Ñopo chaʼan Jehová mucʼʌch i cʼuxbiñet

1. ¿Chucoch tsaʼ wʌqʼue a cuxtʌlel Jehová? (Qʼuele jaʼel jiñi foto).

¿CʼAJAL baʼ chaʼan cheʼ bʌ tsaʼ sube Jehová ti oración chaʼan mi caj a wʌqʼuen a cuxtʌlel yicʼot mi caj a melben i yeʼtel tiʼ pejtelel ora? Tsaʼ mele iliyi come tsaʼix cʼoti a cʌn yicʼot muqʼuix a cʼuxbin. Jin chaʼan tsaʼ sube chaʼan mi caj a melben i yeʼtel yicʼot chaʼan mi caj a cʼuxbin tiʼ pejtelel a pusicʼal, a cuxtʌlel, a ñaʼtʌbal yicʼot a pʼʌtʌlel (Mar. 12:30). Cʼʌlʌl ti jimbʌ ora tsaʼix caji a ñumen cʼuxbin Jehová, jin chaʼan mi an majqui miʼ cʼajtibeñet mi mucʼʌch a cʼuxbin Jehová, ti ora mi caj a suben chaʼan mucʼʌch a wen cʼuxbin.

2, 3. a)¿Chuqui yom Jehová chaʼan mi lac ñop? (Jeremías 31:3). b) ¿Chuqui mi caj laj qʼuel ti ili estudio?

² Pero ixcu mi an majqui miʼ cʼajtibeñet: «¿Mucʼʌch baʼ junyaj ñop chaʼan Jehová miʼ cʼuxbiñet?». Tajol wocol mi caj a wʌl chaʼan mucʼʌch come tajol maʼ ñaʼtan chaʼan mach i wentʌlelic miʼ cʼuxbiñet. Juntiquil hermana mach bʌ añic tsaʼ wen cʼuxbinti cheʼ bʌ wolito (choncolto) i colel, miʼ yʌl: «Joñon mij cʼuxbin Jehová pero an i tajol mij cʼajtiben c bʌ mi Jehová mucʼʌch i cʼuxbiñon». Pero ¿bajcheʼ yilal miʼ qʼuelet Jehová?

³ Jehová yom chaʼan maʼ ñop chaʼan mucʼʌch i cʼuxbiñet (pejcan Jeremías 31:3). Tsiʼ mulaj chaʼan maʼ sujtel tiʼ yamigo, jin chaʼan tsiʼ pʌyʌyet ochel tiʼ tejclum. I cheʼ bʌ tsaʼ wʌqʼue a cuxtʌlel yicʼot tsaʼ chʼʌmʌ jaʼ, tsaʼto caji i ñumen cʼuxbiñet. I jiñi cʼuxbiya muʼ bʌ i yubin tiʼ tojlel i wiñicob maʼañic miʼ jilel, jin chaʼan miʼ mejlel a ñop chaʼan miʼ qʼuelet ti ñuc (Mal. 3:17). Yom chaʼan cheʼʌch miʼ cʼotel a wʌl cheʼ bajcheʼ tsiʼ yʌlʌ jiñi apóstol Pablo: «Mic wen ñop chaʼan mi jiñicto jiñi chʌmel o jiñi cuxtʌlel, mi jiñicto jiñi ángelob o yumʌlob, mi jiñicto jiñi an tac bʌ ili ora o muʼto bʌ caj i tilel, mi jiñicto jiñi pʼʌtʌlel tac, mi jiñicto am bʌ ti chan o am bʌ tiʼ yebal, mi jiñicto yan tac bʌ melbil bʌ mi caj i mejlel i tʌtsʼonla tiʼ cʼuxbiya Dios» (Rom. 8:​38, 39). Ti ili estudio mi caj laj qʼuel chucoch ñucʌch i cʼʌjñibal mi lac ñop chaʼan Jehová miʼ cʼuxbiñonla, i chuqui yom mi lac mel chaʼan mi lac ñop chaʼan i sujmʌch iliyi.

CHUCOCH ÑUCɅCH I CʼɅJÑIBAL MI LAC ÑOP CHAʼAN JEHOVÁ MIʼ CʼUXBIÑONLA

4. ¿Chuqui ti yac miʼ cʼʌn Satanás, i chuqui yom mi lac mel chaʼan maʼañic mi lac yajlel?

