¿Chuqui mi caj i coltañonla chaʼan mi lac chʌn ubin lac tijicñʌyel?

1. ¿Chuqui yom i yʌl cheʼ tijicñayonla, i chuqui mach bʌ yomic i yʌl?

¿TIJICÑAYET ba maʼ wubin a bʌ? Jiñi muʼ bʌ i yubin i tijicñʌyel miʼ yubin i bʌ bajcheʼ jiñi come miʼ wen qʼuel ti ñuc jiñi bendición tac am bʌ i yʌqʼue Jehová i maʼañic miʼ michʼan o miʼ yubin i chʼijyemlel tiʼ caj chuqui tac mach bʌ añic i chaʼan. Anquese tijicñayʌch mi la cubin lac bʌ chaʼan woli bʌ (choncol bʌ) lac mel mach yomic i yʌl chaʼan maʼañix mi caj lac chaʼlen wersa lac ñumen melben i yeʼtel Jehová (Rom. 12:1; 1 Tim. 3:1). Pero cheʼ jaʼel, maʼañic mi lac sʌt lac tijicñʌyel mi maʼañic woli lac taj jumpʼejl meta o maʼañic woli la cʌqʼuentel jumpʼejl privilegio wen la com bʌ.

2. ¿Chuqui miʼ mejlel ti ujtel mi mach tijicñayoñicla yicʼot chuqui tac an lac chaʼan?

² Mi mach tijicñayoñicla yicʼot jiñi an tac bʌ lac chaʼan miʼ mejlel i yʌqʼueñonla lac mel mach tac bʌ weñic. Jiñi mach bʌ tijicñayic tajol miʼ cʌlʌx chaʼlen eʼtel (troñel) chaʼan miʼ mʌn chuqui tac yom anquese mach i cʼʌjñibalic i chaʼan. Chʼijyemtic jax ti alol, pero an hermanojob am bʌ i xujchʼiyob taqʼuin o yan tac bʌ. Tajol tsiʼ ñaʼtayob: «Mi caj c chʼʌm iliyi. I cʼʌjñibalʌch c chaʼan» o «Mi caj c chʼʌm ili taqʼuin, muʼto c chaʼ sutqʼuin». Pero jiñi xujchʼ mulilʌch, i Jehová maʼañic miʼ mulan come miʼ bibʼesʌben i cʼabaʼ (Pr. 30:9). An yambʌ tsaʼ bʌ i cʌyʌ i melbeñob i yeʼtel Jehová come tsiʼ yubiyob i chʼijyemlel cheʼ maʼañic tsiʼ tajayob jumpʼejl privilegio (Gál. 6:9). ¿Chucoch juntiquil muʼ bʌ i melben i yeʼtel Jehová miʼ cʼotel i mel cheʼ tac bʌ bajcheʼ ili? Tajol tsaʼ caji i cʼunteʼ sʌt majlel i tijicñʌyel tiʼ melol i yeʼtel Jehová i mach chʌn tijicñayix tsiʼ yubi i bʌ yicʼot chuqui tac an i chaʼan.

3. ¿Chuqui miʼ pʌsbeñonla Filipenses 4:​11, 12?

³ Ti lac pejtelel miʼ mejlel lac chʌn ubin lac tijicñʌyel anquese an i tajol wocolʌch mi la cubin. Jiñi apóstol Pablo tsiʼ yʌlʌ: «Mach yʌlʌyic bajcheʼ yilal woli c ñusan tsaʼ j cʌñʌ bajcheʼ mi cajñel tic tijicñʌyel» (pejcan Filipenses 4:​11, 12). Jiñi apóstol Pablo an ti cárcel cheʼ bʌ tiʼ tsʼijbu ili tʼan tac, pero maʼañic sʌtbil i chaʼan i tijicñʌyel. Jiñi tsaʼ bʌ i yʌlʌ yicʼot tsaʼ tac bʌ i ñusa, miʼ pʌsbeñonla chaʼan mucʼʌch i mejlel lac chʌn ubin lac tijicñʌyel mach yʌlʌyic chuqui mi lac ñusan. ¿Bajcheʼ miʼ mejlel lac mel? Ti ili estudio mi caj laj qʼuel uxchajp muʼ bʌ caj i coltañonla.

