¿Muʼ ba i mejlel i coltañonla ili ora jiñi tsaʼ tac bʌ laj cʌñʌ cheʼ tsaʼ lac teche estudio?

1. ¿Bajcheʼ yubil tsaʼ wubi a bʌ cheʼ bʌ tsaʼ cʌñʌ jiñi i sujmlel?

JIÑI tsaʼ tac bʌ laj cʌñʌ cheʼ bʌ tsaʼ lac teche lac chʼʌm estudio añʌch i coltayonla ti laj cuxtʌlel. Cheʼ bʌ tsaʼ laj cʌñʌ chaʼan i cʼabaʼ Dios jiñʌch Jehová, tsiʼ coltayonla chaʼan mi lac tech lac lʌcʼtesan lac bʌ tiʼ tojlel (Is. 42:8). I tijicña tsaʼ la cubi lac bʌ cheʼ bʌ tsaʼ lac ñaʼta chaʼan jiñi chʌmeñoʼ bʌ maʼañic woli (choncol) i ñusañob wocol (Ec. 9:10). I cheʼ bʌ tsaʼ laj cʌñʌ chaʼan Dios mi caj i sujtesan ti jumpʼejl paraíso ili pañimil, tsaʼ laj cʌyʌ lac pensarin chuqui mi caj i yujtel ti talto bʌ qʼuin come la cujil chaʼan mi lac mejlel ti chumtʌl tiʼ pejtelel ora, mach cojach 70 o 80 jab (Sal. 37:29; 90:10).

2. ¿Chucoch Pedro tsiʼ cʼajtesʌbeyob jiñi xñoptʼañob ti wajali jiñi tsaʼ tac bʌ i ñaxan cʌñʌyob? (2 Pedro 1:​12, 13).

² Anquese añix ora añonla tiʼ sujmlel mach yomic miʼ ñajʌyel lac chaʼan chaʼan jiñi tsaʼ tac bʌ lac ñaxan cʌñʌ wen ñucʌch i cʼʌjñibal. Jiñi apóstol Pedro tiʼ tsʼijbubeyob majlel carta jiñi xñoptʼañob xucʼulʌch bʌ añob ti jiñi i sujmlel (pejcan 2 Pedro 1:​12, 13). Tsiʼ mele iliyi chaʼan miʼ coltañob i lʌtʼ jiñi wocol am bʌ yaʼ ti congregación come ti jimbʌ ora an lac piʼʌlob woliyoʼ bʌ (yʌqueloʼ bʌ) ti lot chaʼan miʼ ñajtʼesañob jiñi hermanojob tiʼ sujmlel (2 Ped. 2:​1-3). Chaʼan miʼ coltañob i bej pʌsob i xucʼtʌlel ti Jehová, tsiʼ cʼajtesʌbeyob jiñi tsaʼ tac bʌ i ñaxan cʌñʌyob.

3. ¿Chucoch yomʌch mi lac bej ñaʼtan bajcheʼ miʼ mejlel i coltañonla jiñi tsaʼ tac bʌ laj cʌñʌ cheʼ woliyontola ti estudio? Alʌ jumpʼejl ejemplo.

³ Anquese añix ora an laj cʌñʌ i sujmlel, añixto chuqui mi lac tsijib cʌn ti jiñi tsaʼ bʌ laj cʌñʌ cheʼ bʌ woliyontola ti estudio. Laʼcu lac ñaʼtan ili yicʼot juntiquil añix bʌ ora cajel i mel bʌlñʌcʼʌl yicʼot juntiquil woli jaxto bʌ i cʌn. Jiñi woli jaxto bʌ i cʌn tajol maxto añic miʼ mejlel i cʼʌn pejtelel muʼ bʌ i yotsʌbentel jumpʼejl bʌlñʌcʼʌl. Pero jiñi añix bʌ ora cajel i mel, yujilix chuqui tac miʼ yotsʌbentel jiñi bʌlñʌcʼʌl yicʼot bajcheʼ miʼ mejlel. Cheʼʌch miʼ yujtel tiʼ tojlelob jaʼel jiñi woliyobto bʌ ti estudio, tajol maxto añic miʼ wen ñaʼtañob bajcheʼ miʼ mejlel i cʼʌñob jiñi woli bʌ i cʌñob majlel. Pero jiñi añix bʌ ora cajel i melbeñob i yeʼtel Jehová muqʼuix i ñaʼtañob bajcheʼ tac yambʌ miʼ mejlel i cʼʌñob. ¿Chucoch? Come cʼʌlʌ cheʼ bʌ tsiʼ chʼʌmʌyob jaʼ cabʌlix chuqui ñusʌbilob i chaʼan i an i tajayob yan tac bʌ privilegio. Cheʼ mi lac ñaʼtan jiñi tsaʼ tac bʌ laj cʌñʌ cheʼ bʌ tsaʼ lac teche estudio yicʼot woli bʌ lac ñusan ili ora, tajol muqʼuix lac ñaʼtan bajcheʼ tac yambʌ miʼ mejlel laj cʼʌn. Ti ili estudio mi caj laj qʼuel uxpʼejl cʌntesa tsaʼ bʌ laj cʌñʌ cheʼ bʌ woliyontola ti estudio i bajcheʼ miʼ mejlel i coltañonla anquese añix ora cajel lac melben i yeʼtel Jehová.