⁴ Mi mucʼʌch lac ñop chaʼan Jehová miʼ cʼuxbiñonla, maʼañic mi caj la cʌcʼ chaʼan jiñi i yac Satanás miʼ yʌsañonla (Efes. 6:11). Satanás yom chaʼan mi laj cʌy lac melben i yeʼtel Jehová, jin chaʼan miʼ cʼʌn yac tac chaʼan miʼ ñop i yʌsañonla. Junchajp muʼ bʌ i cʼʌn jiñʌch cheʼ miʼ yʌqʼueñonla lac ñaʼtan chaʼan Jehová maʼañic miʼ cʼuxbiñonla, pero jiñi majch i sujmic. Jiñi Biblia miʼ yʌl chaʼan Satanás lajalʌch bajcheʼ juncojt león (1 Ped. 5:​8, 9). Juncojt león miʼ sʌclan jiñi añimal i bajñel jach bʌ yicʼot mach bʌ wen pʼʌtʌlic chaʼan miʼ tsʌnsan. Cheʼʌch miʼ mel Satanás jaʼel. Cheʼ bʌ miʼ qʼuel chaʼan chʼijyemonla tiʼ caj tsaʼ bʌ lac ñusa ti wajali, tiʼ caj jiñi wocol woli bʌ (yʌquel bʌ) lac ñusan ili ora o chaʼan woli laj cʌlʌx pensarin chuqui miʼ mejlel ti ujtel ti talto bʌ qʼuin, miʼ yʌqʼueñonla lac ñaʼtan chaʼan Jehová maʼañic miʼ cʼuxbiñonla (Pr. 24:10). Pero chaʼan maʼañic mi lac yajlel ti jiñi yac yomʌch mi lac ñop chaʼan Jehová mucʼʌch i cʼuxbiñonla (Sant. 4:7).

5. ¿Chucoch ñucʌch i cʼʌjñibal mi lac ñop chaʼan Jehová miʼ cʼuxbiñonla yicʼot miʼ qʼuelonla ti ñuc?

⁵ Mi mucʼʌch lac ñop chaʼan Jehová miʼ cʼuxbiñonla, mi caj lac lʌcʼtesan lac bʌ tiʼ tojlel. Jehová tsiʼ meleyonla (pʌtʌyonla) chaʼan mi lac mulan mi laj cʼuxbintel i mi lac pʌs jiñi laj cʼuxbiya tiʼ tojlel yañoʼ bʌ. Cheʼ bʌ an majqui miʼ pʌs chaʼan miʼ cʼuxbiñonla, mi lac pʌsben laj cʼuxbiya jaʼel. Jin chaʼan, cheʼ bʌ mi laj qʼuel chaʼan Jehová mucʼʌch i cʼuxbiñonla yicʼot miʼ qʼuelonla ti ñuc, muʼto lac ñumen cʼuxbin jaʼel (1 Juan 4:19). Jiñi miʼ coltañonla chaʼan mi lac lʌcʼtesan lac bʌ tiʼ tojlel come jiñi Biblia miʼ yʌl: «Lʌcʼtesan laʼ bʌ ti Dios i mi caj i lʌcʼtesan i bʌ ti laʼ tojlel» (Sant. 4:8). Wʌle mi caj laj qʼuel chuqui miʼ mejlel lac mel ti jujuntiquil chaʼan mi lac junyaj ñop chaʼan Jehová mucʼʌch i cʼuxbiñonla.

¿CHUQUI MI CAJ I COLTAÑET A ÑOP CHAʼAN JEHOVÁ MUCʼɅCH I CʼUXBIÑET?