LAʼ LA CɅQʼUEN WOCOLIX I YɅLɅ JEHOVÁ YICʼOT YAÑOʼ BɅ

4. ¿Bajcheʼ miʼ coltañonla cheʼ mi la cʌqʼuen wocolix i yʌlʌ Jehová chaʼan pejtelel chuqui an i yʌqʼueñonla? (1 Tesalonicenses 5:18).

⁴ Cheʼ mi la cʌqʼuen wocolix i yʌlʌ Jehová miʼ coltañonla chaʼan mi lac ñumen ubin lac tijicñʌyel (pejcan 1 Tesalonicenses 5:18). Jumpʼejl ejemplo, mi mucʼʌch la cʌqʼuen wocolix i yʌlʌ chaʼan chuqui tac an lac chaʼan maʼañic mi caj laj cʌlʌx ñaʼtan jiñi maʼañic bʌ lac chaʼan. I mi mucʼʌch laj qʼuel ti ñuc jiñi asignación am bʌ lac chaʼan ili ora, mi caj lac chaʼlen wersa lac mel yicʼot lac tijicñʌyel i mach jiñic mi caj lac ñaʼtan jiñi privilegio tac maʼañic bʌ lac chaʼan. Jin chaʼan, jiñi Biblia miʼ yʌl chaʼan yom mi la cʌqʼuen wocolix i yʌlʌ Jehová, mi cheʼʌch mi lac mel mi caj lac taj «jiñi i ñʌchʼtʌlel Dios, maʼañic bʌ miʼ mejlel i chʼʌmben i sujm mi juntiquilic lac piʼʌl» (Filip. 4:​6, 7).

5. ¿Chucoch jiñi israelitajob i wentʌlel tsiʼ yʌqʼueyob wocolix i yʌlʌ Jehová? (Qʼuele jaʼel jiñi dibujo).

⁵ Laʼcu lac ñaʼtan tsaʼ bʌ ujti tiʼ tojlel jiñi israelitajob, mach junsujtelic jach tsiʼ yʌlʌyob chaʼan mach tijicñayobic chaʼan jiñi woli bʌ (yʌquel bʌ) i yʌqʼuentelob i cʼux come jin jach woliʼ cʼajtesañob tsaʼ bʌ i cʼuxuyob yaʼ ti Egipto (Nm. 11:​4-6). Wocolʌch woliʼ ñusañob yaʼ ti desierto, pero cheʼ tsaʼic i qʼueleyob ti ñuc pejtelel tsaʼ bʌ i mele Jehová tiʼ tojlelob tijicña tsaʼ ajñiyob. I wentʌlel tsiʼ cʼajtesayob bajcheʼ tsaʼ wen ticʼlʌntiyob yaʼ ti Egipto, i bajcheʼ Jehová tsiʼ chocbeyob cʼotel wocol jiñi egipciojob chaʼan miʼ yʌjqʼuelob ti loqʼuel. I cheʼ bʌ tsaʼ loqʼuiyob tsiʼ chʼʌmʌyob majlel cabʌl plata, oro yicʼot pisil (Éx. 12:​35, 36). Cheʼ jaʼel, tsiʼ qʼueleyob bajcheʼ Jehová tsiʼ cʼʌñʌ i pʼʌtʌlel chaʼan miʼ tʼox jiñi chʌchʌc bʌ mar chaʼan miʼ mejlelob ti ñumel. I cheʼto jaʼel ti jujumpʼejl qʼuin tsiʼ yʌqʼueyob jiñi maná chaʼan miʼ cʼuxob. Mi jiñi israelitajob tsiʼ qʼueleyob pejtelel iliyi, ¿chucoch mach tijicñayobic? Mach chaʼañic maʼañic chuqui miʼ cʼuxob, chaʼañʌch maʼañic tsiʼ qʼueleyob ti ñuc pejtelel tsaʼ bʌ i mele Jehová tiʼ tojlelob.

6. ¿Chuqui mi caj i coltañonla chaʼan mi la cʌqʼuen wocolix i yʌlʌ Jehová yicʼot yañoʼ bʌ?