JEHOVÁ JIÑɅCH TSAʼ BɅ I MELEYONLA

4. ¿Bajcheʼ an i coltayonla cheʼ tsaʼ laj cʌñʌ chaʼan Jehová jiñʌch tsaʼ bʌ i Meleyonla?

⁴ La cujil chaʼan tsaʼ bʌ i mele (pʌtʌ) ili pañimil yicʼot pejtelel chuqui an, juntiquilʌch wen am bʌ i ñaʼtʌbal yicʼot wen pʼʌtʌl bʌ. Jiñi Biblia miʼ yʌl: «Jiñi tsaʼ bʌ i mele pejtelel chuqui tac an jiñʌch Dios» (Heb. 3:4). Cheʼ bʌ tsaʼ laj cʌñʌ iliyi mach cojach tsaʼ lac ñaʼta chaʼan añʌch majqui tsiʼ meleyonla, tsiʼ pʌsbeyonla jaʼel chaʼan Jehová wen i cʌñʌyonla, miʼ cʼuxbiñonla i yujil chuqui jiñi ñumen wem bʌ chaʼañonla. Iliyi tsiʼ coltayonla lac chʼʌmben i sujm chucoch wʌʼañonla ila ti pañimil yicʼot chuqui miʼ mejlel i yʌqʼueñonla lac tijicñʌyel.

5. ¿Bajcheʼ miʼ coltañonla cheʼ la cujil chaʼan Jehová jiñʌch tsaʼ bʌ i Meleyonla? (Isaías 45:​9-12).

⁵ Cheʼ la cujil chaʼan Jehová jiñʌch tsaʼ bʌ i Meleyonla miʼ coltañonla lac pʌs lac pecʼlel. Laʼcu lac ñaʼtan tsaʼ bʌ ujti tiʼ tojlel Job. Cheʼ bʌ Job woliʼ ñusan wocol, jin jach tsiʼ bajñel ñaʼta jiñi wocol woli bʌ i ñusan i tsaʼto i yʌlʌ chaʼan Jehová mach tojic chuqui woliʼ mel. Pero Jehová tsiʼ cʼajtesʌbe chaʼan jiñʌch tsaʼ bʌ i mele pejtelel chuqui an (Job 38:​1-4). Jiñi tsiʼ colta i qʼuel Job chaʼan tojʌch pejtelel chuqui miʼ mel Jehová. I jiñi xʼaltʼan Isaías tsiʼ yʌlʌ chaʼan mach yomic mi lac ñaʼtan chaʼan ñumen la cujil bajcheʼ Jehová (pejcan Isaías 45:​9-12).

6. ¿Chucoch yomʌch mi la cʌqʼuen i yorajlel chaʼan mi lac ñaʼtan chaʼan Jehová jiñʌch ñumen am bʌ i ñaʼtʌbal yicʼot am bʌ i pʼʌtʌlel? (Qʼuele jaʼel jiñi foto tac).

⁶ Juntiquil xñoptʼan añix bʌ ora cajel i melben i yeʼtel Jehová tajol miʼ tech i chʼʌm ti ñuc chuqui miʼ bajñel ñaʼtan i maʼañix miʼ cʼajtiben i coltaya Jehová, mi muqʼuicto i sʌclan i coltʌntel yaʼ ti Biblia (Job 37:​23, 24). Chaʼan maʼañic miʼ yujtel bajcheʼ iliyi, yomʌch miʼ yʌqʼuen i yorajlel chaʼan miʼ wen ñaʼtan chaʼan jiñi tsaʼ bʌ i Meleyonla wen an i ñaʼtʌbal yicʼot wen an i pʼʌtʌlel (Is. 40:22; 55:​8, 9). Iliyi mi caj i coltan chaʼan miʼ pʌs i pecʼlel i miʼ cʼajtesan chaʼan jiñi i ñaʼtʌbal Jehová ñumen ñucto bajcheʼ i chaʼan.