6. Mi wocol maʼ wubin chaʼan maʼ ñop chaʼan Jehová miʼ cʼuxbiñet, ¿chuqui miʼ mejlel a mel?

⁶ Chʌn cʼajtiben Jehová chaʼan miʼ coltañet a qʼuel chucoch miʼ cʼuxbiñet (Luc. 18:1; Rom. 12:12). Tajol mach junsujtelic jach yom maʼ cʼajtiben chaʼan miʼ coltañet a qʼuel chuqui wem bʌ miʼ qʼuel ti a tojlel. Pero mi bej wocol maʼ wubin chaʼan maʼ ñop chaʼan mucʼʌch i cʼuxbiñet, cʼajtesan chaʼan Jehová jiñʌch ñumen ñuc bʌ bajcheʼ a pusicʼal (1 Juan 3:​19, 20). Jehová jiñʌch i ñumen cʌñʌyet bʌ i miʼ qʼuel jiñi wen tac bʌ a melbal maʼañic bʌ maʼ taj a qʼuel jatet (1 S. 16:7; 2 Cr. 6:30). Jin chaʼan, suben bajcheʼ yubil maʼ wubin a bʌ i cʼajtiben chaʼan miʼ coltañet a qʼuel chaʼan mucʼʌch i cʼuxbiñet (Sal. 62:8). I cheʼ bʌ tsaʼix a mele oración, añʌch chuqui yom maʼ mel. Laʼ laj qʼuel chuqui tac miʼ mejlel a mel.

7, 8. ¿Bajcheʼ miʼ coltañonla jiñi salmo tac chaʼan mi lac ñop chaʼan Jehová mucʼʌch i cʼuxbiñonla?

⁷ Ñopo chaʼan i sujmʌch muʼ bʌ i yʌl Jehová. Jehová tsiʼ yʌqʼue jiñi chʼujul bʌ i yespíritu jiñi wiñicob tsaʼ bʌ i tsʼijbuyob jiñi Biblia, jin chaʼan miʼ mejlel lac ñop chaʼan i sujmʌch tsaʼ bʌ i yʌlʌyob tiʼ tojlel Jehová. Laʼcu lac ñaʼtan ili tsaʼ bʌ tsʼijbu David: «Lʌcʼʌl an lac Yum baʼan chʼijiyemoʼ bʌ i pusicʼal. Miʼ coltan jini woli bʌ i melob i pusicʼal» (Sal. 34:18). Mi chʼijyem maʼ wubin a bʌ, tajol maʼ ñaʼtan chaʼan maʼañic majqui miʼ chʼʌmbeñet i sujm i chaʼan maʼan majqui miʼ mejlel i coltañet. Pero Jehová miʼ subeñet chaʼan maʼan mi caj i bajñel cʌyet come yujil chaʼan i cʼʌjñibal a chaʼan i coltaya. Ti yambʌ salmo, David tsiʼ yʌlʌ: «Tempan i yaʼlel c wut ti limetej» (Sal. 56:8). Ti wajali, juntiquil muʼ bʌ i chaʼlen ñajt bʌ xʌmbal miʼ wen cʌntan i yaʼal, maʼan miʼ toʼol becʼ come miʼ wen qʼuel ti ñuc. Jehová jaʼel miʼ wen qʼuel ti ñuc jiñi i yaʼlel a wut. Jin chaʼan cheʼ bʌ maʼ chaʼlen uqʼuel tiʼ caj jiñi wocol tac muʼ bʌ a ñusan lajal bajcheʼ miʼ tempan majlel jiñi i yaʼlel a wut. Cheʼ jaʼel David tiʼ sube Jehová: «Cʌñʌl a chaʼan pejtel c melbal» (Sal. 139:3). Jehová miʼ qʼuel pejtelel chuqui maʼ mel, pero muʼto i ñumen chʼʌm ti ñuc chuqui wen tac bʌ maʼ mel (Heb. 6:10). ¿Chucoch? Come yujil chaʼan woli a chaʼlen wersa chaʼan maʼ tijicñesʌben i pusicʼal.a

⁸ Yicʼot ili texto tac lajal bajcheʼ Jehová woliʼ subeñet: «Com maʼ ñaʼtan chaʼan mic wen cʼuxbiñet yicʼot mic wen qʼuelet ti ñuc». Pero cheʼ bajcheʼ tsaʼix laj qʼuele, Satanás yom i yʌqʼueñet a ñaʼtan chaʼan Jehová maʼañic miʼ cʼuxbiñet. Jin chaʼan, mi tsaʼ tili ti a pusicʼal chaʼan Jehová maʼañic miʼ cʼuxbiñet, miʼ mejlel a ñaʼtan iliyi: «¿Majqui mi caj c jacʼben i tʼan? ¿Jimba Satanás, i tat jiñi lot o jimba Jehová, jiñi Dios muʼ bʌ i yʌl i sujmlel?» (Juan 8:44; Sal. 31:5).

9. ¿Chuqui miʼ yʌl Jehová chaʼan mi caj i mel tiʼ tojlel jiñi muʼ bʌ i cʼuxbiñob? (Éxodo 20:6).

