Chajpan a pusicʼal

Cheʼ bʌ mi lac chaʼlen estudio, la com chaʼan jiñi muʼ bʌ laj cʌn tiʼ tojlel Jehová miʼ cʼotel ti lac pusicʼal yicʼot miʼ coltañonla lac tojʼesan chuqui tac mi lac ñaʼtan, bajcheʼ yubil mi la cubin yicʼot chuqui tac mi lac mulan. Jin chaʼan yomʌch mi lac lajin Esdras, «tsiʼ wen chajpa i pusicʼal chaʼan miʼ chʼʌmben isujm i mandar lac Yum» (Esd. 7:10). ¿Bajcheʼ miʼ mejlel a chajpan a pusicʼal jaʼel?

Mele oración. Cheʼ bʌ maʼ cajel ti estudio, ñaxan cʼajtiben Jehová chaʼan miʼ coltañet a chʼʌmben i sujm yicʼot maʼ jacʼ jiñi muʼ bʌ a cʌn (Sal. 119:​18, 34).

Pʌsʌ a pecʼlel. Dios maʼañic miʼ yʌqʼuen i cʌn i sujmlel jiñi chanchan jax bʌ miʼ melob i bʌ yicʼot luʼ yujilobix bʌ miʼ ñaʼtan (Luc. 10:21). Mach a mel investigación chaʼan jach maʼ pʌsben yambʌlob chaʼan cabʌl chuqui a wujil. I mi tsaʼ qʼuele chaʼan an chuqui yom maʼ tojʼesan, pʌsʌ a pecʼlel i tojʼesan jiñi yom bʌ maʼ tojʼesan.

Ñʌchʼtan cʼay tac chaʼan bʌ organización. Jiñi música miʼ ñijcan lac pusicʼal i miʼ chajpañonla chaʼan mi lac chʼujutesan Dios. Miʼ mejlel lac ñʌchʼtan jumpʼejl cʼay cheʼ bʌ muʼto laj cajel ti estudio. Jiñi mi caj i coltañonla chaʼan mi lac xucʼchocon lac ñaʼtʌbal ti Jehová yicʼot chaʼan jiñi muʼ bʌ lac pejcan miʼ coltañonla.