7. ¿Chuqui tsiʼ colta Rahela chaʼan miʼ jacʼ junchajp tsaʼ jaxto bʌ qʼuextʌyi ti organización?

⁷ Juntiquil hermana chʼoyol bʌ ti Eslovenia i cʼabaʼ Rahela tsiʼ wen colta cheʼ bʌ tsiʼ ñaʼta chaʼan Jehová jiñʌch tsaʼ bʌ i Meleyonla chaʼan miʼ jacʼ junchajp tsaʼ jaxto bʌ qʼuextʌyi ti organización. Rahela miʼ yʌl: «An i tajol wocol mi cubin chaʼan mic jacʼ muʼ tac bʌ i qʼuextʌyel ti organización. Junchajp wocol bʌ tsaʼ cubi jiñʌch cheʼ tsaʼ ajli chaʼan jiñi hermanojob muqʼuix i mejlel i yʌcʼob ti colel i tsuctiʼ. Anquese tsaʼix j qʼuele jiñi Informe 8 chaʼan jiñi Junmojt muʼ bʌ i pʌsob bij tsaʼ bʌ loqʼui ti 2023, lecojax tsaʼ j qʼuele cheʼ bʌ juntiquil hermano am bʌ i tsuctiʼ tsiʼ ñusa discurso. Jin chaʼan, tsaʼ j cʼajtibe Jehová chaʼan wen jach mic chʼʌm jiñi tsaʼ bʌ qʼuextʌyi». Rahela tsaʼ cʼoti i chʼʌmben i sujm chaʼan Jehová yujil bajcheʼ miʼ tojʼesan majlel jiñi i yorganización come jiñʌch tsaʼ bʌ i Meleyonla. Mi jatet wocol maʼ wubin chaʼan maʼ jacʼ chuqui tac miʼ qʼuextʌyel, aqʼuen i yorajlel a ñaʼtan chaʼan jiñi tsaʼ bʌ i Meleyonla wen an i ñaʼtʌbal yicʼot wen pʼʌtʌl (Rom. 11:​33-36).

CHUCOCH DIOS MIʼ YɅCʼ TI UJTEL WOCOL

8. ¿Bajcheʼ an i coltayonla cheʼ la cujil chucoch Dios maxto añic i jisa jiñi wocol?

⁸ Cabʌl lac piʼʌlob maʼañic miʼ ñaʼtañob chucoch Dios maxto i jisa jiñi wocol. Tiʼ caj jiñi, muqʼuix i michʼañob yicʼot, i an muʼ bʌ cʼotel i ñaʼtañob chaʼan machʌch añic Dios (Pr. 19:3). Pero joñonla an laj cʌñʌ chaʼan mi lac ñusan wocol tiʼ caj xmulilonla i mach chaʼañic Jehová miʼ yʌqʼueñonla jiñi wocol. Cheʼ jaʼel, an laj cʌñʌ chaʼan Jehová maxto i jisa jiñi wocol come yom chaʼan cabʌl lac piʼʌlob miʼ cʼotel i cʌñob yicʼot miʼ cʌñob chuqui mi caj i mel ti talto bʌ qʼuin (2 Ped. 3:​9, 15). Cheʼ bʌ tsaʼ laj cʌñʌ iliyi an i ñuqʼuesa lac pusicʼal yicʼot an i coltayonla lac ñumen lʌcʼtesan lac bʌ tiʼ tojlel.

9. ¿Baqui ora yom mi laj cʼajtesan chucoch Jehová maxto i jisa jiñi wocol?

⁹ La cujil chaʼan yomto mi lac chʌn pijtan jinto baʼ ora Jehová miʼ jisan jiñi wocol. Pero cheʼ bʌ an majqui miʼ chʌmel lac chaʼan o mi lac ñusan yan tac bʌ wocol, tajol mi laj cʼajtiben lac bʌ chucoch Jehová maxto añic i jisa (Hab. 1:​2, 3). Cheʼ bʌ mi la cujtel bajcheʼ jiñi, yom mi la cʌqʼuen i yorajlel chaʼan mi lac ñaʼtan chucoch mi lac ñusan wocol (Sal. 34:19).a Cheʼ jaʼel, yom mi laj cʼajtesan chaʼan Jehová mucʼʌch caj i jisan.