⁹ Wen ñaʼtan bajcheʼ yilal miʼ qʼuel Jehová jiñi muʼ bʌ i cʼuxbiñob. Ñaʼtancu chuqui tiʼ sube Moisés yicʼot jiñi israelitajob (pejcan Éxodo 20:6). Jehová miʼ yʌcʼ i tʼan chaʼan maʼañic baʼ ora mi caj i cʌy i cʼuxbin jiñi muʼ bʌ i cʼuxbin (Neh. 1:5). Cheʼ bʌ wocol maʼ wubin chaʼan maʼ ñop chaʼan Jehová miʼ cʼuxbiñet, cʼajtiben a bʌ: «¿Muʼ ba j cʼuxbin Jehová?». Mi mucʼʌch a cʼuxbin yicʼot maʼ chaʼlen wersa a mel chuqui miʼ mulan, miʼ mejlel a ñop chaʼan mucʼʌch i cʼuxbiñet i chaʼan maʼañic baʼ ora mi caj i bajñel cʌyet (Dn. 9:4; 1 Cor. 8:3).

10, 11. ¿Bajcheʼ yilal yom mi laj qʼuel cheʼ Jehová tsiʼ choco tilel i yalobil chaʼan miʼ toj lac mul? (Gálatas 2:20).

¹⁰ Wen ñaʼtan chaʼan Jehová tsiʼ choco tilel i yalobil chaʼan miʼ toj lac mul. Iliyi jumpʼejlʌch majtañʌl tsaʼ bʌ i yʌqʼueyonla ti jujuntiquil (Juan 3:16). Ñaʼtancu tsaʼ bʌ ujti tiʼ tojlel Pablo. Cheʼ bʌ maxto xñoptʼañic tsiʼ mele mach tac bʌ weñic, i cheʼ jiñi tsaʼto i bej chaʼle wersa chaʼan miʼ mʌlben (jot) jiñi i cʼunlel (Rom. 7:​24, 25; 1 Tim. 1:​12-14). Pero tsiʼ qʼuele bajcheʼ jumpʼejl i majtan jiñi tsaʼ bʌ i mele Jehová (pejcan Gálatas 2:20). Cʼajtesan chaʼan Jehová tsiʼ cʼʌñʌ i yespíritu chaʼan miʼ yʌqʼuen i tsʼijbun Pablo ili tʼan tac, i mi yaʼʌch an ti Biblia chaʼañʌch an chuqui yom i pʌsbeñonla Jehová (Rom. 15:4). Yom chaʼan maʼ qʼuel bajcheʼ jumpʼejl a majtan cheʼ tsiʼ choco i tilel i yalobil chaʼan miʼ toj lac mul, mi cheʼʌch maʼ qʼuel mi caj a ñumen ñop chaʼan mucʼʌch i cʼuxbiñet.

¹¹ Mi la cʌqʼuen wocolix i yʌlʌ Jehová chaʼan tsiʼ choco tilel i yalobil chaʼan miʼ toj lac mul. Pero Jesús mach cojach tsaʼ tili chaʼan miʼ yʌcʼ i cuxtʌlel. Tsaʼ tili jaʼel chaʼan miʼ pʌsbeñonla bajcheʼ cʼamel miʼ cʼuxbiñonla Jehová, i jiñʌch muʼ bʌ caj laj qʼuel.

JESÚS TSIʼ PɅSɅ CHAʼAN JEHOVÁ MIʼ CʼUXBIÑET

12. ¿Bajcheʼ la cujil chaʼan i sujmʌch tsaʼ bʌ i yʌlʌ Jesús tiʼ tojlel Jehová?

¹² Cheʼ bʌ Jesús tsajñi ila ti pañimil (mulawil), tsiʼ mulaj i pʌsben jiñi lac piʼʌlob bajcheʼ yilal Jehová (Luc. 10:22). Miʼ mejlel lac ñop chaʼan i sujmʌch pejtelel tsaʼ bʌ i yʌlʌ tiʼ tojlel i Tat come jin jach i ñumen cʌñʌ bʌ yicʼot cabʌlix jab yaʼan yicʼot (Col. 1:15). Jesús yujil chaʼan miʼ wen cʼuxbintel tiʼ Tat, cheʼ jaʼel an i qʼuele chaʼan miʼ cʼuxbin jiñi ángelob yicʼot jiñi xucʼul bʌ i wiñicob añoʼ bʌ wʌʼ ti pañimil. Wʌle mi caj laj qʼuel bajcheʼ jiñi tsaʼ bʌ i pʌsʌ Jesús miʼ coltañonla lac ñop chaʼan Jehová mucʼʌch i cʼuxbiñonla.