⁶ ¿Chuqui mi caj i coltañonla chaʼan mi la cʌqʼuen wocolix i yʌlʌ Jehová yicʼot jiñi yañoʼ bʌ? Ñaxam bʌ, yom mi la cʌqʼuen i yorajlel ti jujumpʼejl qʼuin chaʼan mi lac ñaʼtan chuqui tac wem bʌ tsaʼ lac ñusa. Tajol miʼ mejlel lac tsʼijbun chaʼchajp o uxchajp tsaʼ bʌ i wen aqʼueyonla lac tijicñʌyel (Lm. 3:​22, 23). I chaʼpʼejlel, laʼ la cʌqʼueñob wocolix i yʌlʌ yañoʼ bʌ chaʼan muʼ bʌ i melob ti lac tojlel i laʼ la cʌqʼuen wocolix i yʌlʌ Jehová jaʼel (Sal. 75:1). I yuxpʼejlel, laʼ lac sʌclan la camigojob ñʌmʌl bʌ i yʌqʼueñob wocolix i yʌlʌ Jehová yicʼot yañoʼ bʌ. Mi jiñi la camigojob cheʼʌch miʼ melob, cheʼʌch mi caj lac mel jaʼel (Dt. 1:​26-28; 2 Tim. 3:​1, 2, 5). Mi mucʼʌch lac chʌn aqʼuen wocolix i yʌlʌ Jehová yicʼot jiñi yañoʼ bʌ maʼañic mi caj laj cʌlʌx ubin lac chʼijyemlel cheʼ bʌ mi lac ñusan wocol i mach jiñic mi caj laj cʌlʌx ñaʼtan chuqui tac mach bʌ añic lac chaʼan.

7. ¿Chuqui tsiʼ colta Alicia chaʼan chaʼ tijicña miʼ yubin i bʌ?

⁷ Laʼ laj qʼuel tsaʼ bʌ ujti tiʼ tojlel juntiquil hermana i cʼabaʼ Aliciaa chʼoyol bʌ ti Indonesia. Alicia miʼ yʌl: «Cheʼ bʌ añonla ti jiñi pandemia tsaʼ caji c lajeʼ bajcheʼ yilal woli c ñusan yicʼot bajcheʼ yilal woliʼ ñusan yambʌ hermanojob, jin chaʼan mach chʌn tijicñayix tsaʼ caji cubin c bʌ» (Gál. 6:4). ¿Chuqui tsiʼ colta? Jiñi hermana miʼ bej al: «Tsaʼ caji c ñaʼtan jiñi bendición tac muʼ bʌ i yʌqʼueñon Jehová ti jujumpʼejl qʼuin yicʼot jiñi bendición tac am bʌ c chaʼan cheʼ añon tiʼ tejclum Jehová. Cheʼ jiñi tsaʼ cʌqʼue wocolix i yʌlʌ Jehová chaʼan pejtelel iliyi i jiñʌch tsaʼ bʌ i coltayon chaʼan mic chaʼ ubin c tijicñʌyel». Mi cheʼʌch mi lac mel cheʼ bajcheʼ tsiʼ mele ili hermana mi caj i coltañonla mi woli lac sʌt lac tijicñʌyel tiʼ caj bajcheʼ woli lac ñusan ili ora.

LAʼ LAC PɅS LAC PECʼLEL

8. ¿Chuqui tsaʼ ujti tiʼ tojlel Baruc?

⁸ Laʼ laj qʼuel chuqui tsaʼ ujti tiʼ tojlel Baruc. Baruc jiñʌch jiñi xtsʼijbaya i chaʼan jiñi xʼaltʼan Jeremías, pero mach chʌn tijicñayix tsiʼ yubi i bʌ chaʼan jiñi woli bʌ i mel. Wocolʌch jiñi eʼtel tsaʼ bʌ aqʼuenti i mel come yom miʼ coltan jiñi xʼaltʼan Jeremías chaʼan miʼ suben jiñi israelitajob chuqui mi caj i chaʼleñob tiʼ caj tsiʼ ñusʌbeyob i tʼan Jehová. Pero tsiʼ cʌyʌ i ñaʼtan chuqui jiñi yom bʌ Jehová i jin jach tsiʼ bajñel ñaʼta i bʌ yicʼot chuqui tac yom bʌ i taj. Jin chaʼan Jehová tsiʼ cʼʌñʌ jiñi xʼaltʼan Jeremías chaʼan miʼ suben: «¿Woli ba a ñop a pʌs a bʌ ti ñuc? [o ¿Woli baʼ sʌclan chuqui ñuc tac bʌ?]. Mach yomic» (Jer. 45:​3-5). Lajal bajcheʼ Jehová tiʼ sube: «Yom tijicñayet yicʼot chuqui tac an a chaʼan». Baruc tsaʼʌch i jacʼʌ jiñi ticʼojel tsaʼ bʌ i yʌqʼue Jehová i chʌn lʌcʼʌl tsaʼ ajñi tiʼ tojlel.