10. ¿Chuqui an i colta Anne chaʼan miʼ ñusan majlel i chʼijyemlel?

¹⁰ Cheʼ la cujil chucoch Jehová maxto i jisa jiñi wocol miʼ coltañonla lac lʌtʼ jiñi wocol tac muʼ bʌ lac ñusan ili ora. Jiñʌch tsaʼ bʌ ujti tiʼ tojlel Anne, chʼoyol bʌ ti jiñi isla Mayotte. Ann miʼ yʌl: «Cheʼ bʌ tsaʼ chʌmi c mamá tsaʼ c wen ubi c chʼijyemlel. Pero mic chʌn cʼajtesan chaʼan mach jiñic Jehová muʼ bʌ i yʌcʼ jiñi wocol, chaʼan yomʌch i jisan yicʼot chaʼan mi caj i chaʼ tejchesan jiñi chʌmeñoʼ bʌ. Cheʼ bʌ mij cʼajtesan iliyi, mic taj c pʼʌtʌlel i mic chaʼ taj c tijicñʌyel».

11. ¿Bajcheʼ miʼ coltañonla cheʼ la cujil chucoch Jehová maxto i jisa jiñi wocol?

¹¹ Cheʼ la cujil chucoch Jehová maxto i jisa jiñi wocol miʼ coltañonla chaʼan mi lac bej chaʼlen subtʼan. Jiñi apóstol Pedro tiʼ tsictesa chaʼan Jehová maxto i chʼʌmʌ tilel i jilibal come yom chaʼan jiñi lac piʼʌlob miʼ cʼotel i cʌñob i miʼ tajob i cuxtʌlel. Pero tsiʼ yʌlʌ jaʼel chuqui yom bʌ mi lac mel: «¡Ñaʼtanla bajcheʼ yilal bʌ lac piʼʌl yometla! Yom mi laʼ pʌs chʼujul tac bʌ laʼ melbal yicʼot yom mi laʼ pʌs laʼ xucʼtʌlel ti Dios» (2 Ped. 3:11). Junchajp bajcheʼ mi lac pʌs lac xucʼtʌlel jiñʌch cheʼ mi lac bej chaʼlen subtʼan. Cheʼ bajcheʼ Jehová, joñonla jaʼel mi laj cʼuxbin lac piʼʌlob i la com chaʼan miʼ tajob jiñi cuxtʌlel mach bʌ añic miʼ jilel. Jehová wolito i yʌqʼuen tiempo jiñi lac piʼʌlob ti lac territorio chaʼan miʼ cʼotel i chʼujutesañob, i joñonla miʼ mejlel lac chaʼlen coltaya chaʼan miʼ cʌñob (1 Cor. 3:9).

CHUMULOÑIXLA TI COJIX BɅ QʼUIN

12. ¿Bajcheʼ miʼ coltañonla cheʼ mi laj qʼuel bajcheʼ woliʼ tsʼʌctiyel muʼ bʌ i yʌl jiñi Biblia chaʼan jiñi cojix bʌ qʼuin?

¹² Jiñi Biblia tsiʼ wʌn alʌ bajcheʼ yilal miʼ cajelob jiñi lac piʼʌlob ti jiñi cojix bʌ qʼuin (2 Tim. 3:​1-5). Ili profecía wolʌch i tsʼʌctiyel come mi laj qʼuel bajcheʼ yilalob jiñi lac piʼʌlob. I cheʼ mi laj qʼuel chaʼan wolʌch i ñumen asiyelob miʼ coltañonla lac ñumen ñop chaʼan i sujmʌch muʼ bʌ i yʌl jiñi Biblia (2 Tim. 3:​13-15).

13. ¿Chuqui yom bʌ mi laj cʼajtiben lac bʌ? (Lucas 12:​15-21).

