼ caj Saúl yom i tsʌnsan. Ti jimbʌ ora, Jehová tsiʼ yʌqʼue David yicʼot i wiñicob pejtelel chuqui i cʼʌjñibal i chaʼañob. Cheʼ bʌ David tsiʼ cʼajtesa bajcheʼ Jehová tsiʼ colta, tsiʼ yʌlʌ: «Chʼitoñon to wajali. Wʌle ñoxonix. Cʼʌlʌl wʌle maʼanic qʼuelel c chaʼan juntiquil toj bʌ tsaʼ bʌ chojqui. I yalobilob jaʼel maʼanic miʼ cʼajtiñob ñumel i bʌl i ñʌcʼ» (Sal. 37:25). Tajol jatet jaʼel an a qʼuele bajcheʼ Jehová an i yʌqʼueyet chuqui i cʼʌjñibal a chaʼan o chuqui i cʼʌjñibal i chaʼan jiñi hermanojob.

9. ¿Chuqui miʼ mel Jehová ili ora chaʼan miʼ coltan i wiñicob cheʼ bʌ miʼ yujtel jumpʼejl wocol? (Qʼuele jaʼel jiñi foto tac).

⁹ Jehová miʼ yʌqʼuen chuqui i cʼʌjñibal i chaʼan i wiñicob jaʼel cheʼ bʌ miʼ yujtel jumpʼejl wocol. Laʼcu lac ñaʼtan, cheʼ ti ñaxam bʌ siglo, jiñi xñoptʼañob chumuloʼ bʌ ti yan tac bʌ tejclum tsiʼ chocbeyob majlel chuqui i cʼʌjñibal i chaʼan jiñi hermanojob ti Jerusalén cheʼ bʌ tsaʼ ñumi tsʌts bʌ wiʼñal (Hech. 11:​27-30; Rom. 15:​25, 26). I cheʼʌch miʼ bej melob jiñi hermanojob ili ora. Cheʼ bʌ miʼ yujtel jumpʼejl wocol bajcheʼ icʼ jaʼal, yujquel o butʼjaʼlel, Jehová miʼ ñijcʌben i pusicʼal i wiñicob chaʼan miʼ chocob majlel bʌlñʌcʼʌl, jaʼ, pisil yicʼot tsʼac tac yaʼ baqui tsaʼ ujti jiñi wocol. Cheʼ jaʼel, an hermanojob muʼ bʌ i chʼʌmob tiʼ wenta chaʼan miʼ tojʼesʌntel jiñi otot tac yicʼot i Yotlel tac tempa bʌ muʼ bʌ i jejmel o miʼ yʌsiyel. I jiñi hermanojob muʼ bʌ i sʌtob i yotot o am bʌ majqui miʼ chʌmel i chaʼañob, ti ora miʼ qʼuejlel bajcheʼ miʼ mejlelob ti coltʌntel chaʼan miʼ ñuqʼuesʌbentelob i pusicʼal yicʼot jiñi Biblia.c

10, 11. ¿Chuqui maʼ cʌn ti jiñi tsaʼ bʌ ujti tiʼ tojlel Boris?

¹⁰ Jehová miʼ pʌsben i yutslel jaʼel yicʼot miʼ yʌqʼuen chuqui i cʼʌjñibal i chaʼan jiñi maxto bʌ Testigojobic. Joñonla jaʼel mi lac lajin, jin chaʼan mi laj qʼuel bajcheʼ miʼ mejlel laj coltan jiñi yambʌ lac piʼʌlob (Gál. 6:10). Iliyi an i yʌcʼʌ chaʼan cabʌlob miʼ mulan i ñumen cʌñob Jehová. Laʼ laj qʼuel tsaʼ bʌ ujti tiʼ tojlel Boris, juntiquil director ti jumpʼejl escuela i chumul ti Ucrania. Anquese mach i testigojic Jehová, tiʼ pejtelel ora tsiʼ pʌsbe i yutslel yicʼot tsiʼ chaʼle ti respetar chuqui miʼ ñopob jiñi alumnojob Testigojoʼ bʌ. Cheʼ bʌ tsaʼ tejchi jiñi guerra, tsaʼ putsʼi majlel ti yambʌ tejclum, i jiñi hermanojob tsiʼ wen coltayob. Ti wiʼil, tsajñi ti Conmemoración. Boris miʼ ñaʼtan pejtelel jiñi coltaya tsaʼ bʌ aqʼuenti, i miʼ yʌl: «Jiñi i testigojob Jehová tsiʼ wen pʌsbeyoñob i cʼuxbiya yicʼot tsiʼ wen cʌntayoñob. Mic wen qʼuel ti ñuc pejtelel tsaʼ bʌ i meleyob tic tojlel».