9. ¿Chuqui miʼ pʌsbeñonla 1 Corintios 4:​6, 7? (Qʼuele jaʼel jiñi foto tac).

⁹ Tajol juntiquil hermano miʼ ñaʼtan chaʼan i wentʌlel miʼ yʌqʼuentel jumpʼejl privilegio. ¿Chucoch? Come tajol añix ora cajel i melben i yeʼtel Jehová, woliʼ chaʼlen wersa chaʼan miʼ taj jiñi privilegio o cabʌl chuqui yujil bʌ melol. Pero yambʌ majqui miʼ yʌqʼuentel jiñi privilegio yom bʌ i taj. ¿Chuqui mi caj i coltan chaʼan maʼañic miʼ sʌt i tijicñʌyel? Miʼ mejlel i ñaʼtan tsaʼ bʌ i yʌlʌ jiñi apóstol Pablo ti 1 Corintios 4:​6, 7 (pejcan). Yom mi laj cʼajtesan chaʼan jiñi la cujil tac bʌ melol o jiñi privilegio tac muʼ bʌ lac taj jumpʼejlʌch majtañʌl woli bʌ i yʌqʼueñonla Jehová come miʼ pʌsbeñonla i yutslel i mach chaʼañic ñumen ñuconla bajcheʼ yañoʼ bʌ o cabʌl chuqui la cujil bʌ melol (Rom. 12:​3, 6; Efes. 2:​8, 9).

10. ¿Chuqui mi caj i coltañonla lac pʌs lac pecʼlel?

¹⁰ Cheʼ mi lac ñaʼtan tsaʼ bʌ i mele Jesús miʼ mejlel i coltañonla lac pʌs lac pecʼlel. Anquese jiñʌch i yalobil Dios yicʼot an ñuc bʌ i yeʼtel tsiʼ pocbe i yoc jiñi apóstolob. Jiñi apóstol Juan tiʼ tsʼijbu: «Jesús, come yujil chaʼan jiñi Tatʌl tsiʼ yʌqʼue tiʼ cʼʌb pejtelel chuqui an yicʼot chaʼan tilemʌch ti Dios i mi caj i chaʼ majlel baʼan Dios, […] tsaʼ caji i pocben i yoc jiñi xcʌntʼañob» (Juan 13:​3-5). Jesús maʼañic tsiʼ ñaʼta chaʼan i wentʌlel jin miʼ pocbentel i yoc. Cheʼ jaʼel, maʼañic tsiʼ ñaʼta chaʼan i wentʌlel an wem bʌ i yotot, i taqʼuin yicʼot chaʼan maʼañix miʼ ñusan wocol come jiñʌch i yalobil Dios (Luc. 9:58). Tsiʼ pʌsʌ i pecʼlel, jin chaʼan chʌn tijicña tsaʼ ajñi anquese mach cabʌlic chuqui an i chaʼan. Jesús tsiʼ cʌybeyonla wem bʌ ejemplo (Juan 13:15).

11. ¿Chuqui miʼ coltan Dennis chaʼan maʼañic miʼ sʌt i tijicñʌyel?