¹³ Cheʼ la cujil chaʼan chumuloñixla ti cojix bʌ qʼuin miʼ coltañonla chaʼan mi laj cʼʌn ti wen jiñi lac tiempo i mi laj qʼuel chuqui jiñi ñumen ñuc bʌ i cʼʌjñibal. Jesús tsiʼ cʼʌñʌ jumpʼejl lajiya chaʼan miʼ pʌsbeñonla chucoch ñuc i cʼʌjñibal mi laj cʼʌn ti wen jiñi lac tiempo (pejcan Lucas 12:​15-21). ¿Chucoch tsaʼ subenti ti tonto jiñi wiñic cabʌl bʌ i chubʌʼan? Come woli jach i bajñel tempan i chubʌʼan pero pʼumpʼun tiʼ wut Dios. I wentʌlel wen bajcheʼ tsiʼ cʼʌñʌ tilel jiñi i tiempo. ¿Chucoch? Come Dios tiʼ sube: «Mi caj a chʌmel ili acʼʌlel». ¿Chuqui miʼ pʌsbeñonla iliyi? La cujil chaʼan mach jalix yom miʼ tilel i jilibal, jin chaʼan yom mi laj cʼajtiben lac bʌ: «¿Tsiquil ba ti chuqui tac mic mel chaʼan jiñi ñumen ñuc bʌ i cʼʌjñibal chaʼañon jiñʌch cheʼ mic melben i yeʼtel Jehová? ¿Muʼ ba j coltan jiñi calobilob chaʼan miʼ yʌqʼueñob i bʌ meta tac? ¿Bajcheʼ mij cʼʌn jiñi c tiempo, c pʼʌtʌlel yicʼot chuqui tac am bʌ c chaʼan? ¿Chaʼan ba mic sʌclan chuqui bajñel com o chaʼan mic ñumen melben i yeʼtel Jehová?».

14. ¿Bajcheʼ miʼ coltañonla cheʼ mi laj cʼajtesan chaʼan chumuloñixla ti cojix bʌ qʼuin? Alʌ jumpʼejl ejemplo.

¹⁴ Cheʼ bʌ mi lac ñaʼtan chaʼan chumuloñixla ti jiñi cojix bʌ qʼuin miʼ coltañonla chaʼan mi lac chʼʌm wen tac bʌ decisión. Jiñʌch tsaʼ bʌ i mele juntiquil hermana i cʼabaʼ Miki. Miʼ yʌl: «Cheʼ bʌ tsaʼ cujtesa jiñi prepa tsaʼ c mulaj majlel ti universidad i mic chʼʌm jumpʼejl carrera baqui miʼ chaʼlentel ti estudiar añimal tac. Pero cheʼ jaʼel com ajñel bajcheʼ precursora regular i mic majlel ti coltaya ti yambʌ congregación. Pero an hermanojob tsaʼ bʌ i subeyoñob chaʼan mic wen ñaʼtan mi mucʼʌch caj mejlel c mel tiʼ chaʼpʼejlel. Tsiʼ cʼajtesʌbeyoñob chaʼan mach jalix yom chaʼan miʼ tilel jiñi i jilibal i chaʼan yaʼ ti tsijiʼ bʌ pañimil mi caj mejlel c chaʼlen ti estudiar pejtelel jiñi añimal tac. Jin chaʼan, maʼañix tsaʼ majliyon ti universidad i tsaʼ jach c chʼʌmʌ jumpʼejl curso chaʼan mij cʌn jumpʼejl eʼtel (troñel) i cheʼ bajcheʼ jiñi mij cajñel bajcheʼ precursora i ti wiʼil tsaʼ majliyon ti coltaya ti Ecuador». Ili ora, Miki yicʼot i ñoxiʼal añob bajcheʼ superintendente chaʼan circuito yaʼ ti Ecuador.

15. ¿Chuqui miʼ pʌsbeñonla tsaʼ bʌ ujti tiʼ tojlel Santiago? (Qʼuele jaʼel jiñi foto tac).