¹¹ Ti lac pejtelel miʼ mejlel lac lajiben i pʼuntaya Jehová cheʼ mi laj coltan jiñi i cʼʌjñibal bʌ i chaʼañob, anquese mach Testigojobic (Luc. 6:​31, 36). La cujil chaʼan jiñi cʼuxbiya muʼ bʌ lac pʌsbeñob miʼ mejlel i ñijcʌbeñob i pusicʼal chaʼan miʼ mulan i ñumen cʌñob Jehová yicʼot miʼ melbeñob i yeʼtel (troñel) jaʼel (1 Ped. 2:12). I mi mach cheʼic miʼ yujtel bajcheʼ jiñi, joñonla wersa tijicñayʌch mi caj la cubin lac bʌ come muʼ bʌ i yʌqʼueñonla lac tijicñʌyel jiñʌch cheʼ mi laj coltan yañoʼ bʌ (Hech. 20:35).

JEHOVÁ MIʼ CɅNTAÑONLA

12. ¿Chuqui an i yʌlʌ Jehová chaʼan mi caj i mel tiʼ tojlel i tejclum? (Salmo 91:​1, 2, 14).

¹² (Pejcan Salmo 91:​1, 2, 14). Jehová an i yʌcʼʌ i tʼan chaʼan mi caj i cʌntan i tejclum chaʼan maʼañic miʼ ñajtʼesan i bʌ tiʼ tojlel. Maʼañic mi caj i yʌcʼ chaʼan Satanás miʼ jem jiñi i sujm bʌ chʼujutesaya (Juan 17:15). I miʼ mejlel lac ñop chaʼan baʼ ora miʼ tejchel jiñi ñuc bʌ wocol, Jehová mi caj i tsʼʌctesan i tʼan come mi caj i cʌntañonla yicʼot i coltañonla chaʼan mi lac chʌn ñop tiʼ tojlel (Apoc. 7:​9, 14).

13. ¿Bajcheʼ miʼ cʌntañonla Jehová ti jujuntiquil?

¹³ ¿I bajcheʼ miʼ cʌntañonla Jehová ti jujuntiquilonla? (Heb. 5:14). Junchajp, tsiʼ yʌqʼueyonla jiñi Biblia chaʼan miʼ coltañonla laj cʌn chuqui jiñi wem bʌ yicʼot mach bʌ weñic. Cheʼ bʌ mucʼʌch lac jacʼ chuqui miʼ yʌl jiñi Biblia miʼ coltañonla chaʼan chʌn lʌcʼʌl mi la cajñel tiʼ tojlel Jehová yicʼot chaʼan mi lac chʼʌm wen tac bʌ decisión muʼ bʌ i coltañonla chaʼan tijicñayonla yicʼot wen mi la cajñel (Sal. 91:4). Yambʌ muʼ bʌ i cʼʌn Jehová jiñʌch jiñi congregación (Is. 32:​1, 2). Cheʼ bʌ mi lac ñochtañob jiñi muʼ bʌ i cʼuxbiñob Jehová yicʼot miʼ jacʼbeñob i tʼan mi lac taj lac tijicñʌyel yicʼot lac pʼʌtʌlel chaʼan maʼañic mi lac mel jiñi mach tac bʌ weñic (Pr. 13:20).