¹¹ Juntiquil hermano i cʼabaʼ Dennis chʼoyol bʌ ti Países Bajos, miʼ yʌl chaʼan miʼ chaʼlen wersa i pʌs i pecʼlel bajcheʼ Jesús, pero an i tajol wocol miʼ yubin. Jiñi hermano miʼ yʌl: «Cheʼ bʌ mij qʼuel chaʼan an majqui miʼ yʌqʼuentel jumpʼejl privilegio wen com bʌ c taj jaʼel an i tajol mic michʼan come mic ñaʼtan chaʼan i wentʌlel joñon tsaʼ aqʼuentiyon. Cheʼ bʌ mi cujtel bajcheʼ jiñi, mi cʌqʼuen i yorajlel c pejcan publicación tac muʼ bʌ i taj ti tʼan jiñi pecʼlel. Cheʼ jaʼel, yaʼ ti aplicación JW Library^® tsaʼ c mele jumpʼejl etiqueta baqui mi cotsan majlel texto tac muʼ bʌ i taj ti tʼan iliyi, cheʼ bajcheʼ jiñi ora jach mic taj i mic chaʼ pejcan. Cheʼ jaʼel an c chaʼle ti descargar discurso tac muʼ bʌ i taj ti tʼan jiñi pecʼlel.b An j cʌñʌ chaʼan pejtelel muʼ bʌ c mel chaʼañʌch mi cʌqʼuen i ñuclel Jehová i mach chaʼañic joñon mij qʼuejlel ti ñuc. Jiñi eʼtel i chaʼañʌch, i woli jach i yʌqʼueñonla chaʼan mi lac tsʼitaʼ chaʼlen coltaya». Mi joñonla cheʼ mi la cujtel bajcheʼ ili hermano, laʼ lac chaʼlen wersa lac pʌs lac pecʼlel. Cheʼ bajcheʼ jiñi chʌn lʌcʼʌl mi caj la cajñel la quicʼot Jehová i ñumen tijicña mi caj la cubin lac bʌ (Sant. 4:​6, 8).

LAʼ LAC ÑAʼTAN MUʼ BɅ CAJ I MEL JEHOVÁ TI TALTO BɅ QʼUIN

12. ¿Chuqui mi caj i coltañonla chaʼan chʌn tijicña mi la cubin lac bʌ mach yʌlʌyic bajcheʼ chumulonla ili ora? (Isaías 65:​21-25).

¹² Mi mucʼʌch la cʌqʼuen i yorajlel lac ñaʼtan muʼ bʌ caj i mel Jehová ti talto bʌ qʼuin mi caj i coltañonla chaʼan chʌn tijicña mi la cubin lac bʌ mach yʌlʌyic bajcheʼ chumulonla ili ora. Jiñi tsaʼ bʌ i yʌlʌ jiñi xʼaltʼan Isaías miʼ pʌsbeñonla chaʼan Jehová mucʼʌch i ñaʼtan chaʼan wocolʌch mi lac ñusan ili ora. Pero cheʼ jaʼel miʼ yʌcʼ i tʼan chaʼan mi caj i jisan pejtelel lac wocol (pejcan Isaías 65:​21-25). Cheʼ bʌ yaʼix añonla ti tsijiʼ bʌ pañimil mi caj lac mel utsʼatax bʌ la cotot, tijicña mi caj lac ñusan ti la queʼtel i mi caj laj cʼux sumuc tac bʌ bʌlñʌcʼʌl. Cheʼ jaʼel maʼañix mi caj lac bʌcʼñan chaʼan mi lac taj wocol o miʼ taj wocol jiñi lac familia (Is. 32:​17, 18; Ez. 34:25). Wen utsʼatax chuqui yom bʌ i mel Jehová i miʼ mejlel lac ñop chaʼan mucʼʌch caj i tsʼʌctesan jiñi albil bʌ i chaʼan.

13. ¿Chuqui tac ti wocol mi lac ñusan i bajcheʼ miʼ coltañonla cheʼ mi lac ñaʼtan muʼ bʌ caj i mel Jehová?