13. ¿Bajcheʼ yilal yom mi laj qʼuel Jehová?

¹³ Jesús yom chaʼan mi laj qʼuel Jehová bajcheʼ juntiquil lac Tat muʼ bʌ i wen cʼuxbiñonla. Yaʼ ti Evangelio ñumen ti 160 veces tsiʼ taja ti tʼan Jehová bajcheʼ i Tat. I cheʼ bʌ tsiʼ tajbeyob ti tʼan Jehová jiñi xcʌntʼañob i chaʼan, tsiʼ cʼʌñʌ jiñi tʼan «laʼ Tat» yicʼot «laʼ Tat am bʌ ti panchan» (Mat. 5:16; 6:26). Jiñi nota de estudio ti Mateo 5:16 muʼ bʌ i tilel ti jiñi Biblia ti español miʼ yʌl: «Jiñi i wiñicob Dios ti wajali tiʼ subeyob Jehová bajcheʼ ‹Mach bʌ añic i pʼisol i pʼʌtʌlel›, ‹Cʼax ñuc bʌ› yicʼot jiñi ‹Tsaʼ bʌ i meleyonla›. Pero Jesús tsiʼ ñumen sube Jehová bajcheʼ i Tat. Ili miʼ pʌsbeñonla chaʼan Jehová yom chaʼan lʌcʼʌl mi la cajñel tiʼ tojlel yicʼot mi laj qʼuel bajcheʼ lac Tat». Wʌle mi caj laj qʼuel chaʼpʼejl ejemplo baqui Jesús tsiʼ taja ti tʼan Jehová bajcheʼ juntiquil Tatʌl.

14. ¿Bajcheʼ tsiʼ pʌsʌ Jesús chaʼan Jehová miʼ qʼuelonla ti ñuc ti jujuntiquil? (Mateo 10:​29-31, qʼuele jaʼel jiñi dibujo).

¹⁴ Laʼ lac ñaxan qʼuel tsaʼ bʌ i taja ti tʼan Jesús ti Mateo 10:​29-31 (pejcan). Jesús tsiʼ yʌlʌ chaʼan Jehová miʼ qʼuel baqui an jujuncojt xpuruwoc. Mi Jehová miʼ qʼuel ti ñuc jiñi alʌ xmateʼmut mach bʌ añic miʼ chʼujutesan, muʼto i ñumen qʼuelonla ti ñuc joñonla muʼ bʌ lac chʼujutesan come mi laj cʼuxbin. Cheʼ jaʼel, ti jiñi versículo 30 baqui miʼ yʌl «laj tsicbilto jiñi i tsutsel laʼ jol», miʼ tilel jumpʼejl nota de estudio ti jiñi Biblia am bʌ ti español muʼ bʌ i yʌl: «Cheʼ mi lac ñaʼtan chaʼan Jehová yujil jaypʼejl i tsutsel lac jol miʼ pʌsbeñonla chaʼan wen i cʌñʌyonla yicʼot miʼ qʼuelonla ti ñuc». Tsiquil chaʼan Jesús yom chaʼan mi lac ñop chaʼan jiñi lac Tat am bʌ i panchan miʼ wen qʼuelonla ti ñuc ti jujuntiquil.

15. ¿Chuqui miʼ pʌsbeñonla tiʼ tojlel Jehová muʼ bʌ i yʌl Juan 6:44?

¹⁵ Yambʌ baqui Jesús tsiʼ cʼʌñʌ jiñi tʼan «Tatʌl» yaʼʌch ti Juan 6:44 (pejcan). Jiñi a Tat am bʌ ti panchan tsiʼ pʌyʌyet tilel tiʼ yorganización come tsiʼ qʼuele jiñi wen tac bʌ a melbal (Hech. 13:48). Yaʼ ti Juan 6:44 miʼ tilel jumpʼejl nota de estudio ti jiñi Biblia am bʌ ti español muʼ bʌ i tsictesan chaʼan cheʼ bʌ Jesús tsiʼ yʌlʌ ili tʼan tac tajol jin woli taj ti tʼan muʼ bʌ i yʌl Jeremías 31:3. Yaʼi Jehová tiʼ sube jiñi i tejclum: «Tsac pʌsbeyet i yutslel c pusicʼal» (Jer. 31:​3, lajin yicʼot Oseas 11:4). Ñaʼtancu, jiñi lac Tat am bʌ ti panchan woliʼ chʌn pʌsbeñet i yutslel i pusicʼal i woliʼ chʌn cʼuxbiñet, ili yom i yʌl chaʼan woliʼ bej qʼuel jiñi wen tac bʌ a melbal anquese jatet maʼañic maʼ taj a qʼuel.