14. a) ¿Chucoch Jehová an i tajol maʼañic miʼ waʼ jisan jiñi lac wocol? b) ¿Chuqui miʼ subeñonla Salmo 9:10? (Qʼuele jaʼel jiñi nota).

¹⁴ Ti wajali, Jehová an i tajol tsiʼ colta i wiñicob chaʼan maʼañic chuqui miʼ chaʼleñob, pero mach tiʼ pejtelel ora tsiʼ mele jiñi. Jiñi Biblia miʼ yʌl chaʼan ti lac pejtelel miʼ mejlel lac waʼ taj wocol (Ec. 9:​11, 12). Cheʼ jaʼel, cheʼ bajcheʼ cʼʌlʌl ti wajali, ili ora Jehová an i tajol maʼañic miʼ mʌctan chaʼan jiñi i wiñicob miʼ tajob i contrajintel o chaʼan muʼto i chʌmelob. Miʼ mel iliyi chaʼan miʼ pʌs chaʼan Satanás juntiquilʌch xlot (Job 2:​4-6; Mat. 23:34). Jehová mach tiʼ pejtelelic ora mi caj i waʼ jisan lac wocol, pero mucʼʌch i mejlel lac ñop chaʼan maʼañic baqui ora mi caj i cʌy jiñi muʼ bʌ i cʼuxbiñob (Sal. 9:10).d

JEHOVÁ MIʼ ÑUQʼUESAN LAC PUSICʼAL

15. ¿Bajcheʼ miʼ cʼʌn Jehová jiñi oración, jiñi i Tʼan yicʼot jiñi hermanojob chaʼan miʼ ñuqʼuesan lac pusicʼal? (2 Corintios 1:​3, 4).

¹⁵ (Pejcan 2 Corintios 1:​3, 4). Ti lac pejtelel an i tajol mi la cubin lac chʼijyemlel o mi lac wen chaʼlen pensar. Tajol wʌleʼli cheʼ mi la cubin lac bʌ bajcheʼ jiñi i lac bajñel mi la cubin lac bʌ. Anquese mi lac ñaʼtan chaʼan maʼañic majqui miʼ junyaj chʼʌmben i sujm bajcheʼ yubil mi la cubin, Jehová mucʼʌch i chʼʌmben i sujm. I miʼ «ñuqʼuesan lac pusicʼal tiʼ pejtelel lac wocol». ¿Bajcheʼ miʼ mel? Jiñʌch cheʼ mi lac melben oración, miʼ cʼʌn jiñi Biblia yicʼot la quermañujob. Cheʼ bʌ mi lac melben oración, Jehová miʼ yʌqʼueñonla «jiñi i ñʌchʼtʌlel [ . . . ] maʼañic bʌ miʼ mejlel i chʼʌmben i sujm mi juntiquilic lac piʼʌl» (Filip. 4:​6, 7). Cheʼ bʌ mi lac pejcʌben i Tʼan mi lac taj laj qʼuel chaʼan miʼ wen cʼuxbiñonla, mi laj cʌn jiñi ticʼojel tac muʼ bʌ i yʌqʼueñonla i tijicña mi la cubin come an lac pijtaya. I cheʼ bʌ mi la cajñel ti tempa bʌ la quicʼot jiñi hermanojob, mi la cubiben i cʼuxbiya i miʼ ñuqʼuesan lac pusicʼal yicʼot jiñi Biblia.

16. ¿Chuqui maʼ cʌn tiʼ tojlel Nathan yicʼot Priscilla?