¹³ ¿Chucoch wen ñuc i cʼʌjñibal chaʼan mi la cʌqʼuen i yorajlel lac ñaʼtan muʼ bʌ caj i mel Jehová ti talto bʌ qʼuin? Come añoñixla ti jiñi cojix bʌ qʼuin i ti lac pejtelel mi lac ñusan wocol tac (2 Tim. 3:1). Jehová miʼ coltañonla ti jujumpʼejl qʼuin yicʼot miʼ yʌqʼueñonla lac pʼʌtʌlel (Sal. 145:14). Pero miʼ subeñonla jaʼel muʼ bʌ caj i mel ti talto bʌ qʼuin, i jiñi miʼ coltañonla cheʼ bʌ woli lac ñusan wocol. Tajol wocol mi la cubin chaʼan mi lac taj taqʼuin chaʼan mi la cʌqʼuen chuqui i cʼʌjñibal i chaʼan lac familia. Pero la cujil chaʼan mach tiʼ pejtelelic ora cheʼ mi caj lac ñusan bajcheʼ jiñi come Jehová an i yʌcʼʌ i tʼan chaʼan yaʼ ti tsijiʼ bʌ pañimil mi caj i yʌqʼueñonla pejtelel chuqui tac i cʼʌjñibal lac chaʼan (Sal. 9:18; 72:​12-14). O tajol wen cʼamonla, an lac chaʼan depresión o laj cʼuxyajoñixla. Pero Jehová an i yʌcʼʌ i tʼan chaʼan yaʼ ti tsijiʼ bʌ pañimil maʼañix mi caj laj cʼamʼan yicʼot maʼañix mi caj lac chʌmel (Apoc. 21:​3, 4). Pejtelel jiñi albil tac bʌ i chaʼan Jehová miʼ coltañonla chaʼan maʼañic mi la cubin lac chʼijyemlel o mi lac michʼan tiʼ caj woli bʌ lac ñusan ili ora. Jin chaʼan anquese mi lac melbentel mach bʌ weñic, mi laj cʼamʼan, an majqui miʼ chʌmel lac chaʼan o mi lac taj yan tac bʌ wocol tijicña mi lac mejlel ti ajñel. ¿Chucoch? Come jiñi wocol tac maʼañic mi caj i jalʼan tiʼ pejtelel ora i yaʼ ti tsijiʼ bʌ pañimil maʼañix mi caj lac ñusan wocol (2 Cor. 4:​17, 18).

14. ¿Chuqui miʼ mejlel lac mel chaʼan mi lac ñop chaʼan Jehová mucʼʌch caj i tsʼʌctesan jiñi albil tac bʌ i chaʼan?

¹⁴ Jiñi albil tac bʌ i chaʼan Jehová miʼ mejlel i coltañonla chaʼan chʌn tijicña mi la cajñel. ¿Chuqui miʼ mejlel i coltañonla chaʼan mi lac ñumen ñop chaʼan Jehová mucʼʌch caj i tsʼʌctesan pejtelel chuqui albil i chaʼan? Lajal bajcheʼ juntiquil maʼañix bʌ miʼ wen cʼotel i wut i cʼʌjñibal miʼ cʼʌn lente chaʼan miʼ taj i qʼuel ti ñajt, joñonla jaʼel añʌch chuqui yom mi lac mel chaʼan mi lac taj laj qʼuel o mi lac ñumen ñop jiñi albil bʌ i chaʼan Jehová. Muʼ bʌ mejlel lac mel jiñʌch cheʼ mi lac ñaʼtan chaʼan yaʼix añonla ti tsijiʼ bʌ pañimil. Cheʼ mi lac mel iliyi lajal bajcheʼ woli lac lʌp jiñi lac lente come miʼ coltañonla laj qʼuel jiñi woli bʌ lac pijtan. Jumpʼejl ejemplo, mi wocol woli la cubin chaʼan mi lac taj taqʼuin, miʼ mejlel lac ñaʼtan chaʼan yaʼ ti tsijiʼ bʌ pañimil maʼañix mi caj i cʼʌjñibʌyel jiñi taqʼuin yicʼot maʼañix miʼ cajel pʼumpʼuñiyel. I mi chʼijyemonla come maʼañic mi lac taj jumpʼejl privilegio, miʼ mejlel lac ñaʼtan chaʼan yaʼ ti tsijiʼ bʌ pañimil mach jiñix mi caj lac ñaʼtan jiñi privilegio tac come tojoñixla i mi caj lac melben i yeʼtel Jehová tiʼ pejtelel ora (1 Tim. 6:19). Tajol wocol mi la cubin chaʼan mi lac ñaʼtan chaʼan yaʼix añonla ti paraíso tiʼ caj jiñi wocol tac am bʌ lac chaʼan, pero mi mucʼʌch lac mel maʼañic mi caj laj cʌlʌx ñaʼtan jiñi woli bʌ lac ñusan i chʌn tijicña mi caj la cajñel.