¹⁵ Mach yomic mi la cubin lac chʼijyemlel mi jiñi lac piʼʌlob maʼañic miʼ ñʌchʼtañob cheʼ bʌ mi lac subeñob jiñi wen tʼan. Laʼ laj cʼajtesan chaʼan ti jumpʼejl bʌ qʼuin mucʼʌch i mejlel i jacʼob. Jiñʌch tsaʼ bʌ ujti tiʼ tojlel Santiago, jiñi i yijtsʼin Jesús. Santiago lajal tsaʼ coli yicʼot Jesús i tsiʼ qʼuele bajcheʼ tsaʼ tsʼʌctiyi jiñi profecía tac tiʼ tojlel Jesús muʼ bʌ i pʌs chaʼan jiñʌch jiñi Mesías. Cheʼ jaʼel, tsiʼ qʼuele bajcheʼ tsiʼ chaʼle cʌntesa. Anquese tsiʼ qʼuele pejtelel iliyi, maʼañic tsaʼ sujti ti xcʌntʼan jinto cheʼ bʌ tsaʼ chaʼ chʼojyi Jesús. I tsaʼʌch sujti ti juntiquil chʼejl bʌ xcʌntʼan (Juan 7:5; Gál. 2:9).b Jin chaʼan, mi an lac familia maxto bʌ añic miʼ jacʼ jiñi wen tʼan muʼ bʌ lac sub ili ora, mach yomic mi lac ñaʼtan chaʼan maʼañic baʼ ora mi caj i jacʼob. Cheʼ jaʼel, mach laj cʌy lac julaʼtañob jiñi lac piʼʌlob maxto bʌ añic miʼ jacʼob jiñi wen tʼan. Laʼ laj cʼajtesan chaʼan chumuloñixla ti jiñi cojix bʌ qʼuin, jin chaʼan yomʌch mi lac chaʼlen wersa subtʼan. Jiñi muʼ bʌ lac subeñob ili ora, tajol jiñʌch muʼ bʌ caj i coltañob cheʼ bʌ miʼ tejchel jiñi ñuc bʌ wocol chaʼan miʼ mulan i cʌñob Jehová.c

LAʼ LAJ QʼUEL TI ÑUC PEJTELEL MUʼ BɅ I SUBEÑONLA JEHOVÁ

16. ¿Bajcheʼ an i coltayet jiñi muʼ bʌ i chajpʌntel chaʼan jiñi maxto bʌ Testigojobic? (Qʼuele jaʼel jiñi recuadro «Cʼʌñʌ chaʼan maʼ coltan yambʌlob»).

¹⁶ An publicación tac o yan tac bʌ chajpʌbil bʌ chaʼan jiñi mach bʌ wen yujilobic chaʼan bʌ jiñi Biblia. Laʼcu lac ñaʼtan jiñi discurso público, jiñi video tac, jiñi tema tac muʼ bʌ i loqʼuel ti jw.org yicʼot jiñi revista tac muʼ bʌ laj cʼʌn ti subtʼan, iliyi melbil chaʼan jiñi mach bʌ Testigojobic. Pero joñonla jaʼel miʼ mejlel lac tajben i wenlel come miʼ coltañonla lac ñumen cʼuxbin Jehová, mi lac ñumen ñop chaʼan i sujmʌch muʼ bʌ i yʌl jiñi Biblia yicʼot miʼ coltañonla chaʼan ñumen wen bajcheʼ mi laj cʌntesañob jiñi lac piʼʌlob (Sal. 19:7).

17. ¿Bajcheʼ miʼ mejlel i coltañonla jiñi tsaʼ bʌ laj cʌñʌ cheʼ bʌ woliyontola ti estudio?

¹⁷ Jiñi añix bʌ ora cajel lac melben i yeʼtel Jehová, tijicña mi la cubin cheʼ bʌ an chuqui miʼ tsijib tsictesʌntel. Pero mi laj qʼuel ti ñuc jaʼel jiñi tsaʼ tac bʌ laj cʌñʌ cheʼ bʌ tsaʼ lac teche estudio come cabʌlto chuqui miʼ mejlel laj cʌn. Mi wocol mi la cubin chaʼan mi lac jacʼ chuqui miʼ qʼuextʌyel, yomʌch mi lac pʌs lac pecʼlel i mi laj cʼajtesan chaʼan jiñi woli bʌ i tojʼesan majlel jiñi organización jiñʌch Jehová, wen am bʌ i ñaʼtʌbal yicʼot wen am bʌ i pʼʌtʌlel. Mi joñonla o juntiquil ti lac familia miʼ ñusan wocol, yomʌch mi lac chʌn pʌs lac pijt i mi lac wen ñaʼtan chucoch Jehová maxto i jisa jiñi wocol. I cheʼ mi laj cʼajtesan chaʼan chumuloñixla ti cojix bʌ qʼuin yicʼot chaʼan lʌcʼʌlix jiñi i jilibal, mi caj i coltañonla chaʼan mi laj cʼʌn ti wen jiñi lac tiempo yicʼot chuqui tac an lac chaʼan. Laʼ lac bej locʼsʌben i wenlel pejtelel chuqui miʼ subeñonla Jehová. Cheʼ bajcheʼ jiñi, mi caj lac chʼʌm wen tac bʌ decisión yicʼot chʌn xucʼul mi caj la cajñel tiʼ tojlel.