¹⁶ Chaʼan mi laj qʼuel bajcheʼ Jehová miʼ cʼʌn jiñi Biblia chaʼan miʼ ñuqʼuesan lac pusicʼal i miʼ yʌqʼueñonla lac tijicñʌyel, mi caj laj qʼuel tsaʼ bʌ ujti tiʼ tojlel Nathan yicʼot Priscilla, chumuloʼ bʌ ti Estados Unidos. Añix chaʼpʼej uxpʼejl jab tsiʼ ñaʼtayob majlel ti yambʌ tejclum chaʼan miʼ ñumen chaʼleñob subtʼan. Nathan miʼ yʌl: «Tsaʼ c ñopo lojon chaʼan Jehová mi caj i yʌqʼueñon lojon i bendición». Pero cheʼ bʌ tsaʼ cʼotiyob yaʼ ti yambʌ congregación, tsaʼ cajiyob ti cʼamʼan i wocol tsiʼ yubiyob chaʼan miʼ tajob taqʼuin. Ti wiʼil, Nathan yicʼot Priscilla tsaʼ chaʼ sujtiyob majlel tiʼ lumal, pero bej wocolʌch tsaʼ caji i yubiñob chaʼan taqʼuin. Nathan miʼ yʌl: «Tsaʼ caji j cʼajtiben c bʌ chucoch Jehová maʼañic woliʼ yʌqʼueñon lojon i bendición bajcheʼ tsaʼ c lon ñaʼta lojon. Tsaʼto caji j cʼajtiben c bʌ mi an chuqui mach bʌ weñic tsaʼ lon c mele». Pero ti wiʼil, Nathan yicʼot Priscilla tsaʼ cʼoti i ñaʼtañob chaʼan Jehová maʼañic cʌybil i chaʼañob. Nathan miʼ yʌl: «Tsaʼ bʌ i wen coltayon lojon cheʼ bʌ woli lon c ñusan jiñi wocol tac jiñʌch cheʼ tsaʼ c pejca lojon jiñi Biblia. Cheʼ tsaʼ c mele lon jiñi lajal bajcheʼ juntiquil lon camigo woliʼ tijicñesan lon c pusicʼal yicʼot woliʼ yʌqʼueñon lojon ticʼojel tsaʼ lon cubi. Tsaʼ lon j cʌñʌ chaʼan mach yomic mic wen ñaʼtan lon jiñi wocol tac, jiñix tsaʼ caji c ñaʼtan lojon bajcheʼ an i coltayon lojon Jehová chaʼan mi lon c lʌtʼ. I jiñi an i coltayon lojon chaʼan ñumen chajpʌbilon lojon chaʼan jiñi wocol tac muʼ bʌ i tilel».

17. ¿Bajcheʼ tsaʼ ñuqʼuesʌbenti i pusicʼal juntiquil hermana i cʼabaʼ Helga? (Qʼuele jaʼel jiñi foto tac).

¹⁷ Cheʼ bajcheʼ tsaʼix laj qʼuele, jiñi la quermañujob miʼ mejlel i wen ñuqʼuesʌbeñonla lac pusicʼal jaʼel. Laʼ laj qʼuel bajcheʼ tsaʼ ujti tiʼ tojlel Helga, chumul bʌ ti Hungría. Cabʌl jab tsiʼ ñusa tsʌts tac bʌ wocol tsaʼ bʌ i wen aqʼue i yubin i chʼijyemlel i maʼañix i cʼʌjñibal tsiʼ yubi i bʌ. Pero wʌle, cheʼ miʼ cʼajtesan pejtelel jiñi tsaʼ bʌ i ñusa, miʼ taj i qʼuel chaʼan Jehová tsiʼ cʼʌñʌ jiñi congregación chaʼan miʼ ñuqʼuesʌben i pusicʼal. Helga miʼ yʌl: «Jajayajl maʼañix c pʼʌtʌlel mi cubin i maʼañix chuqui miʼ mejlel c mel mi cubin, Jehová tsiʼ coltayon. Yom mic chaʼlen eʼtel, mij cʌntan jiñi calobil cʼam bʌ i anto yan tac bʌ c wocol. Miʼ mejlel cʌl chaʼan ti jiñi 30 jab ñumen bʌ tilel, Jehová añʌch i tsʼʌctesa i tʼan chaʼan miʼ ñuqʼuesan c pusicʼal. Mi jumpʼejlic qʼuin cʌybil i chaʼañon. An i tajol miʼ cʼʌn jiñi hermanojob, miʼ subeñoñob utsʼatax tac bʌ tʼan muʼ bʌ i yʌqʼueñon cubin chaʼan miʼ cʼuxbiñoñob yicʼot chaʼan miʼ qʼueloñob ti ñuc. ¡Cheʼ bʌ ñumen i cʼʌjñibalto c chaʼan mi cubin, miʼ cʼotel jumpʼejl mensaje, jumpʼejl tarjeta o an chuqui utsʼatax bʌ mic subentel!».