15. ¿Chuqui mi laj cʌn tiʼ tojlel Christa?

¹⁵ Laʼ laj qʼuel chuqui mi laj cʌn tiʼ tojlel Christa, jiñi i yijñam Dennis, tsaʼ bʌ lac taja ti tʼan ti párrafo 11. Jiñi hermana miʼ yʌl: «Tiʼ caj jiñi cʼamʌjel am bʌ c chaʼan maʼañix mic mejlel ti xʌmbal i yomix mij cʼʌn silla de rueda. Lʌcʼʌ tiʼ pejtelel ora ñololon jach i maʼañix miʼ lajmel i cʼuxel c bʌcʼtal. Maxto wen jali jiñi doctor tiʼ subeyon chaʼan maʼañix baʼ ora mi caj c lajmel. Cheʼ bʌ tiʼ subeyon bajcheʼ jiñi, tsaʼ jach c ñaʼta: ‹Jiñi doctor mach yujilic chuqui woli bʌ c pijtan›. Cujil chaʼan Jehová mi caj i jisan jiñi cʼamʌjel tac i jiñi miʼ coltañon chaʼan maʼañic mic sʌt c tijicñʌyel. Cheʼ bʌ añonto ti ili pañimil yomto mij cuch jiñi c wocol, ¡pero yaʼ ti tsijiʼ bʌ pañimil tijicñayix mi caj c ñusan!».

«MAʼANIC CHUQUI AN TO YOM I CHAʼAÑOB MUʼ BɅ I BɅCʼÑAÑOB LAC YUM»

16. ¿Chucoch tsiʼ yʌlʌ David chaʼan «maʼanic chuqui an to yom i chaʼañob muʼ bʌ i bʌcʼñañob lac Yum»?

¹⁶ Anquese tijicña mi la cubin lac bʌ, la cujil chaʼan mi caj lac ñusan wocol. Jiñʌch tsaʼ ujti tiʼ tojlel David. Tsaʼ chʌmi uxtiquil i yalobil, tsaʼ jopʼbenti i mul, jiñi i yamigojob tsaʼ sujtiyob tiʼ contra i tsaʼ putsʼi ñumel come jiñi rey Saúl yom i tsʌnsan. Anquese tsiʼ ñusa pejtelel iliyi chʌn tijicña tsaʼ ajñi. I tsiʼ yʌlʌ: «Maʼanic chuqui an to yom i chaʼañob muʼ bʌ i bʌcʼñañob lac Yum» (Sal. 34:​9, 10). ¿Chucoch tsiʼ yʌlʌ iliyi? Come David tsiʼ qʼuele chaʼan Jehová tsaʼʌch i cʌnta yicʼot tsiʼ yʌqʼue chuqui tac i cʼʌjñibal i chaʼan anquese maʼañic tsiʼ jisʌbe i wocol (Sal. 145:16). Cheʼ bajcheʼ David, joñonla jaʼel chʌn tijicña mi lac mejlel ti ajñel come la cujil chaʼan Jehová maʼañic mi caj i bajñel cʌyonla mach yʌlʌyic chuqui mi lac ñusan.

17. ¿Chucoch tijicña a wom ajñel?

¹⁷ Jehová yom chaʼan chʌn tijicña mi la cajñel mach yʌlʌyic chuqui woli lac ñusan (Sal. 131:​1, 2). Cheʼ bajcheʼ tsaʼix laj qʼuele, jiñi muʼ bʌ caj i coltañonla chaʼan maʼañic mi lac sʌt lac tijicñʌyel jiñʌch cheʼ mi la cʌqʼuen wocolix i yʌlʌ Jehová yicʼot yañoʼ bʌ, mi lac pʌs lac pecʼlel yicʼot mi lac ñaʼtan muʼ bʌ caj i mel Jehová ti talto bʌ qʼuin. Mi mucʼʌch lac mel pejtelel iliyi, mi caj i mejlel la cʌl: «Tsaʼ j cʌñʌ ajñel tic tijicñʌyel mach yʌlʌyic bajcheʼ yilal woli c ñusan» (Filip. 4:11).