16. a) ¿Chuqui miʼ subeñonla Jesús i chucoch yom mi lac ñopben i tʼan? b) ¿Chuqui mi caj i coltañonla lac ñop chaʼan Jehová jiñʌch jiñi ñumen wem bʌ Tatʌl? (Qʼuele jaʼel jiñi recuadro «Jehová jiñʌch ñumen wem bʌ Tatʌl»).

¹⁶ Cheʼ bajcheʼ tsaʼix laj qʼuele, Jesús lajal bajcheʼ woliʼ subeñet: «Jehová mach bajñel c Tatic, a Tatʌch jaʼel i miʼ mejlel a ñop chaʼan miʼ cʼuxbiñet yicʼot miʼ qʼuelet ti ñuc». Jin chaʼan, mi an i tajol wocol maʼ wubin chaʼan maʼ ñop chaʼan Jehová miʼ cʼuxbiñet, cʼajtesan tsaʼ bʌ i yʌlʌ Jesús i ñopo chaʼan i sujmʌch pejtelel tsaʼ bʌ i yʌlʌ come jin jach i ñumen cʌñʌ bʌ Jehová (1 Ped. 2:22).

CHAʼLEN WERSA A ÑOP CHAʼAN JEHOVÁ MUCʼɅCH I CʼUXBIÑET

17. ¿Chucoch yomʌch mi lac chaʼlen wersa lac ñop chaʼan Jehová mucʼʌch i cʼuxbiñonla?

¹⁷ Cheʼ bajcheʼ tsaʼix laj qʼuele, Satanás juntiquilʌch laj contra yom bʌ chaʼan mi laj cʌy lac melben i yeʼtel Jehová. Jumpʼejl yac muʼ bʌ i cʼʌn chaʼan miʼ ñajtʼesañonla ti Jehová jiñʌch cheʼ miʼ ñop i yʌqʼueñonla lac ñaʼtan chaʼan Jehová maʼan miʼ cʼuxbiñonla. ¡Pero mach la cʌcʼ lac bʌ ti lotintel! (Job 27:5). Laʼ lac bej chaʼlen wersa lac ñop chaʼan Jehová mucʼʌch i cʼuxbiñonla.

18. ¿Chuqui mi caj i coltañet a ñumen ñop chaʼan Jehová mucʼʌch i cʼuxbiñet?

¹⁸ Ti ili estudio tsaʼ laj qʼuele chuqui tac miʼ mejlel i coltañet a ñop chaʼan Jehová miʼ cʼuxbiñet. Cʼajtiben chaʼan miʼ coltañet a qʼuel chuqui wem bʌ ti a tojlel i ñaʼtan texto tac muʼ bʌ i pʌs chaʼan Jehová miʼ cʼuxbin i wiñicob. Cʼajtesan chaʼan maʼañic baʼ ora mi caj i cʌy i cʼuxbin jiñi muʼ bʌ i melbeñob i yeʼtel. Qʼuele bajcheʼ jumpʼejl a majtan cheʼ Jehová tsiʼ choco tilel i yalobil chaʼan miʼ toj lac mul. I cʼajtesan tsaʼ bʌ i yʌlʌ Jesús, Jehová jiñʌch a Tat. Pejtelel iliyi jiñʌch muʼ bʌ caj i coltañet chaʼan maʼ ñop chaʼan Jehová mucʼʌch i cʼuxbiñet. I mi an majqui miʼ cʼajtibeñet mi mucʼʌch a ñop chaʼan Jehová miʼ cʼuxbiñet, ti ora mi caj a wʌl: «Cujil chaʼan mucʼʌch i cʼuxbiñon i mic chaʼlen wersa c pʌs chaʼan mucʼʌch j cʼuxbin jaʼel».