18. ¿Bajcheʼ miʼ mejlel lac ñuqʼuesʌben i pusicʼal yambʌlob?

¹⁸ An lac chaʼan jiñi ñuc bʌ privilegio chaʼan mi lac lajin jiñi lac Dios i mi lac ñuqʼuesʌben i pusicʼal yañoʼ bʌ. Mi lac mel iliyi cheʼ bʌ mi lac wen ñʌchʼtañob, mi lac subeñob tʼan tac muʼ bʌ i ñuqʼuesʌbeñob i pusicʼal yicʼot mi laj qʼuel bajcheʼ tac yambʌ miʼ mejlel laj coltañob (Pr. 3:27). I mach cojach jiñi hermanojob mi lac ñuqʼuesʌbeñob i pusicʼal, yicʼotʌch jiñi maʼañic bʌ miʼ melbeñob i yeʼtel Jehová. Cheʼ bʌ miʼ ñusañob jumpʼejl wocol, cʼamob o an majqui miʼ chʌmel i chaʼañob, mi lac julaʼtañob, mi lac ñʌchʼtañob i mi laj cʼʌn jiñi Biblia chaʼan mi lac ñuqʼuesʌbeñob i pusicʼal. Cheʼ mi lac lajin «jiñi Dios muʼ bʌ i ñuqʼuesʌben i pusicʼal lac piʼʌlob», mach cojach mi laj coltan jiñi hermanojob chaʼan miʼ lʌtʼob jiñi wocol tac, mi laj coltan jaʼel jiñi yambʌ lac piʼʌlob chaʼan miʼ mulan i cʌñob Jehová (Mat. 5:16).

JEHOVÁ MAʼAÑIC MI CAJ I WIS CɅYONLA

19. ¿Chuqui tac miʼ mel Jehová chaʼan miʼ coltañonla, i bajcheʼ miʼ mejlel lac lajin?

¹⁹ Jehová mucʼʌch i wen ñaʼtan pejtelel muʼ bʌ i cʼuxbiñob i maʼañic miʼ wis cʌyob cheʼ bʌ miʼ ñusañob wocol tac. Miʼ wen cʼuxbiñonla i miʼ cʌntañonla cheʼ bajcheʼ miʼ mel juntiquil tatʌl tiʼ tojlel i yalobil. Miʼ pʌsbeñonla chuqui miʼ mejlel lac mel, miʼ yʌqʼueñonla chuqui i cʼʌjñibal lac chaʼan, miʼ cʌntañonla yicʼot miʼ ñuqʼuesan lac pusicʼal. I joñonla miʼ mejlel lac lajin cheʼ bʌ mi laj coltan yicʼot mi lac ñuqʼuesʌben i pusicʼal jiñi muʼ bʌ i ñusañob wocol tac. Mach yʌlʌyic chuqui tac mi lac ñusan, miʼ mejlel lac ñop chaʼan Jehová mi caj i chʌn ajñel yicʼotonla come albil i chaʼan: «Mach a chaʼlen bʌqʼuen, come añon quicʼotet» (Is. 41:10). ¡Mi la cubin lac tijicñʌyel cheʼ la cujil chaʼan Jehová maʼañic baʼ ora miʼ cʌyonla!